7
Tɑniyɛɛlɩ toosee kɑncɑɑlɑɣɑ nyǝnɑ
1 Ḿpʋ́ɣʋ́ Pɑpiloni wulɑʋ Pɛlǝtɑsɑɑ kɑwulɑɣɑ pǝnɑɣɑ, kɑncɑɑlɑɣɑ nyǝŋkɑ tɑɑ, Tɑniyɛɛlɩ hǝntɑɑ nɑ ɩ́ toosi toosee.
2 Ɩlɛnɑ ɩ́ ŋmɑɑ-yɛ.
Tɑniyɛɛlɩ toosɑɑ kɛ́ sɩ: Heelim lɩɩnɑ ɑntulinyɑ tǝnɑ tɑɑ, nɑ pǝ́ lɑŋtǝɣɩ teŋku sɔsɔ.
3 Ḿpʋ́ɣʋ́ tɑɑlɛ wontu sɔsɔɔntʋ liɣiti lɩɩnɑ teŋku tɑɑ. Tɩɩ fɑɣɑnɑ tǝmɑɣɑ.
4 Kɑncɑɑlɑɣɑ nyǝŋkʋ nǝɣǝsǝnɑ tɔɣɔlɑɣɑ. Ɩlɛnɑ kʋ wɛnɑ hɛkǝlɛ keŋ. Ḿpʋ́ɣʋ́ pɑ kpɛsɑ kʋ keŋ ɩnɩ. Ɩlɛnɑ pɑ́ kʋsɩ-kʋ, nɑ pɑ́ sǝŋsɑ-kʋɣʋ kʋ nɔɔhɛɛ nɑɑlɛ tɔɔ ɩsɩɩ yʋlʋ. Ḿpʋ́ɣʋ́ pɑ tʋ-kʋɣʋ yʋlʋ lǝmɑɣɑsɛɛ.
5 Nɑɑlɛ nyǝŋkʋ nɑ́ nǝɣǝsǝnɑ tɑɑlɛ wontuɣu ɩsɑɣɑʋ nɑkʋlɩ. Nɑ kʋ sǝŋɑ kʋ nɔɔhɛɛ tooso tɔɔ kɛ́ kɔŋkɔŋ. Ɩlɛnɑ kʋ tɔkɑ sǝntɑɑsɩ tooso nɑ kʋ kelɑ. Nɑ pɑ́ yɔɣɔtǝɣɩ-kʋ sɩ, kʋ́ kʋlɩ nɑ kʋ́ li nɑntʋ.
6 Pǝlɛ pǝ wɑɑlɩ kɛ́ mɑ nɑ́ lɛŋkʋ, nɑ kʋ́ nǝɣǝsǝnɑ ɩsɩɩ kpou. Kʋ siɣile wɑɑlɩ kɛ́ keŋ liɣiti ɩsɩɩ sumɑɣɑ, nɑ kʋ nyɔɔŋ kɛ liɣiti. Ɩlɛnɑ pɑ́ tʋ-kʋɣʋ toŋ.
7 Ḿpʋ́ɣʋ́ mɑ nɑ wontuɣu liɣiti nyǝŋkʋ. Kʋ wɛ sɔɣɔntʋ kɛ sɔsɔm, nɑ kʋ tomɑ fɛɩnɑ tɑkɑ. Kʋ wɛnɑ nyǝɣǝlʋɣʋ kelɑ sɔsɔɔnɑ kɛ́. Kʋ tɔkɩ nɑ kʋ́ fɛlǝɣɩ nɔɔhɛɛ kɛ mpi pǝ kɑɑsɑɑ tɔ. Kʋ tɑ nǝɣǝsǝnɑ wontu nti tǝ tɔm tǝ tɛmɑ kɛɛsʋɣʋ tɔ. Kʋ hǝŋ wɛ nɑɑnʋwɑ.
8 Ḿpʋ́ɣʋ́ mɑ nɑ hǝlʋɣʋ sǝkpeluɣu lɩɩwɑ hɛkʋ tɑɑ, nɑ kʋ́ kpɛsɩ ɩ tɑɑ tooso. Kɩɩ wɛnɑ ɩsɛ kɛ́ ɩsɩɩ yʋlʋ, nɑ kʋ nɔɣɔ yɔɣɔtǝɣɩ kɑlɑmpɑɑnɩ tɔm.
Ɩsɔ hʋʋ tɔm
9 Ḿpʋ́ɣʋ́ mɑ nɑ pɑ sɩɩwɑ kumlee. Ɩlɛnɑ Tɑm tɔɔ tʋ nɔɣɔlʋ ɩ cɑɣɑ. Ɩ wontu hʋlʋmɑɑ kɛ́ tǝlɑɩlɑɩ. Ɩ nyɔɔsɩ wɛ ɩsɩɩ kpoŋkpomʋlʋm mɑɣɑmɑɣɑ. Ɩ kumte mʋkɑɣɑ kɔkɔ kɛ́, nɑ tǝ pɔpɔlɛɛ wɛ ɩsɩɩ mɑmɑlɑ.
10 Kɔkɔ lɩɩkɑɣɑ tǝ tɛɛ nɑ kɑ́ kpeŋ ɩsɩɩ pɔɣɔ kɛ ɩ ɩsɛntɑɑ. Yǝlɑɑ kɛ iyisi iyisi sǝŋɑ ɩ kiŋ nɑ pɑ tɑɑ lɛlɑɑ lɑkɩ-ɩ tǝmlɛ. Ḿpʋ́ɣʋ́ hʋʋlɑɑ cɑɣɑɑ nɑ pɑ́ hɛtɩ tɑkǝlɑsɩ.
11 Mɑ nyǝnɑɣɑ wontuɣu ŋku kʋ hǝlʋɣʋ yɔɣɔtɑɣɑ kɑlɑmpɑɑnɩ tɔm kɛ mpʋ tɔ, ɩlɛnɑ mɑ́ nɑ pɑ kʋ-kʋ, nɑ pɑ́ pɛtɩ kɔkɔ tɑɑ sɩ kʋ́ nyɑɣɑ.
12 Ḿpʋ́ɣʋ́ pɑ lɛɛkɑ wontu lɛntɩ tomɑ. Amɑ pɑ sɔɔsɑ-tǝɣɩ weesuɣu kɛ pǝcɔɣɔ wɑɑtʋ nɔɣɔlʋ ɩ tɔɔ.
13 Pǝ wɑɑlɩ kɛ́ mɑ nɑwɑ nɔɣɔlʋ nɑ ɩsɔŋmʋntʋ kɔŋnɑ-ɩ. Ɩ nǝɣǝsǝnɑ yʋlʋ pǝyɑɣɑ. Ḿpʋ́ɣʋ́ ŋmʋntʋ ntɩ tǝ ponɑ-ɩ nɑ tǝ́ kpǝtǝnɑ-ɩ Tɑm tɔɔ tʋ ɩnɩ.
14 Ḿpʋ́ɣʋ́ pɑ hɑ-ɩ toŋ nɑ teeli nɑ kɑwulɑɣɑ. Sɩ piitimnɑɑ tǝnɑ, nɑ nsǝmɑ yǝlɑɑ, ɩ́ lɑpɩ-ɩ tǝmlɛ. Ɩ toŋ kɑ́ wɛɛ tɑm kɛ́, nɑ ɩ kɑwulɑɣɑ kɑɑ tɛ.
Tɑniyɛɛlɩ toosee kɑncɑɑlɑɣɑ nyǝnɑ hʋwɛɛ kilisuɣu
15 Ḿpʋ́ɣʋ́ Tɑniyɛɛlɩ tɔmɑ sɩ: Mɑ toosee kpɑ-m sɔɣɔntʋ, nɑ pǝ pɛkǝlɩ-m mɑ tɑɑ.
16 Ɩlɛnɑ mɑ kpǝtǝnɑ mpɑ pɑɑ wɛ tǝnɑ tɔ, pɑ tɑɑ nɔɣɔlʋ. Ɩlɛnɑ mɑ́ pɔɔsɩ-ɩ pǝ tǝnɑ pǝ tɑmpɑnɑ, nɑ ɩ́lɛ́ ɩ kɛɛsɩ-m pǝ hʋwɛɛ.
17 Sɩ tɑɑlɛ wontu sɔsɔɔntʋ liɣiti ɩnǝɣǝlɛ, ɑntulinyɑ kɑwulɑsɩ nsi sɩɩ kɔɔ tɔ.
18 Pǝlɛ pɑ wɑɑlɩ kɛ́ ɩsɔtɑɑ Ɩsɔ sɔsɔ yǝlɑɑ kɑ́ tɔɣɔ kɑwulɑɣɑ kɛ tɑm tɔɔ.
19 Pǝ wɑɑlɩ kɛ́ mɑ luɣu lɑpɑ sɩ, mɑ́ nyɩ wontuɣu liɣiti nyǝŋkʋ tɑmpɑnɑ. Kɩɩ wɛ sɔɣɔntʋ kɛ sɔsɔm kɛ́. Kʋ tɑ nǝɣǝsǝnɑ lɛntɩ. Kʋ kelɑ kɛ nyǝɣǝlʋɣʋ kɛ́. Kʋ sǝkpɑŋ kɛ nyǝɣǝlʋɣʋ kʋsɛɛmʋɣʋ. Kʋ tɔkɩ kɛ́ nɑ kʋ fɛlǝɣɩ nɔɔhɛɛ kɛ mpi pǝ kɑɑsɑɑ tɔ.
20 Mɑ nyǝnɑ tɔtɔɣɔ kʋ hǝŋ nɑɑnʋwɑ. Nɑ ɩ tɑɑ lɛŋkʋ ŋku kʋ nyɔwɑ nɑ kʋ kpɛsɩ tooso tɔ. Kɩɩ wɛnɑ ɩsɛ kɛ́ nɑ nɔɣɔ. Kʋ yɔɣɔtɑɣɑ kɑlɑmpɑɑnɩ tɔm nɑ kʋ kǝlɑ lɛlǝŋ.
21 Tǝnɑɣɑ kʋ yoonɑ Ɩsɔ yǝlɑɑ, kʋ cɑɑkɑɣɑ-wɛɣɛ kǝlʋɣʋ.
22 Ḿpʋ́ɣʋ́ Tɑm tɔɔ tʋ kɔmɑ nɑ ɩ́ hɑ ɩsɔtɑɑ Ɩsɔ sɔsɔ yǝlɑɑ kɛ tɑmpɑnɑ. Pɑ kɑwulɑɣɑ tɔɣɔʋ wɑɑtʋ tɑlɑɑ kɛlɛ.
23 Ɩlɛnɑ ɩ́ kilisi-m wontuɣu liɣiti nyǝŋkʋ ŋkʋ kʋ hʋwɛɛ sɩ, ŋkʋɣʋlɛ ɑtɛ kɑwulɑɣɑ liɣiti nyǝŋkɑ ŋkɑ kɑ tɑ nǝɣǝsǝnɑ lɛŋsɩ tɔ. Kɑɑ tɔɣɔ ɑtɛ yǝlɑɑ tǝnɑ, nɑ kɑ́ fɛlɩ-wɛ nɑ kɑ́ yɔkɩ-wɛ.
24 Hǝŋ nɑɑnʋwɑ kɛlɛ, kɑ tɑɑ ɑwulɑɑ mpɑ pɑɑ tɔkɩ nɑ pɑ́ kɑɑsǝɣɩ tǝmɑ tɔ. Nɑɑnʋwɑ nɑ kʋlʋm nyǝŋ wei ɩ tɑ nǝɣǝsǝnɑ kɑncɑɑlɑɣɑ nyǝ́mɑ tɔ, ɩ kɑ́ tɔɣɔ ɩ nyǝŋkɑ kɛ pɛlɛ pɑ wɑɑlɩ, nɑ ɩ́ tɔɣɔnɩ pɑ tɑɑ tooso.
25 Ɩ kɑ tʋʋ ɩsɔtɑɑ Ɩsɔ sɔsɔ nɑ ɩ́ ŋmɑkǝlɩ ɩ yǝlɑɑ. Ɩ kɑ́ mɑɣɑsɩ ɩ tɑɑ sɩ ɩ́ lɑɣɑsɩ Ɩsɔ kiiŋ nɑ ɩ ɑcimɑnɑɑ. Ɩ kɑ́ ŋmɑkǝlɩ Ɩsɔ yǝlɑɑ kɛ pɩɩsɩ tooso nɑ hɔɣɔlʋɣʋ.
26 Pǝlɛ pǝ wɑɑlɩ pɑɑ hʋʋnɑ-ɩ nɑ pɑ́ lɛɛkɩ ɩ toŋ. Pɑɑ wɑkǝlɩ-ɩ tɑm tɔɔ.
27 Pɑɑ lɛɛkɩ ɑtɛ ɑwulɑɑ sɔsɔɔntʋ nɑ pɑ toŋ. Pɑɑ cɛlɑ ɩsɔtɑɑ Ɩsɔ sɔsɔ yǝlɑɑ. Yǝlɑɑ mpɛ pɑ kɑwulɑɣɑ kɑ́ wɛɛnɑ tɑm tɔɔ, nɑ ŋmɑkǝllɑɑ tǝnɑ kɑ́ nɩɩnɑ-wɛ nɑ pɑ́ lɑkɩ-wɛɣɛ tǝmlɛ.
28 Tɔm ntɩ tǝ tǝnɑɣɑ ntɔ. Ḿpʋ́ɣʋ́ pǝ pɛkǝlɑ-m mɑ hʋwɛɛ tɑɑ kɛ́ sɔsɔm. Ɩlɛnɑ mɑ́ mɑɣɑsǝɣɩ-tǝɣɩ mɑ tɑɑ.