24
Ɩsɔ tǝsɛɛlɛ wɑkǝlʋɣʋ tɔm
(Mɑlǝkɩ 13:1-2; Luku 21:5-6)
1 Yesu lɩɩnɑ Ɩsɔ tǝsɛɛlɛ tɑɑ nɑ ɩ́ tɔŋnɑ tɛɛʋ, ɩlɛnɑ ɩ ɩfɑlɑɑ kpǝtǝnɑ-ɩ nɑ pɑ́ hʋlɩ-ɩ Ɩsɔ tǝsɛɛlɛ ŋmɑtʋ.
2 Tǝnɑɣɑ Yesu tɔmɑ-wɛ sɩ: Ntɔŋ ɩ́ nɑwɑ pǝ tǝnɑ ɩsǝntɔ? Tɑmpɑnɑ kɛ mɑ heeliɣi-mɛ yoo mɑɑ cɛsɩɣɩ, pǝ kɑɑ kɑɑsɩ pǝlɛ lɛntɛ nɑ tǝ́ tǝnɑ lɛntɛ tɔɔ, pɑɑ tusi pǝ tǝnɑ.
Mpi pǝ lɑpʋ kɑ́ hʋlɩ ɑntulinyɑ tɛm tɔ
(Mɑlǝkɩ 13:3-13; Luku 21:7-19)
3 Yesu kɔmɑ nɑ ɩ́ cɑɣɑ Olifinɑɑ pʋɣʋ tɔɔ, ɩlɛnɑ ɩ ɩfɑlɑɑ fɑɣɑsɩ nɑ pɑ́ pɔɔsɩ-ɩ sɩ: Heeli-tʋɣʋ kʋyɑŋku mpʋ ɩnɩ pɩɩ lɑ tɔ. Nmɑɑtǝlɛ nteɣe pɩɩ hʋ́lɩ́ nɑ tǝ nyǝnɑ nyɑ́ kɔntɛ nɑ ɑntulinyɑ tɛm.
4 Ḿpʋ́ɣʋ́ Yesu cɔ ɩ ɩfɑlɑɑ sɩ: Ɩ́ lɑ lɑɑkɑlɩ, ɩ́ tɑɑ yele nɑ nɔɣɔlʋ kɔɔ nɑ ɩ́ tolisi-mɛ.
5 Mpi tɔ, pɑɣɑlɛ kɑ́ kɔɔ nɑ pɑ́ hɑ pɑ tǝɣɩ mɑ hǝtɛ sɩ mpɛɣɛlɛ Mesii. Hɑlɩ pɑɑ tolisi pɑɣɑlɛ.
6 Ɩ́ kɑ́ nɩɩ yooŋ tɑŋ kɛ mǝ cɔlɔ mǝ cɔlɔ. Pɑɑ heeliɣi-mɛɣɛ pooluŋ yooŋ tɔmnɑɑ. Amɑ ɩ́ tɑɑ yele nɑ mpʋ ɩnɩ pǝ́ cɛ mǝ lɑŋɑ. Pǝ wɛɛ sɩ mpʋ ɩnɩ pǝlɛ pɩɩ lɑ kɛ́. Amɑ wɑɑlɩ wɑɑlɩ kɛ́ ɑntulinyɑ nɑ́ɑ́ kɔɔ nɑ ɩ́ tɛŋ.
7 Tɛtʋ kɑteŋɑ lɛŋkɑ kɑ́ yoonɑ lɛŋkɑ nyǝ́mɑ, kɑwulɑɣɑ lɛŋkɑ kɑ́ kʋlɩ lɛŋkɑ tɔɔ. Nyɔɣɔsɩ kɑ́ lɑ tiiliwɛ tiiliwɛ, tɛtʋ kɑ sele tiiliwɛ tiiliwɛ tɔtɔ.
8 Pǝnɛ ɩnɩ pǝ tǝnɑ pǝ wɛnɑ ɩsɩɩ ɑlʋ lʋlʋɣʋ nɑ pǝ cɑɑlɩ-ɩ wɩɩʋ kɛ sǝŋŋsǝŋŋ tɔ.
9 Yǝlɑɑ kɑ́ kʋlɩ nɑ pɑ́ hʋ́lɩ́ sɩ pɑ́ tʋ-mɛɣɛ kʋnyɔŋ, nɑ pɑɑ kʋ-mɛ. Kɑteŋɑ tǝnɑ yǝlɑɑ tɑɑ kɑ́ kpɑnɑ-mɛɣɛ mɑ tɔɔ.
10 Yǝlɑɑ pɑɣɑlɛ kɑ́ lɔ Ɩsɔ sɛɛʋ tɔm kɛ wɑɑtʋ ɩnɩ, nɑ pɑɑ lɩɩ tǝmɑ wɑɑlɩ, nɑ pɑ tɑɑ kpɑnɑ tǝmɑ.
11 Ɩsɔ kʋyɔɣɔtʋtʋ tɛlǝsǝlɑɑ pɔpɔtʋnɑɑ kɑ́ lɩɩ pɑɣɑlɛ nɑ pɑ́ tolisi yǝlɑɑ kɛ sɔsɔm.
12 Ɩsɑɣɑtʋ kɑ́ tɔɔ sɔsɔm sɔsɔm, hɑlǝnɑ yǝlɑɑ pɑɣɑlɛ sɔɔlʋɣʋ kɑ́ pɑsɑ.
13 Amɑ ye wei ɩ nyɑɣɑ ɑpɑlʋtʋ nɑ ɩ́ tɑlɑ tǝnɑɣɑ, pʋntʋ nyʋɣʋ kɛ pɩɩ yɑ.
14 Pǝ wɛɛ sɩ pɑɑ kpɑɑlɩ Ɩsɔ Kɑwulɑɣɑ Lɑɑpɑɑlɩ Kʋpɑŋ kɛ ɑntulinyɑ tǝnɑ tɑɑ kɛ́ nɑ pɑɑ piitim mpi pǝ́ nɩɩ. Ye pǝ tɛmɑ ḿpʋ́ɣʋ́ lɑpʋ kɛ ɑntulinyɑ kɑ tɛ.
Acɑɑlǝtʋ tɔm
(Mɑlǝkɩ 13:14-23; Luku 21:20-24)
15 Ḿpʋ́ɣʋ́ Yesu tɔmɑ sɩ ɩ́ kɑ́ kɔɔ nɑ ɩ́ nɑ́ ɑcɑɑlǝtʋ tɑɑ ɑcɑɑlǝtʋ nti tǝ tɔm Ɩsɔ kʋyɔɣɔtʋtʋ tɛlǝsʋlʋ Tɑniyɛɛlɩ kɑ yɔɣɔtɑɑ tɔɣɔ kɑtɛ tɑɑ. Wei ɩ kɑlǝɣɩ tɔ ɩ́ cɛkǝnɑ-tǝɣɩ teu.
16 Mpʋ ɩnɩ tɔ, mpɑ pɑɑ wɛ Yutɑ tɔ pɑ́ se nɑ pɑ́ kpɑ pɔ́ɔ́ŋ.
17 Ye pǝ mɑɣɑnɑ wei nɑ ɩ́ wɛ kutuluɣu tɔɔ nɑ ɩ́ tiiwɑ, ɩ tɑɑ tɔ sɩ ɩ sʋʋkɩ tǝyɑɣɑ nɑ ɩ́ kpɑɣɑ ɩ pʋlʋ.
18 Nɑ wei pɩɩ mɑɣɑnɑ ɩ wɛ tɑɑlɛ tɔ ɩ́ tɑɑ tɔ sɩ ɩ kpeŋ ɩ tɛ nɑ ɩ́ kɛlɩ ɩ kpɑɩ.
19 Ahusitonɑɑ nɑ ɑsɔŋ tɔm kɑ́ lɑ wɑɩyo kɛ́ wɑɑtʋ ɩnɩ.
20 Ɩ́ sǝlǝmɩ Ɩsɔ nɑ mǝ kʋseu kʋnɛ kʋ tɑɑ pɑmsǝnɑ wɑtʋ wɑɑtʋ yɑɑ kʋyɑkʋ kʋhɛɛsʋɣʋ wule.
21 Pǝ tɑɣɑ pʋlʋ, wɑɑtʋ ɩnɩ wɑhɑlɑ kɑ́ lɑ sɔɣɔntʋ kɛ sɔsɔm pǝ tɩɩ fɛɩ. Pɑ tɑ nɑtɑ wɑhɑlɑ ɩnɩ ɩ tɑkɑ kɛ hɑtoo ɑntulinyɑ kɑncɑɑlɑɣɑ nɑ pǝ́ kɔɔ sɑŋɑ, nɑ pɑ kɑɑ tɑsɑ ɩ tɑkɑ kɛ́ nɑʋ.
22 Nɑ ye pǝ tɑɣɑ ɩsɩɩ Ɩsɔ hʋʋwɑ sɩ ɩ kɑ́ pɑsɑ kʋyɛɛŋ ɩnɩ tɔɔ, nɔɣɔlʋ kɑɑ tʋlɩ-tɩ. Amɑ ɩ pɑsɑ pǝ kʋyɛɛŋ ɩnǝɣɩ yǝlɑɑ mpɑ ɩ lǝsɑɑ tɔ pɑ tɔɔ.
23 Nɑ ye yʋlʋ tɔmɑ-mɛ sɩ: Ɩ́ nyǝnɩ, Mesii wɛ cǝnɛ yɑɑ cǝnɛ, ɩ́ tɑɑ nɩɩ.
24 Pǝ tɑɣɑ pʋlʋ tɔɔ, Mesiinɑɑ nɑ Ɩsɔ kʋyɔɣɔtʋtʋ tɛlɛsǝlɑɑ pɔpɔtʋnɑɑ kɑ́ lɩɩ nɑ pɑ́ lɑ́ kɔkɔlɔ nyǝmnɑɑ nɑ piti tǝmɑ. Hɑlɩ ye pɑɑ pǝsɑɣɑ pɑ puɣusiɣi mpɑ pɑ mɑɣɑmɑɣɑ Ɩsɔ lǝsɑɑ tɔɣɔ.
25 Tɔʋ, mɑ lɑɑlɑɑ nɑ mɑ́ kpɑɑlɩ-mɛɣɛlɛ.
26 Mpʋ tɔ ye pɑ kɔmɑ nɑ pɑ́ heeli-mɛ sɩ: Ɩ́ nyǝnɩ, ɩ wɛnnɑ ntɛɣɛ wʋlɑɣɑ tɛtʋ tɑɑ, ɩ́ tɑɑ polo. Yɑɑ sɩ, ɩnɩ ɩ ŋmɛlǝnɑ ntɛɣɛ cǝnɛ, ɩ́ tɑɑ nɩɩ.
27 Yʋlʋ Pǝyɑɣɑ mɑ mɑ kɔntɛ kɑ́ lɑ kɛ́ ɩsɩɩ tɛʋ nyǝɣǝsʋɣʋ hɑtoo tɛʋ kite tɛɛ nɑ pǝ́ kɑlǝsǝnɑ kʋ nɔɣɔ tɔ.
28 Timpi pʋlʋ sǝpɑ nɑ pǝ́ hǝntɑɑ tɔ tǝnɑɣɑ yepelekunɑɑ kotiɣi.
Yʋlʋ Pǝyɑɣɑ kɔntɛ
(Mɑlǝkɩ 13:24-27; Luku 21:25-28)
29 Wɑhɑlɑ kʋyɛɛŋ ɩnɩ ɩ tɛɛkɩ kpɑkpɑɑ tɔ, ilim kɑ́ sɩ tǝkpitii, ɩsɔtʋ kɑɑ tɑsɑ hʋlʋmʋɣʋ. Ɩsɔtʋlʋŋɑsɩ kɑ́ lɩɩnɑ ɩsɔtɑɑ nɑ sɩ hoti. Pɩɩ ciɣiti ɩsɔtɑɑ kɔkɔlɔnɑɑ.
30 Wɑɑtʋ ɩnǝɣɩ pɑɑ nɩɩ Yʋlʋ Pǝyɑɣɑ mɑ́ mɑ tɑŋ kɛ ɩsɔtɔntʋɣʋ tɑɑ. Kɑteŋɑ tǝnɑ tɑɑ yǝlɑɑ kɑ́ kpɑ pɑ lɑŋɑ nɑ pɑ́ wii sɔsɔm. Pɑɑ nɑ Yʋlʋ Pǝyɑɣɑ mɑ́ mɑ sǝŋɑ ɩsɔŋmʋntʋɣʋ tɔɔ nɑ mɑ́ tiiki nɑ mɑ tomɑ kɛ sɔsɔm nɑ mɑ teeli.
31 Akɑntǝlɛ sɔsɔɔlɛ kɑ́ wii, ɩlɛnɑ mɑ́ tili mɑ ɩsɔtɑɑ tillɑɑ kɛ ɑntulinyɑ hɔɣɔlǝŋ tǝnɑ tɑɑ. Pǝ kpɑɣɑʋ ilim tǝlɩɩlɛ nɑ pǝ tǝtʋlɛ tɔ, nɑ pǝ́ polo pǝ ntɔɣɔŋ nɑ pǝ mpǝtǝŋ tɔɔ, sɩ pɑ́ cɔɔ pɑ́ koti mpɑ mɑ lǝsɑɑ tɔɣɔ ɑntulinyɑ tǝnɑ tɑɑ.
Fiki tʋɣʋ tɔm
(Mɑlǝkɩ 13:28-31; Luku 21:29-33)
32 Ɩ́ nyǝnnɑ fiki tʋɣʋ nɑ ɩ́ cɛkǝnɑ. Sɑɑ wei kʋ nɛɣɛtǝɣɩ nɑ kʋ hɑtʋ yɛɣɛlǝɣɩ tɔ, ɩ́ nyǝmɑ́ kpɑkpɑɑ sɩ hɛɛsʋɣʋ tɑlɑɑ kɛlɛ.
33 Mpʋ tɔtɔɣɔ wɑɑtʋ wei ɩ́ kɑ́ nɑ́ pǝ tǝnɑɣɑ mpʋ pǝ lɑkɩ tɔ, ɩ́ nyɩ sɩ pǝ wʋsɑɑ kɛlɛ, pǝ cɑɑ lɑpʋ ntɛ́.
34 Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, yǝlɑɑ mpɑ pɑ wɛ ɩsǝntɔ tɔ pɑ kɑɑ sɩ pɑ tǝnɑ nɑ pǝ́cɔ́ pǝ tǝnɑɣɑ mpʋ pǝ́ lɑ.
35 Ɩsɔtɔnʋɣʋ nɑ ɑtɛ kɑ́ mʋkɩ yem. Amɑ mɑ kʋyɔɣɔtʋtʋ kɑɑ sɑɑlɩ pɑɑ pǝcɔ.
Ɩsɔ tike nyǝmnɑ ɑntulinyɑ tɛm
(Mɑlǝkɩ 13:32-37; Luku 17:26-30,34-36)
36 Nɔɣɔlʋ fɛɩ wei ɩ nyǝmɑ́ pǝ wɑɑtʋ yɑɑ pǝ wʋlɛ tɔ, pɑɑ ɩsɔtɑɑ tillɑɑ nɑ Pǝyɑɣɑ mɑ́ mɑ mɑɣɑmɑɣɑ. Amɑ Tɑcɑɑ tike tǝkoŋ nyǝmnɑ.
37 Ɩsǝnɑ pɩɩ lɑpɑ Nowee pɔɔlɛ tɑɑ tɔ, mpʋ ɩnɩ pǝ mɑɣɑmɑɣɑ pɩɩ lɑnɑ kʋyɑŋku Yʋlʋ Pǝyɑɣɑ mɑ́ mɑɑ kɔɔ tɔ.
38 Kʋpɑm, kʋyɛɛŋ wei ɩ tɑɑ lʋm tɑɑ wɑɑsǝtɑ tɛtʋ tɔɔ tɔ, pǝ tɔkɑɣɑ kɛ́ nɑ pǝ́ nyɔɔkɩ, nɑ pǝ́ hɑɑ tǝmɑɣɑ ɑlɑɑ, nɑ pǝ́ kpɑkǝɣɩ mpʋ yoo, hɑlǝnɑ kʋyɑŋku Nowee sʋʋ kpɩɩlʋɣʋ tɑɑ tɔ.
39 Pɑ cɑɣɑ ḿpʋ́ɣʋ́ yem kɛ́ ḿpʋ́ɣʋ́, pɑ tɑ hʋʋ pʋlʋ tɔɔ. Hɑlǝnɑ lʋm sɔsɔɔm kɔɔ nɑ pǝ́ tɔɣɔ pɑ tǝnɑ tǝpɑɩ. Ḿpʋ́ɣʋ́ pɩɩ lɑ kʋyɑŋku Yʋlʋ Pǝyɑɣɑ mɑ́ mɑɑ kɔɔ tɔ.
40 Pɩɩ pɑnɑ ɑpɑlɑɑ nɑɑlɛ kɑ́ wɛɛ tɑɑlɛ. Pɩɩ kpɑɣɑ lɛlʋ nɑ pǝ́ yele lɛlʋ.
41 Pɩɩ pɑnɑ ɑlɑɑ nɑɑlɛ wɛ nɑmɑ tɔɔ nɑ pɑ́ nɑŋǝɣɩ. Pɩɩ kpɑɣɑ lɛlʋ nɑ pǝ́ yele lɛlʋ.
42 Ɩ́ feŋ, pǝ tɑɣɑ pʋlʋ tɔɔ, ɩ́ tɑ nyɩ kʋyɑŋku mǝ Sɔsɔ kɑ kɔɔ tɔ.
43 Ɩ́ nyɩ teu sɩ ye nyǝm kɑ nyǝŋɑɣɑ nɑ tǝyɑɣɑ cɑɑ nyɩ wɑɑtʋ wei ŋmɩɩlʋ kɑ́ kɔɔ ɑhoo tɔ, ɩ kɑ cɑɣɑnɑ ɩ ɩsɛ kɛ́. Ɩ kɑɑ yele-ɩ nɑ ɩ́ sʋʋ ɩ tǝyɑɣɑ.
44 Pǝ tɔɔ kɛ́ mɛ tɔtɔ mɩɩ tɑɣɑnɩ mǝ tǝɣɩ mpʋ. Yʋlʋ Pǝyɑɣɑ mɑ́ mɑ kɔŋ kɔntɛ kɛ wɑɑtʋ wei ɩ́ kɑɑ hʋʋ tɔɣɔ.
Tǝmlɛ tʋ ɩsɑɣɑʋ nɑ kʋpɑŋ pɑ tɔm
(Luku 12:41-48)
45 Aweɣe tǝmlɛ tʋ kʋpɑŋ nɑ lɑɣɑtʋ? Ye pǝ tɑɣɑ wei ɩ cɑɑ yelinɑ-ɩ tǝmlɛ nyǝ́mɑ lɛlɑɑ sɩ ɩ́ nyǝnǝɣɩ-wɛ, nɑ pǝ́ tɑlɑɑ ɩ cɛlɛ-wɛɣɛ pɑ kʋtɔɣɔʋ tɔ?
46 Cɛcɛ ɩnɩ ɩ́ kɔmɑ nɑ ɩ́ mǝlɩ nɑ ɩ́ mɑɣɑnɑ tǝmlɛ tʋ ɩnɩ ɩ ɩsǝlɛ sɛɛnɑ tǝmlɛ ńtɛ́ tǝ lɑpʋ, ɩ nyʋɣʋ lɑpɑ leleŋ kɛ́.
47 Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, tǝyɑɣɑ cɑɑ kɑ tʋ tǝmlɛ tʋ ɩnǝɣɩ ɩ kʋpɑm tǝnɑ tɔɔ feŋuɣu kɛ́.
48 Amɑ pǝ́ cǝpɑ tǝmlɛ tʋ ɩnɩ nɑ ɩ́ tʋ ɩ tɑɑ sɩ: Mɑ cɑɑ kɑɑ kɔɔ lɔŋ se.
49 Ɩlɛnɑ ɩ́ sʋʋ ɩ tɑɑpɑlɑɑ kɛ mɑpʋ, nɑ ɩ́ tɔkɩ, nɑ ɩ́ nɑ sʋlʋnyɔɔlɑɑ lɛlɑɑ pɑ́ sʋʋ sʋlʋm nyɔɔʋ nɑ pǝ́ kʋɣɩ-wɛ.
50 Pɩɩ kɔɔ nɑ kʋyɑkʋ ŋku nɑ ɩsǝmɑ wɑɑtʋ ɩ tɑɑ tʋ ɩ tɑɑ sɩ tǝyɑɣɑ tʋ kɑ tɑlɑ tɔ, ɩ́lɛ́ ɩ kɑ́ sʋʋ tǝkpʋʋʋ.
51 Nɑ ɩ́ lɑ tǝmlɛ tʋ ɩnɩ tǝkɑŋkɑŋ, nɑ ɩ́ mǝlǝnɑ-ɩ nɑ ɩ́ pɛtɩ-ɩ cɛsǝlɑɑ tɔɔ. Tǝnɑɣɑ ɩ kɑ cɑsǝɣɩ kɑpusi nɑ ɩ́ nyɑsǝɣɩ ɩ tǝɣɩ kelɑ.