8
Toosee liɣiti nyǝnɑ
1 Ḿpʋ́ɣʋ́ Tɑcɑɑ lɑpɑ nɑ mɑ tɑsɑ toosuɣu. Tɩɩŋ pee kʋpǝpɩɩnɑ nɑ tɔkʋ ntɛ́ mɑ nɑwɑ.
2 Ɩlɛnɑ ɩ́ pɔɔsɩ-m sɩ: Pepeɣe n nɑɑkɩ, Amɔɔsɩ? Mɑ sɩ Tʋɣʋ pee wenɑ ɑ pɩɩwɑ tɔ ɑ tɔkʋ. Mpʋɣʋlɛ sɩ: Mɑ yǝlɑɑ Ɩsɛɣɛlɩ nyǝ́mɑ pɩɩwɑɣɑ, pɑ tɑlɑ pɑ tǝnɑɣɑ. Mɑ kɑɑ tɑsɑ-wɛɣɛ wiiu.
3 Mɑ heelɑ-wɛ sɩ:
Ɩsɔ Tɑcɑɑ mɑ, mɑ hʋʋlɛ kʋyɑkʋ wule,
kɑwulɑɣɑ tǝyɑɣɑ tɑɑ yontu kɑ́ pǝsɩ wulɑ.
Ɩlɛnɑ sǝtɑɑ sɔɣɔtɩ, nɑ pǝ́ sumɑ tiɣitiɣi.
Tɑɑtǝlɑɑ ɩsɑɣɑtʋ
4 Ḿpʋ́ɣʋ́ Tɑcɑɑ tɔmɑ sɩ:
Mpɑ mɛ mǝ fɛlǝɣɩ kʋnyɔntʋnɑɑ kɛ nɔɔhɛɛ,
nɑ ɩ́ kʋɣɩ tɛtʋ tɑɑ wɑhɑlɑ nyǝ́mɑ,
5 ɩlɛnɑ ɩ́ tɔŋ sɩ ɩsɔtʋ kʋfɑlʋ ɑcimɑ
ɩɩ tɛŋ lɔŋ sɩ tǝ́ tɑɑtɩ.
Aɑɩyee sɩ, kʋyɑkʋ kʋhɛɛsʋɣʋ
nɑɑ tɛŋ lɔŋ sɩ tǝ lǝsɩ tɔɣɔnɑɣɑ pee
nɑ tǝ́ pɑsɑ mɑɣɑsǝlɑɣɑ.
Ɩlɛnɑ tǝ́ kpɑɑsɩ kɑ liɣitee.
Nɑ tǝ́ lu sɑnǝyɑnɑɑ kʋmuɣullɑɑ,
6 nɑ tǝ́ kpɛŋǝɣǝnɑ toolee nɑ tǝ́ pɛɛtǝɣɩ.
Ye kʋnyɔntʋ tɑ pǝsɩ
nɑ ɩ́ fɛlɩ-mɛɣɛ ntɑŋkpɑlɑ liɣitee,
ɩlɛ ɩ́ kpɑ-ɩ yomle.
7 Ḿpʋ́ɣʋ́ Tɑcɑɑ tuuwɑ sɩ:
Nɑ tɛtʋ nti ɩ́ hɔŋnɑ mǝ tɩ ɩsǝntɔ tɔ,
mɑ kɑɑ sɔɔ mǝ lɑkɑsɩ sǝnɛ.
8 Pǝ tɔɔ kɛ́ tɛtʋ kɑ́ sele,
nɑ tǝ tɑɑ yǝlɑɑ tǝnɑ cɑɣɑ lǝyɑɣɑ.
Tɩɩ kpɑɑkɩ nɑ tǝ́ tiiki ɩsɩɩ Nili pɔɣɔ lʋm.
9 Ḿpʋ́ɣʋ́ Tɑcɑɑ Ɩsɔ tɑsɑɑ sɩ:
Kʋyɑŋkuɣu mɑɑ yele nɑ ilim tʋ pǝ sikuɣu wɑɑtʋ.
Ɩlɛnɑ sǝkpɛtʋɣʋ nyɑlɑ tɛtʋ tǝnɑ tɔɔ.
10 Mɑɑ pǝsǝnɑ mǝ ɑcimɑ kɛ lǝyɑɣɑ,
nɑ mǝ lɑŋhʋlʋmlɛ yontu pǝsɩ wulɑ.
Nɑ yǝlɑɑ tǝnɑ looli pɑ nyɔɔŋ ɩsɩɩ lǝyɑɣɑ
nɑ pɑ́ suu lǝyɑɣɑ wontu ɩsɩɩ fɔlǝtɔnɑɑ tɑkɑ,
ɩsɩɩ pǝyɑɣɑ ɩkpɑmlɛ sǝpǝnɑ.
Ɩlɛnɑ pǝ tǝnɑɣɑ mpʋ pǝ́ pǝsɩ lɑŋwɑkǝllɛ kʋyɑkʋ.
11 Ḿpʋ́ɣʋ́ Tɑcɑɑ tɔmɑ sɩ:
Mɑɑ kɔnɑ wɑhɑlɑ kɛ kʋyɑkʋ nɑkʋlɩ.
Wɑhɑlɑ ɩnǝɣǝlɛ sɩ mɑ kʋyɔɣɔtʋtʋ nɩɩʋ
kʋnyɩɩlʋɣʋ kɑ́ kpɑ yǝlɑɑ,
nɑ pǝ kǝlɩ ɩsɩɩ nyɔɣɔsɩ yɑɑ lʋkɔtʋ kʋkʋɣʋ-wɛ tɔ.
12 Pɑɑ cɔɔ yem kɛ́ tɛtʋ tǝnɑ,
nɑ pɑ́ pɛɛkǝɣɩ sɩ pɑ́ nɩɩ mɑ tɔm,
ɑmɑ pɑ kɑɑ nɑ.
13 Kʋyɑŋkuɣu lʋkɔtʋ kɑ́ kʋ ɩfepiyɑ ɑkpɑlɑ nyǝ́mɑ,
nɑ pɛɛlɑɑ kʋpɑmɑ, nɑ pɑ́ pi-wɛ.
14 Nɑ mpɑ pɑ tuukinɑ Sɑmɑlii tʋɣʋ,
yɑɑ Tɑŋ nyǝŋkʋ yɑɑ Pɛɛsepɑ nyǝŋkʋ tɔ.
Pɑ tǝnɑ pɑɑ hoti, pɑ kɑɑ tɑsɑ kʋlʋɣʋ.