3
Ɩsɔ lʋm sɔlʋ Yohɑɑnɩ wɑɑsʋ
(Mɑtiyee 3:1-12; Mɑlǝkɩ 1:1-8; Yohɑɑnɩ 1:19-28)
1 Wɑɑtʋ wei wulɑʋ sɔsɔ Tipɛɛ kɑwulɑɣɑ pɩɩsɩ lɑpɑ nɑɑnʋwɑ nɑ kɑkpɑsɩ tɔ, Pɔŋsɩ Pilɑtɩ nɑ́ kɛ́ Yutɑ kʋfǝnɛɛ, nɑ Helɔtɩ nɑ́ɑ́ kɛ́ Kɑlilee wulɑʋ, nɑ ɩ́lɛ́ ɩ neu Filipʋ nɑ́ɑ́ tɔkɩ kɑwulɑɣɑ kɛ Ɩtulee nɑ Tǝlɑkoniti pǝ tɛtʋ tɑɑ, nɑ Lisɑniyɑ nɑ́ɑ́ kɛ́ Apileni wulɑʋ.
2 Ɩlɛnɑ Anɑ nɑ Kɑyifi pɛlɛ pɑ kɛ́ kɔtǝlɑɑ sɔsɑɑ tɔɣɔ Ɩsɔ tɔm kɔmɑ Sɑkɑlɩ pǝyɑlʋ Yohɑɑnɩ tɑɑ kɛ́ wʋlɑɣɑ tɛtʋ tɑɑ.
3 Nɑ ɩ́ cɔɔ Yɑɑtɑnɩ tɛtɛkǝlɛ tǝnɑ nɑ ɩ́ heeliɣi yǝlɑɑ sɩ pɑ́ lɑɣɑsɩ tɔntɛ, nɑ pɑ́ sɔ-wɛɣɛ Ɩsɔ lʋm nɑ Ɩsɔ hɩɩsɩ pɑ ɩsɑɣɑtʋ.
4 Ɩlɛnɑ pǝ́ lɑ́ ɩsɩɩ pɑɑ ŋmɑɑʋ Ɩsɔ kʋyɔɣɔtʋtʋ tɛlǝsʋlʋ Ɩsɑyii tɑkǝlɑɣɑ tɑɑ tɔ sɩ:
Nɔɣɔlʋ yɔɣɔtǝɣǝnɑ nɔɣɔ sɔsɔɣɑ kɛ
wʋlɑɣɑ tɛtʋ tɑɑ sɩ, ɩ́ tɑɣɑnɩ Tɑcɑɑ mpɑɑʋ,
ɩ́ hɛɛ-ɩ mpɑɩsi nɑ sɩ siɣisi.
5 Pɑɑ suuli kʋtɑɑlomiŋ tǝnɑ.
Pɑɑ yɔsɩ pɔ́ɔ́ŋ nɑ pulɑsɩ tǝnɑ.
Pɑɑ siɣisi tǝkɛɛlɛnɑɑ. Pɑɑ kuli pɛɛ tǝnɑ.
6 Nɑ yʋlʋpiyɑ tǝnɑ kɑ́ nɑ́ ɩsǝnɑ Ɩsɔ wɑɑsǝɣɩ-tʋ tɔ.
7 Yohɑɑnɩ yɔɣɔtɑɣɑ sɑmɑɑ wei ɩ kɔŋɑɣɑ ɩ kiŋ sɩ ɩ́ sɔ-wɛɣɛ Ɩsɔ lʋm tɔ sɩ: Akɑlɑ piyɑ mɛ, ɑwe kpɑɑlɑ-mɛ nɑ ɩ́ seeki Ɩsɔ pɑ́ɑ́nɑ́ nnɑ ɑ kɔŋ tɔ?
8 Ɩ́ lɑ mpɑ pɑ yelɑ ɩsɑɣɑtʋ tɔ pɑ kʋlɑpǝlɛ. Ɩlɛ ɩ́ tɑɑ tɛlǝsǝɣɩ lɔlɔ sɩ mǝ cɑɑ kɛlɛ Apǝlɑhɑm. Mɑ heeliɣi-mɛ sɩ ye tǝlɛ tǝ tɔɔ ɩlɛ, Ɩsɔ pǝsǝɣɩ nɑ ɩ́ lɑ nɑ pɛɛ ɑnɛ ɑ́ pǝsɩ Apǝlɑhɑm piyɑ.
9 Pɑ tɛmɑ lɑɑlɛ tʋɣʋ kɛ tɩɩŋ sɩ pɑ huɣu-ɩ nɑ ɩ tɛɛ kɛ́ te. Tʋɣʋ ŋku kɩɩ lʋlǝɣɩ pee kʋpɑnɑ tɔ, pɑɑ hu-kʋ nɑ pɑ́ tʋ kɔkɔ.
10 Tǝnɑɣɑ sɑmɑɑ pɔɔsɑ Yohɑɑnɩ sɩ: Ye mpʋ nti nɑ ntiɣi tɩɩ lɑ?
11 Yohɑɑnɩ cɔ-wɛ sɩ: Ye wei ɩ wɛnɑ tokonɑɑ kɛ nɑɑlɛ ɩ́ pɑsɑ wei ɩ fɛɩnɑ tɔ. Nɑ ye wei ɩ wɛnɑ kʋtɔɣɔʋ ɩ́lɛ́ ɩ́ lɑ mpʋ tɔtɔ.
12 Ḿpʋ́ɣʋ́ pǝ kpɛŋnɑ lɑmpuu mʋlɑɑ nɑ pɑ́ kɔɔ ɩ kiŋ sɩ ɩ́ sɔ-wɛɣɛ Ɩsɔ lʋm, nɑ pɑ́ pɔɔsɩ-ɩ sɩ: Tɑcɑɑ, nti nɑ ntiɣi tɩɩ lɑ?
13 Yohɑɑnɩ cɔ-wɛ sɩ: Ɩ́ tɑɑ mʋ nɑ pǝ́ tɛɛ ɩsǝnɑ pɑɑ sɩɩwɑ tɔ.
14 Yoolɑɑ nɑ́ pɔɔsɑ-ɩ tɔtɔ sɩ: Nɑ tɑ́ se, nti nɑ ntiɣi tɑ́ɑ́ lɑ? Ḿpʋ́ɣʋ́ Yohɑɑnɩ cɔ pɛlɛ sɩ: Ɩ́ tɑɑ muɣuli nɔɣɔlʋ. Pǝ́cɔ́ ɩ́ tɑɑ tʋ nɔɣɔlʋɣʋ tɔm. Mǝ lɑŋɑ ɩ́ hɛɛnɑ mǝ kʋfɛlʋɣʋ.
15 Yǝlɑɑ tɛɛlɑɣɑɑ teu sɩ pʋlʋ kɑ́ lɑ, hɑlǝnɑ pɑ́ kɔɔ pɑ́ sʋʋ mɑɣɑsʋɣʋ kɛ pɑ tɑɑ sɩ, yɑɑ Yohɑɑnɩ kɛlɛ Mesii ɩnɩ.
16 Ɩlɛnɑ Yohɑɑnɩ heeli pɑ tǝnɑ sɩ: Mɑ ɩlɛ, lʋm kɛ mɑ sɔɔ-mɛ. Amɑ nɔɣɔlʋ wɛɛ ɩ kɔŋ, ɩ́lɛ́ ɩ kǝlɑ-m. Hɑlɩ mɑ tɑ tɑlɑ mɑ́ wɔɣɔsɩ ɩ nɔɔhɛɛ tɑɑ ntɑŋkpɑlɑ mɑɣɑmɑɣɑ. Feesuɣu Nɑŋŋtʋ nɑ kɔkɔ kɛ ɩ́lɛ́ ɩ kɑ́ sɔ-mɛ.
17 Ɩ tɔkɑ ɩ kʋfɑlʋɣʋ kɛ ɩ niŋ tɑɑ. Ɩ kɑ́ fɑlɑ pǝ tǝnɑ tǝcɑɣɑcɑɣɑ nɑ ɩ́ suu pee kɛ kpóú tɑɑ. Amɑ ɩ kɑ́ tʋ lɔɔtʋ kɛ kɔkɔ ŋkɑ kɑɑ teŋ tɔ kɑ tɑɑ.
18 Sɛɣɛsǝŋ wɑɑnɩ wɑɑnɩ kɛ ḿpʋ́ɣʋ́ ɩ kɑɑkɑɣɑnɑ sɑmɑɑ nɑ ɩ́ heeliɣinɑ-wɛɣɛ Lɑɑpɑɑlɩ Kʋpɑŋ.
19 Yohɑɑnɩ kɑ kɑlǝnɑ wulɑʋ Helɔtɩ kɛ timpi ɩ kpɑɣɑ ɩ tɑɑlʋ ɑlʋ Helɔtiyɑtɩ tɔ, nɑ ɩsɑɣɑtʋ tǝnɑ nti ɩ kɑ lɑpɑ tɔ tǝ tɔɔ.
20 Ḿpʋ́ɣʋ́ ɩ lɛlɑ ɩsɑɣɑtʋ lɛntɩ tɔtɔ, ɩ kpɑ Yohɑɑnɩ nɑ ɩ́ tǝkɩ-ɩ sɑlǝkɑ.
Yesu Ɩsɔ lʋm sɔʋ
(Mɑtiyee 3:13-17; Mɑlǝkɩ 1:9-11)
21 Yohɑɑnɩ tɔŋnɑ yǝlɑɑ tǝnɑɣɑ Ɩsɔ lʋm sɔʋ, ɩlɛnɑ Yesu nɑ́ɑ́ polo tɔtɔ nɑ pɑ́ sɔ-ɩ.
22 Wɑɑtʋ wei Yesu tɔŋnɑ sǝlǝmʋɣʋ tɔ, ɩsɔtɔnʋɣʋ tʋlɑɑ nɑ Feesuɣu Nɑŋŋtʋ tii ɩ tɔɔ, nɑ pɑ́ nɑɑkɩ-ɩ ɩsɩɩ ɑlukuku. Nɑ pɑ́ nɩɩ nɔɣɔlʋ nɔɣɔ kɛ ɩsɔtɑɑ sɩ: Nyɑɣɑlɛ mɑ luɣu tɛɛ Pǝyɑɣɑ, mɑ lɑŋlɛ hɛɛnɑ-ŋ sɔsɔm.
Yesu lʋlʋɣʋ looŋɑ nyǝ́mɑ
(Mɑtiyee 1:1-17)
23 Yesu cɑɑlʋɣʋ ɩ tǝmlɛ kɛ wɑɑtʋ wei kɛ́ mpʋ tɔ, ɩ pɩɩsɩ wɛ ɩsɩɩ hiu nɑ nɑɑnʋwɑ, nɑ yǝlɑɑ nyǝnɑɣɑ-ɩ ɩsɩɩ Yosɛɛfʋ pǝyɑɣɑ. Yosɛɛfʋ nɑ́ kɛ́ Heli pǝyɑɣɑ,
24 nɑ Heli kɛ́ Mɑtɑtɩ pǝyɑɣɑ, nɑ Mɑtɑtɩ kɛ́ Lefii pǝyɑɣɑ, nɑ Lefii kɛ́ Mɛlɛci pǝyɑɣɑ, nɑ Mɛlɛci kɛ́ Yɑnnɑyi pǝyɑɣɑ, nɑ Yɑnnɑyi kɛ́ Yosɛɛfʋ pǝyɑɣɑ,
25 nɑ Yosɛɛfʋ kɛ́ Mɑtɑtiyɑsɩ pǝyɑɣɑ, nɑ Mɑtɑtiyɑsɩ kɛ́ Amɔɔsɩ pǝyɑɣɑ, nɑ Amɔɔsɩ kɛ́ Nɑhum pǝyɑɣɑ, nɑ Nɑhum kɛ́ Ɩsɑli pǝyɑɣɑ, nɑ Ɩsɑli kɛ́ Nɑkɑyi pǝyɑɣɑ,
26 nɑ Nɑkɑyi kɛ́ Mɑɑtɩ pǝyɑɣɑ, nɑ Mɑɑtɩ kɛ́ Mɑtɑtiyɑsɩ pǝyɑɣɑ, nɑ Mɑtɑtiyɑsɩ kɛ́ Semeyiŋ pǝyɑɣɑ, nɑ Semeyiŋ kɛ́ Yosɛci pǝyɑɣɑ, nɑ Yosɛci kɛ́ Yotɑ pǝyɑɣɑ,
27 nɑ Yotɑ kɛ́ Yowɑnɑŋ pǝyɑɣɑ, nɑ Yowɑnɑŋ kɛ́ Lesɑ pǝyɑɣɑ, nɑ Lesɑ kɛ́ Solopɑpɛɛlɩ pǝyɑɣɑ, nɑ Solopɑpɛɛlɩ kɛ́ Sɑlɑtiyɛɛ pǝyɑɣɑ, nɑ Sɑlɑtiyɛɛ kɛ́ Neli pǝyɑɣɑ,
28 nɑ Neli kɛ́ Mɛlɛci pǝyɑɣɑ, nɑ Mɛlɛci kɛ́ Atii pǝyɑɣɑ, nɑ Atii kɛ́ Kosɑm pǝyɑɣɑ, nɑ Kosɑm kɛ́ Ɩlimɑtɑm pǝyɑɣɑ, nɑ Ɩlimɑtɑm kɛ́ Ɛɛlɩ pǝyɑɣɑ,
29 nɑ Ɛɛlɩ kɛ́ Yosuwee pǝyɑɣɑ, nɑ Yosuwee kɛ́ Ɩliyesɛɛ pǝyɑɣɑ, nɑ Ɩliyesɛɛ kɛ́ Yolim pǝyɑɣɑ, nɑ Yolim kɛ́ Mɑtɑtɩ pǝyɑɣɑ, nɑ Mɑtɑtɩ kɛ́ Lefii pǝyɑɣɑ,
30 nɑ Lefii kɛ́ Simiyɔŋ pǝyɑɣɑ, nɑ Simiyɔŋ kɛ́ Yutɑ pǝyɑɣɑ, nɑ Yutɑ kɛ́ Yosɛɛfʋ pǝyɑɣɑ, nɑ Yosɛɛfʋ kɛ́ Yonɑm pǝyɑɣɑ, nɑ Yonɑm kɛ́ Ɩliyɑkim pǝyɑɣɑ,
31 nɑ Ɩliyɑkim kɛ́ Meleyɑ pǝyɑɣɑ, nɑ Meleyɑ kɛ́ Mennɑ pǝyɑɣɑ, nɑ Mennɑ kɛ́ Mɑtɑtɑ pǝyɑɣɑ, nɑ Mɑtɑtɑ kɛ́ Nɑtɑŋ pǝyɑɣɑ, nɑ Nɑtɑŋ kɛ́ Tɑfiiti pǝyɑɣɑ,
32 nɑ Tɑfiiti kɛ́ Sesee pǝyɑɣɑ, nɑ Sesee kɛ́ Opɛtɩ pǝyɑɣɑ, nɑ Opɛtɩ kɛ́ Powɑɑsɩ pǝyɑɣɑ, nɑ Powɑɑsɩ kɛ́ Sɑlɑ pǝyɑɣɑ, nɑ Sɑlɑ kɛ́ Nɑɑsɔŋ pǝyɑɣɑ,
33 nɑ Nɑɑsɔŋ kɛ́ Aminɑtɑpɩ pǝyɑɣɑ, nɑ Aminɑtɑpɩ kɛ́ Atɑmiŋ pǝyɑɣɑ, nɑ Atɑmiŋ kɛ́ Alini pǝyɑɣɑ, nɑ Alini kɛ́ Ɩsǝlɔm pǝyɑɣɑ, nɑ Ɩsǝlɔm kɛ́ Fɑlɛsɩ pǝyɑɣɑ, nɑ Fɑlɛsɩ kɛ́ Yutɑ pǝyɑɣɑ,
34 nɑ Yutɑ kɛ́ Yɑkɔpʋ pǝyɑɣɑ, nɑ Yɑkɔpʋ kɛ́ Ɩsɑɑkɑ pǝyɑɣɑ, nɑ Ɩsɑɑkɑ kɛ́ Apǝlɑhɑm pǝyɑɣɑ, nɑ Apǝlɑhɑm kɛ́ Tɑlɑ pǝyɑɣɑ, nɑ Tɑlɑ kɛ́ Nɑsoo pǝyɑɣɑ,
35 nɑ Nɑsoo kɛ́ Seluci pǝyɑɣɑ, nɑ Seluci kɛ́ Lɑkɑo pǝyɑɣɑ, nɑ Lɑkɑo kɛ́ Fɑlɛkɩ pǝyɑɣɑ, nɑ Fɑlɛkɩ kɛ́ Ɩpɛɛ pǝyɑɣɑ, nɑ Ɩpɛɛ kɛ́ Sɑlɑ pǝyɑɣɑ,
36 nɑ Sɑlɑ kɛ́ Kɑyinɑm pǝyɑɣɑ, nɑ Kɑyinɑm kɛ́ Alɑfɑsɑtɩ pǝyɑɣɑ, nɑ Alɑfɑsɑtɩ kɛ́ Sɛm pǝyɑɣɑ, nɑ Sɛm kɛ́ Nowee pǝyɑɣɑ, nɑ Nowee kɛ́ Lɑmɛkɩ pǝyɑɣɑ,
37 nɑ Lɑmɛkɩ kɛ́ Mɑtusɑlɑ pǝyɑɣɑ, nɑ Mɑtusɑlɑ kɛ́ Henɔkɩ pǝyɑɣɑ, nɑ Henɔkɩ kɛ́ Yɑlɛtɩ pǝyɑɣɑ, nɑ Yɑlɛtɩ kɛ́ Mɑleleyɛɛ pǝyɑɣɑ, nɑ Mɑleleyɛɛ kɛ́ Kɑyinɑŋ pǝyɑɣɑ,
38 nɑ Kɑyinɑŋ kɛ́ Ɩnɔsɩ pǝyɑɣɑ, nɑ Ɩnɔɔsɩ kɛ́ Sɛtɩ pǝyɑɣɑ, nɑ Sɛtɩ kɛ́ Atɑm pǝyɑɣɑ, nɑ Atɑm kɛ́ Ɩsɔ pǝyɑɣɑ.