10
Ɩsɔtɑɑ tillu nɑ tɑkǝlɑɣɑ sǝkpelɑɣɑ
1 Pǝ wɑɑlɩ kɛ́ mɑ nɑ́ ɩsɔtɑɑ tillu tʋŋ tʋ lɛlʋ nɑ ɩ́ lɩɩnɑ ɩsɔtɑɑ nɑ ɩ́ tii, nɑ pʋlʋpʋ ɩsɩɩ ɩsɔŋmʋntʋɣʋ nyɑlɑ ɩ tɔɔ nɑ kɑɣɑlʋ cɔɔnɑ ɩ nyʋɣʋ. Ɩ ɩsɛntɑɑ wɛ kɛ́ ɩsɩɩ ilim nɑ ɩ nɔɔhɛɛ ɩsɩɩ kɔkɔ nsǝmɑ sɔsɔɔnɑ kʋlʋɣʋʋ tɔ.
2 Ɩ kɑ tɔkɑ ɩ niŋ tɑɑ kɛ́ tɑkiliyɑ nɑ kɑ́ hɛtɑɑ, nɑ ɩ́ sɩɩ ɩ ntɔɣɔŋ nɔɔhǝlɛ kɛ teŋku tɔɔ nɑ ɩ mpǝtǝŋ nyǝntɛ kɛ tɛtʋ tɔɔ.
3 Ɩlɛnɑ ɩ́ mɑ́ kɑpukɑ nɑ nɔɣɔ sɔsɔɣɑ ɩsɩɩ tɔɣɔlɑɣɑ wiikuɣu tɔ. Ɩ́ tɛmɑ ḿpʋ́ɣʋ́ kɑ mɑpʋ ɩlɛnɑ tɛʋ holɑ nɑɑtosompɔɣɔlɑɣɑ ɩnɩ ɩ́ cɔnɑ holɑ.
4 Pǝ tɛmɑ yɔɣɔtɑɣɑ kɛ mpʋ ɩlɛnɑ mɑ́ tɑɣɑnɩ mɑ tɩ sɩ mɑ ŋmɑɑkɩ. Ḿpʋ́ɣʋ́ mɑ nɩɩ pǝ yɔɣɔtǝnɑ-m nɑ ɩsɔtɑɑ sɩ: Nmɛsɩ nti tɛʋ holɑ nɑɑtosompɔɣɔlɑɣɑ ɩnɩ ɩ yɔɣɔtɑɑ tɔ, tɑɑ ŋmɑɑ.
5 Ɩsɔtɑɑ tillu wei mɑɑ nɑwɑ nɑ ɩ sǝŋɑ teŋku nɑ tɛtʋ pǝ tɔɔ tɔ, ɩ kpɑɑsɑ ɩ niŋ ntɔɣɔŋ nɑ ɩsɔ,
6 nɑ ɩ́ tuunɑ Ɩsɔ wei ɩ wɛ tɑm tɔɔ tɔ, wei ɩ ŋmɑ ɩsɔtɔnʋɣʋ nɑ pǝ tǝnɑ mpi pǝ wɛ kʋ tɑɑ tɔ, nɑ tɛtʋ nɑ pǝ tǝnɑ mpi pǝ wɛ tǝ tɑɑ tɔ, nɑ teŋku nɑ pǝ tǝnɑ mpi pǝ wɛ ɩ́lɛ́ ɩ tɑɑ tɔ, sɩ pǝ fɛi wʋlɛ sɩɩʋ tɔtɔ.
7 Wɑɑtʋ wei ɩsɔtɑɑ tillu nɑɑtosompɔɣɔlɑɣɑ nyǝŋ kɑ́ hʋlɩ ɩ ɑkɑntǝlɛ tɔɣɔ Ɩsɔ kɑ́ yoosi lɑpʋ kɛ mpi ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ nɑ pǝ́ ŋmɛlɑɑ tɔ. Ɩ́ kɑ tɛmɑ pǝ tɔm heeluɣu kɛ Ɩsɔ kʋyɔɣɔtʋtʋ tɛlǝsǝlɑɑ mpɑ pɑ kɛ ɩ pǝyɑlɑɑ tɔ.
8 Pǝ wɑɑlɩ kɛ́ yɔɣɔtʋɣʋ mpi pɩɩ tɛmɑ ɩsɔtɑɑ kɛ yɔɣɔtǝnɑʋ nɑ mɑ́ nɩɩ tɔ pǝ tɑsɑ-m sɩ: Polo nɑ ń mʋ ɩsɔtɑɑ tillu wei ɩ sǝŋɑ teŋku nɑ tɛtʋ pǝ tɔɔ tɔ ɩ niŋ tɑɑ kɛ́ tɑkiliyɑ ŋkɑ kɑ hɛtɑ mpʋ tɔ.
9 Ḿpʋ́ɣʋ́ mɑ kʋlɑɑ nɑ mɑ́ polo ɩsɔtɑɑ tillu kiŋ nɑ mɑ́ tɔmɩ-ɩ sɩ: Cɛlɛ-m tɑkiliyɑ ŋkɛ. Tǝnɑɣɑ ɩ tɔmɑ-m sɩ: Mʋ-kɛ, nɑ ń tɔɣɔ-kɛ. Kɑɑ lɑ leleŋ ɩsɩɩ tɩɩŋ kɛ nyɑ́ nɔɣɔ tɑɑ. Amɑ kɑɑ lɑ nyɑŋ kɛ nyɑ́ hiluɣu tɑɑ.
10 Mɑ mʋ tɑkiliyɑ ŋkɛɣɛ ɩsɔtɑɑ tillu niŋ tɑɑ ɩlɛnɑ mɑ́ tɔɣɔ-kɛ. Kɑ lɑpɑ leleŋ kɛ mɑ nɔɣɔ tɑɑ ɩsɩɩ tɩɩŋ. Amɑ mɑ kɔmɑ nɑ mɑ́ li-kɛ ɩlɛnɑ kɑ́ lɑ́ nyɑŋ kɛ mɑ hiluɣu tɑɑ.
11 Ḿpʋ́ɣʋ́ pǝ tɔmɑ-m sɩ: Pǝ wɛɛ sɩ n kɑ́ tɑsɑ tɔtɔɣɔ Ɩsɔ kʋheelitu kpɑɑlʋɣʋ kɛ yǝlɑɑ pɑɣɑlɛ nɑ piitimnɑɑ pɑɣɑlɛ nɑ nsǝmɑ pɑɣɑlɛ nɑ ɑwulɑɑ sɔsɑɑ pɑɣɑlɛ kɛ́. Tǝ kɛ pɑ nyǝntʋ kɛ.