13
Ye ɩ́ tɑ lɑɣɑsɩ tɔntɛ ɩ́ kɑ́ sɩ
1 Ḿpʋ́ɣʋ́ yǝlɑɑ nɑpǝlɩ pɑ kɔmɑ tǝnɛ ɩnǝɣɩ kpɑkpɑɑ nɑ pɑ́ heeli Yesu sɩ: Kɑlilee nyǝ́mɑ nɑpǝlɩ pɑ lɑkɑɣɑ kɔtɑɣɑ kɛ Ɩsɔ, ɩlɛnɑ Pilɑtɩ yele nɑ pɑ́ kʋ-wɛ.
2 Tǝnɑɣɑlɛ Yesu cɔ-wɛ sɩ: Ɩ́ hʋʋ sɩ Kɑlilee nyǝ́mɑ mpɑ pɑ kʋ mpʋ tɔ, pɑ tɛɛ Kɑlilee nyǝ́mɑ lɛlɑɑ tǝnɑɣɑ kɑwɑlɑsɩ tɔɣɔ pɑ kʋ-wɛ?
3 Aɑɩ, mɑ heeliɣi-mɛ sɩ, pǝ tɑɣɑ mpʋ se. Amɑ mɩɩ tɑ lɑɣɑsɩ tɔntɛ, ɩ́ kɑ́ sɩ mǝ tǝnɑɣɑ ɩsɩɩ pɛlɛ pɑ sǝpʋ tɔ.
4 Nɑ yǝlɑɑ pǝlefɛi hiu wei Silowee kutuluɣu kpɛsɑɑ nɑ kʋ tɑkɩ nɑ kʋ nɑŋtɩ tɔ, ɩ́ hʋʋ sɩ Yosɑlɛm nyǝ́mɑ tǝnɑ tɑɑ pɛlɛ pɑ kǝlǝnɑ ɩsɑɣɑtʋ nɑ?
5 Aɑɩ, mɑ heeliɣi-mɛ sɩ, pǝ tɑɣɑ mpʋ se. Amɑ mɩɩ tɑ lɑɣɑsɩ, ɩ́ kɑ́ sɩ mǝ tǝnɑɣɑ ɩsɩɩ pɛlɛ pɑ sǝpʋ tɔ.
Fiki tʋɣʋ ŋku kɩɩ lʋlǝɣɩ tɔ kʋ tɔm
6 Ḿpʋ́ɣʋ́ Yesu sɛɛ-wɛɣɛ ɩsɔ sɩ: Apɑlʋ nɔɣɔlʋ ɩ kɑ sɔnɑ ɩ lɛsɛŋ tɩɩŋ tɑɑlɛ tɑɑ kɛ́ fiki. Ḿpʋ́ɣʋ́ ɩ polɑ pee kooluɣu. Amɑ ɩ tɑ mɑɣɑnɑ kʋ tɔɔ kɛ́ pɑɑ pʋlʋpʋ cǝcǝkɑ.
7 Tǝnɑɣɑ ɩ tɔmɑ tɑɑlɛ tɔkʋlʋ sɩ: Nyǝnɩ, pɩɩsɩ tooso kɔlɔ mɑ tʋ kɔntɛ sɩ mɑ kooliɣi pee. Amɑ mɑɑ mɑkǝnɑ pʋlʋ cǝcǝkɑ kɛ kʋ tɔɔ. Sɛtɩ-kʋ. Pepe tɔɔ kɛ́ kɩɩ sǝŋ yem nɑ kɩɩ lʋlǝɣɩ?
8 Ɩlɛnɑ tɑɑlɛ tɔkʋlʋ cɔ-ɩ sɩ: Tɑcɑɑ, tɑsɑ-kʋɣʋ yeluɣu kɛ pʋntɔ, nɑ mɑɑ huli nɑ mɑ́ cɔɔnɑ kʋ kite nɑ mɑ tʋ hute nɑ mɑ́ nɑ́.
9 Ntɑnyɩ pǝ́ tɑlǝnɑ pǝnte kɩɩ lʋlɩ pee. Kʋ tɑ lʋlɩ ɩlɛ n sɛtɩ-kʋ.
Alʋ ɩcɑm wɑɑsʋɣʋ kɛ kʋhɛɛsʋɣʋ wule
10 Ḿpʋ́ɣʋ́ kʋyɑkʋ kʋhɛɛsʋɣʋ nɑkʋlɩ kʋ wule Yesu sɛɣɛsɑɣɑ Yutɑ nyǝ́mɑ tǝkotile nɑtǝlɩ tǝ tɑɑ.
11 Pǝ pɑmnɑ ɑlʋ kʋtɔntʋ nɔɣɔlʋ ɩ kɑ wɛ tǝnɑ. Ɩ hii ɩlɔɣɔʋ nɑ pǝ kɔkǝlɩ-ɩ pɩɩsɩ pǝlefɛi hiu tǝcu, ɩɩ pǝsǝɣɩ nɑ ɩ́ siɣisi ɩ tǝɣɩ pɑɑ pǝcɔ mɑɣɑmɑɣɑ.
12 Yesu nɑ-ɩ, ɩlɛnɑ ɩ́ yɑɑ-ɩ nɑ ɩ́ tɔmɩ-ɩ sɩ: Alʋ nyɑ́, sɑŋɑ wɑɑlɩ n hikɑ ɑlɑɑfǝyɑ kɛ́.
13 Ɩlɛnɑ Yesu tǝnɩ ɩ tɔɔ kɛ́ ɩ niŋ, nɑ ɑlʋ siɣile siɣisi tǝnɛ ɩnǝɣɩ kpɑkpɑɑ, nɑ ɩ́ niki Ɩsɔ kɛ́ sɑm.
14 Ɩsɩɩ Yesu lɑpʋ nɑ yʋlʋ hiki ɑlɑɑfǝyɑ kɛ kʋyɑkʋ kʋhɛɛsʋɣʋ wule kɛ mpʋ tɔ pǝ tɑ mɑɣɑ Yutɑ nyǝ́mɑ tǝkotile nyʋɣʋ tʋ ntɛ́. Tǝnɑɣɑ ɩ pǝsǝnɑ sɑmɑɑ sɩ: Kʋyɛɛŋ nɑɑtoso kɛ pɑ lɑkɩ tǝmlɛ. Ye ɩ́ cɑɑ ɩ́ hiki ɑlɑɑfǝyɑ, ɩ́ kɛɛsǝnɑ kʋyɛɛŋ ɩnɩ ɩ tɑɑ nɑ ɩ́ kɔɔ. Ɩ́ tɑɑ kɔŋ kʋhɛɛsʋɣʋ wule sɩ pɑ́ hɑ-mɛɣɛ ɑlɑɑfǝyɑ.
15 Tǝnɑɣɑ Tɑcɑɑ nɑ́ cɔ Yutɑ nyǝ́mɑ tǝkotile nyʋɣʋ tʋ ɩnɩ sɩ: Mǝnɑɑfikinɑɑ mɛ, ye pǝ tɑlɑ kʋyɑkʋ kʋhɛɛsʋɣʋ wule mǝ tɑɑ ɑwe yeki ɩ nɑʋ yɑɑ ɩ kpɑŋɑɣɑ kɛ tʋ́lʋ́ɣʋ́ sɩ kɑ́ nyɔɔ lʋm ye?
16 Yɑɑ ɩ́ nyǝmɑ́ sɩ Apǝlɑhɑm lʋlʋɣʋ tɑɑ ɑlʋ ɩnɛɣɛ pɑ kɑɑ wɑɑsɩ kʋyɑkʋ kʋhɛɛsʋɣʋ wule? Pǝ́cɔ́ Sɑtɑnɩ tɔkɑ-ɩ nɑ ɩ́ cɔɔsǝɣɩ-ɩ tɔ pɩɩsɩ pǝlefɛi hiu ntɔ.
17 Yesu cɔ Yutɑ nyǝ́mɑ tǝkotile nyʋɣʋ tʋ ɩnǝɣɩ mpʋ, ɩlɛnɑ fɛɛlɛ kpɑ mpɑ pɑɑ cɑɑ-ɩ tɔ. Amɑ sɑmɑɑ wei pǝ kɑɑsɑɑ tɔ ɩ́lɛ́ ɩ tǝnɑ ɩ lɑŋlɛ nɑ́ hɛɛnɑ tǝmɑ kʋpɑmpɑnɑ nnɑ Yesu lɑkɑɣɑ tɔ.
Sɔɔɣɑ pǝle tɔm
(Mɑtiyee 13:31-32; Mɑlǝkɩ 4:30-32)
18 Ḿpʋ́ɣʋ́ Yesu tɑsɑ yɔɣɔtʋɣʋ sɩ: Ɩsɩɩ pepeɣelɛ Ɩsɔ Kɑwulɑɣɑ nǝɣǝsǝnɑɑ, nɑ pepeɣe mɑɑ kɛɛsǝnɑ-kɛ ɩlɛ yee?
19 Kɑ nǝɣǝsǝnɑ kɛ́ ɩsɩɩ yʋlʋ tuukuɣu sɔɔɣɑ pile kɛ ɩ tɑɑlɛ tɑɑ nɑ tǝ nyɔ, nɑ tǝ pɩɩ tʋɣʋ sɔsɔɔʋ nɑ sumɑsɩ kɔŋ nɑ sɩ́ tʋɣɩ tɑnɑ kɛ kʋ pǝliŋɑsɩ tɔɔ tɔɣɔ.
Potopoto kʋkʋsʋm tɔm
(Mɑtiyee 13:33)
20 Ḿpʋ́ɣʋ́ Yesu tɑsɑɑ sɩ: Pepe cɑʋ kɛ́ mɑɑ kɛɛsǝnɑ Ɩsɔ Kɑwulɑɣɑ ɩlɛ yee?
21 Kɑ nǝɣǝsǝnɑ kɛ́ ɩsɩɩ ɑlʋ mɑɣɑsʋɣʋ mʋlʋm kɛ cɛmsɛ tǝpɑm nɑ ɩ́ kpɑɣɑ kʋkʋsʋm kɛ pǝcɔ nɑ ɩ́ tʋ, nɑ ɩ́ huɣuti nɑ pǝ tǝnɑ pǝ́ kpɑ tǝfʋʋ tɔ.
Nɔnɔɣɔ kʋkpɩɩlɑɣɑ
(Mɑtiyee 7:13-14,21-23)
22 Yesu kʋlɑɑ sɩ ɩ puki Yosɑlɛm, ɩlɛnɑ ɩ́ sɛɣɛsǝɣǝnɑ mpɑɑ kɛ ɑcɑlɛɛ sɔsɔɔnɑ nɑ sǝkpenɑ nnɑ ɑ tɑɑ ɩ tǝŋɑɣɑnɑ tɔ nɑ ɩ́ puki.
23 Ḿpʋ́ɣʋ́ nɔɣɔlʋ pɔɔsɑ-ɩ sɩ: Tɑcɑɑ, ntɔŋ yǝlɑɑ pǝciimɑɣɑ tike nyɔɔŋ kɛ pɩɩ yɑ nɑ?
Ɩlɛnɑ Yesu cɔ-wɛ sɩ:
24 Ɩ́ lɑ kookɑlɩ nɑ ɩ́ sʋʋnɑ nɔnɔɣɔ ŋkɑ kɑ wɛ tǝfǝkɩɩ tɔ. Tɔm fɑɑwɩɩ tɔɔ, yǝlɑɑ pɑɣɑlɛ kɑ́ lʋnɑ teu sɩ pɑ́ tǝŋnɑ tǝnɑ nɑ pɑ́ sʋʋ. Amɑ pɑ kɑɑ hiki mpɑɑ.
25 Ḿpʋ́ɣʋ́ Yesu tɔmɑ sɩ: Pɩɩ kɔɔ nɑ tǝyɑɣɑ cɑɑ tǝkɩ nɑ ɩ́ kɑlǝsɩ, nɑ mɩɩ wɛnɑ ɑwɑlɩ tɔɔ, ɩlɛ ɩ́ sʋʋ mɑpʋ ntɛ́ nɔnɔɣɔ sɩ: Tɑcɑɑ, tʋlɩ-tʋ. Ɩ́lɛ́ ɩ kɑ́ cɔ-mɛ sɩ: Mɑ tɑ nyɩ timpi ɩ́ lɩɩnɑɑ tɔ.
26 Pǝlɛɣɛlɛ ɩ́ kɑ sʋʋ yɔɣɔtʋɣʋ sɩ: Tɑ́ nɑ-ŋ tǝ tɔkɑɣɑnɑ nɑ tǝ nyɔɔkɩ. Tɑ ɩcɑtɛ hɑpɛɛ tɔɔ kɛ́ n tɩɩ sɛɣɛsǝɣɩ.
27 Ɩ́lɛ́ ɩ kɑ́ lɛlɩ-mɛɣɛ yɔɣɔtʋɣʋ sɩ: Mɑ tɑ nyɩ timpi ɩ́ lɩɩnɑɑ tɔ yoo. Mǝ tǝnɑ ɩ́ tɛɛ ɩ́ fɛɛ-m, ɩsɑɣɑlɑtɑɑ mɛ.
28 Ɩ́ kɑ́ kɔɔ nɑ ɩ́ nɑ Apǝlɑhɑm nɑ Ɩsɑɑkɑ nɑ Sɑɑkɩ nɑ Ɩsɔ kʋyɔɣɔtʋtʋ tɛlǝsǝlɑɑ tǝnɑɣɑ Ɩsɔ Kɑwulɑɣɑ tɑɑ, nɑ pɑ́ fiɣitɑ-mɛ nɑ ɑwɑlɩ tɔɣɔlɛ ɩsɩɩ ɩ́ kɑ́ tɩɩ cɑsɩ kɑpusi nɑ ɩ́ nyɑsǝɣɩ mǝ tǝɣɩ kelɑ te.
29 Yǝlɑɑ kɑ́ lɩɩnɑ ilim tǝlɩɩlɛ tɔɔ, nɑ pǝ tǝtʋlɛ tɔɔ, nɑ lɛlɑɑ lɩɩnɑ pǝ ntɔɣɔŋ nɑ pǝ mpǝtǝŋ tɔɔ nɑ pɑ́ suli Ɩsɔ Kɑwulɑɣɑ tɑɑ kɛ́ tɔɣɔʋ.
30 Wɑɑtʋ ɩnɩ mpɑ pɑ wɛ lɔlɔ kɛ́ kɑɣɑnɑ tɔ pɑ tɑɑ lɛmpɑ kɑ́ mǝlɩ wɑɑlɩ, nɑ wɑɑlɩ nyǝ́mɑ nɑ́ɑ́ mǝlɩ lɔlɔ.
Yesu lɑŋwɑkǝllɛ kɛ Yosɑlɛm tɔɔ
(Mɑtiyee 23:37-39)
31 Wɑɑtʋ ɩnɩ ɩ mɑɣɑmɑɣɑ kɛ Fɑlisɑnɑɑ nɑpǝlɩ pɑ kɔmɑ Yesu kiŋ nɑ pɑ́ heeli-ɩ sɩ: Wulɑʋ sɔsɔ Helɔtɩ pɛɛkǝɣɩ-ŋ kʋɣʋ. Pǝlɛ pǝ tɔɔ lɩɩ cǝnɛ nɑ ń lɑɣɑsɩ ɩcɑtɛ.
32 Ḿpʋ́ɣʋ́ Yesu cɔ-wɛ sɩ: Ɩ́ polo ɩ́ heeli mǝ tɑɑlɛ hɑɣɑ ŋkɛ sɩ, sɑŋɑ nɑ cele pǝ tɑɑ mɑ tɔɣɔnǝɣɩ ɑlɔɣɑɑ, nɑ mɑ́ wɑɑsǝɣɩ kʋtɔntʋnɑɑ, nɑ pǝ kʋfemuɣu kɛ mɑɑ tɛ mɑ tǝmlɛ.
33 Amɑ pǝ wɛɛ kɛ́ sɩ mɑ́ tɔ mɑ mpɑɑʋ kɛ sɑŋɑ nɑ cele nɑ pǝ kʋfemuɣu. Pǝ tɑɣɑ pʋlʋ, pɑɑ kʋɣɩ Ɩsɔ kʋyɔɣɔtʋtʋ tɛlǝsʋlʋ kɛ tiiliɣi yem nɑ pǝ tɑ kɛnɑ Yosɑlɛm tɑɑ.
34 Hei Yosɑlɛm, Yosɑlɛm, nyɑ́ tɑɑ kɛ́ pɑ kʋɣɩ Ɩsɔ kʋyɔɣɔtʋtʋ tɛlǝsǝlɑɑ, nɑ nyɑ́ tɑɑ tɔtɔɣɔ pɑ yooki Ɩsɔ tillɑɑ kɛ pɛɛ nɑ pɑ́ kʋɣɩ. Tɔm pɑɣɑlɛ kɛ mɑ sɔɔlɑɑ sɩ mɑ kpeɣeliɣi nyɑ́ tɑɑ yǝlɑɑ tǝnɑ tǝkotokoto ɩsɩɩ kɑntuɣu pɑpʋɣʋ kʋ piyɑ tɔɔ tɔ. Amɑ pɑ kisɑɑ.
35 Tɔʋ, mǝ tǝyɑɣɑ kɑ tǝkɩ kɑɑʋ tǝkpɑtɑɑ, nɔɣɔlʋ kɑɑ pɑɑsǝnɑ-kɛ. Mɑ heeliɣi-mɛ tǝfoo sɩ, ɩ́ kɑɑ tɑsɑ-m keesuɣu, hɑlǝnɑ pǝ́ tɑlɑ wule nte ɩ́ kɑ yɔɣɔtɩ sɩ, Ɩsɔ ɩ́ sǝnɑ Tɑcɑɑ tillu tɔ.