15
Mʋlʋm nɑ nim nɑ sʋlʋm pǝ kɔtɑɣɑ
1 Ḿpʋ́ɣʋ́ Tɑcɑɑ tɔmɑ Moisi sɩ:
2 Tɛlǝsɩ Ɩsɛɣɛlɩ nyǝ́mɑ sɩ, wɑɑtʋ wei ɩ́ kɑ́ sʋʋ tɛtʋ nti mɑ hɑɑkɩ-mɛ tɔ, tǝ tɑɑ sɩ ɩ́ cɑkɩ tɔ,
3 ye ɩ́ lɑkɩ kɔtɑsɩ nsi kɔkɔ lusɑ sɩ tǝnɑ tɔ yɑɑ ciikuɣu nyǝnsɩ yɑɑ nɔɣɔ sɩɩʋ nyǝnsɩ. Yɑɑ luɣu kʋlʋmʋɣʋ nyǝnsɩ yɑɑ ɑcimɑ nyǝnsɩ. Nɑʋ yɑɑ heu yɑɑ pǝ́ŋ́ kɛ ɩ́ kɑ́ lɑnɑ pǝ kɔtɑɣɑ. Nɑ mɑ lɑŋlɛ hɛɛnɑ pǝ sɔɔsʋŋ.
4 Ye wei ɩ kɔnɑ ɩ kpǝntɛ, ɩ kɑ́ tǝnɩ tǝ tɔɔ kɛ́ tɔɣɔnɑɣɑ kɔtɑɣɑ. Ɩsɩɩ mʋlʋm mpi pɑ nuɣutinɑ nim liitili kʋlʋm nɑ titite tɔɣɔ kiloonɑɑ tooso.
5 Nɑ ɩ́ liisi sʋlʋm kɛ liitili kʋlʋm nɑ titite kɛ pɑɑ ɩwǝyɑɣɑ ŋkɑ kɑ kɔtɑɣɑ ŋkɑ kɔkɔ lusɑ kɑ tǝnɑ tɔ, yɑɑ ciikuɣu nyǝŋkɑ tɔɔ.
6 Ye pǝ kɛ́ ɩwɑɑʋ, ɩlɛ ɩ́ sɔɔsɩ mʋlʋm mpi pɑ nuɣutinɑ nim liitilinɑɑ nɑɑlɛ tɔɣɔ kiloonɑɑ nɑɑtoso.
7 Nɑ sʋlʋm kɛ liitilinɑɑ nɑɑlɛ, nɑ Tɑcɑɑ lɑŋlɛ hɛɛnɑ pǝ sɔɔsʋŋ.
8 Ye ɩsɩɩ nɑʋ kɛ ɩ́ lɑkɩ-m kɔtɑɣɑ ŋkɑ kɔkɔ lusɑ kɑ tǝnɑ tɔ, yɑɑ ciikuɣu nyǝŋkɑ, yɑɑ nɔɣɔ sɩɩʋ nyǝŋkɑ.
9 Ɩ́ tǝnɩ kpǝntɛ tɔɔ kɛ́ mʋlʋm mpi pɑ nuɣutinɑ nim liitilinɑɑ tooso, tɔɣɔ kiloonɑɑ pɔɣɔlɑɣɑfɛɩ nɑɑnʋwɑ.
10 Nɑ sʋlʋm kɛ liitilinɑɑ tooso, nɑ Tɑcɑɑ lɑŋlɛ hɛɛnɑ pǝ sɔɔsʋŋ.
11 Ye ɩ́ lɑkɩ nɑʋ yɑɑ ɩwɑɑʋ yɑɑ ɩwǝyɑɣɑ yɑɑ pinɑɣɑ kɛ kɔtɑɣɑ, ḿpʋ́ɣʋ́ ɩ́ kɑ́ lɑ.
12 Pɑɑ tɔlɑ ɩsǝnɑɣɑ ɩ́ kɑ́ lɑ kɔtɑɣɑ. Ɩ́ kɑ́ tǝnɩ pɑɑ nte tǝ tɔɔ kɛ́ ḿpʋ́ɣʋ́.
13-14 Yɑɑsi ɩnǝɣɩ Ɩsɛɣɛlɩ nyǝ́mɑ mɛ ɩ́ kɑ́ tǝŋ nɑ ɩ́ lɑkɩ kɔtɑsɩ sɔɔsʋŋ nyǝnsɩ. Nɑ pǝ́ kpɛnnɑ mǝ tɛtʋ tɑɑ cɑɣɑlɑɑ tǝnɑ. Mpɑ pɑ leelɑɑ nɑ mpɑ pɑ tɑ leeli tɔ.
15-16 Kʋsǝsɩɩtʋ kʋlʋmtʋ ntǝɣɩ Ɩsɛɣɛlɩ nyǝ́mɑ nɑ cɑɣɑlɑɑ ɩ́ kɑ tɔkɩ teitei, nɑ pǝ́ polo mǝ piyɑ piyɑ. Tɑcɑɑ mɑ́ mɑɑ fɑɣɑsǝɣɩ.
Kɑkɑlɑsɩ kɑncɑɑlɑɣɑ nyǝnsɩ kɔtɑɣɑ
17 Ḿpʋ́ɣʋ́ Tɑcɑɑ tɔmɑ Moisi sɩ:
18 Tɛlǝsɩ Ɩsɛɣɛlɩ nyǝ́mɑ sɩ, ye wɑɑtʋ wei ɩ́ tɑlɑ tɛtʋ nti tǝ tɑɑ mɑ pukinɑ-mɛ tɔ,
19 ɩlɛ ɩ́ kpɑɣɑ tǝ tɔɣɔnɑɣɑ nɑ ɩ́ lɑ-m kɔtɑɣɑ. Ɩlɛnɑ pǝ́cɔ́ ɩ́ tɔɣɔ.
20 Ɩlɛnɑ ɩ́ cosi mǝ kɑncɑɑlɑɣɑ somtu tɑɑ nɑ ɩ́ tʋ́ kɑkɑlɑɣɑ. Nɑ ɩ́ kpɑɑsɩ-m-kɛ nɑ ɩsɔ, ɩsɩɩ pɑ lɑkʋɣʋ kɑncɑɑlɑɣɑ pee wenɑ pɑ mɑpɑ tɔ.
21 Nɑ ɩ́ lɑ-m kɔtɑɣɑ kɛ pǝ kɑkɑlɑɣɑ kɑncɑɑlɑɣɑ nyǝŋkɑ. Ɩ́ kɑ́ tɔkɩ kʋsǝsɩɩtʋ tǝnɛɣɛ tɑm tɔɔ kɛ́.
Ɩsɑɣɑtʋ nti tǝ yʋkǝnɑ yʋlʋ tɔ tǝ kɔtɑɣɑ
22-23 Ḿpʋ́ɣʋ́ Moisi tɔmɑ sɩ: Ye kʋyɑkʋ nɑkʋlɩ pǝ yʋkǝnɑ mɛ, yɑɑ mǝ piyɑ piyɑ kɛ wɑɑtʋ nɔɣɔlʋ, ɩlɛnɑ pʋntʋ yɔkɩ kʋsǝsɩɩtʋ nti mɑ tɛlǝsɑ-mɛ ɩsǝntɔ tɔ tǝ tɑɑ nɑtǝlɩ, ɩlɛ ɩ́ tɑɣɑnɩ-tɩ nɑ kɔtɑɣɑ.
24 Ye pǝ kɛ́ ɩsɑɣɑtʋ nti tǝ yʋkǝnɑ yʋlʋ tɔ nɑ sɑmɑɑ tɑ nyɩ pǝ tɔm, ɩlɛ ɩ́ cɑɑ lɑtǝcɛ nɑ ɩ́ lɑ-m kɔtɑɣɑ sɔɔsʋŋ nyǝŋkɑ ŋkɑ kɔkɔ lusɑ kɑ tǝnɑ tɔ. Nɑ ɩ́ tǝnɩ kɑ tɔɔ kɛ́ mʋlʋm, nɑ sʋlʋm, nɑ ɩsɑɣɑtʋ hɩɩsʋɣʋ kɔtɑɣɑ pǝŋtʋlʋɣʋ.
25 Kɔtʋlʋ kɑ́ lɑ ɩsɑɣɑtʋ hɩɩsʋɣʋ kɔtɑɣɑ kɛ Ɩsɛɣɛlɩ nyǝ́mɑ tǝnɑ, nɑ pǝ́ hɩɩsɩ mǝ ɩsɑɣɑtʋ. Mpi tɔ, pǝ kɛ́ ɩsɑɣɑtʋ nti tǝ yʋkǝnɑ-mɛ tɔɣɔ. Nɑ pǝ tɔɔ kɛ́ ɩ́ kɔnɑ-m kɔtɑɣɑ ŋkɑ kɔkɔ lusɑ kɑ tǝnɑ tɔ. Nɑ ɩsɑɣɑtʋ hɩɩsʋɣʋ nyǝŋkɑ.
26 Pɩɩ hɩɩsɩ Ɩsɛɣɛlɩ nyǝ́mɑ tǝnɑ ɩsɑɣɑtʋ kɛ. Nɑ cɑɣɑlɑɑ mpɑ pɑ wɛ mǝ hɛkʋ tɔ pɛlɛ pɑ nyǝntʋ. Mpi tɔ, pǝ kɛ ɩsɑɣɑtʋ nti tǝ yʋkǝnɑ-mɛ tɔɣɔ.
27 Ye yʋlʋ kʋlʋm kɛ pǝ yʋkǝnɑɑ nɑ ɩ́ lɑ ɩsɑɣɑtʋ, ɩlɛ pǝnɑɣɑ kʋlʋmɑɣɑ pǝ́ŋ́ kɛ ɩ kɑ́ kɔtǝnɑ.
28 Ɩlɛnɑ kɔtʋlʋ lɑ ɩsɑɣɑtʋ hɩɩsʋɣʋ kɔtɑɣɑ, kɛ wei ɩnɩ pǝ yʋkǝnɑɑ nɑ ɩ́ lɑ́ ɩsɑɣɑtʋ kɛ mpʋ tɔ. Ɩ tɛŋ mpʋ ɩlɛnɑ ɩ ɩsɑɣɑtʋ hɩɩsɩ.
29 Pɑɑ Ɩsɛɣɛlɩ tʋ yɑɑ cɑɣɑlʋ kɛ pǝ yʋkǝnɑɑ nɑ ɩ́ pǝntɩ, kʋsǝsɩɩtʋ kʋlʋmtʋ tǝnɛ ɩnǝɣɩ ɩ́ kɑ́ tɔ́kɩ.
30 Amɑ ye Ɩsɛɣɛlɩ tʋ yɑɑ cɑɣɑlʋ pǝntǝnɑ tǝfɑɑ, ɩsɩɩ pɑ kpiisɑ-ɩ tɛtʋ tɑɑ.
31 Ɩ nyʋɣʋ tɑɑ kɛ́ ɩ kpiisuɣu kɑ́ mǝlɩ. Mpi tɔ, ɩ footɑ Tɑcɑɑ tɔm, nɑ ɩ́ wɑkǝlɩ ɩ kʋtʋtʋtʋ.
Kʋyɑkʋ kʋhɛɛsʋɣʋ wɑkǝlʋɣʋ tɔm
32 Ḿpʋ́ɣʋ́ wɑɑtʋ wei Ɩsɛɣɛlɩ nyǝ́mɑ tɑlɑ wʋlɑɣɑ tɛtʋ tɑɑ, ɩlɛnɑ kʋyɑkʋ nɑkʋlɩ pɑ́ kpǝlɩ pɑ tɑɑ nɔɣɔlʋ nɑ ɩ́ cɑɑkɩ tɑɑsɩ kɛ kʋyɑkʋ kʋhɛɛsʋɣʋ wule.
33 Ɩlɛnɑ pɑ́ ponɑ-ɩ Moisi nɑ Alɔŋ nɑ sɑmɑɑ tǝnɑ kiŋ.
34 Nɑ pɑ́ sɩɩ-ɩ nɑ pɑ́ tɑŋɑ nti Ɩsɔ kɑ heeli-wɛ sɩ pɑ́ lɑnɑ-ɩ tɔ.
35 Ntɛnɑ Tɑcɑɑ heeli Moisi sɩ: Pǝ wɛɛ sɩ sɑmɑɑ tǝnɑ ɩ́ kʋ́ pʋntʋ ɩnǝɣɩ nɑ pɛɛ, kɛ tǝsikile wɑɑlɩ.
36 Kɛlɛnɑ pɑ́ lɩɩnɑ-ɩ nɑ pɑ́ kʋ-ɩ nɑ pɛɛ, ɩsɩɩ Tɑcɑɑ kɑ heeluɣu Moisi tɔ.
Tokonɑɑ sɔsɑɑ ɑtʋɣʋsɑ
37 Ḿpʋ́ɣʋ́ Tɑcɑɑ tɔmɑ Moisi sɩ:
38 Tɛlǝsɩ Ɩsɛɣɛlɩ nyǝ́mɑ sɩ, mǝ nɑ mǝ lʋlʋŋ nyǝ́mɑ ɩ́ kɑ́ kɔɔkɩ mǝ tokonɑɑ sɔsɑɑ ntompee kɛ ɑtʋɣʋsɑ kɛ́, nɑ ɩ tɑmsǝɣɩ-yɛɣɛ ɑkpɑɑyɑlɑ kponkpontu.
39-40 Ntǝɣɩ ɩ́ kɑ́ nyǝnǝɣɩ nɑ ɩ́ tɔɔsǝɣɩ mɑ kʋsǝsɩɩtʋ tɔɔ, nɑ ɩ tɔkǝɣɩ-tɩ. Ɩlɛ ɩ kɑɑ nyɩɩlɩ tɩɩŋ wɑɑnɩ wɑɑnɩ lɑɑʋ kɛ mǝ hʋwɛɛ w tɑɑ. Tǝnɑɣɑ ɩ́ kɑ́ hʋlǝnɑ sɩ ɩ́ kɛ́ mɑ nyǝ́mɑ.
41 Mɑɣɑlɛ Tɑcɑɑ mǝ Ɩsɔ, mɑ lǝsǝnɑ-mɛɣɛ Icipiti tɛtʋ tɑɑ sɩ mɑ́ wɛɛ mǝ Ɩsɔ.