13
Apiyɑ kɑwulɑɣɑ
(Awulɑɑ I 15:1-8)
1 Ɩsɛɣɛlɩ wulɑʋ Selopʋwɑm kɑwulɑɣɑ pǝnɑɣɑ pǝlefɛɩ hiu nyǝŋkɑ tɑɑ kɛ́ Apiyɑ pǝsɑ Yutɑ nyǝ́mɑ wulɑʋ.
2 Ɩlɛnɑ ɩ́ tɔɣɔ pɩɩsɩ tooso kɛ́ Yosɑlɛm. Ɩ too kɛlɛ Kipeyɑ tʋ Uliyɛlɩ pɛɛlɔ Mikɑyɑ.
Apiyɑ nɑ Selopʋwɑm pɑ yookɑɣɑnɑ tǝmɑɣɑ.
3 Ḿpʋ́ɣʋ́ Apiyɑ kpɑɣɑ ɩ yoolɑɑ tɑɑ yoolɑɑ kɛ iyisi nɑsǝlɛ (400000) sɩ ɩ yookinɑ Selopʋwɑm. Nɑ Selopʋwɑm tɑɣɑnɩ ɩ nyǝ́mɑ kɛ iyisi nɑsǝnɑɑsɑ (800000) sɩ ɩ suliɣi-ɩ.
4 Ḿpʋ́ɣʋ́ Apiyɑ kpɑwɑ Semɑlɑyim pulɑɣɑ tɔɔ kɛ́ Ɩfǝlɑyim pɔɔŋ tɑɑ. Ɩlɛnɑ ɩ́ holinɑ Selopʋwɑm nɑ Ɩsɛɣɛlɩ nyǝ́mɑ sɩ: Ɩ nɩɩ mɑ tɔm yoo.
5 Ɩ́ tɑ nyɩ tɑɑ sɩ Tɑfiiti nɑ ɩ lʋlʋɣʋ nyǝ́mɑ kɛ Ɩsɛɣɛlɩ Ɩsɔ Tɑcɑɑ tʋwɑ kɑwulɑɣɑ kɛ tɑm tɔɔ, pɩɩ lɑɣɑsǝɣɩ.
6 Pǝyele Nepɑtɩ pǝyɑlʋ Selopʋwɑm nɑ́ kʋlɑ ɩ cɑɑ Sɑlʋmɔŋ wei ɩ tǝmlɛ ɩ lɑkɑɣɑ tɔ ɩ tɔɔ.
7 Ḿpʋ́ɣʋ́ yʋlʋyemnɑɑ nɑ tɛtɛlɑtɑɑ kotinɑ Selopʋwɑm nɑ pɑ́ lɑ nɑ ɩ́ kǝlɩ Sɑlʋmɔŋ pǝyɑlʋ Lʋpʋwɑm. Mpi tɔ, Lʋpʋwɑm kɑ́ kɛ́ pǝyɑɣɑ kɛ́, ɩ tɑ nyɩ pʋlʋ ɩlɛ ɩ tɑ pǝsɩ nɑ ɩ́ sǝŋ pɑ ɩsɛntɑɑ.
8 Ɩlɛnɑ nɔɔnɔɔ mɩɩ cɑɑkɩ sɩ ɩ́ yoonɑ kɑwulɑɣɑ ŋkɑ Tɑcɑɑ tʋwɑ Tɑfiiti lʋlʋɣʋ nyǝ́mɑ tɔ. Ɩ́ lɑpɑ yoolɑɑ kpekǝle sɔsɔɔlɛ. Pǝyele ɩ́ tɔkɑ wʋlɑ nɑwee nnɑ Selopʋwɑm lupɑ tɔ, nɑ ɩ́ lɑɑkɩ.
9 Ɩ́ tɔɣɔnɑ Tɑcɑɑ kɔtǝlɑɑ Alɔŋ lʋlʋɣʋ nyǝ́mɑ, nɑ Lefii nyǝ́mɑ, nɑ ɩ́ kpɑ mǝ tǝɣɩ kɔtǝlɑɑ, ɩsɩɩ tɛtʋnɑɑ lɛntɩ yǝlɑɑ lɑpʋ tɔ. Ye wei ɩ́lɛ́ ɩ́ kɔnɑ lɑtǝcɛ, nɑ ɩwɑɑŋ nɑɑtosompɔɣɔlɑɣɑ, ɩ pǝsɑ tɩɩŋ kɔtʋlʋ ntɛ́ mpʋ.
10 Amɑ tɑ́ ɩlɛ, Ɩsɔ Tɑcɑɑ tike kɛ tɑ́ nyǝnǝɣɩ, tǝ tɑ kpɛɛsǝnɑ-ɩ. Nɑ Alɔŋ lʋlʋɣʋ nyǝ́mɑ ntɛ́ Tɑcɑɑ kɔtǝlɑɑ nɑ Lefii nyǝ́mɑ nɑ́ɑ́ lɑkɩ pɑ tǝmɑ.
11 Tɑnɑŋ nɑ tɑɑnɑɣɑ kɛ́ tǝ lɑkɩ kɔtɑsɩ nsi kɔkɔ lusɑ sɩ tǝnɑ tɔ. Nɑ tǝ́ wɔkɩ tulɑɑlunɑɑ kɛ kɔtɑɣɑ tǝlɑtɛ tɔɔ. Nɑ tǝ́ sɩɩkɩ Ɩsɔ potopotonɑɑ kɛ ɩ tɑɑpǝlɩ tɔɔ. Nɑ tǝ́ mʋsǝɣɩ fǝtǝlɑ sɔsɔ kɛ tɑɑnɑsɩ. Tɑ́ lɑkɩ teu kɛ Tɑcɑɑ tǝmlɛ kɛ́. Amɑ mǝ kisinɑ-ɩ.
12 Tɔʋ, pǝnɛntɛ Tɑcɑɑ kɛlɛ tɑ́ nyʋɣʋ tʋ. Nɑ ɩ kɔtǝlɑɑ ntɔ́, sɩ pɑ́ hʋlǝɣɩ yoou tutuɣu, nɑ mǝ nɑ-ɩ ɩ́ suliɣi. Ɩlɛ Ɩsɛɣɛlɩ nyǝ́mɑ mɛ, ɩ́ tɑɑ yoonɑ mǝ cɔsɔnɑɑ Ɩsɔ Tɑcɑɑ. Mpi tɔ, ɩ́ kɑɑ kpɑɣɑ ɩ tɔɔ kɛ́ nyɩɩlʋɣʋ.
13 Wɑɑtʋ ɩnǝɣɩ Selopʋwɑm fɑɣɑ ɩ yoolɑɑ tɑɑ, nɑ pɑ́ polo pɑ pɑpɩ Yutɑ nyǝ́mɑ wɑɑlɩ. Nɑ ɩ yoolɑɑ lɛlɑɑ nɑ ɩsɛntɑɑ tɔɔ, nɑ pǝ́ tʋ-wɛɣɛ hɛkʋ.
14 Yutɑ nyǝ́mɑ pǝsɑɑ ɩlɛ, pɑ cɛkǝnɑɑ kɛlɛ sɩ pɑɑ yoo tɑɑ nɑ wɑɑlɩ. Ntɛnɑ pɑ́ wiinɑ Tɑcɑɑ sɩ ɩ́ wɑɑsɩ-wɛ. Wɑɑtʋ wei kɔtǝlɑɑ yɑɣɑ tutuuŋ,
15 ɩlɛnɑ pɑ yoolɑɑ kiisi. Tǝnɑɣɑ Tɑcɑɑ yelɑɑ nɑ Selopʋwɑm nɑ Ɩsɛɣɛlɩ nyǝ́mɑ pɑ tuli tɑpǝŋ.
16 Nɑ pɑ́ se nɑ Ɩsɔ tʋ-wɛɣɛ Yutɑ nyǝ́mɑ niŋ tɑɑ.
17 Ḿpʋ́ɣʋ́ Apiyɑ nɑ ɩ yoolɑɑ pɑ kǝlɑ-wɛ tǝkpɑtɑɑ, nɑ pɑ́ kʋ pɑ yoolɑɑ tɑɑ yoolɑɑ kɛ iyisi nɑsǝlɛ nɑ nɩɩnʋwɑ (500000).
18 Ɩsɛɣɛlɩ nyǝ́mɑ nɑ́ kpisɑ mpʋ tɔ nɑ Yutɑ nyǝ́mɑ nɑ́ɑ́ tɔɣɔ ɑkɑɩtʋ. Mpi tɔ, pɑ cɔsɔnɑɑ Ɩsɔ Tɑcɑɑ kɛ pɑ tɛɛlɑɣɑ.
19 Ḿpʋ́ɣʋ́ Apiyɑ tɔɣɔnɑ Selopʋwɑm, nɑ ɩ́ lɛɛkɩ Petɛɛlɩ, nɑ Yesɑnɑ, nɑ Ɩfǝlɔŋ nɑ pǝ cɔlɔ ɑcɑlɛɛnɑɑ.
20 Hɑlǝnɑ Apiyɑ sǝm, Selopʋwɑm tɑ tɑsɑ ɩ toŋ kʋpǝŋ tɑɑ kɛ́ mǝlʋɣʋ. Amɑ Tɑcɑɑ tɛɛsǝnɑ-ɩ kʋɣʋ kɛ́.
21 Ɩlɛnɑ Apiyɑ toŋ nɑ́ɑ́ sɔɔsǝɣɩ nɑ ɩ́ kpɑɣɑ ɑlɑɑ nɑɑnʋwɑ nɑ liɣiti. Ḿpʋ́ɣʋ́ ɩ lʋlɑ ɑpɑlʋpiyɑ kɛ hiu nɑ nɑɑlɛ, nɑ ɑlʋpiyɑ kɛ nɑɑnʋwɑ nɑ nɑɑtoso.
22 Apiyɑ tɔm lɛntɩ wɛ tɑkǝlɑɣɑ ŋkɑ pɑ yɑɑ sɩ Ɩsɔ kʋyɔɣɔtʋtʋ tɛlǝsʋlʋ Ɩtoo kʋtɔɔsʋtʋ tɑkǝlɑɣɑ tɔ kɑ tɑɑ. Kɑ tɑɑ kɛ́ pɑ kɛɛsɑ ɩ kʋlɑpʋtʋ nɑ ɩ tǝmɑ.
23 Apiyɑ sǝpɑ, ɩlɛnɑ pɑ́ pimi-i Tɑfiiti tɛ, nɑ ɩ pǝyɑlʋ Asɑ lɛɛtɩ ɩ lonte.