4
Yutɑ nyǝ́mɑ kolontunɑɑ sǝŋsɑ Ɩsɔ tǝsɛɛlɛ ŋmɑʋ
1 Ḿpʋ́ɣʋ́ Ɩsɛɣɛlɩ nyǝ́mɑ kolontunɑɑ nɩɩwɑ sɩ, Yutɑ nɑ Pɛncɑmɛɛ pǝ nyǝ́mɑ kɔmnɑ Pɑpiloni, nɑ pɑ́ ŋmɑɑkɩ timpi pɑɑ sɛɛ Tɑcɑɑ Ɩsɔ tɔ.
2 Ɩlɛnɑ pɑ́ polo nɑ pɑ́ mɑɣɑnɑ Solopɑpɛɛlɩ nɑ lʋlʋŋ nyɔɔŋ nyǝ́mɑ nɑ pɑ́ tɔ-wɛ sɩ: Tɑ́ luɣu wɛɛ sɩ tǝ́ sǝnɑ-mɛɣɛ Ɩsɔ tǝsɛɛlɛ ńtɛ́ tǝ ŋmɑʋ. Tɑ mɑɣɑmɑɣɑ tǝ sɛɛkɑɣɑ Ɩsɔ kʋlʋm ɩnǝɣɩ nɑ tǝ́ lɑkɩ-ɩ kɔtɑsɩ kɛ hɑtoo kʋyɑŋku Asilii wulɑʋ Asɑlɑtɔŋ kɔnɑ-tʋɣʋ cǝnɛ tɔ.
3 Amɑ Solopɑpɛɛlɩ nɑ Yesuwɑ nɑ Ɩsɛɣɛlɩ lʋlʋŋ nyɔɔŋ nyǝ́mɑ lɛlɑɑ pɑ cɔwɑ sɩ: Pǝ tɑ mʋnɑ sɩ ɩ́ sǝnɑ-tʋ nɑ tǝ́ ŋmɑ tɑ́ Ɩsɔ kɛ tǝsɛɛlɛ. Tɑ tike tɩɩ ŋmɑnɑ-ɩ. Mpi tɔ, pǝ kɛ́ tɑ́ Ɩsɔ Tɑcɑɑ tǝsɛɛlɛ kɛ́. Pɛɛsɩ wulɑʋ sɔsɔ Silusi mɑɣɑmɑɣɑ kɑ sɩɩ ḿpʋ́ɣʋ́.
4 Ḿpʋ́ɣʋ́ kolontunɑɑ mpɛ pɑ mɑɣɑsɑɑ sɩ pɑ nyɑɑsǝɣɩ Yutɑ nyǝ́mɑ nɑ pǝ́ yɔɔlɩ pɑ ɑpɑlʋtʋ nɑ pɑ́ yele Ɩsɔ tǝsɛɛlɛ ŋmɑʋ.
5 Hɑlǝnɑ pɑ́ hɑ wulɑʋ wɑɑlɩ nyǝ́mɑ kɛ liɣitee sɩ pɑ́ wɑkǝlɩ Yutɑ nyǝ́mɑ tǝmlɛ kɛ pǝ kpɑɣɑʋ Pɛɛsɩ wulɑʋ Silusi pɔɔlɛ hɑlǝnɑ pǝ tɑlɑ Tɑliyusi wɑɑtʋ.
Pɑ kulɑ Yutɑ nyǝ́mɑ wɑɑlɩ kɛ wulɑʋ Atɑkǝsɛsɛɛ kiŋ
6 Ḿpʋ́ɣʋ́ Yutɑ nyǝ́mɑ kolontunɑɑ ŋmɑɑ Atɑkǝsɛsɛɛ kɛ tɑkǝlɑɣɑ kɛ ɩ kɑwulɑɣɑ kɑncɑɑlɑɣɑ wɑɑtʋ nɑ pɑ́ suu Yosɑlɛm nɑ Yutɑ tɛtʋ nyǝ́mɑ kɛ tɔm.
7 Ɩlɛnɑ Piselɑm, nɑ Mitǝletɑtɩ, nɑ Tɑpeyɛlɩ, nɑ pɑ tɑɑpɑlɑɑ pɑ́ ŋmɑɑ wulɑʋ Atɑkǝsɛsɛɛ tɔtɔ nɑ Alɑɑmee tɔm tɑɑ nɑ tǝ ŋmɑɑtʋ pee.
8 Ḿpʋ́ɣʋ́ hɔɣɔlʋɣʋ ŋkʋ kʋ kʋfǝnɛɛ Lehum nɑ ɩ tɑkǝlɑsɩ ŋmɑɑlʋ Simesɑyi pɑ ŋmɑɑwɑ wulɑʋ Atɑkǝsɛsɛɛ tɔtɔɣɔ Yosɑlɛm tɔm sɩ:
9 Tɑɣɑ hɔɣɔlʋɣʋ kʋfǝnɛɛ Lehum nɑ ɩ wɑɑlɩ tʋ Simesɑyi, nɑ tɑ́ tɑɑpɑlɑɑ mpɑ tɑ tǝ wɛ Tiŋ, nɑ Afɑsɑtɑkɩ, nɑ Tɑɑpɛlɩ nɑ Afɑlɑsɩ, nɑ Ɩlɛkɩ, nɑ Pɑpiloni, nɑ Susi, nɑ Tehɑ, nɑ Ɩlɑm pǝ hɔɣɔlǝŋ tɑɑ tɔ.
10 Nɑ yǝlɑɑ lɛlɑɑ mpɑ Asilii wulɑʋ sɔsɔ lɛlʋ Asǝnɑpɑɑ kɑ kpɑɣɑɑ nɑ ɩ́ sɩɩ Sɑmɑlii ɑcɑlɛɛ tɑɑ nɑ Ɩfǝlɑtɩ pɔɣɔ tɛtʋ kʋkɑɑsǝtʋ nti tǝ wɛnɑ ilim tǝtʋlɛ hɔɣɔlʋɣʋ tɔɔ tɔ nɑ lɛntǝnɑɑ tɔ.
11 Pɑ tɑkǝlɑɣɑ ŋkɛ kɑ tɑɑ tɔm ntɛ́ sɩ: Tɑcɑɑ wulɑʋ Atɑkǝsɛsɛɛ, tɑɣɑ nyɑ́ tǝmlɛ nyǝ́mɑ mpɑ pɑ wɛnɑ Ɩfǝlɑtɩ pɔɣɔ kʋteŋ nɑ cǝnɛ tɔɔ tɔ.
12 Tɑ heeliɣinɑ-ŋ sɩ Yutɑ nyǝ́mɑ mpɑ pɑ lɩɩ nyɑ́ tɛ tɔ pɑ tɑlɑ Yosɑlɛm cǝnɛ nɑ pɑ tɑɑ wɛɛ sɩ pɑ tɑɣɑnǝɣɩ yǝlɑɑ ɑsɑɣɑɑ nɑ tɔɔ kʋllɑɑ ɩcɑtɛ ntɛɣɛ ŋmɑʋ. Hɑlɩ pɑ tɛmɑ koluŋɑ kite kɛ tɑɣɑnʋɣʋ nɑ pɑ́ ŋmɑɑkɩ.
13 Tɑcɑɑ, nyɩ teu sɩ ye yǝlɑɑ pɑnɛ pɑ ŋmɑ́ pɑ ɩcɑtɛ nɑ tǝ koloosi, ɩcɑtɛ nyǝmɑ kɑɑ tɑsɑ lɑmpuunɑɑ fɛlʋɣʋ nɑ liɣitee kɑɑ wɛɛ kɑwulɑɣɑ kpɑncoou tɑɑ.
14 Pǝ tɔɔ kɛ́ tɑ mpɑ tǝ lɑpɑ nyʋleleŋ nɑ tǝ kɛ́ nyɑ́ tǝmlɛ nyǝ́mɑ tɔ, ye tǝ nyǝnǝɣɩ ɩsǝnɑ pɑɑ tʋɣʋnɑ-ŋ tɔ pǝ wɩɩkɩ-tʋ. Ɩlɛ tǝ mɑɣɑsǝɣɩ kɛ́ sɩ
15 ń pɛɛkɩ nyɑ́ cɑɑnɑɑ tɑkǝlɑsɩ kʋpǝŋsɩ tɑɑ, n kɑ́ mɑɣɑnɑ sɩ ɩcɑtɛ tǝnɛ tǝ yǝlɑɑ kɛ́ ɑsɑɣɑɑ kɛ́. Tuu tɔ tǝ yǝlɑɑ tɑ hɛɛsɩ wulɑʋ sɔsɔ nɑ hɔɣɔlʋɣʋ kʋfǝnɛɛ kɛ wɑkǝlʋɣʋ, nɑ tǝ yǝlɑɑ kʋlǝɣɩ tǝmɑ tɔɔ kɛ́ tɑm kɛ́. Pǝ mɑɣɑmɑɣɑ pǝ tɔɔ kɛ́ tǝ yɔkɑɑ.
16 Tɑcɑɑ, tǝ kpɑɑlǝɣɩ-ŋ sɩ, ye ɩcɑtɛ tǝnɛ nɑ tǝ koloosi pǝ ŋmɑwɑ, n kɑɑ pǝsɩ Ɩfǝlɑtɩ pɔɣɔ hɔɣɔlʋɣʋ kʋnɛ.
Wulɑʋ Atɑkǝsɛsɛɛ kʋcɔcɔtʋ
17 Wulɑʋ sɔsɔ ŋmɑɑwɑ kʋfǝnɛɛ Lehum nɑ ɩ tɑkǝlɑsɩ ŋmɑɑlʋ Simesɑyi nɑ pɑ tɑɑpɑlɑɑ mpɑ pɑ sɩɩ Sɑmɑlii nɑ Ɩfǝlɑtɩ pɔɣɔ kʋteŋ tɛtʋ tɑɑ tɔ sɩ: Mɑ nyǝ́mɑ mɛ, mɑ sɛɛ-mɛ.
18 Tɑkǝlɑɣɑ ŋkɑ ɩ ŋmɑɑ-m tɔ pɑ tɛlǝsɑ-kɛ nɑ pɑ kɑlɑ-m.
19 Mɑ yelɑɑ nɑ pɑ pɛɛkɩ ɩcɑtɛ ntɛ tǝ tɔm nɑ pɑ́ nɑ́ tɑmpɑnɑ sɩ hɑtoo tɔ, Yosɑlɛm ɩcɑtɛ nyǝ́mɑ kʋlǝɣɩ ɑwulɑɑ tɔɔ kɛ́ tɑm kɛ́.
20 Pǝ kɑɑsɑ ɩcɑtɛ ńtɛ́ tɔ, ɑwulɑɑ nɑpǝlɩ pɑ tɔkɑɣɑnɑ kɑwulɑɣɑ nɑ pɑ́ ŋmɑkǝlǝɣɩ hɔɣɔlʋɣʋ ŋkʋ kʋ nyǝ́mɑ, nɑ pɑ́ mʋɣɩ-wɛɣɛ lɑmpuunɑɑ nɑ pɑ́ fɛlǝɣɩ-wɛ nɑ pǝ́cɔ́ pɑ́ sʋʋkɩ pɑ tɛtʋ tɑɑ.
21 Mpʋ tɔ, ɩ́ heeli Yutɑ nyǝ́mɑ sɩ pɑ́ sǝŋ nɑ mɑ́ hɑwɑ nɔɣɔ ɩlɛ pǝ́cɔ́ pɑɑ ŋmɑ́.
22 Ɩ́ pɑɑsǝnɑ teu yoo, ɩ́ tɑɑ too tɔm ntɩ tǝ tɔɔ. Pǝ tɑɑ kɔɔ nɑ pǝ́ tɑsɑ-tʋɣʋ wɑkǝlʋɣʋ tɔtɔ.
23 Too ɩsɩɩ Lehum nɑ ɩ tɑkǝlɑsɩ ŋmɑɑlʋ Simesɑyi nɑ pɑ tɑɑpɑlɑɑ pɑ kɑlʋɣʋ wulɑʋ tɑkǝlɑɣɑ tɔ, pɩɩ lɑkɩ-wɛɣɛ lɔŋ. Tǝnɑɣɑ pɑ polɑ kpɑkpɑɑ nɑ pɑ́ cɑ́ɑ́lɩ́ Yutɑ nyǝ́mɑ nɑ tɔm ntɩ tǝ toŋ sɩ pɑ́ yele ŋmɑʋ.
Pɑ tɑɣɑnǝɣɩ Ɩsɔ tǝsɛɛlɛ kɛ ŋmɑʋ
24 Ḿpʋ́ɣʋ́ Yosɑlɛm Ɩsɔ tǝsɛɛlɛ ŋmɑʋ sǝŋɑɑ hɑlǝnɑ pǝ́ tɑlɑ Pɛɛsɩ wulɑʋ Tɑliyusi kɑwulɑɣɑ pǝnɑɣɑ nɑɑlɛ nyǝŋkɑ.