26
Sɔsɑɑ sɔsɑɑ cɑɣɑʋ kɛ Yesu ɑcɑɣɑ
(Mɑlǝkɩ 14:1-2; Luku 22:1-2; Yohɑɑnɩ 11:45-53)
1 Yesu tɛmɑ tɔm tǝnɛ tǝ tǝnɑɣɑ yɔɣɔtʋɣʋ, ɩlɛnɑ ɩ́ heeli ɩ ɩfɑlɑɑ sɩ:
2 Ntɔŋ ɩ́ nyǝmɑ́ teu sɩ pǝ kɑɑsɑ kʋyɛɛŋ nɑɑlɛ nɑ pɑ́ tɔɣɔ Tɛɛʋ ɑcimɑ nɑ? Tɛɛʋ ɑcimɑ ɑnɩ ɑ tɔɔ kɛ́ pɑɑ tʋ Yʋlʋ Pǝyɑɣɑ mɑɣɑ yǝlɑɑ niŋ tɑɑ nɑ pɑ́ kɑ-m sǝm tesikɑ tɔɔ.
3 Ḿpʋ́ɣʋ́ kɔtǝlɑɑ sɔsɑɑ nɑ Yutɑ nyʋɣʋ nyǝ́mɑ nyʋɣʋ nyǝ́mɑ pɑ kotɑ kɔtǝlɑɑ wulɑʋ wei pɑ yɑɑ sɩ Kɑyifi tɔ ɩ tǝyɑɣɑ.
4 Nɑ pɑ́ cɑɣɑ nɑ pɑ́ mɑɣɑsɩ nɑ pɑ́ sɩɩ ɩsǝnɑ pɑɑ kpɑ Yesu tǝhɛɛ nɑ nɔɣɔlʋ tɑ nɑ tɔ, nɑ pɑ́ kʋ-ɩ.
5 Pɑ yɔɣɔtɑɣɑ pɑ tɑɑ sɩ: Tǝ tɑɑ kpɑ-ɩ ɑcimɑ wɑɑtʋ, tɔfɔ pɩɩ lɑ yoou kɛ yǝlɑɑ tɑɑ.
Alʋ tulɑɑlʋ pǝlʋɣʋ kɛ Yesu tɔɔ
(Mɑlǝkɩ 14:3-9; Yohɑɑnɩ 12:1-8)
6 Yesu kɑ wɛ Petɑnii kɛ tɔnʋɣʋ tɔɔ ɑsilimɑ kʋtɔŋ tʋ Simɔŋ tǝyɑɣɑ tɑɑ.
7 Tǝnɑɣɑ ɑlʋ nɔɣɔlʋ ɩ kɔmɑ ɩ kiŋ nɑ ɩ́ tɔkɑ tulɑɑlʋ kʋpɑmpɑŋ nɑ pɑ́ lɑpɑ ɩ ɑkpɑlǝpiyɑ kɛ liɣitee pǝlɛ kʋhʋlʋmǝlɛ tɑɑ tɔ. Yesu cɑɣɑɑ nɑ ɩ́ tɔŋnɑ tɔɣɔʋ, ɩlɛnɑ ɑlʋ ɩnɩ ɩ́ pǝlɩ tulɑɑlʋ ɩnǝɣɩ Yesu nyʋɣʋ tɑɑ.
8 Yesu ɩfɑlɑɑ nɑ́ mpʋ tɔ pǝ tɑ mɑɣɑ-wɛ, nɑ pɑ́ tɔ sɩ: Pɑ wɑkǝlʋɣʋ tulɑɑlʋ ɩnɛɣɛ ɩsǝntɔ tɔ suweɣelɛ?
9 Ye pɑɑ pɛɛtɑ-ɩ pǝ tɑɑ lɑ liɣitee kɛ sɔsɔm nɑ pɑ́ hɑ kʋnyɔntʋnɑɑ?
10 Yesu cɛkǝnɑɑ sɩ pɑ yɔɣɔtǝɣɩ mpʋ, ɩlɛnɑ ɩ́ pɔɔsɩ-wɛ sɩ: Pepe tɔɔ kɛ́ ɩ́ pǝsǝɣɩ ɑlʋ ɩnɛ ɩ lɑŋlɛ kɛ mpʋ? Mpi ɩ lɑpɑ-m mpʋ tɔ pǝ tewɑɣɑ hɑlɩ.
11 Mǝ nɑ kʋnyɔntʋnɑɑ ɩ́ wɛnnɑ tɑm. Amɑ mɑ́ nɑ-mɛ tǝ kɑɑ wɛɛ tǝmɑ kiŋ kɛ tɑm.
12 Mɑ pim tɔɔ kɛ́ ɩ pǝlɑ tulɑɑlʋ kɛ mɑ tɔnʋɣʋ tɔɔ kɛ́ mpʋ.
13 Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, pɑɑ timpiɣi pɑɑ heeli Lɑɑpɑɑlɩ Kʋpɑŋ ɩnɛɣɛ ɑntulinyɑ tǝnɑ tɑɑ, pɑɑ kɛɛsɩ ɑlʋ ɩnɛ ɩ lɑpɑ mpi tɔ pǝ tɔm nɑ pɑ́ tɔɔsǝɣɩ ɩ tɔɔ.
Yutɑɑsɩ kɔlɔmɔtɔ tɔm
(Mɑlǝkɩ 14:10-11; Luku 22:3-6)
14 Ḿpʋ́ɣʋ́ Yesu ɩfɑlɑɑ nɑɑnʋwɑ nɑ nɑɑlɛ tɑɑ lɛlʋ wei pɑ yɑɑ sɩ Yutɑɑsɩ Ɩsǝkɑleeu tɔ, ɩ kʋlɑɑ nɑ ɩ́ polo nɑ ɩ́ mɑɣɑnɑ kɔtǝlɑɑ sɔsɑɑ,
15 nɑ ɩ́ pɔɔsɩ-wɛ sɩ: Ye mɑ tʋ Yesu kɛ́ mǝ niŋ tɑɑ pepeɣe ɩ́ kɑ hɑ-m?
Ḿpʋ́ɣʋ́ pɛlɛ pɑ kɑlɑ liɣitee nyǝɣǝtʋ kɛ hiu nɑ nɑɑnʋwɑ nɑ pɑ́ cɛlɛ-ɩ.
16 Pǝ kpɑɣɑ kʋyɑŋku tɔɣɔ Yutɑɑsɩ sʋʋ kʋyɑkʋ kʋpɑŋkʋ kɛ pɛɛkʋɣʋ sɩ ɩ́ tʋ Yesu kɛ́ pɑ niŋ tɑɑ.
Tɛɛʋ ɑcimɑ kʋtɔɣɔʋ tɑɣɑnʋɣʋ
(Mɑlǝkɩ 14:12-21; Luku 22:7-14,21-23; Yohɑɑnɩ 13:21-30)
17 Pǝ tɑlɑ potopotonɑɑ mpɑ pɑ tɑɑ kʋkʋsʋm fɛɩ tɔ pǝ ɑcimɑ kʋyɑkʋ kɑncɑɑlɑɣɑ nyǝŋkʋ wule. Ɩlɛnɑ Yesu ɩfɑlɑɑ polo nɑ pɑ́ pɔɔsɩ-ɩ sɩ: Leɣe n cɑɑ sɩ tǝ́ polo nɑ tǝ́ lɑ-ŋ Tɛɛʋ ɑcimɑ kʋtɔɣɔʋ?
18 Tǝnɑɣɑ Yesu tɔmɑ-wɛ sɩ: Ɩ́ polo ɩcɑtɛ tɑɑ kɛ́ ɑkele tɛ nɑ ɩ́ heeli-ɩ sɩ: Mɑ wʋlɛ tɑlɑɑ, nyɑ́ tɛɣɛ mɑ́ nɑ mɑ ɩfɑlɑɑ tɩɩ tɔɣɔ Tɛɛʋ ɑcimɑ.
19 Ḿpʋ́ɣʋ́ Yesu ɩfɑlɑɑ lɑpɑ nti ɩ kɛɛsɑ-wɛ tɔ. Pɑ polɑɑ nɑ pɑ́ lɑ́ Tɛɛʋ ɑcimɑ kʋtɔɣɔʋ.
20 Pǝ kɔmɑ ɩsɩɩ tɑɑnɑɣɑ ɩlɛ, ɩ́ nɑ pɑ nɑɑnʋwɑ nɑ nɑɑlɛ pɑ cɑɣɑ tɔɣɔʋ ntɛ́.
21 Pɑ tɔŋnɑ tɔɣɔʋ kɛ mpʋ, ɩlɛnɑ Yesu yɔɣɔtɩ sɩ: Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, mǝ tɑɑ nɔɣɔlʋ kɑ́ lɑ-m kɔlɔmɔtɔ.
22 Tǝnɑɣɑ ɩ ɩfɑlɑɑ ɩsɛntɑɑ nyǝŋɑ sɔsɔm nɑ tɔm tǝnɛ. Ɩlɛnɑ pɑ́ sʋʋ-ɩ pɔɔsʋɣʋ kɛ kʋlʋm kʋlʋm. Ɩnɛ sɩ: Mɑtɔŋ pǝ tɑɣɑ mɑ́, Tɑcɑɑ? Ɩnɛ sɩ: Mɑtɔŋ pǝ tɑɣɑ mɑ́, Tɑcɑɑ?
23 Ḿpʋ́ɣʋ́ Yesu cɔ-wɛ sɩ: Mɑ nɑ wei tɑ niŋ kpɛntɑ sʋsʋɣʋ kɛ nyǝnɑɣɑ tɑɑ tɔ pʋntʋ kɑ́ lɑnɑ-m kɔlɔmɔtɔ.
24 Yʋlʋ Pǝyɑɣɑ mɑ́, mɑ sǝkɩ teitei kɛ́ ɩsɩɩ pɑ kɛɛsɑ mɑ tɔm kɛ Ɩsɔ Tɔm tɑɑ tɔ. Amɑ wei ɩ kɑ́ lɑ Yʋlʋ Pǝyɑɣɑ mɑɣɑ kɔlɔmɔtɔ kɛ mpʋ tɔ ɩ tɔm kɑ́ lɑ wɑɩyo kɛ́ sɔsɔm. Pʋntʋ ɩnɩ, ye pɑ tɑɑ lʋlɩ-ɩ, pǝlɛ pɩɩ lɑpɑ sɑnɑ.
25 Pǝ kpɛŋnɑ Yutɑɑsɩ wei ɩ lɑkɩ-ɩ kɔlɔmɔtɔ tɔ nɑ ɩ́ pɔɔsɩ Yesu sɩ: Mɑtɔŋ pǝ tɑɣɑ mɑ́, Tɑcɑɑ?
Ɩlɛnɑ Yesu cɔ-ɩ sɩ: Ntǝɣǝlɛ mpʋ.
Tɑcɑɑ sǝm tɔɔsʋɣʋ
(Mɑlǝkɩ 14:22-26; Luku 22:14-20; Kɔlɛntɩ I 11:23-25)
26 Ḿpʋ́ɣʋ́ wɑɑtʋ wei pɑ tɔkɑɣɑ tɔ Yesu kpɑɣɑ potopoto nɑ ɩ́ sɛɛ Ɩsɔ kɛ́ ɩ́ nɑ tǝmlɛ, nɑ ɩ́ fɑɣɑ-ɩ nɑ ɩ́ cɛlɑ ɩ ɩfɑlɑɑ, nɑ ɩ́ heeli-wɛ sɩ: Ɩ́ mʋ nɑ ɩ́ tɔɣɔ, mɑ tɔnʋɣʋ ntɛ́.
27 Pǝlɛ pǝ wɑɑlɩ kɛ́ Yesu kpɑɣɑ kɔpʋ nɑ ɩ́ sɛɛ Ɩsɔ kɛ́ ɩ nɑ tǝmlɛ. Ɩlɛnɑ ɩ́ cɛlɛ-wɛ nɑ ɩ́ tɔ sɩ: Ɩ́ nyɔɔ-wǝɣɩ mǝ tǝnɑ.
28 Mɑ cɑlǝm ntɛ́ mpi pǝ hʋ́lǝ́ɣɩ́ Ɩsɔ nɔɣɔ pɛɛlʋɣʋ tɑmpɑnɑ tɔ. Mpɩ pǝ kpemnɑ yǝlɑɑ pɑɣɑlɛ tɔɔ sɩ pǝ́ hɩɩsɩ ɩsɑɣɑtʋnɑɑ.
29 Tɑmpɑnɑ kɛ mɑ heeliɣi-mɛ yoo, sɑŋɑ wɑɑlɩ mɑ kɑɑ tɑsɑ sʋlʋm pǝnɛɣɛ nyɔɔʋ. Hɑlǝnɑ kʋyɑŋku mɑ́ nɑ-mɛ tɩɩ nyɔɔ sʋlʋm kʋfɑm kɛ mɑ Cɑɑ Kɑwulɑɣɑ tɑɑ tɔ.
30 Pɑ tɛmɑ mpʋ ɩlɛnɑ pɑ́ yoo ɑcimɑ yontu, ɩlɛnɑ pɑ́ tɛɛ Olifinɑɑ pʋɣʋ tɔɔ.
Piyɛɛ kpɛɛsʋɣʋ tɔm kpɑɑlʋɣʋ
(Mɑlǝkɩ 14:27-31; Luku 22:31-34; Yohɑɑnɩ 13:36-38)
31 Ḿpʋ́ɣʋ́ Yesu tɔmɑ ɩ ɩfɑlɑɑ sɩ: Sɑŋɑ ɑhoo ɑnɛ ɑ mɑɣɑmɑɣɑ ɩ́ kɑ́ yele-m mǝ tǝnɑ nɑ ɩ́ se. Pɑ ŋmɑɑ ḿpʋ́ɣʋ́ Ɩsɔ Tɔm tɑɑ sɩ: Mɑɑ kʋ tiikilu nɑ heeŋ kɑ́ yɑ yem yem.
32 Amɑ wɑɑtʋ wei mɑɑ fe ɩlɛnɑ, mɑ́ tɛɛ-mɛɣɛ nɔɣɔ kɛ Kɑlilee.
33 Tǝnɑɣɑ Piyɛɛ nɔɣɔ tǝkpɑʋ sɩ: Pɑɑ pɑ tǝnɑ pɑɑ yele-ŋ nɑ pɑ́ se, mɑ́, mɑ kɑɑ lɑ mpʋ.
34 Amɑ Yesu tɔmɑ-ɩ sɩ: Tɑmpɑnɑ kɛ mɑ heeliɣi-ŋ yoo mɑɑ cɛsǝɣɩ, n kɑ kpɛɛsɩ tɔm tooso kɛ́ ɑhoo ɑnɛ sɩ n tɑ nyɩ-m kɛ́ n tɑ nyɩ-m nɑ pǝ́cɔ́ kɑmpɑɑʋ koo.
35 Tǝnɑɣɑ Piyɛɛ tɔmɑ-ɩ sɩ: Pɑɑ mɑ nɑ-ŋ tɩɩ sɩ tɩɩ sɩ kɛ́, mɑ kɑɑ kpɛɛsɩ sɩ mɑ tɑ nyɩ-ŋ.
Ḿpʋ́ɣʋ́ pɑ tǝnɑ pɑ yɔɣɔtɑ mpʋ.
Yesu sǝlǝmʋɣʋ kɛ Kɛtǝsemɑnee
(Mɑlǝkɩ 14:32-42; Luku 22:39-46)
36 Ḿpʋ́ɣʋ́ Yesu nɑ ɩ ɩfɑlɑɑ pɑ tɑlɑ timpi pɑ yɑɑ sɩ Kɛtǝsemɑnee tɔ. Ɩlɛnɑ ɩ́ tɔ-wɛ sɩ: Ɩ́ cɑɣɑ cǝnɛ nɑ mɑ́ polo Ɩsɔ sǝlǝmʋɣʋ kɛ hɑtoo cǝnɛ.
37 Ɩlɛnɑ ɩ́ kpɑɣɑ Piyɛɛ nɑ Sepetee pǝyɑlɑɑ nɑɑlɛ. Tǝnɑɣɑ ɩsǝnyǝŋlɛ nɑ lɑŋwɑkǝllɛ sɔsɔɔlɛ sʋʋ-ɩ kpɑʋ.
38 Ɩlɛnɑ ɩ́ tɔ-wɛ sɩ: Mɑ lɑŋlɛ wɑkǝlɑɑ kɛ́ tǝtɔɣɔtɔɣɔ pǝ fɛɩ kɛɛsʋɣʋ. Ɩ́ cɑɣɑ cǝnɛ nɑ mɑ́ nɑ-mɛ tǝ́ feŋiɣi.
39 Ɩ tuusɑ ɩ nɔɣɔ tɔɔ kɛ́ pǝcɔ, ɩlɛnɑ ɩ́ luŋ nɑ ɩ́ sǝlǝmɩ sɩ: Mɑ Cɑɑ, ye pǝ wɛ pǝsʋɣʋ kɛɛlɩ wɑhɑlɑ sɔsɔ ɩnɛɣɛ mɑ nyʋɣʋ tɔɔ. Pɑɑ nɑ mpʋ mpi n nɔkɑɑ tɔ pǝlɛ pǝ lɑ, pǝ́ tɑɑ lɑ mɑ luɣu nyǝntʋ.
40 Ɩ tɛmɑ mpʋ, ɩlɛnɑ ɩ́ mǝlɩ ɩ ɩfɑlɑɑ tooso ɩnɩ ɩ kiŋ nɑ ɩ́ mɑɣɑnɑ pɑ tɔŋnɑ tom. Ɩlɛnɑ ɩ́ tɔ Piyɛɛ sɩ: Ɩ́ kpisɑ cɑɣɑʋ ntɛ́ sɩ mɑ́ nɑ-mɛ tǝ́ feŋ pɑɑ pǝcɔ mɑɣɑmɑɣɑ.
41 Ɩ́ feŋ nɑ ɩ́ sǝlǝmɩ, tɔfɔ ɩ́ kɑ́ hoti wɑɑtʋ wei mɑɣɑsʋɣʋ kɔŋ-mɛ tɔ. Pɑ́ɑ́nɑ́ wɛɛ, ɑmɑ tɔnʋɣʋ ɩɩ pǝsǝɣǝnɑ.
42 Ɩ tɑsɑ tuusuɣu, ɩlɛnɑ ɩ́ tɑsɑ Ɩsɔ kɛ́ sǝlǝmʋɣʋ sɩ: Mɑ Cɑɑ, ye pǝ fɛɩ pǝsʋɣʋ sɩ wɑhɑlɑ sɔsɔ ɩnɛ ɩ́ hɑtǝlǝnɑ-m, nyɑ́ luɣu nyǝntʋ ɩ́ lɑ.
43 Ɩ tɑsɑ ɩ ɩfɑlɑɑ kiŋ kɛ mǝlʋɣʋ, ɩlɛnɑ ɩ́ mɑɣɑnɑ pɑ tɔŋnɑ tom tɔtɔ, pɑ kpisɑ pɑ́ cɑɣɑnɑ pɑ ɩsɛ.
44 Ḿpʋ́ɣʋ́ ɩ tɑsɑ-wɛɣɛ yeluɣu nɑ ɩ́ tuusi nɑ ɩ́ tɑsɑ Ɩsɔ sǝlǝmʋɣʋ kɛ tɔm tooso nyǝm kɛ tɔm kʋlʋmtʋ ntɩ.
45 Tǝnɑɣɑ ɩ mǝlɑ ɩ ɩfɑlɑɑ kiŋ nɑ ɩ́ pɔɔsɩ-wɛ sɩ: Ɩ́ tɔŋnɑ tom nɑ ɩ́ hɛɛsǝɣɩ yɑɑ? Ɩɩ nɑɑ, pǝ tɑlɑɑ kɛlɛ. Pɑɑ tʋ Yʋlʋ Pǝyɑɣɑ mɑɣɑ ɑsɑɣɑɑ niŋ tɑɑ.
46 Ɩ́ kʋlɩ nɑ tǝ́ tɛɛ. Ɩ́ nyǝnɩ kɔlɔmɔtɔ tʋ tɑlɑ cǝnɛ.
Yesu Kpɑʋ
(Mɑlǝkɩ 14:43-50; Luku 22:47-53; Yohɑɑnɩ 18:3-12)
47 Yesu tɔŋnɑ yɔɣɔtɑɣɑ kɛ mpʋ ɩlɛ, ɩ ɩfɑlɑɑ nɑɑnʋwɑ nɑ nɑɑlɛ tɑɑ lɛlʋ Yutɑɑsɩ tɑlɑɑ kɛlɛ. Nɑ ɩ wɑɑlɩ kɛ́ yǝlɑɑ sɑmɑɑ tuutuumɑ, nɑ pɑ́ tɔkɑ lɑɣɑlɛɛ nɑ kpɑtǝŋ. Kɔtǝlɑɑ sɔsɑɑ nɑ Yutɑ nyʋɣʋ nyǝ́mɑ nyʋɣʋ nyǝ́mɑ pɑ tilinɑ yǝlɑɑ mpɛ.
48 Yutɑɑsɩ wei ɩnɩ ɩ lɑkɩ Yesu kɛ́ kɔlɔmɔtɔ kɛ mpʋ tɔ ɩ kɑ kɛɛsɑ sɑmɑɑ ɩnǝɣɩ ɩsǝnɑ ɩ kɑ lɑ tɔ. Ɩ heelɑ-wɛɣɛ sɩ: Ye mɑ polɑɑ nɑ mɑ́ wɑɣɑlɑ wei ɩlɛ, ɩnǝɣǝlɛ, ɩ́ kpɑ-ɩ.
49 Tǝnɑɣɑ Yutɑɑsɩ kpǝtǝnɑ Yesu kɛ kpɑkpɑɑ nɑ ɩ́ sɛɛ-ɩ sɩ: Fɔɔ Tɑcɑɑ.
Ɩlɛnɑ ɩ́ wɑɣɑlɩ-ɩ.
50 Ḿpʋ́ɣʋ́ Yesu tɔmɑ-ɩ sɩ: Mɑ tɑɑpɑlʋ, lɑ nti n kɔmɑ lɑpʋ tɔ.
Tǝnɑɣɑ ɩ́ nɑ mpɑ tɔ, pɛlɛ pɑ tʋ niŋ kɛ Yesu tɔɔ nɑ pɑ́ kpɑ-ɩ.
51 Ɩlɛnɑ Yesu nɑ mpɑ pɑɑ wɛɛ tɔ pɑ tɑɑ nɔɣɔlʋ kpɛɛ ɩ lɑɣɑtɛ nɑ ɩ́ lo kɔtʋlʋ sɔsɔ tǝmlɛ tʋ ŋkpɑŋʋɣʋ nɑ ɩ́ kɔɔlɩ tǝfeŋ.
52 Ḿpʋ́ɣʋ́ Yesu tɔmɑ-ɩ sɩ: Suu nyɑ́ lɑɣɑtɛ kɛ tǝ suɣute tɑɑ. Pǝ tɑɣɑ pʋlʋ tɔɔ, ye wei ɩ́ kpɑɣɑ lɑɣɑtɛ, pʋntʋ kɑ́ sǝnɑ lɑɣɑtɛ.
53 N tɑ nyɩ sɩ, mɑ́ sɔɔlɑɑ, mɑɑ yɑɑ mɑ Cɑɑ nɑ ɩ́ hɑ-m ɩsɔtɑɑ tillɑɑ kɛ iyisi nɑɑtoso (6000) kɛ loosi nɑɑnʋwɑ nɑ nɑɑlɛɣɛ cǝnɛɣɛ kpɑkpɑɑ yɛɛ?
54 Amɑ ye mɑ lɑpɑ mpʋ nti pɑɑ kɛɛsɑ Ɩsɔ Tɔm tɑɑ sɩ tɩɩ lɑ tɔ, ɩsǝnɑɣɑ pɩɩ lɑ nɑ tǝlɛ tǝ́ lɑ́ ɩlɛ?
55 Tǝnɑɣɑ Yesu pɔɔsɑ sɑmɑɑ ɩnɩ sɩ: Ɩ́ kɔŋɩ-m kpɑʋ nɑ ɩ́ nɔkɩ nɑ ɩ́ kpɑkǝɣɩ lɑɣɑlɛɛ nɑ kpɑtǝŋ tɔ, mɑɣɑ ŋmɩɩlʋ ɩsɑɣɑʋ kɛ? Kʋyɛɛŋ tǝnɑ Ɩsɔ tǝsɛɛlɛ tɑɑ kɛ́ mɑ cɑɣɑɑ nɑ mɑ́ sɛɣɛsǝɣɩ, ɩ́ tɑ́ kpɑ-m.
56 Amɑ pǝ tǝnɑ ɩsǝntɔ pǝ lɑpɑɣɑ sɩ pǝ́ lɑ nti Ɩsɔ kʋyɔɣɔtʋtʋ tɛlǝsǝlɑɑ kɑ yɔɣɔtɑɑ nɑ tǝ́ wɛ Ɩsɔ Tɔm tɑɑ tɔ.
Tǝnɑɣɑ ɩ ɩfɑlɑɑ tǝnɑ yelɑ-ɩ nɑ pɑ́ se nɑ pɑ́ tɛɛ.
Yesu ponɑʋ kɛ Kotuɣu sɔsɔɔʋ tɑɑ
(Mɑlǝkɩ 14:53-65; Luku 22:54-55,63-71; Yohɑɑnɩ 18:13-14,19-24)
57 Mpɑ pɑ kpɑ Yesu tɔ pɑ ponɑ-ɩ kɔtǝlɑɑ wulɑʋ Kɑyifi tɛ nɑ pɑ́ mɑɣɑnɑ Ɩsɔ Tɔm sɛɣɛsǝlɑɑ nɑ nyʋɣʋ nyǝ́mɑ nyʋɣʋ nyǝ́mɑ pɑ kotɑɑ.
58 Piyɛɛ tǝŋɑɣɑ Yesu kɛ́ tɑ́ɑ́lǝ́ḿ tɔɔ, hɑlǝnɑ ɩ́ tɑlɑ kɔtǝlɑɑ wulɑʋ tɑɣɑ tɔɔ. Ɩlɛnɑ ɩ́ sʋʋ nɑ ɩ́ cɑɣɑ tǝmlɛ nyǝ́mɑ kiŋ sɩ ɩ nɑɑ sɩ pɩɩ tɛnɑ-we.
59 Ḿpʋ́ɣʋ́ kɔtǝlɑɑ sɔsɑɑ nɑ Kotuɣu sɔsɔɔŋkʋ nyǝ́mɑ pɑ pɛɛkɑɑ sɩ pɑɑ tɔm suuu pɑ suu Yesu nɑ pɑ́ hiki mpɑɑʋ nɑ pɑ́ kʋ-ɩ.
60 Pɑɑ nɑ yǝlɑɑ pɑɣɑlɛ kʋlɑɑ nɑ pɑ́ suuki-ɩ pɔpɔtʋ tɔmnɑɑ tɔ, pɑ tɑ hiki nti pɑɑ wɑɑnɑ-ɩ tɔ. Wɑɑlɩ wɑɑlɩ kɛ́ yǝlɑɑ nɑpǝlɩ pɑ kʋlɑ nɑɑlɛ
61 nɑ pɑ́ tɔ sɩ: Apɑlʋ ɩnɛ ɩ kɑ tɔmɑ sɩ ɩnɩ ɩ pǝsǝɣɩ nɑ ɩ́ yɔkɩ Ɩsɔ tǝsɛɛlɛ sɔsɔɔlɛ nɑ ɩ tɑɣɑnɩ-tɛɣɛ ŋmɑʋ kɛ kʋyɛɛŋ tooso tɑɑ.
62 Ḿpʋ́ɣʋ́ kɔtǝlɑɑ wulɑʋ kʋlɑɑ nɑ ɩ́ tɔ Yesu sɩ: N kɑɑ yɔɣɔtɩ? Suweɣe yǝlɑɑ pɑnɛ pɑ yɔɣɔtǝɣǝnɑ-ŋ ye?
63 Amɑ Yesu sumɑ. Tǝnɑɣɑ kɔtǝlɑɑ wulɑʋ tɔmɑ-ɩ sɩ: Nɑ Ɩsɔ wei ɩ wɛnɑ weesuɣu tɔ, ye n kɛ́ Ɩsɔ Pǝyɑlʋ Mesii heelɩ-tʋ tǝfoo.
64 Ḿpʋ́ɣʋ́ Yesu cɔ-ɩ sɩ: Ntǝɣɩ n yɔɣɔtɑɑ. Mɑ heeliɣi-mɛ tǝfoo sɩ pǝ kpɑɣɑʋ pǝnɛntɛ tɔ ɩ́ kɑ́ nɑ́ Yʋlʋ Pǝyɑɣɑ mɑ́ nɑ mɑ́ cɑɣɑ Ɩsɔ Toŋ tǝnɑ tʋ kɔŋkɔŋ tɑɑ. Nɑ ɩ́ kɑ́ nɑ-m ɩsɔtɑɑ ŋmʋntʋɣʋ tɔɔ nɑ mɑ́ tiiki.
65 Tǝnɑɣɑ kɔtǝlɑɑ wulɑʋ cǝlɑ ɩ wontu nɑ ɩ́ tɔ sɩ: Ɩ kpɑ Ɩsɔ tɔɔ. Tǝ tɑsǝɣɩ ɑseetɑ nyǝ́mɑ kɛ pɛɛkʋɣʋ sɩ tǝ lepe? Mǝ mɑɣɑmɑɣɑ ɩ́ nɑ́ ɩsǝnɑ ɩ kpɑ Ɩsɔ tɔɔ tɔɣɔlɛ.
66 Tɔʋ, ɩ́ nɑ-we?
Ḿpʋ́ɣʋ́ pɑ tɔmɑ sɩ ɩ tɔm sǝpɑ, pɑɑ kʋ-ɩ kɛ́.
67 Tǝnɑɣɑ pɑ sʋʋ ntɑɣɑmɑ tɔʋ kɛ ɩ ɩsɛntɑɑ, nɑ pɑ́ mɑkɩ-ɩ ŋkumɑ, nɑ lɛlɑɑ nɑ́ɑ́ mɑpɩ-ɩ kɑtɑɑsɩ.
68 Nɑ pɑ́ tɔŋ sɩ: Mesii kpeɣe, heeli-tʋɣʋ wei ɩ mɑpɑ-ŋ tɔ.
Piyɛɛ kpɛɛsʋɣʋ
(Mɑlǝkɩ 14:66-72; Luku 22:56-62; Yohɑɑnɩ 18:15-18,25-27)
69 Piyɛɛ kɑ cɑɣɑ ɑwɑlɩ kɛ́ tɑɣɑ tɔɔ. Tǝnɑɣɑ kɔtǝlɑɑ wulɑʋ tǝmlɛ tʋ ɑlʋ nyǝŋ nɔɣɔlʋ kpǝtǝnɑ-ɩ nɑ ɩ́ tɔmɩ-ɩ sɩ: Nyɑ́ tɔtɔ n kɑ wɛ Kɑlilee tʋ Yesu ɩnɩ ɩ kiŋ.
70 Ḿpʋ́ɣʋ́ Piyɛɛ kpɛɛsɑ yǝlɑɑ tǝnɑ ɩsɛntɑɑ sɩ: Mɑ tɑ nyɩ nti n yɔɣɔtǝɣɩ mpʋ tɔ.
71 Pǝlɛ pǝ wɑɑlɩ kɛ́ Piyɛɛ kʋlɑɑ nɑ ɩ́ polo nɔnɔkeelɑsɩ. Ɩlɛnɑ tǝmlɛ tʋ ɑlʋ nyǝŋ lɛlʋ nɑ́ɑ́ nɑ-ɩ nɑ ɩ́ heeli mpɑ pɑɑ wɛ tǝnɑ tɔ sɩ: Ɩnɛ ɩnɩ ɩ kɑ wɛ Nɑsɑlɛtɩ Yesu ɩnɩ ɩ kiŋ kɛ́.
72 Ḿpʋ́ɣʋ́ Piyɛɛ tɑɣɑnɑ kpɛɛsʋɣʋ sɩ: Nɑ Ɩsɔ, mɑ tɑ nyɩ ɑpɑlʋ ɩnɩ.
73 Pǝ lɑpɑ lɑɑsɑɣɑ ɩlɛnɑ mpɑ pɑɑ wɛ tǝnɑ tɔ pɑ́ kpǝtǝnɑ Piyɛɛ nɑ pɑ́ tɔmɩ-ɩ sɩ: Nyɑ́ n tɑ lɑŋ yǝlɑɑ mpɛ pɑ tɑɑ nɔɣɔlʋ. Nyɑ́ yɔɣɔtɑɣɑ hʋlǝɣǝnɑ timpi n lɩɩnɑɑ tɔ.
74 Ḿpʋ́ɣʋ́ Piyɛɛ kpɛɛsɑɑ tǝlɑlɑlɑ nɑ ɩ́ tuu nɑ ɩ́ tɔ sɩ: Nɑ Ɩsɔ, mɑ tɑ nyɩ ɑpɑlʋ ɩnɩ.
Tǝnɑɣɑ kɑmpɑɑʋ koo kpɑkpɑɑ.
75 Ɩlɛnɑ Piyɛɛ tɔɔsɩ nti Yesu kɑ yɔɣɔtɑ-ɩ tɔ tǝ tɔɔ sɩ: Mpi pɩɩ tɑkɩ kɑmpɑɑʋ koou tɔ n tɛmɑ tɔm toosoɣo kpɛɛsʋɣʋ sɩ n tɑ nyɩ-m kɛ́ n tɑ nyɩ-m. Ḿpʋ́ɣʋ́ ɩ tukɑɑ nɑ ɩ́ lɩɩ, ɩlɛnɑ ɩ́ wii ɩsɩɩ ɩ sǝkɩ ɩ sǝkɩ.