7
Tǝmɑ footuɣu tɔm
(Luku 6:37-38,41-42)
Ɩ́ tɑɑ footi lɛlɑɑ, pǝ́ tɑɑ kɔɔ nɑ Ɩsɔ hʋʋnɑ-mɛ. Pǝ tɑɣɑ pʋlʋ tɔɔ, ɩsǝnɑ ɩ́ footiɣi mǝ tɔɣɔntǝlɛnɑɑ tɔɣɔ Ɩsɔ kɑ́ hʋʋnɑ-mɛ. Nɑ ɩsǝnɑ ɩ́ mɑɣɑsǝɣɩ mǝ tɔɣɔntǝlɛnɑɑ tɔɣɔ Ɩsɔ kɑ́ mɑɣɑsɩ-mɛ. Ɩsǝnɑɣɑ pǝ lɑpɑ nɑ ń nɑɑkɩ nyɩɩliim wei ɩ wɛ nyɑ́ tɔɣɔntǝlɛ ɩsǝpǝle tɑɑ tɔ, nɑ ń kɑɑ nɑ kpɑ́tʋ́ɣʋ́ ŋku kʋ wɛ nyɑ́ nyǝntɛ tɑɑ tɔ? Nɑ ɩsǝnɑɣɑ nyɑ́ pǝsǝɣɩ nɑ ń tɔ nyɑ́ tɔɣɔntǝlɛ sɩ: Sǝŋ tǝkpi nɑ mɑ́ lǝsɩ nyɑ́ ɩsǝlɛ tɑɑ nyɩɩliim, nɑ pǝyele kpɑ́tʋ́ɣʋ́ kɑɣɑ nyɑ́ nyǝntɛ tɑɑ? Cɛsʋlʋ nyɑ́, lǝsɩ kpɑ́tʋ́ɣʋ́ ŋku kʋ wɛ nyɑ́ mɑɣɑmɑɣɑ nyɑ́ ɩsǝpǝle tɑɑ tɔ, ɩlɛnɑ pǝ́cɔ́ ń nɑ́ teu tǝcɛɩcɛɩ nɑ ń lǝsɩ nyɑ́ tɔɣɔntǝlɛ ɩsǝlɛ tɑɑ nyɩɩliim ɩnɩ.
Ɩ́ tɑɑ kpɑɣɑ mpi pǝ kɛ́ Ɩsɔ nyǝm tɔ nɑ ɩ́ pɛtɩ hɑsɩ, sɩ́ tɑɑ kɔɔ nɑ sɩ́ kʋlɩ mǝ tɔɔ nɑ sɩ́ cǝlɩ-mɛ. Ɩ́ tɑɑ pɛtɩ mpi pǝ tewɑ tɔɣɔ ɑfɑnɑɑ kiŋ, pɑɑ fɛlɩ.
Pɔɔsʋɣʋ nɑ pɛɛkʋɣʋ nɑ nɔnɔɣɔ mɑpʋ tɔm
(Luku 11:9-13)
Ɩ́ sǝlǝmǝɣɩ, pɑɑ hɑ-mɛɣɛ. Ɩ́ pɛɛkǝɣɩ, ɩ́ hikiɣi kɛ́. Ɩ́ mɑkɩ, pɑ tʋlǝɣɩ-mɛɣɛ. Sǝlǝmʋlʋ kɛ pɑ hɑɑkɩ. Pɛɛkǝlʋ hikiɣinɑ. Mɑtʋ kɛ pɑ tʋlǝɣɩ. Wulee mǝ tɑɑ ɑwe pǝyɑɣɑ sǝlǝmɑ-ɩ kɑkɑlɑɣɑ nɑ ɩ́ kpɑɣɑ pǝlɛ nɑ ɩ́ cɛlɛ-kɛ? 10 Yɑɑ wulee mǝ tɑɑ ɑwe pǝyɑɣɑ sǝlǝmɑ-ɩ tinte nɑ pʋntʋ cɛlɛ-kɛɣɛ cimte ye? 11 Ye ɑsɑɣɑɑ mɛ mɩɩ pǝsɑ mǝ piyɑ kɛ kʋpɑntʋ lɑpʋ, mǝ Cɑɑ wei ɩ wɛ ɩsɔtɑɑ tɔ ɩ kɑɑ lɑ kʋpɑntʋ kɛ mpɑ pɑ sǝlǝmǝɣɩ-ɩ tɔ?
12 Ɩsǝnɑ mǝ cɑɑkɩ sɩ lɛlɑɑ ɩ́ lɑ-mɛ tɔ, mɩɩ lɑ-wɛɣɛ mpʋ tɔtɔ. Ye ɩ́ lɑpɑ mpʋ, ɩ́ tǝŋɑ kʋsǝsɩɩtʋ tǝnɑ nɑ Ɩsɔ kʋyɔɣɔtʋtʋ tɛlǝsǝlɑɑ tɔm tǝnɑ ntɛ́.
Nɔnɔɣɔ kʋkpɩɩlɑɣɑ tɔm
(Luku 13:24)
13 Ɩ́ sʋʋnɑ nɔnɔɣɔ ŋkɑ kɑ wɛ tǝfǝkɩɩ tɔ. Asɑɑlɑ tete nɔnɔɣɔ wɑlɑɑ kɛ́, nɑ pǝ mpɑɑʋ kɛ pɑɣɑlɛ tǝŋǝɣɩ. 14 Amɑ nɔnɔɣɔ ŋkɑ kɑ wɛ tǝfǝkɩɩ tɔ kɑ wɛ wɑhɑlɑ kɛ́, pǝ́cɔ́ weesuɣu nyǝŋkɑ ntɛ́. Yǝlɑɑ pǝcɔ tike tǝŋǝɣǝnɑ pǝ mpɑɑʋ.
Tʋɣʋ nyǝm nɑ kʋ pǝle kiŋ
(Luku 6:43-44)
15 Ɩ́ lɑ lɑɑkɑlɩ nɑ Ɩsɔ kʋyɔɣɔtʋtʋ tɛlǝsǝlɑɑ pɔpɔtʋnɑɑ. Pɑ kɔŋ mǝ kiŋ nɑ pɑ́ cɛsǝɣɩ ɩsɩɩ pɑ kɛ́ heeŋ, sɛsɛ ɩlɛ sʋnsʋmǝŋ kpitikpitinɑɑ ntɛ́. 16 Pɑ kʋlɑpʋtʋnɑɑ kiŋ kɛ ɩ́ kɑ́ nyǝnɑ-wɛ. Yʋlʋ kɑɑ kooli tʋɣʋ ŋku pɑ yɑɑ sɩ lɛsɛŋ tɔ kʋ pee kɛ sɔsɔʋ tɔɔ se. Pǝ́cɔ́ pɑɑ kooliɣi tʋɣʋ ŋku pɑ yɑɑ sɩ fiki tɔ kʋ pee kɛ kɔlɔŋ tɔɔ. 17 Tʋɣʋ kʋpɑŋkʋ lʋlǝɣɩ pee kʋpɑnɑ kɛ́, nɑ tʋɣʋ ɩsɑɣɑʋ nɑ́ɑ́ lʋlɩ pee ɑsɑɣɛɛ. 18 Tʋɣʋ kʋpɑŋkʋ ɩɩ lʋlǝɣɩ kpɑɩ pǝle se. Pǝ́cɔ́ kpɑɩ tʋɣʋ nɑɑ lʋlǝɣɩ pǝle kʋpɑntɛ tɔtɔ. 19 Tʋɣʋ ŋku kɩɩ lʋlǝɣɩ pee kʋpɑnɑ tɔ, pɑ sɛtǝɣɩ-kʋɣʋ nɑ pɑ́ tʋ kɔkɔ. 20 Pǝ tɔɔ kɛ́ ɩ́ kɑ́ nyɩ Ɩsɔ kʋyɔɣɔtʋtʋ tɛlǝsǝlɑɑ kʋcɛsɑɑ mpɛ nɑ pɑ kʋlɑpʋtʋnɑɑ kiŋ.
Yesu nyǝm kɛ mpɑ pɑ nyǝmɑ-ɩ tɔ
(Luku 13:25-27)
21 Pǝ tɑɣɑ pɑ tǝnɑ mpɑ pɑ yɑɑ-m Tɑcɑɑ Tɑcɑɑ tɔ pɑ tǝnɑ pɑɑ sʋʋnɑ ɩsɔtɑɑ Kɑwulɑɣɑ tɑɑ. Amɑ mpɑ pɑ lɑkɩ mɑ Cɑɑ wei ɩ wɛ ɩsɔtɑɑ tɔ ɩ luɣu nyǝntʋ tɔ pɑ tike pɑɑ sʋʋnɑ. 22 Kʋyɑkʋ ŋkʋ kʋ wule pɑɣɑlɛ kɑ́ tɔ-m sɩ: Tɑcɑɑ Tɑcɑɑ, nyɑ́ toŋ tɑɑ kɛ́ tǝ kpɑɑlǝnɑ Ɩsɔ kʋheelitu. Nyɑ́ toŋ tɑɑ kɛ́ tǝ tɔɣɔnnɑ ɑlɔɣɑɑ. Nɑ nyɑ́ toŋ kɛ tǝ lɑpǝnɑ piti tǝmɑ pɑɣɑlɛ. 23 Tǝnɑɣɑ mɑɑ cɔ-wɛ tǝfoo sɩ: Mɑ tɑ nyɩ-mɛɣɛ pɑɑ pǝcɔ. Ɩ́ tɛɛ ɩ́ fɛɛ-m, ɩsɑɣɑlɑtɑɑ mɛ.
Lɑɣɑtʋ nɑ kʋmɛlɛŋ pɑ kutuluŋ ŋmɑʋ
(Luku 6:47-49)
24 Wei ɩ nɩɩkɩ tɔm nti mɑ yɔɣɔtɑ ɩsǝntɔ nɑ ɩ́ tɔkǝɣɩ-tɩ tɔ, pʋntʋ nǝɣǝsǝnɑ lɑɣɑtʋ wei ɩ ŋmɑ ɩ kutuluɣu kɛ pǝtolɑɣɑ tɑɑ tɔ. 25 Ḿpʋ́ɣʋ́ tɛʋ nɩɩnɑ heelim sɔsɔɔm nɑ pǝ́ cɑsǝɣɩ kutuluɣu ŋkʋ, nɑ pusi su nɑ sɩ lɩɩ. Kutuluɣu tɑ hoti. Mpi tɔ, pɑ sɩɩ kʋ kite kɛ pǝtolɑɣɑ tɑɑ kɛ́. 26 Amɑ wei ɩ nɩɩkɩ tɔm nti mɑ yɔɣɔtɑ ɩsǝntɔ nɑ ɩɩ tɔkǝɣɩ-tɩ tɔ, pʋntʋ nǝɣǝsǝnɑ ɩsɩɩ kʋmɛlɛŋ ŋku kʋ ŋmɑ kutuluɣu kɛ kɑnyǝŋɑ tɑɑ tɔɣɔ. 27 Ḿpʋ́ɣʋ́ tɛʋ nɩɩnɑ heelim sɔsɔɔm nɑ pǝ cɑsǝɣɩ kutuluɣu, nɑ pusi su nɑ sɩ lɩɩ. Tǝnɑɣɑ kutuluɣu hotɑɑ nɑ pǝ tǝnɑ pǝ pǝsɩ ncɑɑlɛ tǝkpɑtɑɑ.
Yesu toŋ tɔm
28 Yesu tɛmɑ sɛɣɛsʋɣʋ, ɩlɛnɑ pǝ́ cɛ sɑmɑɑ lɑŋɑ kɛ teu. 29 Mpi tɔ, ɩ sɛɣɛsɑɣɑ-wɛɣɛ nɑ toŋ ɩ tɑ nyɑ́. Ɩ fɛɩ ɩsɩɩ pɑ Ɩsɔ Tɔm sɛɣɛsǝlɑɑ lɛlɑɑ.