23
1 Ḿpʋ́ɣʋ́ Pɑlɑɑm tɔmɑ Pɑlɑkɩ sɩ: Nmɑ-m tǝfɛɛnlɛ kɛ tɔm nɑɑtosompɔɣɔlɑɣɑ. Nɑ ń cɛlɛ-m lɑtǝcɛnɑɑ nɑ ɩwɑɑŋ kɛ nɑɑtosompɔɣɔlɑɣɑ mpɔɣɔlɑɣɑ.
2 Ɩlɛnɑ Pɑlɑkɩ lɑ mpʋ, nɑ pɑ nɑɑlɛ pɑ́ lɑɑ lɑtǝcɛ nɑ ɩwɑɑʋ kɛ pɑɑ lonte nte tǝ tɑɑ.
3 Nɑ Pɑlɑɑm tɔ Pɑlɑkɩ sɩ:
Sǝŋ tǝfɛɛnlɛ cǝnɛ nɑ mɑ́ hɑtǝlɩ. Ntɑnyɩ Tɑcɑɑ kɑ́ lɩɩ mɑ tɔɔ nɑ ɩ́ heeli-m nɑtǝlɩ nɑ mɑ tɛlǝsɩ-ŋ. Ɩlɛnɑ ɩ́ kpɑ tontoŋlɛ tɔɔ.
4 Tǝnɑɣɑ Tɑcɑɑ lɩɩ ɩ tɔɔ, nɑ Pɑlɑɑm tɔ sɩ: Mɑ ŋmɑwɑ tǝfɛɛnlɛ kɛ tɔm nɑɑtosompɔɣɔlɑɣɑ, nɑ mɑ́ lɑɑ lɑtǝcɛ nɑ ɩwɑɑʋ kɛ pɑɑ tǝfɛɛnlɛ nte tǝ tɔɔ.
5 Ɩlɛnɑ Tɑcɑɑ hʋlɩ Pɑlɑɑm kɛ tɔm nti ɩ kɑ yɔɣɔtɩ tɔ. Nɑ ɩ́ tɔmɩ-ɩ sɩ: Mǝlɩ Pɑlɑkɩ kiŋ.
6 Ḿpʋ́ɣʋ́ ɩ mǝlɑ Pɑlɑkɩ nɑ ɩ wɑɑlɩ nyǝ́mɑ pɑ cɔlɔ nɑ pɑ́ sǝŋ tǝfɛɛnlɛ tǝnɑ.
7 Kɑwǝyɑɣɑ ŋkɑ Pɑlɑɑm mɑpɑ tɔɣɔlɔ:
Mowɑpʋ wulɑʋ Pɑlɑkɩ yɑɑnɑ-m
ilim tǝlɩɩlɛ pɔɔŋ tɑɑ kɛ Silii,
sɩ mɑ́ nyɑɑsɩ Ɩsɛɣɛlɩ nyǝ́mɑ.
Nɑ mɑ́ tǝŋsɩ Yɑkɔpʋ lʋlʋɣʋ nyǝ́mɑ kɛ mpusi.
8 Ɩlɛ ɩsǝnɑɣɑ mɑɑ tǝŋsɩ mpusi kɛ wei
Tɑcɑɑ tɑ tǝŋsɩ mpusi tɔ?
Yɑɑ ɩsǝnɑɣɑ mɑɑ nyɑɑsɩ yǝlɑɑ
mpɑ ɩ tɑ nyɑɑsɩ tɔ?
9 Pɔɔŋ tɔɔ kɛ́ mɑ wɛɛ, nɑ mɑ́ loosiɣi yǝlɑɑ mpɛ.
Pulɑsɩ tɔɔ kɛ́ mɑ wɛɛ nɑ mɑ́ nyǝnǝɣɩ-wɛ.
Pɑ fɑɣɑnɑ piitimnɑɑ lɛmpɑ kɛ,
nɑ pɑ tǝcɑɣɑlɛ wɛnɑ tǝ mpɑɑ.
10 Aweɣelɛ Ɩsɛɣɛlɩ sɑmɑɑ kɑllʋ?
Yɑɑ ɩ cɛkǝnɑ ɩ lʋlʋɣʋ nyǝ́mɑ nyʋɣʋ?
Mɑ sɔɔlɑ mɑ́ nɑ siɣisilɑɑ mpɛ tǝ́ kpɛntɩ sǝm kɛ́,
nɑ pǝ́ lɑ-m ɩsɩɩ mpɛ.
11 Mpʋɣʋlɛ Pɑlɑkɩ pɔɔsɑ Pɑlɑɑm nɑ piti sɩ: Wetiɣilɛ n lɑpɑ-m mpʋ? Mɑ kɔnɑ-ŋ kɛ́ sɩ ń tǝŋsɩ mɑ kolontunɑɑ kɛ mpusi ɩlɛnɑ nyɑɑ mǝlɩ nɑ ń kooliɣi-wɛɣɛ kʋpɑntʋ nɑ?
12 Ntɛnɑ Pɑlɑɑm cɔ sɩ: Tǝlɑsɩ kɛ́ sɩ mɑ yɔɣɔtɩ nti Tɑcɑɑ tʋ mɑ nɔɣɔ tɑɑ tɔ.
Pɑlɑɑm koolee nɑɑlɛ nyǝnɑ
13 Mpʋɣʋlɛ Pɑlɑkɩ tɔmɑ Pɑlɑɑm sɩ: Kɔɔ nɑ tǝ́ lɑɣɑsɩ timpi n kɑ́ nɑ́ Ɩsɛɣɛlɩ nyǝ́mɑ tǝnɑ tɔ. Pǝ tɑɣɑ pʋlʋ, pǝcɔ tike kɛ n nɑɑkɩ. Tǝnɑɣɑ n kɑ́ tǝŋsɩ-m-wɛɣɛ mpusi.
14 Ɩlɛnɑ ɩ́ ponɑ Pɑlɑɑm kɛ Pisikɑ pʋɣʋ luɣu tǝfeŋle, nɑ ɩ́ ŋmɑ tǝfɛɛnlɛnɑɑ tɔtɔɣɔ nɑɑtosompɔɣɔlɑɣɑ. Nɑ ɩ́ lɑɑ lɑtǝcɛ nɑ ɩwɑɑʋ kɛ pɑɑ tǝfɛɛnlɛ nte tǝ tɔɔ.
15 Nɑ ɩ́ tɔ́ Pɑlɑkɩ sɩ: Sǝŋ tǝnɑ nɑ mɑ́ polo nɑ mɑ́ nɑ Ɩsɔ tǝ́ suli.
16 Ɩlɛnɑ Tɑcɑɑ tʋ Pɑlɑɑm nɔɣɔ tɑɑ kɛ́ tɔm sɩ ɩ́ mǝlɩ nɑ ɩ́ heeli Pɑlɑkɩ.
17 Pɑlɑɑm mǝlɑ wulɑʋ nɑ ɩ wɑɑlɩ nyǝ́mɑ pɑ kiŋ, ɩlɛnɑ ɩ́lɛ́ ɩ pɔɔsɩ-ɩ sɩ: Wentiɣilɛ Tɑcɑɑ heelɑ-ŋ?
18 Ḿpʋ́ɣʋ́ Pɑlɑɑm kpɑɣɑ kɑwǝyɑɣɑ sɩ:
Sipɔɔ pǝyɑlʋ Pɑlɑkɩ kʋlɩ nɑ n ke ŋkpɑŋŋ.
19 Ɩsɔ tɑ́ kɛ́ yʋlʋ sɩ ɩ looliɣi, yɑɑ ɩ́ lɑɣɑsɩ ɩ kʋsǝsɩɩtʋ.
Nti ɩ sɩɩwɑ tɔɣɔ ɩ lɑkɩ tǝtetete.
20 Tɑcɑɑ koolinɑ yǝlɑɑ mpɛɣɛ kʋpɑntʋ,
nɑ mɑ́ɑ́ tɛɛsǝɣɩ,
21 mɑɑ pǝsǝɣɩ nɑ mɑ́ lɑɣɑsɩ pʋlʋ.
Ɩ wɛ pɑ wɑɑlɩ kɛ́ ɩ tɑ nɑ pɑ ɩsɑɣɑtʋ, yɑɑ pɑ tɑsǝkǝlɛ.
Ɩ kɛ́ pɑ wulɑʋ kɛ́ nɑ pɑ́ wilitiɣi-ɩ nɑ lɑŋhʋlʋmlɛ.
22 Ɩnɩ ɩ lǝsǝnɑ-wɛɣɛ Icipiti tɑɑ
nɑ tomiŋ ɩsɩɩ tɑɑlɛ nɑʋ.
23 Tɩɩtʋ nɑ pee pɔɔsʋɣʋ ɩɩ lɑkɩ Ɩsɛɣɛlɩ nyǝ́mɑ kɛ pʋlʋ.
Pǝ tɔɔ kɛ́ pɑ nyǝnǝɣɩ Ɩsɛɣɛlɩ nɑ pɑ tɔŋ sɩ:
Ɩɩ nɑɑkɩ mpi Ɩsɔ lɑpɑ-wɛ tɔ.
24 Yǝlɑɑ mpɛ pɑ wɛ toŋ kɛ́ ɩsɩɩ tɔɣɔlɑɣɑ
ŋkɑ kɑ cǝlǝɣɩ kɑ tɔɣɔnɑɣɑ,
nɑ kɑ́ nyɔɔkɩ kɑ kʋkʋkʋm cɑlǝm,
nɑ pǝ́cɔ́ kɑ́ hǝntǝɣɩ tɔ.
25 Ntɛnɑ Pɑlɑkɩ tɔ Pɑlɑɑm sɩ: Ye n kɑɑ tǝŋsɩ-wɛɣɛ mpusi, ɩlɛ tɑɑ kooli-wɛɣɛ kʋpɑntʋ.
26 Kɛlɛnɑ Pɑlɑɑm sɩ: Anɩ mɑ tɛmɑ-ŋ heeluɣu sɩ nti Tɑcɑɑ tʋɣʋ mɑ nɔɣɔ tɑɑ tɔɣɔ mɑ yɔɣɔtǝɣɩ.
Pɑlɑɑm koolee tooso nyǝnɑ
27 Ḿpʋ́ɣʋ́ Pɑlɑkɩ yɑɑ pɑlɑɑm sɩ: Tǝ́ lɑɣɑsɩ lonte lɛntɛ. Ntɑnyɩ Ɩsɔ kɑ́ tisi nɑ ń tǝŋsɩ-m yǝlɑɑ mpɛɣɛ mpusi.
28 Ɩlɛnɑ ɩ́ kpɑɑnɑ-ɩ Peyɔɔ pʋɣʋ tɔɔ timpi yǝlɑɑ nɑɑkɩ wʋlɑɣɑ tɛtʋ tɔ.
29 Nɑ Pɑlɑɑm tɔ Pɑlɑkɩ sɩ: Nmɑ-m tǝfɛɛnlɛnɑɑ kɛ nɑɑtosompɔɣɔlɑɣɑ, nɑ ń cɑɑ-m lɑtǝcɛnɑɑ kɛ nɑɑtosompɔɣɔlɑɣɑ nɑ heeŋ kɛ mpʋ tɔtɔ.
30 Ɩlɛnɑ Pɑlɑkɩ lɑ mpʋ nɑ ɩ́ lɑɑ lɑtǝcɛ nɑ ɩwɑɑʋ kɛ pɑɑ tǝfɛɛnlɛ nte tǝ tɔɔ.