3
Pɑɑ mpi nɑ pə wɑɑtʋ kɛ́
Pɑɑ mpi nɑ pə wɑɑtʋ kɛ ɑtɛɣɛ. Lʋlʋɣʋ wɛnɑ pə wɑɑtʋ kɛ́, nɑ səm nɑ pə wɑɑtʋ. Tʋɣʋ sɔʋ nɑ pə wɑɑtʋ, nɑ kʋ kpɛsʋɣʋ nɑ pə wɑɑtʋ. Kʋɣʋ wɛnɑ pə wɑɑtʋ kɛ́, nɑ wɑɑʋ nɑ pə wɑɑtʋ. Nmɑʋ nɑ pə wɑɑtʋ, nɑ yɔkʋɣʋ nɑ pə wɑɑtʋ. Wulɑ nɑ ɑ wɑɑtʋ kɛ́, nɑ woŋɑ nɑ ɑ wɑɑtʋ. Lɑŋwɑkəllɛ nɑ tə wɑɑtʋ, nɑ pɑɑlɛ nɑ tə wɑɑtʋ. Pɛɛ lɔɣɔʋ wɑɑtʋ wɛɛ kɛ́, nɑ ɑ tɔɔsʋɣʋ nɑ pə wɑɑtʋ. Wɑɣɑlʋɣʋ wɛnɑ pə wɑɑtʋ, nɑ pə́ kɑɑsɩ wɑɑtʋ wei n kɑ́ se-wɩ tɔ. Pɛɛkʋɣʋ wɑɑtʋ wɛɛ kɛ́, nɑ lepu nɑ pə wɑɑtʋ. Wɑɑtʋ wei yʋlʋ kɑ́ sɩɩ pʋlʋ tɔ, nɑ wɑɑtʋ wei ɩ kɑ́ lɔ-wɩ tɔ. Cəlʋɣʋ wɑɑtʋ wɛɛ kɛ́, nɑ nyɑlʋɣʋ nɑ pə wɑɑtʋ. Sum wɛnɑ pə wɑɑtʋ kɛ́, nɑ yɔɣɔtɑɣɑ nɑ kɑ wɑɑtʋ. Sɔɔlʋɣʋ wɑɑtʋ wɛɛ kɛ́, nɑ pə kɑɑsɩ tɑɑ kpɑnɑʋ wɑɑtʋ. Ɩlɛnɑ yoou nɑ kʋ wɑɑtʋ, nɑ hɛɛsʋɣʋ nɑ kʋ wɑɑtʋ.
Pepeɣe təmlɛ lɑtʋ wɑɑkɩ? 10 Mɑ nɑwɑ kʋlɑpəlɛ nte Ɩsɔ tʋɣɩ yəlɑɑ tɔ. 11 Pə tənɑ mpi ɩ lɑpɑ tɔ pə tewɑ pə wɑɑtʋ kɛ́. Hɑlənɑ ɩ́ tʋ yəlɑɑ tɑɑ kɛ́ tɑm tɔɔ ləmɑɣɑsəlɛ. Pɑɑ nɑ yʋlʋ ɩɩ pəsəɣɩ nɑ ɩ́ cɛkənɑ təmlɛ nte Ɩsɔ lɑpɑ hɑtoo kɑncɑɑlɑɣɑ nɑ tə tənɑɣɑ tɔ. 12 Ɩlɛnɑ mɑ́ cɛkənɑ sɩ yəlɑɑ fɛɩnɑ lɑŋhʋlʋmlɛ nɑtəlɩ. Ye pə tɑɣɑ pɑ́ hɑ pɑ təɣɩ pɑ tɩ leleŋ nɩɩʋ tɑɑ kɛ́ pɑ weesiŋ wɑɑtʋ. 13 Yʋlʋ tɔkʋɣʋ nɑ ɩ́ nyɔɔkɩ nɑ ɩ́ yɔɔləɣənɑ ɩ təmlɛ kʋlʋlʋm tɔ pə kɛ́ Ɩsɔ kʋcɔɔʋ kɛ́. 14 Ɩlɛnɑ mɑ́ cɛkənɑ sɩ pə tənɑ mpi Ɩsɔ lɑkɩ tɔ pə wɛ tɑm tɔɔ kɛ́. Pʋlʋ tɑ sɔɔsɩ pə́cɔ́ pə tɑ pɑsɑ. Ɩ lɑkɩ ḿpʋ́ɣʋ́ sɩ yəlɑɑ ɩ́ nyɩ ɩ sɔsɔɔntʋ. 15 Mpi pə lɑkɩ nɔɔnɔɔ nɑ mpi pɩɩ tɛ nɑ pə́ kɔɔ tɔ, pɩɩ tɛmɑ lɑpʋ kɛ hɑtoo lɔŋ kɛ́. Ɩsɔ lɑkənɑ nɑ pə́ lɛləɣɩ.
Pə tənɑ pə tɛɛsəɣənɑ səm kɛ́
16 Ḿpʋ́ɣʋ́ mɑ tɑsɑ cɛkənɑʋ tɔtɔ sɩ, ɩsɑɣɑtʋ tɔkənɑ kɑwulɑɣɑ kɛ timpi pɩɩ wɛɛ sɩ pɑ́ təŋ siɣisuɣu nɑ pɑ́ hɑ tɑmpɑnɑ tɔ. 17 Ɩlɛnɑ mɑ́ tɔ sɩ: Ɩsɔ kɑ́ hʋʋnɑ ɩsɑɣɑʋ nɑ siɣisilu kɛ́. Mpi tɔ, pɑɑ mpi pə lɑkɩ pə wɑɑtʋ kɛ́. 18 Ye pə kɑɑsɑ yəlɑɑ ɩlɛ Ɩsɔ mɑɣɑsəɣɩ-wɛɣɛ sɩ pɑ́ cɛkənɑ sɩ pɑ tɑ kəlɩ tɔlɑ kɛ pʋlʋ. 19 Pə kpɛntɑ yʋlʋ nɑ tɔtɛ kɛ kpɑ́tʋ́ɣʋ́ kʋlʋmʋɣʋ kɛ́. Feesuɣu kʋlʋmʋɣʋ kɛ pɑ wɛnɑ, pɑ nɑɑlɛ pɑɑ tɛ nɑ pɑ́ sɩ. Yʋlʋ tɑ kəlɩ tɔtɛ. Mpi tɔ, pə tənɑ pə cɛkənɑʋ wɛ kɑtɛ tɔ se. 20 Pɑ tənɑ pɑɑ tɑɣɑnɩ tɛtʋ nti pɑɑ ŋmɑnɑ-wɛ tɔɣɔ pəsʋɣʋ kɛ́. 21 Nɔɣɔlʋ kɑɑ pəsɩ nɑ ɩ́ hʋlɩ təfoo sɩ yəlɑɑ ləsɑsɩ kpɑɑkɩ ɩsɔ nɑ tɔlɑ nyənsɩ nɑ́ɑ́ sɑɑlɩ ɑtɛ. 22 Tənɑɣɑ mɑ cɛkənɑɑ sɩ yʋlʋ fɛɩnɑ pʋlʋ nɑ pə́ tɛɛ sɩ ɩ́ yɔɔlənɑ ɩ təmlɛ kʋlʋlʋm. Mpi pə hɑ-ɩ tɔɣɔlɛ. Pə tɑɣɑ pʋlʋ, ɩ kɑɑ pəsɩ nɑ ɩ́ yɔɔlənɑ cele nyəm nɑ ɩ́ tɑ tɑtɑ tənɑ.