7
Hɑmɑŋ kʋɣʋ
1 Ḿpʋ́ɣʋ́ wulɑʋ nɑ Hɑmɑŋ pɑ polɑ Ɩsǝtɛɛ tɛɣɛ tɔɣɔʋ.
2 Wɑɑtʋ wei pɑ cɑɣɑ sʋlʋm nyɔɔʋ ɩlɛnɑ wulɑʋ pɔɔsɩ Ɩsǝtɛɛ kɛ kʋlʋmtʋ nti ɩ kɑ pɔɔsɑ-ɩ tete tɔ sɩ: Pepeɣe n nyɩɩlǝɣɩ yee? Pɑɑ mɑ kɑwulɑɣɑ hɔɣɔlʋɣʋ mɑɑ hɑ-ŋ.
3 Mpʋɣʋlɛ Ɩsǝtɛɛ sɩ: Hɑɩ, mɑ cɛ, mɑ nyɩɩlǝɣɩ kɛ́ sɩ ń yɑ mɑ́ nɑ mɑ yǝlɑɑ tɑ́ weesiŋ.
4 Pǝ tɑɣɑ pʋlʋ, pɑ pɛɛtɑ-tʋ sɩ pɑ lɛntǝɣɩ nɑ pɑ́ kpiisi-tʋ. Ye pɑɑ pɛɛtɑ-tʋɣʋ sɩ tǝ tɔɣɔ yomle, mɑɑ sumɑɣɑ mɑ tɑɑ nɔkɩ nɑ mɑ́ kɑɣɑtǝɣɩ-ŋ.
5 Ḿpʋ́ɣʋ́ wulɑʋ pɔɔsɑ Ɩsǝtɛɛ sɩ: Pepee, ɑwe mɑɣɑsǝnɑ ḿpʋ́ɣʋ́ ɩ tɑɑ? Le-tʋ?
6 Ntɛnɑ Ɩsǝtɛɛ sɩ: Tɑ́ kolontu sɔsɔ ɩnǝɣǝlɛ ɩsɑɣɑʋ Hɑmɑŋ ɩnɛ.
Tǝnɑɣɑ Hɑmɑŋ tɔnʋɣʋ lʋlɑ pee kɛ wulɑʋ nɑ Ɩsǝtɛɛ pɑ ɩsɛntɑɑ tǝnɑ.
7 Ɩlɛnɑ wulɑʋ kʋlǝnɑ pɑ́ɑ́nɑ́ kɛ tǝtɔɣɔlɛ nɑ ɩ́ lɩɩ nɔnɔɣɔ tɛɛ kɛ́ tɩɩŋ tɛɛ. Hɑmɑŋ cɛkǝnɑɑ sɩ ɩ tɔm tɛmɑ, ɩlɛnɑ ɩ́ sɑɑlɩ Ɩsǝtɛɛ kiŋ nɑ ɩ́ wiikinɑ-ɩ sɩ: Wɑɑsɩ-m.
8 Wulɑʋ lɩɩnɑ ɑwɑlɩ nɑ ɩ́ sʋʋ, ɩlɛ ɩ mɑɣɑnɑ Hɑmɑŋ luŋɑ Ɩsǝtɛɛ tǝcɑɣɑlɛ ntɛ́. Mpʋɣʋlɛ wulɑʋ mɑpɑ kɑpukɑ sɩ: Pǝ kpɛŋnɑ mɑ ɑlʋ nɑ ń kpiki ɩlɛɣɛ mɑ ɩsɛntɑɑ cǝnɛ tɔtɔ?
Wulɑʋ nɔɣɔ tɑ tɩɩ tiitɑ ɑtɛ. Ɩlɛnɑ tǝmlɛ nyǝ́mɑ hɔkɔ Hɑmɑŋ ɩsɛntɔɔ. Ḿpʋ́ɣʋ́ pɑ hɔkɑɣɑ mpɑ pǝ wɛɛ sɩ pɑ́ kʋ tɔ.
9 Ḿpʋ́ɣʋ́ tǝmlɛ nyǝ́mɑ tɑɑ lɛlʋ wei pɑ yɑɑ sɩ Hɑponɑ tɔ ɩ heelɑ wulɑʋ sɩ: Hɑmɑŋ kɑ sɑɑkɑ tesikɑ nɑ kɑ́ kʋlɩ mɛɛtǝlǝnɑɑ hiu nɑ kɑkpɑsɩ kɛ ɩ nɔnɔɣɔ tɛɛ sɩ, ɩ pusiɣi Mɑɑtosee wei ɩ kɑ wɑɑsɑ-ŋ tɔ. Ɩlɛnɑ wulɑʋ sɩ: Pɑ pusi-ɩ tǝnɑ.
10 Ɩlɛnɑ pɑ́ pusi-ɩ nɑ tesikɑ ŋkɑ ɩ kɑ sɑɑkɑ Mɑɑtosee tɔɔ tɔ. Ɩlɛnɑ wulɑʋ pɑ́ɑ́nɑ́ tii tǝfɛ.