5
Yar-mullugi Jesús sogsad, doamargi bur nued binsalesa
(Lucas 6:20-23)
1 Jesús dulemar-bukidar ese duurmakdani dakdegu, yar-birse nakwisad. Agi sigisgu, e-sapingan ese nonimalad.
2 Degi, Jesús dulemar-odurdakdegu, sogded:
3 “Dulemar burbar na wileged itoger,
amargi nued binsalesad,
ar ade Bab-Dummad-neg-dakmaid amargadid.
4 Dulemar-bodidimalad,
amargi nued binsalesad,
ar amar-bukib-binsadiid,
weligwaled ega uklegoed.
5 Dulemar na san-dummarba imaksurmalad,
amargi nued binsalesad,
ar amar we-napneg-naid egadga guoed.
6 Dulemar-igar-napiragwad-bina mas-gunbiedyob itodimalad,
degi, uku-uku itodimalad, amargi nued binsalesad,
ar Bab Dummad nabir igar-inikigwad-imaked amar-imakoed
igi dulemar immerba nabir itononidamaladyob.
7 Dulemar nue wile emar-daked,
amargi nued binsalesad,
ar amar wile daklemogoed.
8 Dulemar-gwage-swilidikmalad,
amargi nued binsalesad,
ar amar Bab-Dummad-dakmaloed.
9 Dulemar emar-gwage-bogidik-imakmalad,
amargi nued binsalesad,
ar amar Bab-Dummad-mimmiganye bilenonimaloed.
10 Dulemar igar-inikigwad-bina baregilledimalad,
amargi nued binsalesad,
ar ade Bab-Dummad-neg-dakmaid amargadid.
11 “Dulemar an-nug-ular be-ichoarmalar, be-bareginnarmalar, degi, galagwensuli binsa gakansaar begi sunmakarmalar, bemargi nued binsalesdo.
12 Bemar yeer itomar, wergumar, ar nibneggi bemarga ibmar-uklegoed dummarbad, ar ayobi Bab-Dummad-gaya-burba-berbemalad epenne bemar-idu baregillesmarmogad.”
Bemar we-napneggined baluyob gumalad
(Marcos 9:50; Lucas 14:34-35)
13 Jesús sogdebar: “Bemar we-napneggi baluyob gumalad. Ar balu-e-gaibid surgudele, ¿igi bar balu-balu guosunna? Geg bar ib-nuedga gued, degisoggu, balu igargi-mier bur nabirid, dulemar egi annaegar.”
Bemar gwallu-meegwadyob gumalad
14 Jesús sogdebar: “Bemar we-napneggi gwallu-meegwadga gumalad, ar neggwebur-gwagwen yar-birgi siile, geg we-neggwebur dukued.
15 Degine, gwallu, ulu-urba-siega ogalesulid, gwallu ogaleged, e-sied-birgi siegar, adi bela dulemar-neg-yagi-bukmaladga neg-mee-saegar.
16 Debayobi, gwallu gaeyobi, bemar dulemar-asabin damarmo, adi dule-baigan be-dakmalagar, bemar ibmar-nuegan imakdiid, degine, adi be Bab-Dummad-nibneggi-maid-e-nug ogannomalagar.”
Moisés-igar-mesisadba daegala Jesús nonikid
17 Jesús sogdebar: “Mer be binsamalo, Moisés-igar-mesisad, igi, Bab-Dummad-gaya-burba-berbemalad-igar-mesisad osulogega an noniye. Suli, an aga nonisulid, an nonikidi a-igar gatik bur-nue odulogegar.
18 “Ar napira an bemarga sogmalad, we-napneg, degi, nibneg-naid bergued-idu, Moisés-igar-narmakar-naid e-bichugwad-bur-bipigwad gwen bipisaar wis ogwalegosulid, ar bela narmakar-naidba guedsegad.
19 Degisoggu, ar doa-dule we-igar-maidgi wis bipisaar egi gwatirisale, degine, ar deyob dulemar-odurdakele, a-dule, dule-bipigwadye nibneggi bilegoed. Ar dule bela Moisés-igar-maidba daele, degine, ar deyob dulemar-odurdakbalile, we-dule, dule-dummadye Bab-Dummad-neg-dakmaidgi bilemogoed.
20 “Ar napira an bemarga sogmalad, bemar igar-napiragwad-imaked, escribamarba, degi, Fariseomarba bur nuedsulile, Bab-Dummad-neg-dakmaidse bemar gwen dogosurmalad.”
Urwed-igargi Jesús sunmaksad
(Lucas 12:57-59)
21 Degi Jesús sogdebar: “Be itosmalad, epenne igi serganga sogles-gusa:
Mer na be oburgwemalo.
Ex. 20:13
Ar dule-wargwen dule-oburgwisale,
a-dulega odurdakleged-igar ega megnonikoed.
Ex. 21:12
22 Ar andi an bemarga sogmalad, ar dule-wargwen binsarsunna sae-itoge e-gwenadse urwe-dibe, a-dulega igar-itoleged megoed. Ar doa-dule e-gwenadga sog-dibe, ‘Be gegegwa an be-dakye,’ a-dulega Judio-dummagan igar-itogoed, ega igar amiegar. Ar doa-dule e-gwenadga sog-dibe, ‘Be akargubi an be-dakye,’ a-dule soo-sailase odurdakleged bur-nabirid.
23 “Degisoggu, Bab Dummadga ibmar be uksokalid, na e-ukleged-galuse be sedanikir, agi be insaalir, be-gwenadgi be gwatirisad,
24 be ibmar-Bab-Dummadga-be-uksokalid, na e-ukleged-galugi be obes nae, be-gwenad-bebo igar be nabonagwer, geb degi a-sorba gannar be dagoed, be Bab-Dummadga-ibmar-uksokalid geb be ukoed.
25 “Dule-bebo igar gwatirnaid, ebo amba be igarba nadapi, gwae agi ebo igar be naboge, ar degi be imaksulile, abakalegi dule igar-naboged-dummadga be-ukalile, degi, a-dule, suar-ibedga be-ukarmogale, degiir, a eskaryagi be-metoed.
26 Napira an bega soge, be eskaryagi mellesiid, be noosurguodo, bela begi-mani-galesad be bennukedse.”
Abirgunagwarsuli-nanamalad-igargi Jesús sunmaksad
27 Jesús sogdebar: “Ar be itosmalad igi serganga soglesa:
Mer be na abirgunagwarsuli
neg-sichigi be yolemalo.
Ex. 20:14
28 Ar andi an sogdo, ar dule-wargwen ome-wargwengi sunnasur na e-ulubgi egi binsasale, bato we-dule na abirgunagwarsuli neg-sichigi omegi yolesdo.
29 Degisoggu, be-ibya-nuedsikid, be-gwage ichogega be-imak-dibe, bur be onodo, bikiin be metedo, ar bur nabirsursi unnila be-sangi-akanaid gwensak bei yoggusar, bur be-san bela soo-sailagi mellegedba.
30 Ar be-argan-nued be-gwage ichogega be-imak-dibe, bur be sikdo, bikiin be metedo, ar bur nabirsursi unnila be-sangi-akanaid gwensak bei yoggusar, bur be-san bela soo-sailagi mellegedbar.”
Jesús ome-meted-igargi sunmaksad
(Mateo 19:1-12; Marcos 10:1-12; Lucas 16:18)
31 Jesús sogdebar: “Bemar itosmar igi epenne bemar-serganga soglesbali:
Ar dule-wargwen ome-metele,
omega ome-meted-garda ukoye.
Dt. 24:1
32 Ar andi an sogdo, ar dule-wargwen unnila e-ome egi-dikarba nosarbi sunna ome-meted. Ar degisulile, ome-meted ega igar gwen maisulid. Ar dule ome-metele, degiir ome neg-sichigi yolega imako-itole, degine, dule ome-melleded nikusale, a-dule ome-dikarba neg-sichigi yoledimodo.”
Mer ibmar-nug be gamar oyogegar, an ibmar imakoye
33 Degine, bemar itosbar, igi epenne bemar-serganga soglesbali:
Napira-ibmar-nuggi be sogsadi be imako,
mer be imaksuli-guo.
Ar Bab-Dummad-asabin napira be ibmar sogsad,
imakedse be sao.
Lv. 19:12; Nm. 30:2; Dt. 23:21
34 Ar andi an sogdo, mer bipisaar be sogo, an napira imakoye we-nibneg-naid-ularye, ar ade nibneg Bab-Dummad-siged-olo-ganad.
35 Degine, mer be sogbalo, we-napneg-naid-ular napira an sogye an imakoye, ar ade napneg Bab-Dummad-e-nag-onakwed-ganad. Degine, mer be sogbalo, Jerusalén-neggwebur-ular an napira sogye an imakoye, ar ade Jerusalén Bab-Dummad-e-neggwebur gued.
36 Degi, be nonose-bakar mer egi be sogo, an-nono-ular an napira ibmar imakoye, ar geg be sailagia-wargwensaar sipuu, igi, sichii be imaked.
37 “Ar be-sunmaked unnila be soge, eyeye, an imakoye, igi, an sao surye. Ar we-sogedba bur-bule be sogsale, agi ibmar-iskana dani-daed.”
Jesús sogsa-gusad, be-istarmalad be sabgumarye
(Lucas 6:27-36)
38 Jesús sogdebar: “Ar bemar itosmarbalid, epenne be-serganga soglesad:
Ibya-gwagwen dule bei onosale,
buged maiye,
degine, nugar-wargwen dule bei bichisale,
buged maibarye.
Ex. 21:24; Lv. 24:20; Dt. 19:21
39 Ar andi an sogdo: Dule-iskana-abin mer be gwisgu. Bur be imakdo, dule-wargwen be-wagar-nuedsikid bei bibyosale, baid-wagar ega be oyobardo.
40 Ar dule-wargwen igar-nika igar-maidgi abin-abin be imakar-dibe, bei mor subiguar-dibe, ega be suba ukbardo.
41 Ar dule-wargwen ise-barmiar milla-gwen ega-ibmar-sedbi be abe-dibe, ega milla-bo ibmar-seded be sae.
42 Ar dule bese ibmar egichialir, ega be uke. Dulegi mer be ibmar nallegu, dule bega sokalir, wis anga be udagwerye, an gannar bega ukbaloye.”
43 Jesús sogdebar: “Ar bemar itosmalad epenne be-serganga soglesad:
Be dule-baigan-sabgumar,
dule-be-istaraddi istar be dakoed.
Lv. 19:18
44 Ar andi an sogdo: Be-istarmalad be sabgumar, dulemar-be-ukabsadimalad be nued egi binsamar, ibmar-nued ega be imakmar. Dulemar-be-nug-ichodimaladga, degi, be-baregindimaladga Bab Dummadse ega be gormar.
45 Adi bemar, be-Bab-nibneggi-maid-e-mimmiganga gumalagar, ar Bab Dummaddi bela dulemar-nuegan, degi, dulemar-iskanaga dad-ibeler ogamaid. Degine, Bab Dummad bela dulemar igar-inikii-imakmaladga, degi, igar-inikii-imaksurmaladga di-owimaibalid.
46 “Ar dule-be-sabmaladbi be sabguele, ¿ar ibu-nued egi be amiosunna? Ibmar-nued egi be amiosuli. ¿Ar dulemar-iskana, Roma-dummadga-mani-gaedgi-arbamalad deyob na imakmosursi?
47 ¿Ar be-gwenadganbi ega be soger, ‘Be nued sogeye,’ ar ibu baiganba bur-nued be imakmarsunna? Bur-nued be imaksuli. ¿Ar deyob dulemar-Bab-Dummad-wichurmalad imakmosursi? Eye, deyob imakmarmoga.
48 Ar be-Bab-nibneggi-maid dule-nueganga, degi, dule-iskanaganga ibmar-nuegan imaksoggu, a-ular bemar ulubgi dule-nueganga gumarmosundo.”