3
Wulɑʋ wʋlɑ lɛɛsʋɣʋ tɔm
Ḿpʋ́ɣʋ́ wulɑʋ Nepukɑnɛsɑɑ lupɑ wʋlɑ kɛ yʋlʋ lɛɛsʋɣʋ. Kʋ tɑɣɑlǝŋ wɛ mɛɛtǝlǝnɑɑ hiu nɑ nɑɑnʋwɑ, nɑ kʋ wɑŋ kɛ mɛɛtǝlǝnɑɑ tooso. Ɩlɛnɑ ɩ́ sǝŋsɩ-kʋɣʋ Pɑpiloni tɛtʋ hɔɣɔlʋɣʋ tɑɑ kɛ́ Tulɑ tɛtɛkǝlɛ tɑɑ. Ɩlɛnɑ ɩ́ yɑɑ ɩ tɛtʋ tǝnɑ hɔɣɔlǝŋ nyɔɔŋ nyǝ́mɑ. Pǝ kpɑɣɑʋ ɑwulumpiyɑ, nɑ kʋmɑtɑŋnɑɑ sɔsɑɑ, nɑ kʋfǝnɛɛnɑɑ. Nɑ lɑɣɑtʋ tɑsǝlɑɑ, nɑ liɣitee pɑɑsǝnlɑɑ, nɑ hʋʋlɑɑ, nɑ kiiŋ nyǝntɑɑ, nɑ tɛtʋ hɔɣɔlǝŋ nyɔɔŋ nyǝ́mɑ tǝnɑ tɔ. Ɩ yɑɑ-wɛɣɛ sɩ pɑ́ polo lɛɛsʋɣʋ ŋkʋ kʋ sɛɛʋ tʋlʋɣʋ. Ḿpʋ́ɣʋ́ pɑ tǝnɑ pɑ kotɑ lɛɛsʋɣʋ ŋkʋ kʋ kiŋ.
Ɩlɛnɑ kpɑɑllʋ kiisinɑ nɔɣɔ sɔsɑɣɑ sɩ: Piitimnɑɑ yǝlɑɑ nɑ nsǝmɑ tǝnɑ, ɩ́ ke ŋkpɑŋŋ nɑ ɩ́ nɩɩ yoo. Ye wɑɑtʋ wei ɩ́ nɩɩwɑ tutuɣu, nɑ hǝlɑɣɑ, nɑ sɑŋkʋ, nɑ cǝmʋɣʋ, nɑ kitiko, nɑ wontu ntɩ tǝ tǝnɑ. Pǝ wɛɛ sɩ ɩ́ hǝntɩ ɑtɛɣɛ, nɑ ɩ́ sɛɛ wulɑʋ wʋlɑ lɛɛsʋɣʋ ŋkʋ. Ye wei ɩ́ kisɑɑ, pɑɑ pɛtɩ pʋntʋ kɛ kpɑkpɑɑ kɛ kɔkɔ sɔsɔɔŋkɑ tɑɑ.
Pǝ tɔɔ kɛ́ wɑɑtʋ wei yǝlɑɑ nɩɩwɑ tutuɣu, nɑ hǝlɑɣɑ, nɑ sɑŋkʋ, nɑ cǝmʋɣʋ, nɑ kitiko, nɑ wontu ntɩ tǝ tǝnɑ tǝ tɑŋ tɔ, ḿpʋ́ɣʋ́ pɑ tǝnɑ pɑ luŋɑɑ nɑ pɑ́ sɛɛ wulɑʋ wʋlɑ lɛɛsʋɣʋ ŋkʋ.
Tɑniyɛɛlɩ tɑɑpɑlɑɑ kisuɣu kɛ lɛɛsʋɣʋ sɛɛʋ
Ḿpʋ́ɣʋ́ Pɑpiloni nyǝ́mɑ nɑpǝlɩ pɑ polɑ wulɑʋ kiŋ. Ɩlɛnɑ pɑ́ kuli Yutɑ nyǝ́mɑ wɑɑlɩ. Pɑ sʋʋ wulɑʋ kiŋ, ɩlɛnɑ pɑ́ sɛɛ-ɩ sɩ: Tɑ cɑɑ, wulɑʋ, mǝnɑ tɛtʋ. 10 Ɩsɩɩ n sɩɩwɑ sɩ, ye tǝ nɩɩ tutuɣu, nɑ hǝlɑɣɑ, nɑ sɑŋkʋ, nɑ cǝmʋɣʋ, nɑ kitiko, nɑ wontu ntɩ tǝ tǝnɑ. Pǝ wɛɛ sɩ yǝlɑɑ tǝnɑ ɩ́ hǝntɩ ɑtɛɣɛ nɑ pɑ́ sɛɛ nyɑ wʋlɑ lɛɛsʋɣʋ nɑ? 11 Ye wei ɩ́ kisɑɑ pɑɑ pɛtɩ pʋntʋ kɛ kpɑkpɑɑ kɛ kɔkɔ sɔsɔɔŋkɑ tɑɑ? 12 Pǝyele Yutɑ nyǝ́mɑ Sɑtǝlɑkɩ, nɑ Mesɑkɩ, nɑ Apɛtɩ-Neko mpɑ n tʋ Pɑpiloni tɛtʋ hɔɣɔlʋɣʋ tɑɣɑnʋɣʋ tɔ, pɑ tɑ tɔkɩ nyɑ́ kʋsǝsɩɩtʋ. Pɑ kisɑ nyɑ́ tɩɩŋ nɑ nyɑ́ wʋlɑ lɛɛsʋɣʋ tǝmlɛ.
13 Ḿpʋ́ɣʋ́ pɑ́ɑ́nɑ́ kpɑ wulɑʋ kɛ sɔsɔm nɑ ɩ́ tɔ sɩ, pɑ́ kɔnɑ-wɛ. Ɩlɛnɑ pɑ́ ponɑ-wɛɣɛ-ɩ. 14 Nɑ ɩ́ pɔɔsɩ-wɛ sɩ: Sɑtǝlɑkɩ, nɑ Mesɑkɩ, nɑ Apɛtɩ-Neko. Ɩ́ kisɑ mɑ tɩɩŋ nɑ mɑ wʋlɑ lɛɛsʋɣʋ pǝ tǝmlɛ lɑpʋ yɑɑ? 15 Pǝnɛntɛ ɩ́ tɑɣɑnɩ mǝ tɩ. Ye wɑɑtʋ wei ɩ́ nɩɩ tutuɣu, nɑ hǝlɑɣɑ, nɑ sɑŋkʋ, nɑ cǝmʋɣʋ, nɑ kitiko, nɑ wontu ntɩ tǝ tǝnɑ. Ɩlɛ ɩ́ hǝntɩ ɑtɛ nɑ ɩ́ sɛɛ lɛɛsʋɣʋ ŋku mɑ sǝŋsɑɑ tɔ. Ye pǝ tɑɣɑ mpʋ, pɑɑ pɛtɩ-mɛɣɛ kpɑkpɑɑ kɛ kɔkɔ sɔsɔɔŋkɑ tɑɑ. Ɩlɛnɑ mɑ́ nɑ́ sɩ tʋɣʋ ŋku kɩɩ lǝsɩ-mɛ?
16 Ḿpʋ́ɣʋ́ Sɑtǝlɑkɩ, nɑ Mesɑkɩ, nɑ Apɛtɩ-Neko, pɑ cɔ wulɑʋ sɩ: Hɑɩ, tɑ cɑɑ, tɩɩ nɔkǝɣɩ nɑ tǝ́ tɑɣɑnɩ tɑ tɩ tɔm. 17 Pɑɑ nɑ mpʋ, tɑ Ɩsɔ wei ɩ tǝmlɛ tǝ lɑkɩ tɔ, ɩ pǝsǝɣɩ nɑ ɩ́ lǝsɩ-tʋɣʋ kɔkɔ sɔsɔɔŋkɑ tɑɑ. Ɩ kɑ́ wɑɑsɩ-tʋɣʋ nyɑ́ niŋ tɑɑ. 18 Pǝyele, pɑɑ ɩ́lɛ́ ɩ tɑ tɩɩ lɑ mpʋ, tǝ kɑɑ lɑ nyɑ́ tɩɩŋ tǝmlɛ. Tǝ kɑɑ sɛɛ nyɑ́ wʋlɑ lɛɛsʋɣʋ ŋku n sǝŋsɑɑ tɔ.
19 Tǝnɑɣɑ pɑ́ɑ́nɑ́ kpɑ wulɑʋ kɛ sɔsɔm, nɑ ɩ́ kpɛɛ-wɛɣɛ ɩsɛ. Ɩlɛnɑ ɩ́ tɔ sɩ: Ɩ́ hɑŋsɩ kɔkɔ sɔsɔɔŋkɑ kɛ tɔm nɑɑtosompɔɣɔlɑɣɑ. 20 Ḿpʋ́ɣʋ́ ɩ tɔmɑ ɩ yoolɑɑ ɑlɑɑfǝyɑ nyǝ́mɑ nɑpǝlɩ sɩ: Ɩ́ hɔkɔ-wɛ, nɑ ɩ́ pɛtɩ kɑ tɑɑ. 21 Tǝnɑɣɑ pɑ hɔkɑ-wɛɣɛ kpɑkpɑɑ, nɑ pɑ tɔlɔɔsɔnɑɑ nɑ pɑ cɑpɑnɑɑ nɑ pɑ kpɑɩnɑɑ. Ɩlɛnɑ pɑ́ pɛtɩ-wɛɣɛ kɔkɔ tɑɑ. 22 Pɑɑ hɑŋsɑ-kɛɣɛ teu kɛ́ ɩsɩɩ wulɑʋ kɑ sɩɩʋ tɔ. Hɑlǝnɑ kɑ́ kʋ mpɑ pɑ pɛtɑ mpɛ ɩnɩ pɑ toosoɣo kɑ tɑɑ tɔ. 23 Ḿpʋ́ɣʋ́ Sɑtǝlɑkɩ nɑ Mesɑkɩ nɑ Apɛtɩ-Neko pɑ hotɑ kɔkɔ sɔsɔɔŋkɑ tɑɑ nɑ pɑ kʋhɔkʋm.
Sɑtǝlɑkɩ-wɛ pɑ tooso kɛ kɔkɔ sɔsɔɔŋkɑ tɑɑ
24 Ḿpʋ́ɣʋ́ sɔɣɔntʋ kpɑ wulɑʋ. Ɩlɛnɑ ɩ́ kʋlɩ tǝkpɑkɑ nɑ ɩ́ pɔɔsɩ ɩ wɑɑlɩ nyǝ́mɑ sɩ: Ɩsɩɩ yǝlɑɑ kʋhɔkɑɑ toosoɣo tǝ pɛtɑ kɔkɔ tɑɑ? Ɩlɛnɑ pɑ́ cɔ-ɩ sɩ: Ḿpʋ́ɣʋ́, tɑ cɑɑ. 25 Ntɛnɑ ɩ́ mɑ́ kɑpukɑ sɩ: Mɑ nɑɑkɩ yǝlɑɑ liɣiti kɛ́ kɑ tɑɑ. Pɑ tɑ hɔkɔ-wɛ, pǝ́cɔ́ pɑ tɔŋ kɑɑ nyɑkɩ-wɛ. Nɑ liɣiti nyǝŋ nǝɣǝsǝnɑ ɩsɩɩ ɩsɔtɑɑ tillu.
26 Pǝlɛ pǝ wɑɑlɩ, ɩlɛnɑ wulɑʋ kpǝtǝnɑ kɔkɔ ŋkɛ kɑ nɔɣɔ. Ḿpʋ́ɣʋ́ ɩ yɑɑwɑ sɩ: Ɩsɔ sɔsɔ tǝmlɛ nyǝ́mɑ, Sɑtǝlɑkɩ, nɑ Mesɑkɩ, nɑ Apɛtɩ-Neko yoou. Ɩ́ lɩɩ nɑ ɩ́ kɔɔ.
Ɩlɛnɑ pɑ́ lɩɩ kɔkɔ tɑɑ kɛ́ kpɑkpɑɑ. 27 Ḿpʋ́ɣʋ́ wulɑʋ ɑkewenɑɑ tǝnɑ kotɑɑ nɑ pɑ́ wiili-wɛ. Ɩlɛnɑ pɑ́ nɑ́ sɩ kɔkɔ tɑ nyɑɣɑ pɑ tiili. Pɑɑ pɑ nyɔɔsɩ yɑɑ pɑ wontu. Pǝyele pɑ tɔɔ mɑɣɑmɑɣɑ fɛɩ kɔkɔ sɔŋ. 28 Ḿpʋ́ɣʋ́ wulɑʋ tɔmɑ sɩ: Mɑ sɑmɑ Sɑtǝlɑkɩ, nɑ Mesɑkɩ, nɑ Apɛtɩ-Neko pɑ Ɩsɔ. Ɩnɩ ɩ tilinɑ ɩ ɩsɔtɑɑ tillu nɑ ɩ́ yɑ ɩ yǝlɑɑ. Mpi tɔ, pɑ tisɑ pɑ yuŋ kɛ ɩ tɔɔ kɛ́. Pɑ mʋ sǝm nɑ pɑ́ kisi mɑ kʋyɔɣɔtʋtʋ. Sɩ pɑ kɑɑ sɛɛ tʋɣʋ nɑ pɑ́ yele pɑ Ɩsɔ. 29 Pǝ tɔɔ kɛ́ mɑ kpɑɑlǝɣɩ mɑ kɑwulɑɣɑ tǝnɑ tɑɑ piitimnɑɑ. Ye wei ɩ́ tʋʋwɑ pɑnɛ ɩnɩ pɑ Ɩsɔ, pɑɑ tɔɔsɩ pʋntʋ nɑntʋ nɑ kpɑtɑsɩ. Pǝ́cɔ́ ɩ tǝyɑɣɑ kɑ́ mǝlɩ ncɑɑlɛ. Mpi tɔ, Ɩsɔ nɔɣɔlʋ ɩ fɛɩ, nɑ ɩ́ yɑkɩ yǝlɑɑ ɩsɩɩ ɩnɛ.
30 Ḿpʋ́ɣʋ́ wulɑʋ sɔɔsɑ pɑ nyɔɔŋ kʋsʋɣʋ kɛ Pɑpiloni tɛtʋ tɑɑ.
Wulɑʋ toosee nɑɑlɛ nyǝnɑ
31 Ḿpʋ́ɣʋ́ Nepukɑnɛsɑɑ ŋmɑɑ tɑkǝlɑɣɑ kɛ piitim nɑ nsǝmɑ tǝnɑ yǝlɑɑ mpɑ pɑ wɛ ɑntulinyɑ tǝnɑ tɑɑ tɔ nɑ ɩ́ sɛɛ-wɛ sɩ: Alɑɑfǝyɑ wɛɛ?
32 Mɑ cɑɑ mɑ kɛɛsɩ-mɛɣɛ piti tǝmɑ sɔsɔɔnɑ wenɑ Ɩsɔ Sɔsɔ lɑpɑ-m tɔ.
33 Ɩ piti tǝmɑ tɔɔwɑɣɑ.
A wɛ toŋ.
Ɩ kɑwulɑɣɑ wɛ tɑm tɔɔ.