24
1 Ḿpʋ́ɣʋ́ Pɑlɑɑm cɛkǝnɑɑ sɩ Tɑcɑɑ sɩɩwɑɣɑ sɩ ɩ kooliɣi Ɩsɛɣɛlɩ nyǝ́mɑ kɛ kʋpɑntʋ. Ɩlɛ ɩ tɑ tɑsɑ pɛɛkʋɣʋ sɩ ɩ suliɣi Ɩsɔ ɩsɩɩ ɩ tɩɩ lɑkɩ tɔ. Ntɛnɑ ɩ kɛɛsɩ kpɑkpɑɑ nɑ wʋlɑɣɑ tɛtʋ tɔɔ.
2 Ɩ kʋsɑ ɩsɛ nɑ ɩ́ nɑ́ Ɩsɛɣɛlɩ nyǝ́mɑ kɛ pɑ tǝsikile, ɩlɛnɑ Ɩsɔ Feesuɣu tii ɩ tɔɔ.
3 Nɑ ɩ́ mɑ kɑwǝyɑɣɑ sɩ:
Peyɔɔ pǝyɑlʋ Pɑlɑɑm mɑ́, mɑ kʋkpɑɑlǝtʋ ntɔ.
Pǝ kulɑ mɑ ɩsɛ kɛ́.
4 Mɑ nɩɩkɩ Ɩsɔ kʋyɔɣɔtʋtʋ kɛ́,
nɑ mɑ́ pɑɑsǝɣǝnɑ nti Tomɑ tǝnɑ tʋ hʋlǝɣɩ-m tɔ.
Ye mɑ sɛɛkɩ-ɩ ɩ hʋlǝɣɩ-m ɩ tǝɣɩ.
5 Ɩsɛɣɛlɩ yǝlɑɑ Yɑkɔpʋ lʋlʋɣʋ nyǝ́mɑ mɛ,
mǝ cokɑ tewɑɣɑ pǝ tɩɩ fɛɩ.
6 Pǝ cɑɣɑ kɛ́ ɩsɩɩ lɔɔŋ wei ɩ kpeŋ tɔ,
yɑɑ pɔɣɔ kʋtemiŋ tɔɔ hɑlǝm.
Yɑɑ tɩɩŋ kʋpɑŋ wei Tɑcɑɑ tuuwɑ pɔɣɔ nɔɣɔ tɔ.
7 Pǝ cɑɣɑ ɩsɩɩ lʋm sukuɣu nɑ pǝ wɑtǝɣɩ tɩɩŋ tɛɛ tɔ.
Pɑ wulɑʋ kɑ́ kǝlɩ Akɑkɩ nɑ pɑ kɑwulɑɣɑ tɛɛ toŋ.
8 Ɩsɔ lǝsǝnɑ-wɛɣɛ Icipiti tɑɑ, nɑ tomiŋ ɩsɩɩ tɑɑlɛ nɑʋ.
Nɑ pɑ́ yɔkǝɣɩ pɑ kolontunɑɑ mʋwɑ
nɑ pɑ́ cʋtǝtǝɣɩ-wɛɣɛ nyǝmɑ́.
9 Pɑ luŋiɣi kɛ́ ɩlɛnɑ pɑ hǝntɩ ɩsɩɩ tɔɣɔlɑsɩ.
Awe pǝsǝɣɩ nɑ ɩ́ kʋsɩ-wɛ nɑ toŋ?
Ɩsɛɣɛlɩ, pǝ́ kooli kʋpɑntʋ kɛ nyɑ́ kʋpɑntʋ koollu.
Pǝ́ tǝŋsɩ mpusi kɛ nyɑ́ mpusi tǝŋsǝlɑɑ.
10 Tǝnɑɣɑlɛ pɑ́ɑ́nɑ́ kpɑ Pɑlɑkɩ nɑ ɩ́ kɑlǝɣɩ nɑ ɩ́ fiisiɣi niŋ nɑ ɩ́ tɔŋ sɩ: Mɑ kɔnɑ-ŋ kɛ́ sɩ ń tǝŋsɩ mɑ kolontunɑɑ kɛ mpusi. Tɔm tooso nyǝm ntɔ n kooliɣi-wɛɣɛ kʋpɑntʋ.
11 Polo ń kpe. Mɑɑ sɩɩwɑ sɩ mɑɑ kʋsɩ nyɑ́ nyʋɣʋ kɛ́. Amɑ Tɑcɑɑ kisɑɑ.
Pɑlɑɑm kɛɛsǝɣɩ ɩsǝnɑ Ɩsɛɣɛlɩ nyǝ́mɑ kɑ wɛɛ teu tɔ
12 Ḿpʋ́ɣʋ́ Pɑlɑɑm cɔwɑ Pɑlɑkɩ sɩ: Anɩ mɑɑ tɛmɑ nyɑ́ tillɑɑ kɛ heeluɣu sɩ,
13 pɑɑ n kɑ́ cɛlɛ-m nyɑ́ kɑwulɑɣɑ tɑɑ liɣitee nɑ wʋlɑ tǝnɑ, pǝ fɛɩ sɩ mɑ́ kpɛɛsǝnɑ Tɑcɑɑ. Nti tǝ tike ɩ́ kɑ́ tʋ mɑ nɔɣɔ tɑɑ tɔɣɔ mɑɑ yɔɣɔtɩ.
14 Tɔʋ, nɔɔnɔɔ mɑɑ mǝlɩ mɑ yǝlɑɑ kiŋ. Ɩlɛ kɔɔ nɑ mɑ́ hʋlɩ-ŋ mpi Ɩsɛɣɛlɩ nyǝ́mɑ kɑ́ wɑkǝlɩ nyɑ́ yǝlɑɑ kɛ kʋyɑkʋ nɑkʋlɩ tɔ.
15 Ntɛnɑ ɩ́ mɑ́ kɑwǝyɑɣɑ sɩ:
Peyɔɔ pǝyɑlʋ Pɑlɑɑm mɑ́, mɑ kʋkpɑɑlǝtʋ ntɔ.
Pǝ kulɑ mɑ ɩsɛ kɛ́.
16 Mɑ nɩɩkɩ Ɩsɔ nyɑ́ kʋyɔɣɔtʋtʋ kɛ́,
nɑ mɑ́ pɑɑsǝɣǝnɑ nti n hʋlǝɣɩ-m tɔ.
Ye mɑ sɛɛkɩ-ŋ n hʋlǝɣɩ-m nyɑ́ tǝɣɩ.
17 Mɑ loosiɣi mpi pɩɩ tɛ nɑ pǝ́ lɑ́ tɔ, nɑ mɑ́ nyǝnǝɣɩ-wɩ.
Ɩsɔtʋlʋŋɑ kɑ́ lɩɩ Yɑkɔpʋ lʋlʋɣʋ tɑɑ.
Wulɑʋ kɑ lɩɩ Ɩsɛɣɛlɩ tɑɑ
nɑ ɩ́ mɑ́ Mowɑpʋ nyǝ́mɑ lǝkpɑɣɑsɑɣɑ
nɑ Sɛɛtɩ lʋlʋɣʋ nyǝ́mɑ nyɔɔŋ tɑɑ.
18 Ɩsɛɣɛlɩ nyǝ́mɑ kɑ́ lɛɛkɩ pɑ kolontunɑɑ
Ɩtɔm nyǝ́mɑ tɛtʋ Seyii nɑ pɑ́ pǝsɩ ɑkɑnɑɑ.
19 Yɑkɔpʋ lʋlʋɣʋ nyǝ́mɑ kpilɑ pɑ kolontunɑɑ.
Pɑ kpiisiɣi mpɑ pǝ kɑɑsɑɑ tɔɣɔ pɑ ɑcɑlɛɛ tɑɑ.
Pɑlɑɑm kɛɛsʋɣʋ kɛ Ɩsɛɣɛlɩ kolontunɑɑ ncɑɑ tɔm
20 Ḿpʋ́ɣʋ́ Pɑlɑɑm nɑwɑ Amɑleke nyǝ́mɑ, nɑ ɩ́ tɔ sɩ:
Amɑleke nyǝ́mɑ kɛ piitim sɔsɔɔm kɛ́.
Amɑ ncɑɑlɛ tǝkpɑtɑɑ kɛ pɑɑ tɛɛsǝnɑ.
21 Ɩ nɑwɑ Keni nyǝ́mɑ, ɩlɛnɑ ɩ tɔ sɩ:
Pǝ cɑɣɑnɑ-mɛɣɛ mǝ tɛtʋ tɑɑ kɛ́ ɩsɩɩ
Tɑntɛ pusuɣunɑ kʋkpɑmʋɣʋ tɔ.
22 Pɑɑ nɑ mpʋ kɔkɔ kɑ́ niisinɑ mǝ tǝcɑɣɑlɛ,
nɑ Asilii nyǝ́mɑ nɑ́ɑ́ kuu-mɛɣɛ yomle.
23 Ḿpʋ́ɣʋ́ Pɑlɑɑm tɑsɑɑ sɩ:
Ye Ɩsɔ tʋ niŋ, ɑwe wɛɛnɑ weesuɣu?
24 Sipili kʋteŋ kɛ Asilii ŋmɑkǝllɑɑ lɩɩkǝnɑ,
nɑ pɑ́ wɑkǝlɩ-wɛ nɑ pǝ́ kpɛŋnɑ Hepɛɛ lʋlʋɣʋ nyǝ́mɑ.
Amɑ pɛlɛ pɑ tɛɛsǝɣǝnɑ ncɑɑlɛ tɔtɔɣɔ.
25 Pɑlɑɑm tɛmɑ tɔmnɑɑ mpɛɣɛ yɔɣɔtʋɣʋ kɛ́, ɩlɛnɑ ɩ́ kpɑɣɑ mpɑɑʋ nɑ ɩ́ mǝlɩ ɩ tɛtʋ tɑɑ, nɑ Pɑlɑkɩ nɑ́ɑ́ mǝlɩ ɩ́lɛ́ ɩ tɛ.