14
Jesús-istarmalad igar-amiarmar, Jesús-oburgwemalagar
(Mateo 26:1-5; Lucas 22:1-2; Juan 11:45-53)
1 Deun Bab-Dummad-Israel-Dulemar-Egiptogi-Wilebukwa-Onosad-Iba ibabose guoele, degi, Madu-Inasuli-Niksuli-Gulleged-Ibagi, amba ibabo-napidginmoga, dule-irwa-Bab-Dummadse-gormalad-e-dummagan, degi, escribamar igar-amiarmalad, igi-saele, Jesús anmar yamo-yardakar gao-dibeye, geb degi adi oburgwemalagarye.
2 Judio-dummagan na ga sogdemar: “Mer ibagi anmar Jesús-gamalo. Degiir, dulemar Jesúsbina urwedamaloed.”
Betaniagi ome-wargwen Jesús-nonogi gwallu-wawaad eosad
(Mateo 26:6-13; Juan 12:1-8)
3 Jesús Betania-neggweburgi gudii, Simón-naibe-buna-ya-maleged-nika-gudigusad-negse mas gunnaded. A-neggi mas gunsigu, ome-wargwen gwallu-wawaa-nuedi, nardo-nugad, gargerba-baklegedi, bute akwa-alabastro-nugadgi sii, senonikid. Ome gwallu-wawaa-bute-nono bichisgu, Jesús-nonogi a-gwallu-wawaad eosad.
4 Gwenna-gwenna-ome-dakbukmalad uludmalad, na ga sogdemalad: “¿Ibiga binsarsunna gwallu-wawaa-nued we-ome wiosa?
5 ¿Ar wede we gwallu-wawaad manigi uklesana, dule-wargwen birgagwen-arbanai-bennuklesa-wilub uklesansursi, geb degi wileganga e-mani nabir uklesansursi?” Deyob dulemar omegi sunmaknanai-guarmalad, egi uludmalad.
6 Ar Jesúsdi sogded:
—Mer ese achamar, we-omese mer urwemar. We-ome ibmar-imaksad dog-nued angi binsasad.
7 Dule-wileganadi gusgu bemarba gudii degi-sadeguoed, degisoggu, wilegana sunna an-sorba bemar bendakoed, andi bemarba gudigu sadeguosulid.
8 Ar we-ome ibmar-imaksad na sunna-ibmar-imakedba imaksad. We-ome an-diglegoed-iduar gusgu anmar-igar-maidba gwallu-wawagi an-magsad.
9 “Napira an bemarga soged, bia an-gaya-burba-nuedgi we-napneggi sunmaklegoe, we-ome-anga-ibmar-imaksadgi sunmaklemogoed, adi we-ome-ibmar-imaksadgi binsamalagar.”
Judas, Jesús-darba-uksad
(Mateo 26:14-16; Lucas 22:3-6; Juan 13:21-30)
10 Judas Iscariote, Jesús-e-sapingan-ambe-gakabogwad-wargwen, dule-irwa-Bab-Dummadse-gormalad-e-dummaganse nade-gusad, adi darba Jesús amarga ukegar.
11 Judio-dummagan Judas-itosmargu, weligwar itoarmalad, degi, ega sogdemalad: “Anmar mani bega ukoed.” Degisoggu, Judas igar-amiarsun, igi-saele darba Jesús-uko-dibeye.
Bab-Jesús-burgwisadgi-binsaegala igar-megisad
(Mateo 26:17-29; Lucas 22:7-23; 1 Corintios 11:17-34)
12 Judio-ibagi, Madu-Ina-Niksuli-Gulleged-Iba gebe-onodedgi, degi, Bab-Dummad-Israel-Dulemar-Egiptogi-Wilebukwa-Onosad-Ibagi sibad-wawaad-oburgwile-daed-ibagi, e-sapingan Jesúsga sognonimalad:
—¿Bia anmar guagwar bega neg-amimaloe, Bab-Dummad-Israel-Dulemar-Egiptogi-Wilebukwa-Onosad-Ibagi mas-gulleged mas gunnega?
13 Degi Jesús na e-sapingan-warbo-barmisad, amarga sogsad:
—Neggweburse be namar. Agi bemar dule-wargwen-dakdapoed gwidugi dii semai, a-duleba bemar namaloed.
14 A-dule bia dogdapoe, a-neg-ibedga bemar sogmaloed: ‘Odurdaked-saila sogye: Bia an sapinganmala Bab-Dummad-Israel-Dulemar-Egiptogi-Wilebukwa-Onosad-Ibagi mas-gunnoed-neg siiye.’
15 Neg-ibed neg-dummad guagwar bato nue-saale, niba-ailabirgi bemarga oyogoed. Agi guar bemar anmar-idu mas urbemaloed.
16 Jesús-sapingan-warbogwad neggweburse nadmarsun. Neggweburse modapmargu, ar igi Jesús emarga sogsa, deyob dakdapmalad. A-neggi ibagi na mas gunmalaga, bela ibmar guagwar urbismarsunnad.
17 A-ibagi neg-mutikudgu, Jesús, degi, e-sapingan-ambe-gakabogwadmala nonimarsunnad.
18 Mesa-naba ambikunonimargu, mas gutemalad. Agi Jesús na e-sapinganga sogded:
—Napira an bemarga soged, bemar-wargwen-anba-mas-gunsiidi darba an-ukoed.
19 A-ular e-sapingan wile itodmalad, Jesússe gwenna-gwenna na egisdemarsunnad:
—¿Ani an be-ukoye? Sur an insado.
Degi baid sogdemogad:
—¿Ani an be-ukoye? Sur an insado.
20 Jesús, na e-sapingan-abin sogded:
—Bemar ambe-gakabogwad-wargwen anba-bategi-madu-wara-saoed, a darba an-ukoed.
21 Napira an bemarga soged, ani Dule-Machi, ar igi Bab-Dummad-Gardagi angi narmakar nai, ar deyob an guoed, an burgoed. Ar dule-darba-an-ukoeddina nue wilegoed. A-dule gwalulessulina bur nabirindo.
22 Mas gunbukmargu, Jesús madu-susgua, Bab Dummadga dog-nuedye sogsa-gusad. Geb a-sorba Jesús madu biske-biske imaksad, e-sapinganga ukde, sogded:
—Be sumar, we-madu an-sanad.
Jesús na e-sapinganmala we-madu guchamarsunnad.
23 A-sorba Jesús nog-susbalid. Bab Dummadga dog-nuedye sogsabargu, e-sapinganga ukdebalid, agi e-sapingan bela gobsamalad.
24 Geb degi Jesús e-sapinganga sogded:
—We, an-abe. An-abe Bab Dummad dulemarbo igar-bini-mesnaid-wilubganad, degi, an-abe dulemar-bukidar-ular milegoed.
25 Napira an bemarga soged, emigindi, uva-nisdi we-sorba bar an gobosulid, Bab-Dummad-neg-dakmaidse geb an gobdapaloed.
26 Bab-Dummad-nuggi namaksamalad-sorba, Olivos-yarse nadmarsunnad.
Jesús Pedroga sogsad, aku be an-dakye be sogoed
(Mateo 26:30-35; Lucas 22:31-34; Juan 13:36-38)
27 Geb degi, Jesús na e-sapinganga sogded:
—Belagwapa emi-mutik bemar angi bangudmaloed, ar ade Bab-Dummad-Gardagi narmakar naid, sognaid:
Sibad-wawaad-edarbed an oburgoed,
Geb agi sibad-wawaad bela duurmakdoed.
Zac. 13:7
28 Jesús sogdebar:
—Geb gannar an durgusad-sorba, bemar-idu Galilease an naoed.
29 Geb degi Pedro Jesúsga sogded:
—Bela begi bangudmalale, andi begi gwen banguosulid.
30 Jesús, Pedro-abin sogded:
—Napira an bega soged, emi-mutiki, gannir-ilabo-namaked-iduar, ilapaa be an-osulogoed.
31 Ar Pedro aka-bur-bule sogded:
—Ar an beba burgweye sogele, amba an be-osulogosulid.
E-sapingan-baigan bela degibi sogdemalad.
Getsemanígi Jesús Bab Dummadse gorsigusad
(Mateo 26:36-46; Lucas 22:39-46)
32 Jesús na e-sapinganmala Getsemaní-neg-nugadse nonimalad. Agi e-sapinganga Jesús sogded:
—Wegi bemar ambikumar, andi Bab Dummadse bina gorgwelo.
33 Unnila Pedro, Santiago, degi, Juan, amarbi eba sesa-gusad. Agi Jesús na nue-wilegoedba nue-wile itoalid, degi, nue-surbinsa itoarbalid.
34 Agi Jesús na e-sapingan-walapaagwadga sogded:
—Andi an ulubgi nue-bukib an itogedba sunna an burgwisar an itoged. Wegi be ambikumar, nue atakmalo, Bab Dummadse be gormalo.
35 Jesús sikwas nadgu, yokorgi sindigar napagi dulluu sigdapgu, Bab Dummadse gorsigisad, bitigi ega sunna egi-nunmaked-danikoed ega osulogena-gadinye.
36 Jesús Bab Dummadse gorsigu, wegi sogded: “An-Bab, begardi bela ibmar sunna guedbiid. An-idu igar-buled naid, ina-gaibid gobedyob beedse an egi wilegoed, be anga osuloge, degite an-sogedbarsur, unnila, be-sogedbarbi be imaksun.”
37 Jesús Bab-Dummadse-gorsiid bergusgu, na e-sapinganse nonikid, daknonikid bela gabmamai. Geb degi Jesús Pedroga sogded:
—¿Simón, be gabmai? ¿Wachi-irgwensaar Babse golega wis geg be atake?
38 Nue atak, Bab Dummadse be gole, adi iskuedgi wilubdakleged mer bemarse warmakmalagar. An wisi bemar burbadi Babse golega guagwar gudiid, bemar sandi degisulid, adi nolloo gued.
39 Jesús gannar nadbargu, gannar Bab Dummadse gotebalid, gannar idu-sogsadgii sogdebalid.
40 Jesús Bab-Dummadse-gorsiid bergusgu, gannar na e-sapinganse nonibargu, daknonikid gabmamai, ar ade gabed nue egi obin-itomalad. E-sapingandi nue gabmamai Jesús odaksasoggu, wichurmarsunnad, igi abin-sogmaloe. Geb degi Jesús gannar nadbalid Babse golegar.
41 Jesús ilapaagus gannar e-sapinganse nanaedgine, amarga sogdesunnad:
—Bemar gabmarsun, bemar obunnomarsun. Bergussun, wachidi omossun. Emigindi, ani Dule-Machi, dulemar-iskudidimaladse darba ukle-sokarsunnad, adi an-oburgwemalagar.
42 Degisoggu, bemar gwisgumarsun, namarsun, dule-darba-an-uksaddi bato anmar walikgusad.
Judio-dummagan-sogedba dulemar Jesús-ganonimalad
(Mateo 26:47-56; Lucas 22:47-53; Juan 18:1-11)
43 Jesús amba e-sapinganga sunmakgwichi, e-sapingan-warambe-gakabogwad-wargwen, Judas-nugad, ese nonikid. Aba dule-irwa-Babse-gormalad-e-dummagan, degi, escribamar, degine, Judiomar-girmar-dummagan, dulemar-bukidar-barmiar-gusmalad. We-dulemar-bukidar espunyar-yalaba, degi, suarmar-annik-annik Judasba duurmakdani-gusmalad.
44 Judas, Jesús-darba-uksadi, dulemar-nonimalad-ebo igar-nabosad, ega sogsad: “Ar dule-e-wagar an uoed, ega sogegar, be nued sogeye, a-dule be gamaloed, degi, nue a-dule bemar sedmaloed.”
45 Judas nonigu, Jesússe naded. Jesús-walik gwisgudapgu, ega sogded:
—Odurdaked-saila.
Geb degi ei-wagar usa imaksad.
46 Degi dulemar Jesússe achadmargu, Jesús-gasmarsunnad.
47 Ar e-sapin-wargwen Jesús-naba-gwichidi, espunyar onosgu, dule-irwa-Bab-Dummadse-gormalad-bur-dummad-e-mai naibi imaksad, e-uaya ei siksad.
48 Jesús dulemarga sogded:
—¿Ibiga bemar dule-iskana-ibmar-atursaedyob an-gadanimala, emide espunyar, degi, suarmar-yalaba bemar an-gadanimargu?
49 Bane-bane bemarba an gudigusad, Bab-Dummadse-goled-neggi dulemar-odurdakdii, degite, agindi bemar gwen an-gassurmalad. Emigindi ar igar-maidbali, adi Bab-Dummad-Gardagi-narmakar-naidba guegala, bemar an-gamaloed.
50 Degi Jesús-sapingan, Jesús wargwen mete, e-idu bela duurmakdemalad.
51 Deun sapingwa-wargwen Jesúsba nadap-gusmogad. A-sapin mor yoi-suli, unnila atuedgi e-san-bipirmakar eba nadap-gusad. A-sapin-gasmargu,
52 binnasur guar, atued-mide, nabir aimargi noded, uka-swiri abarmakde-gusad.
Jesús igar-nabiromalad-dummagan-asabin selesad
(Mateo 26:57-68; Lucas 22:66-71; Juan 18:19-24)
53 Dulemar-Jesús-gasmaladi dule-irwa-Bab-Dummadse-gormalad-bur-dummadse Jesús-senonimarsunnad. Agi bela dule-irwa-Bab-Dummadse-gormalad-e-dummagan, degi, Judiomar-girmar-dummagan, degi, escribamar, bela ambikunonimalad Jesúsga igar-itogegar.
54 Pedrodi bannabasaar Jesúsba nadap-gusmogad, dule-irwa-Bab-Dummadse-gormalad-bur-dummad-neg-imbase warmakdapid. Pedro suar-ibmalad-imbagi sigdapid, wis na soogi wadapmogad.
55 Dule-irwa-Bab-Dummadse-gormalad-e-dummagan, degi, bela-Judio-dummagan-igar-nabiromalad, igar-aminanai-guarmalad, igi-saele Jesús-nodiid amimalo-dibeye, adi Jesús-oburgwemalagar. Degite gwen amissurgusmalad, bia Jesús nodiid.
56 Ar ade bukidar Jesúsgi istar sunmaknanaid, bela yamo-gakansaar ibmar sognanaisoggu, na gwen balillaa sogsasurmalad.
57 Gwen-gwen gwisgusgua, yamo-gakansaar sogdemalad:
58 —Anmar we-Jesús soge itosmarye: ‘We-neg, Bab-Dummadse-goled-neg-siid, dulemar-sobsadi an earoye. Geb degi ibapaagi Bab-Dummadse-goled-neg gannar an soboeddina, dulemar-sobsulid an soboye.’
59 Ar degi-sognanaimalad na degite balillaa gwen barsogsasurmalad.
60 Degi dule-irwa-Bab-Dummadse-gormalad-bur-dummad, dummagan-abargi gwisgusgu, Jesúsga sogded:
—¿Be dulemar-abin-imakosuli? ¿Ar wede igi be sogmosunna, begi sunmaknanaidgi?
61 Jesús bipisaar gwen abin-imaksasulid, degi, gwen akar sogsasurbalid. Dule-irwa-Bab-Dummadse-gormalad-bur-dummad Jesússe-ibmar-egichided, gannar ega sogded:
—¿Ar be Cristo, Bab-Dummad-Bur-Odummolediid E-Machi-sunnadi?
62 Degi Jesús, abin-sogded:
—An aado. Ani Dule-Machi, bela-Bab-Dummad-gangued-nikad e-argan-nuedsik dule-dummadga-an-sii be an-dakmaloed, degine, nibneggi mogir-imbaba-dani be an-dakmarbaloed.
63 Geb degi dule-irwa-Bab-Dummadse-gormalad-bur-dummad e-mor na esirmaksad, oyogegar Jesús-degi-sogsad ede sae-itoye, Bab Dummadgi dodoguye. Degi dummaganga sogded:
—¿Ar ibiga e-barsogmalad anmar bar abesunna?
64 Ar bemar-sunnad na itosmalad we-Jesús Bab-Dummad-nuggi dodosad. ¿Igi bemar itomarmosunna?
Dummagan-igar-itobukmalad belagwapa sogdemalad:
—Oburgwed ega igar-maid, degisoggu, nue-oburgwed imakmarsun.
65 Gwenna-gwenna Jesúsgi wiakdemalad. Jesús-ibya-edusar, geb bibyosar, ega sogde-damalad:
—Ar bela be ibmar wissoggu, emigi be sogena, ¿doa be-sarsosa?
Jesúsdi dulemar-gwen-abin-imaksasulid. Agi suar-ibmala wagargi Jesús-bibyonai-gusmarmogad.
Pedro sogsa-gusad, an aku Jesús-dakye
(Mateo 26:69-75; Lucas 22:54-62; Juan 18:15-18, 25-27)
66 Pedro aila-urba neg-imbagi sii, dule-irwa-Bab-Dummadse-gormalad-bur-dummadga-bunagwa-arbaed nonikid.
67 Bunagwa Pedro soogi wasii dakargua, nue-nuu dakdegu, ega sogded:
—Jesús-Nazaretginedba be gudidamogad.
68 Pedro bunagwa-abin-osulod, sogded:
—Aku an ito ibi be anga obare, degine, a-dule aku an dakbalid.
A-sorba Pedro magaba-noed-yawagakse nadgu, gannir namakded.
69 Bunagwa gannar Pedro-dakarbargu, dulemar-bukmaladga sogded:
—We-dule Jesúsba-gudii an daksamogad.
70 Pedro gannar osulodbalid. Degine, sikwas sanargusadgine Pedro-dikarba-gwigwismalad Pedroga sogdemarmogad:
—Napira an bega soged, be Jesús-sordamogad, ar be Galilea-dolad, degi, be-sunmakedi a-dulemargii be sunmakmogad.
71 Geb degi Pedro ukabsaar ibmar sokalid, degi, sogdebalid:
—Bab-Dummad-nuggi napira an bemarga soged, we-dulegi-bemar-sunmaknanaid an aku daked.
72 Degi-sogsagu, ilaboguddo gannir namaked. Agi Pedro ebinsaas-naded igi Jesús ega ibmar sogsad: “Gannir-ilabo-namaked-iduar, ilapaa be an-osulogoye.” Pedro deyob Jesús-ega-sogsad insadgu, ise-boar naded.