27
Yesu ponɑʋ kɛ Pilɑtɩ
(Mɑlǝkɩ 15:1; Luku 23:1-2; Yohɑɑnɩ 18:28-32)
Ḿpʋ́ɣʋ́ tɑnɑŋ kʋpɑŋkʋ tɛɛ kɔtǝlɑɑ sɔsɑɑ tǝnɑ nɑ Yutɑ nyʋɣʋ nyǝ́mɑ nyʋɣʋ nyǝ́mɑ cɑɣɑɑ nɑ pɑ́ mɑɣɑsɩ nɑ pɑ́ sɩɩ sɩ pɑ́ kʋ Yesu. Tǝnɑɣɑ pɑ hɔkɑ-ɩ nɑ pɑ́ kpɑɣɑ-ɩ nɑ pɑ́ polo nɑ pɑ́ cɛlɑ Kʋfǝnɛɛ Pilɑtɩ.
Yutɑɑsɩ kʋ ɩ tɩ
(Tillɑɑ Tǝmlɛ 1:18-19)
Yutɑɑsɩ wei ɩ lɑpɑ-ɩ kɔlɔmɔtɔ tɔ, ɩ nɑwɑ sɩ pɑ sɩɩwɑ sɩ pɑɑ kʋ Yesu kɛ́ tɑmpɑnɑ ɩlɛnɑ ɩ lɑŋlɛ pǝsɩ sɔsɔm. Tǝnɑɣɑ ɩ kpɑɣɑ liɣitee nyǝɣǝtʋ hiu nɑ nɑɑnʋwɑ ɩnɩ nɑ ɩ́ polo ɩ́ cɛlɑ kɔtǝlɑɑ sɔsɔ nɑ nyʋɣʋ nyǝ́mɑ. Nɑ ɩ́ heeli-wɛ sɩ: Mɑ lɑpɑ ɩsɑɣɑtʋ, mɑ cɛlɑ-mɛɣɛ yʋlʋ sɩ ɩ́ kʋ-ɩ tulum kɛ yem.
Ḿpʋ́ɣʋ́ nyʋɣʋ nyǝ́mɑ cɔ Yutɑɑsɩ sɩ: Tɑ́ pɑɑye, pǝ kɛ́ nyɑ́ tɔm kɛ́.
Tǝnɑɣɑ Yutɑɑsɩ mǝŋnɑ liɣitee ɑnɩ nɑ ɩ́ pɛtɩ Ɩsɔ tǝsɛɛlɛ sɔsɔɔlɛ tɑɑ, nɑ ɩ́ tɛɛ nɑ ɩ́ polo nɑ ɩ́ tʋ ŋmǝnɑɣɑ kɛ ɩ luɣu tɛɛ nɑ ɩ́ sɩ.
Ḿpʋ́ɣʋ́ kɔtǝlɑɑ sɔsɑɑ nɑ́ tɔɔsɑ-yɛ nɑ pɑ́ tɔ sɩ: Tɑ mpɑɑʋ tɑɑ pǝ fɛɩ pǝsʋɣʋ sɩ tǝ́ kpɑɣɑ liɣitee ɑnɛ nɑ tǝ́ tɑsɑ tʋɣʋ kɛ Ɩsɔ tǝsɛɛlɛ sɔsɔɔlɛ ɑtɑkɑɑ tɑɑ. Pǝ tɑɣɑ pʋlʋ tɔɔ, yʋlʋkʋlɛ liɣitee kɛ́.
Tǝnɑɣɑ pɑ cɑɣɑɑ nɑ pɑ́ mɑɣɑsɩ, ɩlɛnɑ pɑ́ kpɑɣɑ liɣitee ɑnɩ nɑ pɑ́ yɑnɑ tɛtʋ nɑtǝlɩ nti pɑ yɑɑ sɩ cʋɣʋ tǝhulle tɔ, sɩ pɑ piŋ mʋʋlɑɑ kɛ tǝnɑ. Ḿpʋ́ɣʋ́ hɑlǝnɑ sɑŋɑ pɑ mǝŋnɑ tɛtʋ ntǝɣɩ hǝtɛ sɩ: Cɑlǝm tɛtʋ. Ḿpʋ́ɣʋ́ pǝ lɑpɑ nti Ɩsɔ kʋyɔɣɔtʋtʋ tɛlǝsʋlʋ Selemii kɑ kpɑɑlɑɑ tɔ sɩ: Pɑ kpɑɣɑ liɣitee nyǝɣǝtʋ hiu nɑ nɑɑnʋwɑ. Liɣitee ɑnǝɣɩ Ɩsɛɣɛlɩ yǝlɑɑ tisɑɑ sɩ pɑ́ fɛlɩ ɩ tɔɔ. 10 Pɑ kpɑɣɑ-yɛ nɑ pɑ́ yɑnɑ tɛtʋ nti pɑ yɑɑ sɩ cʋɣʋ tǝhulle tɔ, nɑ pǝ mɑɣɑmɑɣɑ kɛ Tɑcɑɑ kɑ heelɑ-m.
Pilɑtɩ pɔɔsǝɣɩ Yesu kɛ tɔm
(Mɑlǝkɩ 15:2-5; Luku 23:3-5; Yohɑɑnɩ 18:33-38)
11 Ḿpʋ́ɣʋ́ pɑ ponɑ Yesu kɛ Kʋfǝnɛɛ ɩsɛntɑɑ, nɑ ɩ́lɛ́ ɩ pɔɔsɩ-ɩ sɩ: Nyɑɣɑlɛ Yutɑ nyǝ́mɑ wulɑʋ sɔsɔ ɩnǝɣɩ? Ɩlɛnɑ Yesu cɔ-ɩ sɩ: Ntǝɣǝlɛ n yɔɣɔtɑ mpʋ.
12 Pǝlɛ pǝ wɑɑlɩ wɑɑtʋ wei kɔtǝlɑɑ sɔsɑɑ nɑ nyʋɣʋ nyǝ́mɑ tɔŋɑɣɑ sɩ ɩ lɑpɑ pǝnɛ nɑ pǝnɛ tɔ, ɩ tɑ cɔ sɩ pʋlʋ. 13 Tǝnɑɣɑ Pilɑtɩ tɔmɑ-ɩ sɩ: Nn nɩɩkɩ ɩsǝnɑ pɑ tɔŋʋɣʋ sɩ n lɑpɑ pǝnɛ nɑ pǝnɛ tɔ?
14 Amɑ tǝ tǝnɑɣɑ mpʋ Yesu tɑ́ cɔ-ɩ tǝ tɔɔ sɩ pʋlʋ. Ɩlɛnɑ pǝ́ lɑ́ Kʋfǝnɛɛ kɛ piti kɛ́ sɔsɔm pǝ tɩɩ fɛɩ.
Sɩ pɑ́ kʋ Yesu kɛ́ pɑ́ kʋ-ɩ
(Mɑlǝkɩ 15:6-15; Luku 23:13-25; Yohɑɑnɩ 18:39–19:16)
15 Pɑɑ Tɛɛʋ ɑcimɑ wenɑ Kʋfǝnɛɛ tʋlǝɣɩ sɑlǝkɑ tʋ nɔɣɔlʋ wei sɑmɑɑ cɑɑ sɩ pɑ́ tʋlɩ tɔɣɔ. 16 Pǝ pɑmnɑ sɑlǝkɑ tʋ kpitikpiti nɔɣɔlʋ wei pɑ yɑɑ sɩ Pɑlɑpɑɑsɩ*fɑ* tɔ ɩ wɛ sɑlǝkɑ tɑɑ. ɑ 17 Sɑmɑɑ kotɑ ḿpʋ́ɣʋ́ tǝnɑ, ɩlɛnɑ Pilɑtɩ pɔɔsɩ-wɛ sɩ: Aweɣe ɩ́ cɑɑ mɑ́ tʋlɩ-mɛ, Yesu wei pɑ yɑɑ sɩ Kilisiti tɔ?
18 Pǝ tɑɣɑ pʋlʋ tɔɔ kɛ́ ɩ pɔɔsɑ-wɛɣɛ mpʋ, ɩ nyǝmɑ́ tǝkelekele sɩ ɩsɛsɛɛmlɛ tɔɔ kɛ́ pɑ ponɑ-ɩ Yesu.
19 Wɑɑtʋ wei Pilɑtɩ cɑɣɑ tǝhʋʋlɛ tɔ ɩ ɑlʋ tilɑɑ sɩ pɑ́ heeli-ɩ sɩ: Tɑɑ sʋsɩ nyɑ́ nɔɣɔ kɛ tɑmpɑnɑ tǝŋlʋ ɩnɩ ɩ tɔm tɑɑ. Pǝ hʋlɑ-m ɩ tɔm kɛ tom tɑɑ kɛ́ ɑhoo ɑnɛ, nɑ pǝ́ pɛkǝlɩ-m sɔsɔm.
20 Ḿpʋ́ɣʋ́ kɔtǝlɑɑ sɔsɑɑ nɑ nyʋɣʋ nyǝ́mɑ pɑ puɣusɑ sɑmɑɑ sɩ pɑ́ sǝlǝmɩ-ɩ nɑ ɩ́ tʋlɩ-wɛɣɛ Pɑlɑpɑɑsɩ, nɑ pǝ́ kɑɑsɩ nɑ ɩ́ kʋ Yesu. 21 Tǝnɑɣɑ Kʋfǝnɛɛ tɑɣɑnɑ-wɛɣɛ pɔɔsʋɣʋ sɩ: Pɑ nɑɑlɛ pɑ tɑɑ ɑweɣe ɩ́ cɑɑ sɩ mɑ́ tʋlɩ-mɛ yee? Ḿpʋ́ɣʋ́ pɑ cɔ-ɩ sɩ: Pɑlɑpɑɑsɩ kɛ tǝ cɑɑ sɩ ń tʋlɩ. 22 Ɩlɛnɑ Pilɑtɩ pɔɔsɩ-wɛ sɩ: Nɑ ɩsǝnɑɣɑ mɑ́ lɑ Yesu wei pɑ yɑɑ sɩ Kilisiti tɔ? Tǝnɑɣɑlɛ pɑ tǝnɑ sɩ: Kɑmɩ-ɩ sǝm tesikɑ tɔɔ. 23 Ḿpʋ́ɣʋ́ Pilɑtɩ pɔɔsɑ-wɛ sɩ: Ɩlɛ ɩsɑɣɑtʋ ntiɣi ɩ lɑpɑ?
Tǝnɑɣɑ pɑ tɑsɑ kɑpusi mɑpʋ nɑ toŋ sɩ: Kɑmɩ-ɩ sǝm tesikɑ tɔɔ.
24 Pilɑtɩ kɔmɑ nɑ ɩ́ nɑ́ sɩ ɩ kɑɑ pǝsɩ-tɩ, pǝyele yoou cɑɑ tiluɣu. Ɩlɛnɑ ɩ́ cɑɑ lʋm nɑ ɩ́ sɑŋ ɩ niŋ kɛ sɑmɑɑ ɩsɛntɑɑ nɑ ɩ́ tɔ sɩ: Apɑlʋ ɩnɛ, pǝ́ tɑɑ wɛɛ sɩ mɑ́ kʋɣʋnɑ-ɩ yoo. Pǝ kɛ́ mǝ tɔm kɛ́.
25 Ḿpʋ́ɣʋ́ sɑmɑɑ tǝnɑ cɔ-ɩ sɩ: Nnn, ɩ sǝm tɔm ɩ́ mǝlɩ tɑ́ nɑ tɑ́ piyɑ tɑ́ nyɔɔŋ tɑɑ.
26 Tǝnɑɣɑ Pilɑtɩ tʋlɑ-wɛɣɛ Pɑlɑpɑɑsɩ. Pǝ kɑɑsɑ Yesu ɩlɛnɑ, ɩ́ yele nɑ pɑ́ cɑsɑ-ɩ ɑkpɑtɛɛ, nɑ ɩ́ kpɑɣɑ-ɩ nɑ ɩ́ cɛlɛ-wɛ sɩ pɑ́ polo nɑ pɑ́ kɑmɩ-ɩ sǝm tesikɑ tɔɔ.
Yoolɑɑ pɑɑnɑʋ kɛ Yesu
(Mɑlǝkɩ 15:16-20; Yohɑɑnɩ 19:2-3)
27 Pilɑtɩ yoolɑɑ ponɑ Yesu kɛ́ Kʋfǝnɛɛ tǝyɑɣɑ tɑɑ, ɩlɛnɑ pɑ sɑmɑɑ tǝnɑ kotinɑ-ɩ. 28 Ḿpʋ́ɣʋ́ pɑ wɔɣɔsɑ ɩ wontu, ɩlɛnɑ pɑ́ suu-ɩ cɑpɑ kʋsɛɛm tǝkpɑɩɩ. 29 Nɑ pɑ́ lʋʋ sɔwɑ kɛ ntenuɣu nɑ pɑ́ te ɩ nyʋɣʋ, nɑ pɑ́ tʋ ɩ niŋ ntɔɣɔŋ tɑɑ kɛ́ kpɑ́tʋ́ɣʋ́, nɑ pɑ́ pɑɑkǝnɑ-ɩ nɑ pɑ́ luŋiɣi ɩ tɛɛ kɛ́ ɑkulɑ, nɑ pɑ́ sɛɛ-ɩ sɩ: Yutɑ nyǝ́mɑ wulɑʋ sɔsɔ fɔɔ.
30 Nɑ pɑ́ tɔɔkɩ ɩ tɔɔ kɛ́ ntɑɣɑmɑ, nɑ pɑ́ mʋɣɩ kpɑ́tʋ́ɣʋ́ nɑ pɑ́ tɑɣɑnǝɣɩ ɩ nyʋɣʋ tɑɑ kɛ́ mɑpʋ. 31 Pɑ tɛmɑ-ɩ pɑɑnɑʋ kɛ mpʋ, ɩlɛnɑ pɑ́ wɔɣɔsɩ cɑpɑ ɩnɩ nɑ pɑ́ mǝŋnɑ-ɩ ɩ wontu nɑ pɑ́ tɛɛnɑ-ɩ kɑm kɛ sǝm tesikɑ tɔɔ.
Yesu kɑm
(Mɑlǝkɩ 15:21-32; Luku 23:26-43; Yohɑɑnɩ 19:17-27)
32 Pɑ lɩɩkɑɣɑ ɩcɑtɛ ɩlɛnɑ, pɑ́ tǝ sulinɑ Silɛɛnɩ tʋ nɔɣɔlʋ, pɑ yɑɑ-ɩ sɩ Simɔŋ. Tǝnɑɣɑ yoolɑɑ kpipɑ ɩ́lɛ́ nɑ toŋ sɩ ɩ́ sǝɣǝlɩ Yesu tesikɑ ŋkɛ. 33 Ḿpʋ́ɣʋ́ pɑ tɑlɑ timpi pɑ yɑɑ sɩ Kɔlǝkɔtɑ tɔ, nti tǝ yɔɣɔtǝɣɩ sɩ nyʋmpɔɣɔlɑɣɑ tɛ tɔ. 34 Tǝnɑɣɑ pɑ cɛlɑ-ɩ sʋlʋm mpi pǝ tɑɑ pɑ sitɑ tʋɣʋ nɑkʋlɩ kʋ cǝlǝm*fɑ* tɔ. Amɑ ɩ tǝŋɑɑ ɩlɛnɑ ɩ́ kisi-wǝɣɩ nyɔɔʋ. ɑ
35 Ḿpʋ́ɣʋ́ pɑ kɑmɑ-ɩ sǝm tesikɑ tɔɔ, nɑ pɑ́ tɔ tɛtɛ kɛ́ ɩ wontu tɔɔ nɑ pɑ́ tɑlɑ-tɩ. 36 Pɑ tɛmɑ ḿpʋ́ɣʋ́ ɩlɛnɑ pɑ́ cɑɣɑ tǝnɑ nɑ pɑ́ tɑŋɩ-ɩ. 37 Pɑ ŋmɑɑwɑ nɑ pɑ́ pusi ɩ nyʋɣʋ tɔɔ sɩ: Yutɑ nyǝ́mɑ wulɑʋ sɔsɔ Yesu kɔlɔ. Pɑ ŋmɑɑ ḿpʋ́ɣʋ́ sɩ pǝ́ hʋ́lɩ́ mpi pǝ tɔɔ pɑ kʋ-ɩ tɔ. 38 Pɑ kpɛŋnɑ ɩ́ nɑ ŋmɩɩlɑɑ kɛ nɑɑlɛ nɑ pɑ́ kɑ-wɛɣɛ sǝm tesikɑsɩ tɔɔ, lɛlʋ kɛ ɩ ntɔɣɔŋ tɔɔ, lɛlʋ kɛ ɩ mpǝtǝŋ tɔɔ.
39 Yǝlɑɑ mpɑ pɑ tɛɛkɑɣɑnɑ tǝnɑ tɔ pɛlɛ pɑ kpɛɛtǝɣɩ nyɔɔŋ nɑ pɑ́ tʋʋkɩ-ɩ sɩ: 40 Mɑtɔŋ nyɑ́ tɔmnɑ sɩ n yɔkǝɣɩ Ɩsɔ tǝsɛɛlɛ sɔsɔɔlɛ nɑ ń tɑɣɑnɩ kʋfɑtɛ ŋmɑʋ kɛ kʋyɛɛŋ tooso tɑɑ. Wɑɑsɩ nyɑ́ tɩ ɩlɛ. Ye n kɛ́ Ɩsɔ Pǝyɑɣɑ lɩɩ tesikɑ tɔɔ nɑ ń tii.
41 Ḿpʋ́ɣʋ́ nɑ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ nɑ nyʋɣʋ nyǝ́mɑ tɔtɔ. Pɛlɛ pɑ tɔŋnɑ-ɩ pɑɑnɑʋ nɑ pɑ́ yɔɣɔtǝɣɩ sɩ: 42 Ɩ yɑpɑ lɛlɑɑ nyɔɔŋ ɩsǝnɑɣɑ nɑ ɩ́ kɑɑ pǝsɩ nɑ ɩ́ yɑ ɩ mɑɣɑmɑɣɑ ɩ nyǝŋkʋ. Ɩsɩɩ sɩ ɩnǝɣǝlɛ Ɩsɛɣɛlɩ wulɑʋ sɔsɔ nɑ? Pǝnɛntɛ ɩ́ lɩɩ tesikɑ tɔɔ nɑ ɩ́ tii. Ɩlɛnɑ tǝ nɑ nɑ tǝ́ tisi. 43 Ɩ tʋ Ɩsɔ kɛ́ nɑɑni nɑ ɩ́ tɔ sɩ ɩnǝɣǝlɛ Ɩsɔ Pǝyɑɣɑ. Tɔʋ, tǝ́ nɑ́ sɩ Ɩsɔ kɑ́ sɔɔlɩ sɩ ɩ́ wɑɑsɩ-ɩ yɑɑ ɩsǝnɑ.
44 Nɑ pǝ kpɛŋnɑ ŋmɩɩlɑɑ mpɑ pɑɑ kɑmɑ ḿpʋ́ɣʋ́ ɩ cɔlɔ tɔ nɑ pɛlɛ pɑ́ tʋʋ-ɩ mpʋ tɔtɔ.
Yesu hɛɛʋ
(Mɑlǝkɩ 15:33-41; Luku 23:44-49; Yohɑɑnɩ 19:28-30)
45 Pǝ kɔmɑ nɑ pǝ́ tɑlɑ ilim sikuɣu, ɩlɛnɑ sǝkpɛtʋɣʋ nyɑlɑ ɩcɑtɛ tɔɔ hɑlǝnɑ ilim kpili. 46 Ilim kpilɑ mpʋ, ɩlɛnɑ Yesu kiisinɑ nɔɣɔ sɔsɔɣɑ sɩ: Eli Eli, lemɑ sɑpɑtɑni? Nɑ tǝlɛ tǝ yɔɣɔtǝɣɩ sɩ: Mɑ Ɩsɔ mɑ Ɩsɔ, pepe tɔɔ kɛ́ n lɔ-m?
47 Mpɑ pɑɑ sǝŋɑ tǝnɑ tɔ pɑ tɑɑ lɛlɑɑ nɩɩ mpʋ, ɩlɛnɑ pɑ́ tɔ sɩ: Ɩ yɑɑnɑ ntɛɣɛ Ilii.
48 Ɩlɛnɑ pɑ tɑɑ nɔɣɔlʋ kpɑɣɑ ɑsewɑ nɑ ɩ́ polo nɑ ɩ́ lii kpɑlǝkpɑm sɑŋ kɛ lʋm kʋnyǝŋǝm nɑpǝlɩ pǝ tɑɑ, nɑ ɩ́ tʋʋ kpɑ́tʋ́ɣʋ́ nɔɣɔ tɑɑ nɑ ɩ́ hʋlɩ Yesu sɩ ɩ́ nyɔɔ. 49 Amɑ lɛlɑɑ nɑ́ tɔmɑ sɩ: Ɩ́ yele nɑ tǝ́ nɑ́ Ilii kɑ́ kɔɔ nɑ ɩ́ wɑɑsɩ-ɩ yɑɑ ɩsǝnɑ.
50 Tǝnɑɣɑ Yesu tɑsɑ kiisuɣu kɛ sɔsɔm, ɩlɛnɑ ɩ́ hɛɛ.
51 Ḿpʋ́ɣʋ́ wɑɑtʋ ɩnǝɣɩ kpɑkpɑɑ, pʋʋɣʋ sɔsɔɔʋ ŋku kɩɩ kɑɣɑ Ɩsɔ tǝsɛɛlɛ sɔsɔɔlɛ tɑɑ tɔ, kʋ fɑɣɑ yem kɛ́ hɑtoo ɩsɔtɑɑ nɑ pǝ́ kɑlǝsǝnɑ kʋ ɑtɛ. Nɑ tɛtʋ sele nɑ kʋkpɑmǝŋ yɑ pɔɣɔlɛɛ, 52 nɑ pǝlɑɑŋ tʋlɩ nɑ Ɩsɔ yǝlɑɑ mpɑ pɑ sǝpɑ tɔ pɑ tɑɑ pɑɣɑlɛ fe. 53 Ḿpʋ́ɣʋ́ pɑ lɩɩ pǝlɑɑŋ tɑɑ, nɑ wɑɑtʋ wei Yesu kɔmɑ nɑ ɩ́ fe tɔ pɑ́ sʋʋ Ɩsɔ ɩcɑtɛ nɑŋŋ nyǝntɛ tɑɑ, nɑ yǝlɑɑ pɑɣɑlɛ nɑ-wɛ.
54 Ḿpʋ́ɣʋ́ Lom yoolɑɑ sɔsɔ nɑ yoolɑɑ mpɑ ɩ nɑ-wɛ pɑɑ tɑŋɑ Yesu tɔ, pɑ nɑwɑ tɛtʋ seluɣu nɑ pǝ tǝnɑ mpi pǝ lɑpɑ tɔ, ɩlɛnɑ pɑ́ nyɑ́ sɔsɔm nɑ pɑ́ tɔ sɩ: Tɑmpɑnɑ, yʋlʋ ɩnɛ ɩ kɛ́ Ɩsɔ Pǝyɑlʋ kɛ́. 55 Alɑɑ pɑɣɑlɛ kɑ wɛ tǝnɑ nɑ pɑ́ sǝŋɑ pooluŋ nɑ pɑ́ nyǝnǝɣɩ. Mpɛ ɩnɩ pɑ tǝŋɑɣɑnɑ Yesu kɛ́ hɑtoo Kɑlilee nɑ pɑ́ cɑlǝsǝɣɩ-ɩ. 56 Mɑkǝtɑlɑ Mɑlɩ nɑ Sɑɑkɩ nɑ Yosɛɛfʋ pɑ too Mɑlɩ nɑ Sepetee pǝyɑlɑɑ too, pɑɑ wɛ ɑlɑɑ mpɛ pɑ tɑɑ.
Yesu pim
(Mɑlǝkɩ 15:42-47; Luku 23:50-56; Yohɑɑnɩ 19:38-42)
57 Wɑɑtʋ wei tɑɑnɑɣɑ tɑɑnɑɑ tɔ, Alimɑtee ɑpɑlʋ toŋ tʋ nɔɣɔlʋ wei pɑ yɑɑ sɩ Yosɛɛfʋ tɔ ɩ kɔmɑ. Ɩ mɑɣɑmɑɣɑ ɩ kɑ tǝŋɑɣɑ Yesu kɛ́. 58 Ḿpʋ́ɣʋ́ ɩ polɑ Pilɑtɩ kiŋ nɑ ɩ́ sǝlǝmɩ-ɩ sɩ ɩ kpɑkǝɣɩ sǝtʋ Yesu. Tǝnɑɣɑ Pilɑtɩ tɔmɑ sɩ pɑ́ cɛlɛ-ɩ. 59 Ɩlɛnɑ ɩ́ kpɑɣɑ sǝtʋ nɑ ɩ́ tɑkɩ-ɩ kponkpontu toŋ nyǝntʋ nti pɑ yɑɑ sɩ lɛŋ tɔ tǝ pʋŋkɑhʋlʋŋɑ kʋfɑlɑɣɑ. 60 Nɑ ɩ́ polo nɑ ɩ́ pimi-ɩ ɩ mɑɣɑmɑɣɑ ɩ pǝlɑɑʋ ŋku pɑ hulɑ kʋkpɑmʋɣʋ tɑɑ tɔ kʋ tɑɑ. Nɑ ɩ́ pilimi pɩɩʋ sɔsɔɔʋ nɑkʋlɩ nɑ ɩ́ suli pǝlɑɑʋ nɔɣɔ. Ɩlɛnɑ ɩ́ tɛɛ ɩ́ kpe. 61 Nɑ Mɑkǝtɑlɑ Mɑlɩ nɑ Mɑlɩ lɛlʋ pɑ́ cɑɣɑ tǝnɑɣɑ pǝlɑɑʋ ɩsɛntɑɑ.
Pǝlɑɑʋ tɑŋʋɣʋ
62 Kʋyɑkʋ kʋhɛɛsʋɣʋ tɔɔ sɔɔlʋ lɑpʋ tɛmɑ nɑ tɛʋ fe, ɩlɛnɑ kɔtǝlɑɑ sɔsɑɑ nɑ Fɑlisɑnɑɑ kpɛntɩ nɑ pɑ́ polo Pilɑtɩ kiŋ, 63 nɑ pɑ heeli-ɩ sɩ: Tɑcɑɑ, tǝ tɔɔsɑɑ sɩ pɔpɔtʋ ɩnɩ ɩ kɑ yɔɣɔtɑɑ sɩ ye pǝ lɑpɑ wɛɛ tooso ɩnɩ ɩ kɑ́ fe. 64 Tɔʋ, mpʋ tɔ, yele nɑ pɑ́ tɑŋ pǝlɑɑʋ hɑlǝnɑ pǝ́ tɑlɑ kʋyɛɛŋ tooso wule. Ɩ ɩfɑlɑɑ ɩ́ tɑɑ kɔɔ nɑ pɑ́ ŋmɩɩlɩ-ɩ nɑ pɑ́ looli sɑmɑɑ sɩ ɩ́ femɑ sǝtɑɑ tɑɑ. Ye pǝ lɑpɑ mpʋ, tǝlɛ tǝ pɔpɔtʋ kɑ́ kǝlɩ kɑncɑɑlɑɣɑ nyǝntʋ.
65 Ḿpʋ́ɣʋ́ Pilɑtɩ tɔmɑ-wɛ sɩ: Yoolɑɑ mpɑ pɑɑ tɑŋ tɔɣɔlɔ, ɩ́ polo ɩ́ tɑŋ-kʋɣʋ teu teu.
66 Tǝnɑɣɑ kɔtǝlɑɑ polɑɑ nɑ pɑ́ tɑɣɑnɩ pǝlɑɑʋ tɔɔ pɩɩʋ ŋkʋɣʋ teu, nɑ pɑ́ tʋ pɑ kʋyʋsʋm sɩ nɔɣɔlʋ ɩ́ tɑɑ tokinɑ. Ɩlɛnɑ pɑ́ sɩɩ yoolɑɑ sɩ pɑ́ tɑŋ.
ɑ 27:16 Pɑlɑpɑɑsɩ: Piipilinɑɑ lɛlɑɑ nɑ sɔɔsǝɣɩ sɩ Yesu Pɑlɑpɑɑsɩ. ɑ 27:34 tʋɣʋ nɑkʋlɩ kʋ cǝlǝm: Pǝ kɛ́ kɔɔlɛ nte tǝ lɑkɩ nɑ yʋlʋ too nɑ pǝ́ kʋ ɩ wʋsɑsɩ tɔɣɔ. Amɑ Yesu nɑ sɔɔlɑɑ sɩ ɩ́ wɛɛnɑ ɩ ɩsɛ kɛ mpʋ hɑlǝnɑ ɩ sǝm.