2
1 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ tɑsɑɑ sɩ:
Mɑɑ cɑɣɑ mɑ tǝtɑŋlɛ nɑ mɑ́ feŋiɣi.
Ɩlɛnɑ mɑ́ nɩɩ nti Ɩsɔ kɑ́ cɔ-m mɑ kʋsǝlǝmʋtʋ tɔɔ tɔ.
Siɣisilu nɑ ŋmɑkǝllʋ pɑ tɔm
2 Ntɛnɑ Tɑcɑɑ cɔ-m sɩ:
Nmɑɑ nti mɑ kulɑɑ nɑ mɑ hʋlɩ-ŋ tɔ.
Tʋ-tǝɣɩ kpɑɑtɑnɑɑ tɔɔ kɛ́ teu,
nɑ pɑɑ wei ɩ́ pǝsɩ nɑ ɩ́ kɑlɑ-tɩ.
3 Tɔm ntɩ tǝ wɑɑtʋ tɑ tɑtɑ kɛ́ sɩ tǝ lɑ.
Amɑ pɑ sɩɩ tǝ wɑɑtʋ kɛ́.
Ɩlɛ tɑŋ-tɩ nɑ nɑɑni.
Tɩɩ leeli kɛ́ tǝ kɑɑ sɑɑlɩ.
4 Nmɑɑ sɩ ɩsɑɣɑʋ sɑɑlǝɣɩ yem kɛ́.
Amɑ tɑmpɑnɑ tǝŋlʋ nɑ́ wɛnɑ weesuɣu kɛ ɩ tɑɑ tɛm tɔɔ.
5 Wɛnɑʋ kɛ́ ɑsolɑ kɛ́.
Mpi tɔ, kɑlɑmpɑɑnɩ yǝlɑɑ ɩɩ hɛɛsǝɣɩ.
Pɑ wɛ hiliŋ kɛ́ ɩsɩɩ ɑtɛtǝlɛ.
Pǝyele pɑɑ hɑkɩ, ɩsɩɩ sǝm.
Pɑ lɛɛkǝɣɩ piitimnɑɑ nɑ pɑ́ puki,
nɑ pɑ́ ŋmɑkǝlǝɣɩ-wɛ.
6 Piitimnɑɑ mpɑ pɑɑ kǝlɑɑ tɔ
pɛlɛ pɑɑ kʋlɩ pɑ ŋmɑkǝllɑɑ tɔɔ.
Mpusinɑɑ kɑkpɑsɩ
Pɑɑ tʋʋ-wɛ sɩ mpusi wɛ pɑ tɔɔ kɛ́.
Ɩsɩɩ pɑ lɛɛkʋɣʋ lɛlɑɑ nyǝm nɑ pɑ́ kɑɑkɩ
nɑ pɑ́ pɔɔsǝɣɩ-wɛɣɛ kǝmlɛ tɔ,
pǝlee kɛ́ pɑɑ yele mpʋ ɩnɩ pǝ lɑpʋ?
7 Mǝ kǝmɑ nyǝ́mɑ kɑ́ mǝlɩ
mǝ tɔɔ nɑ pɑ́ lɛɛtɩ-mɛ.
8 Ɩsǝnɑ ɩ́ kɑ́ lɛɛkɑ lɛlɑɑ tɔɣɔ,
pɑɣɑlɛ kɑ lɛɛkɩ-mɛ mpi pǝ tɔɔ tɔ,
ɩ́ lɑpɑ tɛtʋnɑɑ nɑ ɑcɑlɛɛ kɛ mʋsʋŋ nɑ ɩ́ kʋ-wɛ.
9 Mpusi wɛ mǝ tɔɔ kɛ́.
Mpi tɔ ɩ́ pɛɛkǝɣɩ kɑsǝyɑɣɑ ɑsilimɑ nyǝŋkɑ sɩ
yǝlɑɑ ɩ́ nyǝnǝɣɩ-mɛɣɛ sɔsɑɑ.
Pɑɑ nɑ mpʋ nɑ ɩ́ hʋʋkɩ sɩ
mǝ toŋ kɑ́ lǝsɩ-mɛɣɛ wɑkǝlʋɣʋ tɑɑ.
10 Mǝ mɑɣɑmɑɣɑ ɩ́
lǝsǝnɑ fɛɛlɛ nɑ ɩ́ tʋ mǝ tɩ.
Ɩ́ kʋ yǝlɑɑ tuutuumɑ,
nɑ ɩ́ wɑkǝlɩ mǝ tɩ.
11 Pɑɑ koloosi tɑɑ pɛɛ,
ɩsɩɩ ɑ mɑpɑ kɑpusi nɑ ɑ́ pɔɔsɩ-mɛ
nɑ lɔtɑsɩ nɑ́ɑ́ tisi.
12 Mpusi wɛ mǝ tɔɔ kɛ́.
Mpi tɔ, yʋlʋkʋlɛ nɑ ŋmɑkǝlʋɣʋ kɛ ɩ́ sɩɩkǝnɑ ɑcɑlɛɛ.
13 Pǝ tɔɔ kɛ́ piitimnɑɑ tǝmlɛ nyɑɣɑ kɔkɔ.
Pɑ wɑhɑlɑ sɑɑlɑ yem.
Pǝ tǝnɑɣɑ mpʋ Atɛ nɑ ɩsɔtɑɑ tʋ Tɑcɑɑ tǝmlɛ kɛ́.
14 Yǝlɑɑ tǝnɑ kɑ́ tɛ nɑ pɑ́ nyɩ Tɑcɑɑ teeli tʋ kɛ́.
Pɑɑ nyǝmɩ-ɩ tɛtʋ tǝnɑ tɑɑ kɛ́ ɩsɩɩ teŋku lʋm wɑɑsʋɣʋ
kɑnyǝŋɑ tɔɔ tɔ.
15 Mpusi wɛ mǝ tɔɔ kɛ́.
Mpi tɔ, ɩ́ tʋɣɩ mǝ tɔɣɔntǝlɛnɑɑ kɛ sʋlʋm kɛ sɔsɔm.
Pǝ kʋɣɩ-wɛ nɑ pɑ kʋtɔɣɔlǝm cɛ,
nɑ pǝ yele-wɛɣɛ kpɛlɑ,
ɩlɛnɑ ɩ́ nyǝnǝɣɩ.
16 Fɛɛlɛ kɛ ɩ́ nɑŋǝɣɩ nɑ ɩ́ tɑɑkɩ mǝ tokuŋ.
Pǝ tɑɣɑ teeli,
mɩɩ nyɔɔ-wɩ nɑ ɩ́ sǝŋ kpɛlɑ.
Tɑcɑɑ kɑ́ mʋ pɑ́ɑ́nɑ́,
nɑ ɩ́ tʋ-mɛɣɛ wɑhɑlɑ nɑ toŋ.
Ɩ́ kɑ́ pǝsɩ tɛtɛlɑtɑɑ.
17 Ɩsɩɩ pɑ sɛtʋɣʋ Lipɑŋ hɔtʋɣʋ kɛ mʋsʋŋ tɔ,
pɩɩ mǝlɩ mǝ nyɔɔŋ tɑɑ.
Mpi tɔ, ɩ́ kpiisɑ tɑɑlɛ wontu.
Ɩ́ kʋ yǝlɑɑ.
Ɩ́ lɑpǝnɑ toŋ kɛ tɛtʋ tɑɑ ɑcɑlɛɛ yǝlɑɑ.
Pɩɩ nyɑɑsɩ mǝ pʋntʋ.
18 Pepe tɔɔ kɛ́ ɩ́ luki tɩɩŋ kɛ nyǝɣǝtʋ?
Ɩ́ sɑɑkǝɣɩ-ɩ tɑɑsɩ,
nɑ ɩ́ puɣusiɣinɑ mǝ tɩ.
Ɩ́ tʋɣɩ mǝ niŋ kʋlɑpǝm kɛ nɑɑni,
ɑnɩ pǝlɛ pɩɩ yɔɣɔtǝɣɩ?
19 Mpusi wɛ mǝ tɔɔ kɛ́.
Mpi tɔ ɩ́ yɑɑkɩ tɑɑkukulɑɣɑ sɩ kɑ́ fe,
nɑ ɩ́ tɔŋ pǝlɛ sɩ tǝ́ kʋlɩ.
Pǝ́cɔ́ pǝ tɑɑ pʋlʋpʋ kɑɑ pǝsɩ nɑ pǝ́ heeli-mɛɣɛ nɑtǝlɩ.
Pɑɑ nɑ ɩ́ wɑɑsɑ tɩɩŋ ɩnɩ ɩ tɔɔ kɛ́ wʋlɑ nɑ liɣitee nyǝɣǝtʋ tɔ.
Ɩ fɛɩnɑ weesuɣu nɑkʋlɩ.
20 Amɑ Tɑcɑɑ nɑ́ wɛ ɩ tǝsɛɛlɛ tɑɑ kɛ́.
Antulinyɑ yǝlɑɑ mɛ ɩ́ su.