7
Ɩsɛɣɛlɩ nyǝ́mɑ kɛ́ Ɩsɔ yǝlɑɑ
1 Ḿpʋ́ɣʋ́ Moisi tɑsɑɑ sɩ: Wɑɑtʋ wei Tɑcɑɑ kɑ́ tɔɣɔnɩ piitimnɑɑ sɔsɔɔm toŋ nyǝm nɑɑtosompɔɣɔlɑɣɑ, ɩlɛnɑ ɩ́ cɛlɛ-mɛɣɛ pɑ tɛtʋ. Ntǝɣǝlɛ Hiti nɑ Kilikɑsɩ nɑ Amolii nɑ Kɑnɑɑŋ nɑ Peliisi nɑ Hifi nɑ Yepusi pǝ tɛtʋnɑɑ.
2 Ɩ kɑ́ tʋ́ piitimnɑɑ mpɛɣɛ mǝ niŋ tɑɑ nɑ ɩ́ kǝlɩ-wɛ, nɑ ɩ́ kpiisi-wɛ. Pǝ fɛɩ sɩ ɩ́ wɛɛnɑ pɑ pǝtɔɔtǝlɛ nɑ mǝ nɑ-wɛ ɩ́ pɛɛlɩ nɔɣɔ nɑkǝlɩ.
3 Mǝ nɑ-wɛ ɩ́ tɑɑ kpɛntɩ ɑkpɑɣɑlɛ tɑɑ. Ɩ́ tɑɑ hɑ mǝ pɛɛlɑɑ kɛ pɑ pǝyɑlɑɑ, yɑɑ ɩ́ cɑɑ pɑ pɛɛlɑɑ kɛ mǝ pǝyɑlɑɑ.
4 Mpi tɔ, ye ɩ lɑpɑ mpʋ, ɩsɩɩ pɑ tolisɑ mǝ piyɑ nɑ pɛlɛ pɑ́ tǝŋ tɩɩŋ. Ɩlɛnɑ Tɑcɑɑ mʋ-mɛ nɑ pɑ́ɑ́nɑ́ nɑ ɩ kʋ-mɛɣɛ kpɑkpɑɑ.
5 Amɑ pǝ wɛɛ kɛ́ sɩ ɩ́ wɑkǝlɩ pɑ tǝlɑɑlɛnɑɑ, nɑ ɩ́ yɔkɩ pɛɛ kʋlɑlɑɑnɑ, nɑ ɩ́ sɛtɩ pɑ tesikɑsɩ nɑ ɩ́ nyɑɣɑsɩ pɑ tɩɩŋ kɛ kɔkɔ.
6 Mǝ Ɩsɔ Tɑcɑɑ nyǝnǝɣɩ-mɛɣɛ ɩ nyǝ́mɑ kɛ́. Ɩnɩ ɩ lǝsǝnɑ-mɛ sɩ ɩ́ pǝsɩ ɩ yǝlɑɑ kɛ ɑntulinyɑ piitimnɑɑ hɛkʋ.
Ɩsɔ tɔkɑ teu kɛ ɩ nɔɣɔ pɛɛlʋɣʋ
7 Pǝ tɑɣɑ ɩsɩɩ ɩ́ tɛɛ piitimnɑɑ tǝnɑɣɑ pɑɣɑlɛ tɔɣɔ Tɑcɑɑ luɣu sʋʋ-mɛ nɑ ɩ́ lǝsɩ-mɛ. Hɑlɩ mɛɣɛlɛ piitim sǝkpem kɛ lɛmpɩ tɑɑ.
8 Amɑ ɩ luɣu wɛ-mɛɣɛ nɑ ɩ́ sɔɔlɩ sɩ ɩ́ tɔkɩ nɔɣɔ ŋkɑ ɩ kɑ sɩɩ mǝ cɑɑnɑɑ tɔ. Nɑ ɩ́ cɛ-mɛɣɛ Icipiti wulɑʋ yomle tɑɑ nɑ ɩ toŋ sɔsɔɔŋ nɑ ɩ́ lǝsɩ-mɛ.
9 Pǝ wɛɛ sɩ ɩ́ nyɩ sɩ Tɑcɑɑ tike ntɛ́ Ɩsɔ. Ɩ tɔkɑ ɩ nɔɣɔ sɩɩʋ kɛ́ nɑ ɩ́ pɑɑsǝɣǝnɑ mpɑ pɑ sɔɔlǝɣɩ-ɩ nɑ pɑ́ tɔkǝɣɩ ɩ kʋsǝsɩɩtʋ tɔ hɑlǝnɑ pɑ lʋlʋŋ loosi iyɑɣɑ (1000).
10 Amɑ ɩ hɔŋ mpɑ pɑɑ cɑɑ-ɩ tɔ pɑ ŋkpɑŋŋ kɛ kpɑkpɑɑ, nɑ ɩ́ kpiisiɣi-wɛ.
11 Mpʋ tɔ, ɩ́ tɔkɩ kiiŋ nɑ kʋsǝsɩɩtʋ nɑ kʋtʋtʋtʋ nti mɑ tʋ-mɛɣɛ sɑŋɑ ɩsǝntɔ tɔ nɑ ɩ́ lɑkɩ-tɩ.
12 Ye ɩ́ nɩɩkɩ Tɑcɑɑ kʋtʋtʋtʋ nɑ ɩ tɔkǝɣɩ-tɩ nɑ ɩ́ lɑkɩ-tɩ Tɑcɑɑ mǝ Ɩsɔ kɑ́ tɔkɩ nɔɣɔ pɛɛlʋɣʋ nɑ kʋpɑntʋ nti ɩ kɑ sɩɩ mǝ cɑɑnɑɑ nɑ tuunɑʋ tɔ.
13 Ɩ kɑ́ sɔɔlɩ-mɛ nɑ ɩ́ kooli-mɛɣɛ kʋpɑntʋ kɛ tɛtʋ nti ɩ kɑ heelinɑ mǝ cɑɑnɑɑ nɑ tuunɑʋ sɩ ɩ kɑ́ hɑ-mɛ tɔ tǝ tɑɑ. Ɩlɛnɑ mǝ nɑ mǝ tɔlɑ ɩ́ huki. Nɑ tǝ́ lʋlɩ-mɛɣɛ tɔɣɔnɑɣɑ pee nɑ nim nɑ sʋlʋm.
14 Ɩsɔ kɑ́ kooli-mɛɣɛ kʋpɑntʋ nɑ pǝ́ kǝlɩ piitimnɑɑ tǝnɑ. Pɑ kɑɑ nɑ mǝ tɛɣɛ kɑɑlʋlɑɣɑ, pɑɑ ɑpɑlʋ yɑɑ ɑlʋ yɑɑ tɔtɛ.
15 Tɑcɑɑ kɑ́ hɑtǝlǝnɑ-mɛɣɛ Icipiti tɑɑ kʋtɔmǝŋ ɩsɑɣɑŋ ɩnɩ ɩ tǝnɑ. Amɑ ɩ kɑ́ tʋ-ɩ mpɑ pɑɑ cɑɑ-mɛ tɔ.
16 Ɩ́ kɑ́ kpiisi piitimnɑɑ tǝnɑ mpɑ Tɑcɑɑ kɑ́ tʋ́ mǝ niŋ tɑɑ tɔɣɔ, ɩ́ tɑɑ wɛɛnɑ pɑ pǝtɔɔtǝlɛ. Pǝ́cɔ́ pǝ fɛɩ sɩ ɩ́ tǝŋ pɑ tɩɩŋ, tɔfɔ pǝ kpɑɑ-mɛ ɩsɩɩ kɑtɔkɑ nɑ pǝ́ kʋ-mɛ.
Tɑcɑɑ kentiɣi ɩ yǝlɑɑ
17 Ntɑnyɩ ɩ́ kɑ́ mɑɣɑsɩ mǝ tɑɑ sɩ piitimnɑɑ mpɛ pɑ tɛɛ-mɛɣɛ pɑɣɑlɛ. Ɩ́ kɑɑ nyɩ ɩsǝnɑ ɩ́ kɑ́ lɑ nɑ ɩ́ tɔɣɔnɩ-wɛ tɔ.
18 Ɩ́ tɑɑ nyɑnɑ-wɛ. Ɩ́ tɔɔsɩ pǝ tǝnɑ mpi mǝ Ɩsɔ Tɑcɑɑ lɑpɑ Icipiti wulɑʋ nɑ Icipiti tɛtʋ tǝnɑ tɔ.
19 Ɩ́ nɑ́nɑ mǝ ɩsǝpǝle kɛ wɑhɑlɑnɑɑ mpɑ ɩ tʋ-wɛ tɔ, nɑ piti tǝmɑ nɑ kɔkɔlɔ nyǝnɑ wenɑ ɩ lɑpɑ nɑ ɩ́ lǝsɩ-mɛɣɛ Icipiti tɛtʋ tɑɑ nɑ tomɑ tɔ. Mpʋ ɩnɩ tɔtɔɣɔ ɩ kɑ́ lɑnɑ piitimnɑɑ mpɑ pɑ sɔɣɔntʋ ɩ wɛnɑ mpʋ tɔ.
20 Tɑcɑɑ mǝ Ɩsɔ kɑ́ tʋ-wɛɣɛ tʋntʋnyɑmǝŋ, nɑ pɑɑ pɑ tɑɑ lɛlɑɑ kɑ́ fiti nɑ pɑ́ ŋmɛlɩ, ɩ kɑ́ kʋ pɑ tǝnɑ.
21 Pǝ tɔɔ ɩlɛ, ɩ́ tɑɑ nyɑ-wɛ, mǝ Ɩsɔ sɔsɔ wei pɑ nyɑŋnɑ tɔ ɩ wɛ mǝ wɑɑlɩ kɛ́.
22 Ɩ kɑ tɔɣɔnɩ piitimnɑɑ mpɛɣɛ pǝcɔ pǝcɔɣɔ. Ɩ kɑɑ kpiisi-wɛɣɛ nɔɣɔ kʋlʋmɑɣɑ. Pǝ́ tɑɑ kɔɔ nɑ tɑɑlɛ wontu huki tɛtʋ tɑɑ nɑ tǝ́ kʋlɩ mǝ tɔɔ.
23-24 Mǝ Ɩsɔ kɑ́ tʋ́ pɑ nɑ pɑ ɑwulɑɑ kɛ mǝ niŋ tɑɑ, nɑ pɑ tɛɛ sʋʋkǝnɑ-mɛ, hɑlǝnɑ ɩ́ kpiisi-wɛ. Pɑ kɑɑ kpɑɣɑ mǝ tɔɔ kɛ́ nyɩɩlʋɣʋ. Pǝyele nɔɣɔlʋ kɑɑ tɑsɑ pɑ ɑwulɑɑ mpɛ pɑ hǝlɑ kɛ tɔɔsʋɣʋ.
25 Ɩ́ kɑ́ wɔ pɑ tɩɩŋ kʋsɑɑkǝŋ kɛ kɔkɔ. Amɑ ɩ́ tɑɑ nyɩɩlɩ pǝ tɔɔ wʋlɑ nɑ liɣitee kɛ kɔɔlʋɣʋ. Mpi tɔ, pǝ kɛ́ mǝ Ɩsɔ Tɑcɑɑ kɛ mpusi kɛ́. Pɩɩ kpɑ-mɛɣɛ ɩsɩɩ kɑtɔkɑ nɑ pǝ́ kʋ-mɛ.
26 Pǝ fɛɩ sɩ ɩ́ sʋʋnɑ mpusi nyǝm mpɩ pǝ tɑɑ pʋlʋɣʋ mǝ tɛɛsɩ tɑɑ, nɑ pǝ́ pǝsɩ-mɛɣɛ mpusi nyǝ́mɑ. Pǝ wɛɛ sɩ ɩ́ nyǝnɩ-wǝɣɩ ɑcɑɑlǝtʋ kɛ́ nɑ ɩ́ kisi-wɩ nɑ ɩ́ wɑkǝlɩ-wɩ.