8
1 Ḿpʋ́ɣʋ́ Tɑcɑɑ tɑsɑ Moisi kɛ heeluɣu tɔtɔ sɩ heeli Alɔŋ sɩ: Hʋ́lɩ́ nyɑ́ kpɑ́tʋ́ɣʋ́ nɑ pusi nɑ lɔɔŋ nɑ lʋcɑɣɑmnɑɑ tɔɔ nɑ sɑlɛɛ lɩɩ Icipiti.
2 Alɔŋ nɑ́ hʋ́lɑ́ ɩ kpɑ́tʋ́ɣʋ́ kɛ mpʋ, ɩlɛnɑ sɑlɛɛ lɩɩ Icipiti lʋmnɑɑ tɑɑ nɑ ɑ́ wɑɑsɩ tɛtʋ tǝnɑ.
3 Ḿpʋ́ɣʋ́ Icipiti tʋwɑɑ nɑ́ lɑpɑ mpʋ nɑ pɑ topotopotʋ tɑɑ tɔtɔ, nɑ sɑlɛɛ lɩɩ nɑ ɑ́ kpɑ tɛtʋ tǝnɑ tɑɑ.
4 Ntɛnɑ Icipiti wulɑʋ yɑɑ Moisi nɑ Alɔŋ nɑ ɩ́ tɔ-wɛ sɩ: Ɩ́ wiinɑ Tɑcɑɑ nɑ ɩ́ hɑtǝlǝnɑ sɑlɛɛ ɑnǝɣɩ mɑ́ nɑ mɑ́ yǝlɑɑ. Pǝ wɑɑlɩ ɩlɛ mɑɑ yele Ɩsɛɣɛlɩ nyǝ́mɑ nɑ pɑ́ polo pɑ́ lɑ́ Ɩsɔ kɛ́ kɔtɑsɩ.
5 Tǝnɑɣɑlɛ Moisi cɔ Icipiti wulɑʋ sɩ: Tɑ cɑɑ, lǝsɩ nyɑ́ mɑɣɑmɑɣɑ kɛ sɑɑ wei n sɔɔlɑɑ sɩ mɑ́ sǝlǝmɩ Ɩsɔ kɛ́ mǝ tɔɔ nɑ ɩ́ kʋ́ sɑlɛɛ kɛ nyɑnɑ nyɑ́ sɑmɑɑ nɑ nyɑ́ tǝmlɛ nyǝ́mɑ mǝ tɛɛsɩ tɑɑ nɑ ɑ́ mǝlɩ pɔɣɔ tɑɑ tike tɔ.
6 Kɛlɛnɑ wulɑʋ sɩ: Cele kɛ mɑ cɑɑkɩ sɩ ń sǝlǝmɩ Ɩsɔ. Ntɛnɑ Moisi sɩ: Tɔʋ, pǝ wɛ teu. Mɑɑ lɑ mpʋ, ɩlɛnɑ pǝ́cɔ́ ń cɛkǝnɑ sɩ tɑ́ Ɩsɔ Tɑcɑɑ fɛɩnɑ sɑɑlɑ.
7 Pɔpɔtʋ fɛɩ leleŋ, sɑlɛɛ kɑ́ lɩɩ nyɑnɑ nyɑ́ sɑmɑɑ nɑ nyɑ́ tǝmlɛ nyǝ́mɑ mǝ tɛɛsɩ tɑɑ nɑ ɑ́ mǝlɩ pɔɣɔ tɑɑ tike.
8 Ḿpʋ́ɣʋ́ Moisi nɑ Alɔŋ pɑ lɩɩ Icipiti wulɑʋ tɛ́. Ɩlɛnɑ Moisi sǝlǝmɩ Ɩsɔ kɛ́ sɑlɛɛ ɑnɩ ɑ tɔɔ.
9 Ɩlɛnɑ Tɑcɑɑ lɑ ɩsɩɩ ɩ sǝlǝmʋɣʋ tɔ, nɑ sɑlɛɛ sɩ tɛɛsɩ tɑɑ nɑ tɑɑsɩ tɔɔ nɑ tɑwɑ tɑɑ.
10 Ḿpʋ́ɣʋ́ pɑ kotɑ-yɛɣɛ huwɑ huwɑ. Ɩlɛnɑ ɩcɑtɛ tǝnɑ sɔŋ pǝ fɛɩ teu.
11 Icipiti wulɑʋ nɑwɑ sɩ ɩ wɑhɑlɑ pɑsɑɑ, ɩlɛnɑ ɩ́ lɑ́ lɑŋkpɩɩsǝŋ nɑ ɩ́ kisi Moisi nɑ Alɔŋ kɛ nɩɩnɑʋ kɛ teitei ɩsɩɩ Tɑcɑɑ kɑ yɔɣɔtʋɣʋ tɔ.
Wɑhɑlɑ tooso nyǝŋ
12 Ḿpʋ́ɣʋ́ Tɑcɑɑ tɔmɑ Moisi sɩ heeli Alɔŋ sɩ: Mɑ nyɑ́ kpɑ́tʋ́ɣʋ́ kɛ tɛtʋ tɔɔ, nɑ mʋsʋɣʋ pǝsɩ pɔtʋ nɑ tǝ́ kpɑ Icipiti tɛtʋ tǝnɑ tɑɑ.
13 Ntɛnɑ Moisi nɑ Alɔŋ pɑ́ lɑ́ teitei ɩsɩɩ Tɑcɑɑ heelɑ-wɛ tɔ. Ɩlɛnɑ mʋsʋɣʋ pǝsɩ pɔtʋ nɑ tǝ́ wɑɑsɩ yǝlɑɑ nɑ tɔlɑ pɑ tɔɔ kɛ́ tɛtʋ tǝnɑ tɑɑ.
14 Ɩlɛnɑ Icipiti tʋwɑɑ mɑɣɑsɩ ɩsɩɩ pɑɑ lɑ mpʋ nɑ pɑ topotopotʋ tɑɑ nɑ pɑ́ kpisi. Nɑ pɔtʋ nɑ́ɑ́ wɛ tɔlɑ nɑ yǝlɑɑ pɑ tɔɔ.
15 Tǝnɑɣɑlɛ tʋwɑɑ heelɑ Icipiti wulɑʋ sɩ: Ɩsɔ mpǝle kɛ cǝnɛ ɩnǝɣɩ yoo.
Pɑɑ nɑ mpʋ Icipiti wulɑʋ tɔkɑ ɩ lɑŋkpɩɩsǝŋ nɑ ɩ́ kisi Moisi nɑ Alɔŋ kɛ nɩɩnɑʋ kɛ teitei ɩsɩɩ Tɑcɑɑ kɑ yɔɣɔtʋɣʋ tɔ.
Wɑhɑlɑ liɣiti nyǝŋ
16 Ḿpʋ́ɣʋ́ Tɑcɑɑ heelɑ Moisi sɩ: Cele kʋlɩ lɔŋ kɛ tɑnɑŋ kʋpɑŋkʋ tɛɛ, nɑ ń kɑtɩ Icipiti wulɑʋ kɛ wɑɑtʋ wei ɩ tiiki pɔɣɔ tɔ nɑ ń heeli-ɩ sɩ Tɑcɑɑ mɑ́, mɑ tɔmɑ sɩ yele mɑ yǝlɑɑ nɑ pɑ́ polo pɑ́ lɑ-m tǝmlɛ.
17 Ye n kisɑɑ sɩ n kɑɑ yele-wɛ, ɩlɛ mɑ yele nɑ kɑcɔsɩ kʋnɑɑsɑsɩ nɑsǝlɩ sɩ lɩɩ nɑ sɩ́ sú Icipiti nyǝ́mɑ tɛɛsɩ tɑɑ kɛ́ tɛtʋ tǝnɑ tɑɑ, nɑ sɩ́ nyɑsǝɣɩ nyɑnɑ yǝlɑɑ nɑ nyɑ́ tǝmlɛ nyǝ́mɑ tǝnɑ.
18 Amɑ kɑcɔsɩ nsɩ sɩ kɑɑ wiili Kosɛŋ tɛtʋ tɑɑ timpi mɑ yǝlɑɑ wɛɛ tɔ. Tǝnɑɣɑ Icipiti wulɑʋ kɑ nyǝnɑ sɩ Tɑcɑɑ mɑ́, mɑ wɛ Icipiti tɑɑ cǝnɛ.
19 Mɑɑ kenti mǝ tɔɔ kɛ́ kpɑntɛ kɛ cele, nɑ ɩ́ kɑɑ nɑ wɑhɑlɑ ɩnɛ.
20 Ḿpʋ́ɣʋ́ Tɑcɑɑ yelɑɑ nɑ kɑcɔsɩ kʋnyɑsɑsɩ nɑsǝlɩ lɩɩ tuutuumɑ nɑ sɩ́ wɑtɩ Icipiti wulɑʋ nɑ ɩ tǝmlɛ nyǝ́mɑ pɑ tɛɛsɩ tɑɑ, nɑ sɩ́ wɑkǝlɩ tɛtʋ tǝnɑ.
21 Tǝnɑɣɑlɛ Icipiti wulɑʋ yɑɑ Moisi nɑ Alɔŋ nɑ ɩ́ tɔ-wɛ sɩ: Ɩ́ polo ɩ́ lɑ́ mǝ Ɩsɔ kɛ́ kɔtɑsɩ. Ɩlɛ Icipiti tɛtʋ tɑɑ kɛ́ pǝ wɛɛ sɩ ɩ́ lɑ-sɩ.
22 Kɛlɛnɑ Moisi nɑ Alɔŋ pɑ cɔ sɩ: Tǝ kɑɑ lɑ-sǝɣɩ cǝnɛ. Mpi tɔ, Icipiti nyǝ́mɑ kɑ́ nyǝnɩ-sǝɣɩ ɑcɑɑlǝtʋ nɑ pɑ́ yɑɣɑ-tʋɣʋ pɛɛ.
23 Pǝ wɛɛ kɛ́ sɩ tǝ́ tɔ kʋyɛɛŋ tooso nɑ tǝ́ polo pooluŋ. Ɩlɛnɑ tǝ́ lɑ́ tɑ́ Ɩsɔ Tɑcɑɑ kɛ kɔtɑsɩ ɩsɩɩ ɩ kɑ heeluɣu-tʋ tɔ.
24 Ntɛnɑ Icipiti wulɑʋ sɩ: Mɑɑ yele-mɛ nɑ ɩ́ polo. Ɩlɛ ɩ́ tɑɑ hɑtǝlɩ pooluŋ kɛ́. Aɑɩyee sɩ, ɩ́ sǝlǝmǝnɑ-m.
25 Mpʋɣʋlɛ Moisi nɔɣɔ tǝkpɑʋ sɩ: Ye mɑ lɩɩ cǝnɛ, mɑɑ sǝlǝmɩ Tɑcɑɑ nɑ cele ɩ kɑ́ hɑtǝlǝnɑ nyɑ́ nɑ nyɑ́ tǝmlɛ nyǝ́mɑ nɑ nyɑ́ yǝlɑɑ kɛ kɑcɔsɩ sǝnɛ. Amɑ kʋlʋmtʋ kɛ́ sɩ ń tɑɑ nɛɛtɩ-tʋ nɑ ń tɑɣɑnɩ Ɩsɛɣɛlɩ nyǝ́mɑ tɑɣɑ tɑŋʋɣʋ sɩ tǝ tɑɑ polo nɑ tǝ lɑ́ Ɩsɔ kɛ́ kɔtɑsɩ.
26 Moisi lɩɩ Icipiti wulɑʋ tɛ́ ɩlɛnɑ ɩ́ sǝlǝmɩ Tɑcɑɑ,
27 nɑ ɩ́lɛ́ ɩ lǝsɩ kɑcɔsɩ tǝnɑ nɑ sɩ́ yele Icipiti wulɑʋ nɑ ɩ tǝmlɛ nyǝ́mɑ nɑ ɩ yǝlɑɑ, pǝ tɑ sɔɔ pɑɑ kʋlʋmɑɣɑ.
28 Ḿpʋ́ɣʋ́ Icipiti wulɑʋ lɑpɑ lɑŋkpɩɩsǝŋ tɔtɔ nɑ ɩ́ kisi sɩ Ɩsɛɣɛlɩ nyǝ́mɑ ɩ́ tɑɑ lɩɩ.