6
Pɑ cɛpɑ-tʋ nɑ ɩsɑɣɑtʋ sɩ tǝ́ wɛɛ Kilisiti tɔɔ
1 Ɩlɛ ɩsǝnɑɣɑ pǝ wɛɛ ɩlɛ? Tɩɩ lɑkɩ ɩsɑɣɑtʋ kɛ ḿpʋ́ɣʋ́ tɑm sɩ Ɩsɔ ɩ́ sɔɔsɩ-tʋɣʋ ɩ pɛɛlɛɛ yɑɑ ɩsǝnɑ?
2 Aɑɩ, pǝ tɑɣɑ mpʋ se, pɑɑ pǝcɔ. Tɑ́ mpɑ sǝm cɛpɑ-tʋ nɑ ɩsɑɣɑtʋ tɔ, ɩsǝnɑɣɑ tɩɩ wɛɛ nɑ tǝ́ tɔŋnɑ ɩsɑɣɑtʋ lɑpʋ tɔtɔ?
3 Ɩ́ tɑ́ nyɩ sɩ tɑ́ tǝnɑ mpɑ pɑ sɔ Ɩsɔ lʋm sɩ tɑ́ nɑ Yesu Kilisiti tǝ kpɛntɑɑ tɔ, ɩ tǝsǝtɛ kɛ pɑ kpɛntɑ-tʋ nɑ pɑ́ sɔ-tʋ?
4 Ye mpʋ ɩlɛ Ɩsɔ lʋm sɔʋ tɑɑ kɛ́ pɑ pimɑ tɑ́ nɑ-ɩ sɩ tɑ́ nɑ-ɩ tǝ sǝpǝnɑ. Nɑ ɩsɩɩ Kilisiti sǝpɑ nɑ Tɑcɑɑ tomɑ sɔsɔɔnɑ feesi-ɩ tɔ, tɑ́ tɔtɔ tǝ lɑɣɑsɑ tɔntɛ tǝkpɑtɑɑ kɛ́.
5 Ye tɑ́ nɑ-ɩ tǝ kpɛntɑɑ nɑ tǝ́ sɩ ɩsɩɩ ɩ sǝpʋ tɔ, pɑɑ kpɛntɩ tɑ́ nɑ-ɩ nɑ pɑ́ feesi-tʋɣʋ sǝm tɑɑ ɩsɩɩ pɑ feesɑ ɩnɩ tɔ.
6 Tǝ nyǝmɑ́ teu sɩ kʋyɑŋku Kilisiti sǝpɑ tesikɑ tɔɔ tɔ, pǝ kpɛnnɑ tɑ́ yɑɑsi kʋpǝŋ nɑ pǝ́ kʋ tǝtɔtɔtɔ. Ɩlɛnɑ timpi tɩɩ kɛ ɑsɑɣɑɑ nɑ tɑ́ tɛɣɛlɛ mpʋ tɔ, pǝ́ lɑ yem nɑ ɩ́ hɛtɩ-tʋ, nɑ tǝ tɑɑ tɑsɑ ɩsɑɣɑtʋ yomle tɑɑ kɛ́ wɛɛʋ.
7 Yʋlʋ wei ɩ tɛmɑ sǝpʋ tɔ pǝ lǝsɑ ɩlɛɣɛ ɩsɑɣɑtʋ yomle tɑɑ kɛ́.
8 Ye tɑ́ nɑ Kilisiti tǝ sǝpɑ, tǝ nyǝmɑ́ sɩ tɑ́ nɑ-ɩ tɩɩ wɛɛnɑ weesiŋ tɔtɔ.
9 Tǝ nyǝmɑ́ teu sɩ ɩsɩɩ Kilisiti fem tɔ sǝm ɩɩ tɑsǝɣɩ-ɩ nyɑɑsʋɣʋ. Pǝyele ɩ kɑɑ tɩɩ sǝpʋ tɔtɔ.
10 Tɔm kʋlʋm kɛ ɩ sǝpɑ nɑ pǝ́ cɛ ɩ́ nɑ ɩsɑɣɑtʋ. Ɩ wɛʋ kɑɣɑnɑ nɑ ɩ weesuɣu tɔ Ɩsɔ tɔɔ kɛ́.
11 Ḿpʋ́ɣʋ́ mɛ tɔtɔ ɩ́ kɑ́ nyǝnɩ mǝ tɩ ɩsɩɩ mpɑ pɑ sǝpɑ nɑ pǝ́ cɛ pɑ́ nɑ ɩsɑɣɑtʋ tɔ, nɑ ɩsɩɩ mpɑ pɑ femɑ sǝtɑɑ tɑɑ nɑ kɑɣɑnɑ pɑ wɛ Ɩsɔ tɔɔ kɛ́ pɑ́ nɑ Yesu Kilisiti pɑ kpɛntʋɣʋ tɔɔ tɔ.
12 Ye mpʋ ɩlɛ, ɩsɑɣɑtʋ ɩ́ tɑɑ tɑsɑ mǝ tɔnǝŋ kʋsǝpǝŋ ɩnɛɣɛ ŋmɑkǝlʋɣʋ nɑ ɩ́ nɩɩnɑ mǝ tɔnǝŋ kʋnyɩɩlǝŋ.
13 Ɩ́ tɑɑ yele nɑ ɩsɑɣɑtʋ tɑsɑ mpɑɑʋ hikuɣu kɛ mǝ tɔnǝŋ tɑɑ kɛ́ tiili nɑ ɩ́ lɑ ɩsɑɣɑtʋ. Amɑ ɩ́ hɑ mǝ tǝɣɩ Ɩsɔ ɩsɩɩ mpɑ pɑ femɑ sǝtɑɑ tɑɑ tɔ, ɩlɛnɑ ɩ́ kpɑɣɑ mǝ tɩ nɑ ɩ́ pɛtɩ Ɩsɔ tǝmlɛ tɑɑ nɑ ɩ́ lɑnɑ-mɛɣɛ kʋpɑm.
14 Pǝ tɑɣɑ pʋlʋ tɔɔ, pǝ fɛɩ ɩsɩɩ ɩsɑɣɑtʋ ɩ́ ŋmɑkǝlɩ-mɛ. Mpi tɔ, pǝ tɑɣɑ kʋsǝsɩɩtʋ tɔɔ kɛ́ ɩ́ wɛɛ. Amɑ Ɩsɔ pɛɛlɛɛ tɔɔ kɛ́.
Siɣisuɣu yomle
15 Mpʋ tɔ, tɩɩ tɔŋnɑ ɩsɑɣɑtʋ lɑpʋ sɩ Ɩsɔ pɛɛlɛɛ tɔɔ kɛ́ tǝ wɛɛ pǝ tɑɣɑ kʋsǝsɩɩtʋ tɔɔ? Aɑɩ pǝ tɑɣɑ mpʋ se, pɑɑ pǝcɔ.
16 Ɩ́ nyǝmɑ́ teu sɩ, ye ɩ́ hɑ mǝ tǝɣɩ wei nɑ ɩ́ nɩɩkǝnɑ-ɩ, ɩ́ pǝsɑ wei ɩ́ nɩɩkǝnɑ mpʋ tɔ ɩ yom kɛ́. Ḿpʋ́ɣʋ́ pǝ wɛɛ nɑ ɩsɑɣɑtʋ, ye n nɩɩkǝnɑ-tǝɣɩ tɑm n tɛŋnɑ sǝm kɛ́. Nɑ mpʋ ɩnɩ tɔtɔɣɔ pǝ wɛɛ nɑ Ɩsɔ, ye n nɩɩkǝnɑ ɩlɛɣɛ tɑm, pǝ lɑɣɑsǝɣɩ-ŋ tɔntɛ nte tǝ kɛɛsǝnɑ-ɩ tɔɣɔ.
17 Aɑɑ, Ɩsɔ fɔɔ, mɛ mpɑ tuu ɩsɑɣɑtʋ kɑ kpɑ yomle tɔ pǝnɛntɛ ɩ́ nɩɩnɑ nti pɑ sɛɣɛsɑ-mɛ sɩ ɩ́ kɛɛsǝnɑ tɔ tǝkpɑtɑɑ.
18 Pǝ lǝsɑ-mɛɣɛ ɩsɑɣɑtʋ yomle tɑɑ, nɑ nɔɔnɔɔ siɣisuɣu yomɑɑ kɛ ɩ́ pǝsɑɑ.
19 Mǝ ɩcɑntʋ tɔɔ kɛ́ mɑ huɣi tǝlɛɣɛ kʋhuɣu sɩ ɩ́ cɛkǝnɑ. Pɩɩ wɛʋ tɔ, tɛtɛlɑkɑsɩ nɑ ɩsɑɣɑtʋ tɑɑ kɛ́ ɩ́ pɛtɑ mǝ tɩ, nɑ pǝlɛ pǝ́ kpɑ-mɛɣɛ yomle nɑ pǝ́ lɑkɩ-mɛɣɛ yɛlɛyɛlɛ nyǝ́mɑ. Mpʋ tɔtɔɣɔ pǝnɛntɛ, ɩ́ pɛtɩ mǝ tǝɣɩ siɣisuɣu tǝmɑ lɑpʋ tɑɑ nɑ pǝlɛ pǝ́ kpɑ-mɛɣɛ yomle nɑ mǝ tɔntɛ kɛɛsɩ teu.
20 Wɑɑtʋ wei ɩsɑɣɑtʋ kɑ kpɑ-mɛɣɛ yomle tɔ, kʋpɑntʋ lɑpʋ tɔm tɑ nɑ-mɛ.
21 Nɑ ɩ́ lɑkɑɣɑ lɑkɑsɩ nsi sɩ wɛ-mɛɣɛ fɛɛlɛ kɛ kɑɣɑnɑ tɔ, pepeɣe ɩ́ wɑɑ sɩ tɑɑ? Sɩ tɛɛsɑɣɑnɑ-mɛɣɛ kʋɣʋ kɛ́.
22 Amɑ kɑɣɑnɑ pǝ lǝsɑ-mɛɣɛ ɩsɑɣɑtʋ yomle tɑɑ nɑ ɩ́ lɑkɩ Ɩsɔ tǝmlɛ. Nɑ mpi ɩ́ wɑɑkɩ tɔɣɔlɛ pɑ tɔŋnɑ-mɛɣɛ kɛɛsʋɣʋ sɩ mǝ tɔntɛ ɩ́ te nɑ cele ɩ́ kɑ́ hiki weesuɣu ŋku kɩɩ tɛŋ tɔ.
23 Ɩsɑɣɑtʋ fɔɔtɔ kɛlɛ sǝm. Amɑ weesuɣu ŋku kɩɩ tɛŋ tɔɣɔ Ɩsɔ nɑ́ hɑɑ fɑɑlɑɑ kɛ mpɑ nɑ Tɑcɑɑ Yesu Kilisiti pɑ kpɛntɑɑ tɔ.