2
Ɩsɔ tiliɣi Ɩsekiyɛɛlɩ kɛ Ɩsɛɣɛlɩ nyǝ́mɑ kiŋ
1 Ḿpʋ́ɣʋ́ yʋlʋ nǝɣǝsǝlɛ ńtɛ́ tǝ tɔmɑ-m sɩ: Yʋlʋ nyɑ́, sǝŋ nyɑ́ nɔɔhɛɛ tɔɔ nɑ mɑ́ yɔɣɔtǝnɑ-ŋ.
2 Pǝ yɔɣɔtǝnɑ-m tɔmnɑɑ mpɛ tɔɣɔ Feesuɣu sʋʋ mɑ tɑɑ, nɑ kʋ́ yele nɑ mɑ́ sǝŋ mɑ nɔɔhɛɛ tɔɔ. Ɩlɛnɑ mɑ́ nɩɩ wei ɩ yɔɣɔtɑɣɑnɑ-m tɔ ɩ tɔm.
3 Wenti ɩ yɔɣɔtɑɣɑnɑ-m tɔɣɔlɛ sɩ: Yʋlʋ nyɑ́ mɑ tiliɣi-ŋ Ɩsɛɣɛlɩ ɑsɑɣɑɑ mpɑ pɑ kʋlǝɣɩ mɑ tɔɔ tɔ pɑ kiŋ. Pɑnɑ pɑ cɑɑnɑɑ pɑ wɑkǝlǝnɑ-m kɛ́. Pɑɑ hɑlǝnɑ sɑŋɑ ɩsǝntɔ.
4 Yǝlɑɑ mpɛ pɑ kɛ́ kpɑŋkpɑntʋnɑɑ kɛ́ nɑ pɑ nyɑmɑ nɑ kpɩɩsǝŋ. Polo pɑ kiŋ nɑ ń heeli-wɛ sɩ, Tɑcɑɑ Ɩsɔ yɔɣɔtǝɣɩ sɩ
5 pɑ kɛ́ ɑsɑɣɑɑ kɛ́. Ɩlɛ pɑɑ pɑ nɩɩkɩ yɑɑ pɑɑ nɩɩkɩ, pɑ kɛ́ tɔɔ kʋllɑɑ kɛ́. Pɑɑ cɛkǝnɑ sɩ ɑsɑɣɑɑ wɛ pɑ hɛkʋ.
6 Tɑɑ nyɑnɑ yǝlɑɑ mpɛ, yɑɑ pɑ kʋyɔɣɔtʋtʋ. Pɑɑ pɑ wɛ-m ɩsɩɩ sɔwɑ yɑɑ pǝcɛsɩ, pǝ fɛɩ sɩ ń nyɑnɑ ɑsɑɣɑɑ mpɛ pɑ kʋyɔɣɔtʋtʋ yɑɑ pɑ yɑɑsi.
7 Pǝ wɛɛ kɛ́ sɩ ń heeli-wɛɣɛ mɑ tɔm té, ye pɑ nɩɩwɑ yɑɑ pɑ tɑ nɩɩ, pɑ kɛ́ ɑsɑɣɑɑ kɛ́.
8 Nɩɩ nti mɑ heeliɣi-ŋ tɔ. Tɑɑ lɑ ɩsɑɣɑʋ ɩsɩɩ ɑsɑɣɑɑ mpɛ. Hɑɑ nyɑ́ nɔɣɔ nɑ ń tɔɣɔ mpi mɑɑ cɛlɛ-ŋ tɔ.
9 Mɑ nyǝnɑɣɑ mpʋ, ɩlɛ mɑ nɑwɑ niŋ ntɛ́ nɑ ɩ́ siɣisinɑ-m, nɑ ɩ tɑɑ nɑ tɑkǝlɑɣɑ hɔʋlɛ.
10 Ntɛnɑ pǝ hɛtɩ-kɛɣɛ mɑ ɩsɛntɑɑ tǝnɛ ɩnɩ, nɑ pǝ́ ŋmɑɑ kɑ tɑɑ nɑ kɑ wɑɑlɩ kɛ́ lɑŋwɑkǝllɛ tɔm. Nɑ kʋnyɔwiinɑ nɑ mɔlɑ tɔm kɛ pǝ tɑɑ tɔtɔ.