2
Feesuɣu Nɑŋŋtʋ tiiu
Ḿpʋ́ɣʋ́ pǝ tɑlɑ Pɛntɑkɔntɑ ɑcimɑ wule, ɩlɛnɑ Ɩsɔ sɛɛlɑɑ koti pɑ tǝnɑɣɑ tǝntǝmlɛ. Pǝ tɑsɑɑ ɩlɛ, kɔkɔtɛ nɑtǝlɩ, ɩsɩɩ heelim sɔsɔɔm mɑkʋɣʋ tɔ, lɩɩnɑ ɩsɔtɑɑ kɛlɛ, nɑ tǝ́ nyɑlǝnɑ tǝyɑɣɑ ŋkɑ kɑ tɑɑ pɑɑ wɛ mpʋ tɔ. Ḿpʋ́ɣʋ́ pʋlʋpʋnɑɑ lɩɩ pɑ tɔɔ nɑ pǝ́ nǝɣǝsǝnɑ ɩsɩɩ kɔkɔ nsǝmɑ. Ɩlɛnɑ pʋlʋpʋnɑɑ mpɛ pɑ́ yɑ nɑ pɑ́ cɑɣɑ pɑɑ wei ɩ tɔɔ kɛ́ kʋlʋm kʋlʋm. Tǝnɑɣɑ Feesuɣu Nɑŋŋtʋ hɑɣɑ pɑ tǝnɑ pɑ tɑɑ tǝmɑmmɑm, nɑ pɑ́ sʋʋ piitim lɛmpɩ tɔm yɔɣɔtʋɣʋ, nɑ nti Feesuɣu tʋ pɑ tɑɑ tɔ ntǝɣɩ pɑ yɔɣɔtɑɣɑ.
Pǝ pɑmnɑ mpɑ pɑ tǝŋǝɣɩ Ɩsɔ mpɑɑʋ kɛ teu tɔ pɑ lɩɩnɑ ɑntulinyɑ tǝnɑ tɑɑ nɑ pɑ́ wɛ Yosɑlɛm kɛ wɑɑtʋ ɩnɩ. Yǝlɑɑ mpɛ pɑ nɩɩ kɔkɔtɛ ńtɛ́ tǝ tɑŋ, ɩlɛnɑ pɑ́ koti sɔsɔm. Ḿpʋ́ɣʋ́ pǝ lɑpɑ-wɛɣɛ hɑ, pǝ tɑɣɑ pʋlʋ, pɑɑ wei ɩ nɩɩkɑɣɑ Ɩsɔ sɛɛlɑɑ yɔɣɔtǝɣǝnɑ ɩ tɛ tɑɑ. Tǝnɑɣɑ pɑ kpɑ nɔɔsɩ nɑ pǝ́ lɑ-wɛɣɛ piti, nɑ pɑ́ tɔ sɩ: Ɩsɩɩ Kɑlilee nyǝ́mɑ tike yɔɣɔtǝɣǝnɑ ɩsǝntɔ. Ɩlɛ pǝ lɑpɑ ɩsǝnɑ nɑ pɑɑ tɑ́ tɑɑ wei ɩ́ nɩɩkɩ pɑ yɔɣɔtǝɣǝnɑ ɩ tɛ tɑɑ? Anɩ tɑ́ tɑɑ cǝnɛ mpɑ pɑ lɩɩnɑ Pɑɑtɩ tɛtʋ tɔ pɑ wɛɛ, Metii nɑ Ɩlɑm pǝ nyǝ́mɑ nɑ́ wɛɛ, Mesopotɑmi nyǝ́mɑ nɑ́ wɛɛ, nɑ Yutɑ nɑ Kɑpɑtɔɔsɩ pǝ nyǝ́mɑ, nɑ Pɔŋ nyǝ́mɑ nɑ Asii tɛtʋ nyǝ́mɑ, 10 Filicii nɑ Pɑmfili pǝ nyǝ́mɑ, nɑ Icipiti nyǝ́mɑ nɑ Silɛɛnɩ cɔlɔ Lipii tɛtʋ hɔɣɔlʋɣʋ lɛŋkʋ nyǝ́mɑ, nɑ pǝ kɑɑsɑ lɛlɑɑ mpɑ pɑ lɩɩnɑ Lom tɔ. 11 Yutɑ nyǝ́mɑ siɣisiɣi wɛɛ, nɑ pǝ kɑɑsɩ mpɑ pɑ sʋʋ Yutɑ nyǝ́mɑ Ɩsɔsɛɛlɛ kɛ kʋsʋʋ tɔ, nɑ Kǝlɛɛtɩ nyǝ́mɑ nɑ Alɑpʋ nyǝ́mɑ. Pɑɑ nɑ mpʋ pɑ tɩɩ kɛɛsǝɣɩ Ɩsɔ tǝmɑ sɔsɔɔnɑ tɔm nɑ tɑ́ tɔmnɑɑ wɑɑnɩ wɑɑnɩ tɑɑ, nɑ tǝ nɩɩkɩ tɑ́ tǝnɑ.
12 Pǝ tǝmsɑ pɑ tǝnɑ, pɑ tɑ nyɩ nti pɑɑ yɔɣɔtɩ tɔ. Ɩlɛnɑ pɑ́ pɔɔsǝɣɩ tǝmɑ sɩ, tɔm tǝnɛ ntiɣilɛ mpʋ? 13 Amɑ lɛlɑɑ nɑ́ woŋɑ-wɛ, nɑ pɑ́ tɔ sɩ sʋlʋm pɩɩnɑ-wɛ.
Piyɛɛ wɑɑsʋ
14 Tǝnɑɣɑ Piyɛɛ nɑ tillɑɑ lɛlɑɑ nɑɑnʋwɑ nɑ kʋlʋm ɩnɩ pɑ kʋlɑɑ nɑ pɑ́ sǝŋ ɩsɔ. Ɩlɛnɑ Piyɛɛ yɔɣɔtǝnɑ sɑmɑɑ nɑ nɔɣɔ sɔsɑɣɑ sɩ: Mɑ Yutɑ nyǝ́mɑ mɛ, nɑ mpɑ mɛ mǝ kɔmɑ Yosɑlɛm kɛ kʋkɔm tɔ, ɩ́ tʋ ŋkpɑŋŋ nɑ ɩ́ cɛkǝnɑ teu kɛ nti mɑ heeliɣi-mɛ tɔ. 15 Pǝ tɑɣɑ sʋlʋm kʋɣʋnɑ yǝlɑɑ pɑnɛ ɩnɩ ɩsɩɩ ɩ́ hʋʋkɩ tɔ. Pǝ tɑɣɑ pʋlʋ tɔɔ, pǝ kǝlɑ tɑnɑŋ. 16 Amɑ nti Ɩsɔ kʋyɔɣɔtʋtʋ tɛlǝsʋlʋ Sowɛɛlɩ kɑ yɔɣɔtɑɑ tɔ, ntɩ tǝ mɑɣɑmɑɣɑ tǝ lɑkǝnɑ sɑŋɑ.
17 Ɩsɔ yɔɣɔtɑɑ sɩ:
Nti mɑɑ lɑ kʋyɛɛŋ kɑntǝkɑɣɑ nyǝŋ tɑɑ tɔɣɔlɔ.
Mɑɑ tisi mɑ Feesuɣu kɛ yǝlɑɑ tǝnɑ tɔɔ.
Mǝ pǝyɑlɑɑ nɑ mǝ pɛɛlɑɑ kɑ́ nɑ nti
tɩɩ lɑ cele tɔ nɑ pɑ́ yɔɣɔtɩ.
Pɩɩ hʋ́lɩ́ mǝ ɩfepiyɑ kɛ tɔmnɑɑ nɑ pɑ́ nɑnɑ pɑ ɩsǝpee.
Nɑ mǝ kʋkpɑtǝlɑɑ kɑ́ toosi toosee.
18 Tɑmpɑnɑ tɔɔ, mɑɑ tisi mɑ Feesuɣu kɛ mɑ tǝmlɛ nyǝ́mɑ,
ɑpɑlɑɑ nɑ ɑlɑɑ nyǝ́mɑ, pɑ tɔɔ kɛ́ kʋyɛɛŋ ɩnɩ ɩ tɑɑ.
Pɑɑ nɑ́ nti tɩɩ lɑ cele tɔ nɑ pɑ́ yɔɣɔtɩ-tɩ.
19 Mɑɑ lɑ kɔkɔlɔ nyǝmnɑɑ kɛ hɑtoo ɩsɔtɔnʋɣʋ tɑɑ,
nɑ piti tǝmɑ kɛ ɑtɛ.
Cɑlǝm nɑ kɔkɔ nɑ nyɔɔsɩ sɔsɔɔnsɩ kɑ́ nyɑlɑ.
20 Ilim kɑ́ sɩ tǝkpitii.
Ɩsɔtʋ kɑ́ sɛɛ ɩsɩɩ cɑlǝm.
Pǝ tǝnɑ pɩɩ lɑ mpʋ nɑ pǝ́cɔ́ pǝ́ tɑlɑ
Tɑcɑɑ kʋyɑkʋ sɔsɔɔŋkʋ teeli nyǝŋkʋ ŋkʋ.
21 Pǝ́ nɑ pǝ mpʋ tɔ yǝlɑɑ tǝnɑ mpɑ
pɑɑ yɑɑ Tɑcɑɑ hǝtɛ tɔ pɑɑ tʋlɩ-tɩ.
22 Ɩsɛɣɛlɩ nyǝ́mɑ mɛ, ɩ́ nɩɩ nti mɑ heeliɣi-mɛ tɔ. Nɑsɑlɛtɩ Yesu kɛ́ yʋlʋ wei ɩ sɔsɔɔntʋ Ɩsɔ hʋ́lɑ́-mɛ tɔɣɔ. Pǝ tɑɣɑ pʋlʋ, Yesu niŋ kɛ Ɩsɔ lɑpǝnɑ piti tǝmɑ nɑ sɔɣɔntʋ tǝmɑ nɑ Ɩsɔ kɔkɔlɔ nyǝmnɑɑ mpɑ ɩ hʋ́lɑ́ mǝ hɛkʋ tɑɑ tɔ. Ɩsɩɩ mǝ mɑɣɑmɑɣɑ ɩ́ nyǝm pǝ tǝnɑ tɔ. 23 Nɑ yʋlʋ ɩnǝɣɩ Ɩsɔ kpɑɣɑɑ nɑ ɩ́ cɛlɛ-mɛ ɩsɩɩ ɩ kɑ hʋʋ ɩ tɑɑ nɑ ɩ́ tʋ pǝ pǝlɛ sɩ ɩ kɑ́ lɑ tɔ. Amɑ mǝ kʋ-ɩ, mǝ yelinɑ nɑ yǝlɑɑ ɑsɑɣɑɑ kɑmɩ-ɩ sǝm tesikɑ tɔɔ. 24 Amɑ Ɩsɔ yɔkɑ sǝm tomɑ nɑ ɩ́ feesi-ɩ. Pǝ tɑɣɑ pʋlʋ, pǝ fɛɩ sɩ sǝm ɩ́ lɑpɩ-ɩ pʋlʋ cǝcǝkɑ. 25 Tɑmpɑnɑ, Tɑfiiti yɔɣɔtɑ Yesu ɩnɩ ɩ tɔm kɛ mpʋ sɩ:
Mɑ nɑɑkɑɣɑ Tɑcɑɑ kɛ tɑm kɛ́ mɑ cɔlɔɣɔ.
Ɩ kɑ sǝŋɑ mɑ wɑɑlɩ kɛ́ sɩ mɑ́ tɑɑ selinɑ pʋlʋ.
26 Pǝ tɔɔ kɛ́ mɑ lɑɑkɑlɩ cɑɣɑ tǝntǝmlɛ kɛ teu,
nɑ lɑŋhɛɛlɛ kʋɣʋ-m mɑ yɔɣɔtɑɣɑ tɑɑ.
Pɑɑ mɑ kɛ́ yʋlʋ nɑ mɑɑ sɩ tɔ,
mɑ cɑɣɑnɑ tɛɛlʋɣʋ.
27 Pǝ tɑɣɑ pʋlʋ tɔɔ,
Ɩsɔ nyɑ́ n kɑɑ lɔ-m yem kɛ́ ɑtɛtǝlɛ tɑɑ.
N kɑɑ yele sɩ nyɑ́ yʋlʋ mɑ́ mɑ́ tɩɩ sɔŋ
pɑɑ pǝcɔ mɑɣɑmɑɣɑ.
28 N hʋlɑ-m weesuɣu mpɑɑŋ.
N kɑ́ wɛɛ mɑ kiŋ nɑ ń hʋlǝsǝɣɩ mɑ lɑŋlɛ kɛ teu.
29 Apɑlɑɑ mɛ, ɩ́ yele mɑ́ tʋlǝsɩ-mɛɣɛ tɑ́ lɔŋcɛ Tɑfiiti tɔm tǝcɛɩcɛɩ sɩ, ɩ sǝpɑ nɑ pɑ́ pimi-ɩ, nɑ ɩ pǝlɑɑʋ wɛ tɑ́ hɛkʋ kɛ hɑlǝnɑ sɑŋɑ. 30 Tɑfiiti ɩnɩ ɩ kɑ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́ nɑ ɩ́ nyǝmɑ́ teu sɩ, Ɩsɔ kɑ tɔmɑ nti nɑ tuunɑʋ sɩ ɩ kɑ́ lɑpɩ-ɩ tɔ pɩɩ lɑ. Sǝsɩ Tɑfiiti lʋlʋɣʋ tɑɑ tʋ nɔɣɔlʋ kɑ́ tɔɣɔnɑ kɑwulɑɣɑ ŋkɑ Tɑfiiti ɩnɩ ɩ kɑ tɔɣɑɑ tɔ. 31 Hɑtoo lɔŋ Tɑfiiti nɑwɑ mpi pɩɩ tɛ nɑ pǝ́ lɑ tɔ. Pǝ tɔɔ kɛ́ ɩ yɔɣɔtɑ Mesii sǝpʋ nɑ ɩ́ fe tɔ pǝ tɔm sɩ:
Pɑ tɑ lɔ-ɩ yem kɛ́ ɑtɛtǝlɛ tɑɑ.
Ɩ tɑ tɩɩ sɔŋ pɑɑ pǝcɔ mɑɣɑmɑɣɑ.
32 Yesu wei ɩnɩ ɩ tɔm mɑ yɔɣɔtǝɣɩ ɩsǝntɔ tɔ, Ɩsɔ feesɑ-ɩ, nɑ tɑ́ tǝnɑ tǝ nɑnɑ tɑ́ ɩsǝpee tǝkelekele. 33 Ɩsɔ kʋsɑ ɩ nyʋɣʋ nɑ ɩ́ cɑɣɑsɩ-ɩ ɩ kɔŋkɔŋ tɑɑ. Ɩlɛnɑ ɩ́ kpɑɣɑ Feesuɣu Nɑŋŋtʋ, wei ɩ kɑ tɔmɑ sɩ ɩ kɑ́ hɑ tɔ, nɑ ɩ́ cɛlɛ-ɩ. Nɑ Feesuɣu Nɑŋŋtʋ ɩnǝɣɩ Yesu tisɑ tɑ́ tǝnɑ tɑ́ tɔɔ, nɑ ɩ́ tɔŋnɑ nɑʋ nɑ nɩɩʋ kɛ ɩsǝntɔ. 34 Pǝ tɑɣɑ ɩsɩɩ Tɑfiiti mɑɣɑmɑɣɑ nɑ́ kpɑ ɩsɔ se. Amɑ pɑɑ nɑ mpʋ ɩ yɔɣɔtɑɑ sɩ:
Tɑcɑɑ Ɩsɔ heelɑ mɑ Sɔsɔ sɩ:
Cɑɣɑ mɑ kɔŋkɔŋ tɑɑ.
35 Hɑlǝnɑ mɑ́ kɔnɑ nyɑ́ kolontunɑɑ,
nɑ ń loosi nyɑ́ nɔɔhɛɛ kɛ pɑ tɔɔ.
36 Pǝ wɛɛ sɩ Ɩsɛɣɛlɩ yǝlɑɑ tǝnɑ kɑ́ nyɩ teu tǝkpɑtɑɑ sɩ, Yesu wei ɩ́ kɑmɑ sǝm tesikɑ tɔɔ tɔ, ɩnǝɣɩ Ɩsɔ lɑpɑ Sɔsɔ nɑ Mesii.
37 Ɩsɛɣɛlɩ nyǝ́mɑ nɩɩ tɔm tǝnɛ ɩlɛnɑ pɑ lɑŋɑ pǝsɩ sɔsɔm, nɑ pɑ́ pɔɔsɩ Piyɛɛ nɑ tillɑɑ lɛlɑɑ sɩ: Tɑ tɑɑpɑlɑɑ mɛ, ɩsǝnɑɣɑ pǝ wɛɛ sɩ tǝ́ lɑ ɩlɛ?
38 Tǝnɑɣɑ Piyɛɛ cɔ-wɛ sɩ: Ɩ́ lɔ mǝ ɩsɑɣɑtʋ nɑ ɩ́ lɑɣɑsɩ hʋwɛɛ, nɑ pɑ́ yɑɑ Yesu Kilisiti hǝtɛ nɑ pɑ́ sɔnɑ pɑɑ mǝ tɑɑ wei kɛ́ Ɩsɔ lʋm, nɑ pǝ́ hɩɩsɩ mǝ ɩsɑɣɑtʋ. Ɩlɛnɑ ɩ́ hiki Ɩsɔ kʋcɔɔʋ sɔsɔɔʋ ŋku kʋ kɛ́ Feesuɣu Nɑŋŋtʋ tɔ. 39 Pǝ tɑɣɑ pʋlʋ tɔɔ, mǝ nɑ mǝ piyɑ nɑ hɑtǝlɑɣɑ nyǝ́mɑ kɛ Ɩsɔ tɔmɑ sɩ ɩ kɑ́ hɑ, ɩ́ tɩɩ lɑɑlɑɑ nɑ ɩ́ yɑɑ wei te, ɩ́lɛ́ ɩ hikɑɑ kɛ́.
40 Ḿpʋ́ɣʋ́ Piyɛɛ tɑsɑ Ɩsɛɣɛlɩ nyǝ́mɑ kɛ tɔm pɑɣɑlɛ kɛ heeluɣu tɔtɔ, nti tɩɩ sǝnɑ-wɛ nɑ tǝ sɔɔsɩ-wɛɣɛ ɑpɑlʋtʋ tɔ. Sǝsɩ, ɩ́ lǝsɩ mǝ tǝɣɩ yǝlɑɑ letɑɑ pɑnɛ pɑ tɑɑ nɑ ɩ́ tʋlɩ-tɩ.
41 Ḿpʋ́ɣʋ́ Ɩsɛɣɛlɩ nyǝ́mɑ tɑɑ yǝlɑɑ tuutuumɑ mʋ Piyɛɛ tɔm nɑ pɑ́ sɔ-wɛɣɛ Ɩsɔ lʋm. Kʋyɑŋku, mpɑ pɑ sʋʋ Ɩsɔ sɛɛʋ tɔ, pɑ nyɔɔŋ tɑlɑ ɩsɩɩ iyisi tooso (3000). 42 Pɑ ɩsǝlɛ kɑ sɛɛnɑ tillɑɑ kʋsɛɣɛsǝtʋ kɛ nɩɩʋ, nɑ pɑ tǝŋɑɣɑ tǝmɑ nɑ lɑŋhʋlʋmlɛ kɛ sɔsɔm. Pɑ tɔkɑɣɑ tǝntǝmlɛ kɛ tɑm, nɑ pɑ́ puki Ɩsɔ sǝlǝmʋɣʋ pɩɩ sɔɔ nɔɣɔlʋ.
Ɩsɔ sɛɛlɑɑ cɑkǝlɛ
43 Tillɑɑ lɑkɑɣɑ piti tǝmɑ nɑ Ɩsɔ kɔkɔlɔ nyǝmnɑɑ, nɑ pǝ́ kpɑɑ pɑɑ wei kɛ́ sɔɣɔntʋ. 44 Ɩsɔ sɛɛlɑɑ tǝnɑ kɑ wɛnɑ nɔɣɔ kʋlʋmɑɣɑ, nɑ pɑ kpɛntɑɣɑ mpi mpi pɑ wɛnɑ tɔ. 45 Pɑ pɛɛtɑɣɑ pɑ tɛtʋnɑɑ nɑ pɑ wontunɑɑ nɑ pɑ́ kotiɣi pǝ liɣitee kɛ tǝntǝmlɛ, nɑ pǝ́ cɑɑlɑ pɑ tɑɑ wei pɑ wɑɑsǝnɑ-ɩ. 46 Pɑ tǝnɑ pɑɑ kotɑɣɑ pɑɑ ɩfemle nteɣe Ɩsɔ tǝsɛɛlɛ kɛ Ɩsɔ sǝlǝmʋɣʋ pɩɩ sɔɔ yʋlʋ. Ye pɑ sɑɑ-wɛɣɛ pɑ tɛɛsɩ tɑɑ, tǝntǝmlɛ kɛ pɑ kotiɣi nɑ pɑ́ tɔkɩ. Lɑŋhʋlʋmlɛ kɛ pɑ tɔkɑɣɑnɑ pɑ tɔɣɔnɑsɩ, nɑ pɑ tɑɑ hɛtǝnɑ tǝmɑ. 47 Nɑ pɑ́ sɑŋ Ɩsɔ, nɑ yǝlɑɑ tǝnɑ lɑŋɑ hɛɛnɑ-wɛ. Pɑɑ kʋyɑŋku Tɑcɑɑ sɔɔsɑɣɑ pɑ kpekǝle tɔɔ kɛ́ mpɑ mpɑ pɑ nyɔɔŋ pǝ yɑpɑ tɔ.