5
Ɩsɛɣɛlɩ tɔɔ wulɑ
1 Ɩsɛɣɛlɩ nyǝ́mɑ ɩ́ nɩɩ mǝ sǝm wulɑ:
2 Ɩsɛɣɛlɩ wɛ kɛ́ ɩsɩɩ pɛɛlɔ wei ɩ sǝpɑ tɔ.
Ɩɩ tɑsǝɣɩ kʋlʋɣʋ.
Pǝ́cɔ́ nɔɣɔlʋ kɑɑ kʋsɩ-ɩ.
3 Mpi tɔ, Tɑcɑɑ Ɩsɔ yɔɣɔtɑ Ɩsɛɣɛlɩ tɔm sɩ:
Ye yǝlɑɑ iyɑɣɑ (1000) polɑ yoou,
nɩɩnʋwɑ (100) tike kɑ mǝlǝnɑ.
Ye nɩɩnʋwɑ (100) polǝnɑ,
nɑɑnʋwɑ kɛ pɩɩ sɔɔ.
Ɩsɔ yɑɑ-wɛ pǝ tɑɑ kɔɔ nɑ pɑ́ sɩ
4 Tɑcɑɑ yɔɣɔtɑɑ sɩ:
Ɩ kɔɔ mɑ kiŋ nɑ mɑ́ hɑ-mɛɣɛ weesuɣu.
5 Amɑ ɩ́ tɑɑ polo Petɛɛlɩ, nɑ Kilikɑɑ,
nɑ Pɛɛsepɑ ɑcɑlɛɛ tǝkɔtǝlɛnɑɑ.
Pǝ tɑɣɑ pʋlʋ,
pɑɑ kuu Kilikɑɑ nyǝ́mɑ,
nɑ pɑ́ kpiisi Petɛɛlɩ nyǝ́mɑ.
6 Yosɛɛfʋ lʋlʋɣʋ nyǝ́mɑ mɛ,
ye ɩ́ cɑɑ weesuɣu,
pǝ wɛɛ sɩ Tɑcɑɑ kɛ ɩ́ pɛɛkɩ.
Tɔfɔ tɔɔ, ɩ́lɛ́ ɩ kɑ́ pǝsɩ kɛ́ ɩsɩɩ kɔkɔ
nɑ ɩ́ nyɑɣɑ pǝ tǝnɑɣɑ Petɛɛlɩ.
Nɔɣɔlʋ kɑɑ pǝsɩ kɑ teesuɣu.
7 Wɑɩyo, ɩ́ lɑɣɑsǝɣɩ tɑmpɑnɑ nɑ ɩsɑɣɑtʋ,
nɑ ɩ́ muɣuliɣi tɑmpɑnɑ nyǝ́mɑ.
8 Tɑcɑɑ lɑpǝnɑ ɩsɔtʋlʋŋɑsɩ kɛ wɑɑnɩ wɑɑnɩ.
Ɩnɩ ɩ lɑɣɑsǝɣǝnɑ sǝkpɛtʋɣʋ kɛ nyɑɑlǝm,
nɑ nyɑɑlǝm kɛ sǝkpɛtʋɣʋ.
Nɑ ɩ́ hɔŋ teŋku lʋm nɑ ɩ́ pǝlǝɣɩ tɛtʋ tɔɔ.
Ɩ hǝtɛ ntɛ́ Tɑcɑɑ.
9 Ɩnɩ ɩ kʋɣʋnɑ toŋtʋnɑɑ
nɑ ɩ́ lɑkɩ pɑ koloosi ɑcɑlɛɛ kɛ ncɑɑ.
10 Mǝ tɑɑ kpɑɑkǝnɑ tɑmpɑnɑ yɔɣɔtʋlʋ kɛ hʋʋlɛ tɑɑ kɛ́,
nɑ wei ɩ hʋlǝɣɩ-mɛɣɛ mǝ tǝwɑkǝllɛ tɔ.
11 Ɩ́ muɣuliɣi ɑcɑmɑɑ nɑ ɩ́ ŋmɩɩlǝɣɩ pɑ kʋhɑlǝm.
Pǝ tɔɔ kɛ́ ɩ́ kɑɑ nɩɩ mǝ kutuluŋ kʋpɑŋ leleŋ.
Pǝ́cɔ́ ɩ́ kɑɑ tǝŋ mǝ lɛsɛŋnɑɑ kʋpɑmɑ sʋlʋm.
12 Mɑɑ sɔɔkɩ mǝ ɩsɑɣɑtʋ tuutuumɑ tɑɑ nɑtǝlɩ.
Ɩ́ muɣuliɣi yʋlʋpɑŋ nɑ ɩ́ mʋɣɩ kʋcɔɔŋ.
Ɩlɛnɑ ɩ́ kʋɣɩ ɑcɑmɑɑ tɔm kɛ hʋʋlɛ tɑɑ.
13 Tɑsǝkǝlɛ tʋɣʋ wɑɑtʋ kɔlɔ ɩnɛ.
Pǝ tɔɔ kɛ́ lɑɣɑtʋnɑɑ sumɑ sɩ pǝ́ tɑɑ kɔɔ pǝ nɑ-wɛ.
14 Ɩ́ yele ɩsɑɣɑtʋ nɑ ɩ́ lɑ kʋpɑntʋ.
Ɩlɛnɑ Pǝ tǝnɑ pǝ tʋ Ɩsɔ wɛɛ mǝ wɑɑlɩ kɛ́ tɑmpɑnɑ,
ɩsɩɩ ɩ yɔɣɔtʋɣʋ tɔ.
15 Ɩ́ kisi ɩsɑɣɑtʋ nɑ ɩ́ sɔɔlɩ kʋpɑntʋ,
nɑ ɩ́ tǝŋǝɣɩ tɑmpɑnɑ kɛ hʋʋlɛ tɑɑ.
Ntɑnyɩ Pǝ tǝnɑ pǝ tʋ Ɩsɔ kɑ́ wii Yosɛɛfʋ
lʋlʋɣʋ kɑkɑɑsɑɣɑ pǝtɔɔtǝlɛ.
16 Ḿpʋ́ɣʋ́ Pǝ tǝnɑ pǝ tʋ Ɩsɔ Tɑcɑɑ yɔɣɔtɑɑ sɩ:
Pɑɑ nɩɩ lǝyɑɣɑ wulɑ kɛ nɔnɔɔsɩ tɛɛ.
Yǝlɑɑ kɑ́ mɑkɩ kɑpusi kɛ hɑpɛɛ tǝnɑ tɔɔ sɩ:
Mpusi wei kɛlɛ, mpusi wei kɛlɛ?
Pɑɑ yɑɑ hɑtɑɑ nɑ wiilɑɑ kɛ wiiu.
17 Wɑɑtʋ wei mɑɑ kɔɔ yǝlɑɑ kɛ fɛlʋɣʋ tɔ,
lǝyɑɣɑ wulɑ kɑ́ nɩɩ lɛsɛŋ tɑwɑ tǝnɑ tɑɑ.
Tɑcɑɑ wɑɑsʋɣʋ kʋyɑkʋ
18 Tɑcɑɑ kʋyɑkʋ sɔsɔɔʋ tɑŋlɑɑ mɛ,
pǝ tɑɣɑ nyɑɑlǝm kɛ ɩ́ kɑ́ nɑ́ kʋ wule yoo.
Amɑ sǝkpɛtʋɣʋ kɛ́.
19 Teitei ɩsɩɩ yʋlʋ seekuɣu tɔɣɔlɑɣɑ,
nɑ ɩ́ sulinɑ kɑ cɑmnɑ,
ɩlɛnɑ ɩ́ sʋʋ tǝyɑɣɑ nɑ ɩ́ teesinɑ koluŋɑ.
Ɩlɛnɑ tʋm nyɑsɑ-ɩ tɔ.
20 Tɑcɑɑ kʋyɑkʋ sɔsɔɔʋ kɑ́ wɛɛ ḿpʋ́ɣʋ́.
Kʋ tɑ kɛ nyɑɑlǝm nyǝŋkʋ.
Amɑ sǝkpɛtʋɣʋ kɛ́.
Ɩsɔsɛɛlɛ nte Ɩsɔ ɩɩ cɑɑkɩ tɔ
21 Ḿpʋ́ɣʋ́ Tɑcɑɑ tɔmɑ sɩ:
Mɑ tɑɑ kpɑɑnɑ mǝ kɔtɑsɩ nɑ mǝ kotuŋ kɛ́.
22 Mǝ kɔtɑsɩ nsi kɔkɔ nyɑɣɑ sɩ tǝnɑ tɔ
nɑ mǝ tɔɣɔnɑɣɑ nyǝŋsɩ lɩɩ-m sɔŋ.
Mɑɑ tɩɩ cɑɑ mǝ nɑwee nim nyǝnɑ.
23 Ɩ́ yele kokoole kɛ mɑ ŋkpɑŋŋ tɑɑ sɩ
ɩ́ yooki-m yontu.
Mɑɑ cɑɑ mɑ́ nɩɩ mǝ cǝmǝŋ tɑŋ.
24 Pǝ kǝlɑ teu sɩ ɩ́ yele nɑ tɑmpɑnɑ wɛɛ mǝ hɛkʋ,
ɩsɩɩ pɔɣɔ sɔsɑɣɑ ŋkɑ kɑɑ nyɔɔkɩ tɔ.
25 Ɩsɛɣɛlɩ nyǝ́mɑ mɛ, pɩɩsɩ nɩɩlɛ wei ɩ́ tɔmɑ wʋlɑɣɑ tɛtʋ tɑɑ tɔ ɩ́ lɑpɑ-m kɔtɑsɩ nɑ?
26 Ntɔŋ mǝ tɩɩŋ Sɑkutɩ nɑ Kewɑŋ wei ɩ́ sɑɑkɑ mǝ tɩ tɔɣɔ ɩ́ kɑ tɔkɑɑ nɑ ɩ́ lɑɑkɩ?
27 Pǝ tɔɔ kɛ́ mɑɑ yele
nɑ pɑ́ ponɑ-mɛɣɛ Tɑmɑsɩ
ɩcɑtɛ wɑɑlɩ kɛ Asilii tɛtʋ tɑɑ.
Pǝ tǝnɑ pǝ tʋ Ɩsɔ mɑ́,
mɑ yɔɣɔtǝnɑ mpʋ.