14
Mpɑ pɑ nyɔɔŋ pǝ yɑpɑ tɔ pɑ yontu yoou
1 Ḿpʋ́ɣʋ́ mɑ nyǝnɑɣɑ, ɩlɛnɑ mɑ́ nɑ́ Ɩwǝyɑɣɑ nɑ kɑ́ sǝŋɑ Siyɔŋ pʋɣʋ tɔɔ, nɑ yǝlɑɑ iyisi nɩɩnʋwɑ nɑ iyisi nɩɩlɛ nɑ liɣiti (144000) wɛ kɑ cɔlɔ, nɑ pɑ́ ŋmɑɑ pɑ tokuŋ tɑɑ kɛ́ kɑnɑ kɑ Cɑɑ pɑ hǝlɑ.
2 Tǝnɑɣɑ mɑ nɩɩ pǝ yɔɣɔtǝnɑ ɩsɔtɑɑ nɑ pǝ lɑ yuŋ ɩsɩɩ lʋm kpeŋuɣu nɑ pǝ́ fɑlǝɣɩ sɔsɔm tɔ, ɩsɩɩ tɛʋ holuɣuunɑ toŋ tɔ pǝ tɑkɑ. Pǝ yɔɣɔtɑɣɑ nɑ mɑ́ nɩɩkɩ tɔ, pǝ nǝɣǝsǝnɑ kɛ́ ɩsɩɩ sɑŋkʋ mɑtɑɑ kʋlʋɣʋʋ pɑ sɑŋkʋnɑɑ mɑpʋ nɑ pǝ́ wiiki ɩsǝnɑ tɔ.
3 Nɑ yǝlɑɑ iyisi iyisi ɩnɩ ɩ sǝŋɑ ḿpʋ́ɣʋ́ kumte nɑ weesiŋ nyǝ́mɑ liɣiti nɑ sɔsɑɑ pɑ ɩsɛntɑɑ nɑ pɑ́ yooki Ɩsɔsɛɛlɛ yontu kʋfɑtʋ. Yǝlɑɑ iyisi nɩɩnʋwɑ nɑ iyisi nɩɩlɛ nɑ liɣiti (144000) wei pɑ yɑpɑ tɛtʋ tɔɔ tɔ ɩ pɑɑsi, nɔɣɔlʋ fɛɩ wei ɩ pǝsǝɣɩ nɑ ɩ́ nyɩ yontu tǝnɛ tǝ yoou tɔ.
4 Mpɛ ɩnɩ pɑ tɑ pilisi pɑ tɩ nɑ ɑlɑɑ, pɑ cɑɣɑ ḿpʋ́ɣʋ́ tǝcʋŋŋ. Pɑɑ timpiɣi Ɩwǝyɑɣɑ puki, pɑ tǝŋǝɣɩ-kɛɣɛ. Pǝ yɑpɑ-wɛɣɛ yǝlɑɑ hɛkʋ tɑɑ kɛ́ sɩ pǝ cɑɑlǝɣǝnɑ-wɛɣɛ Ɩsɔ nɑ Ɩwǝyɑɣɑ kɛ hɑʋ.
5 Pɑ tɑ nɩɩnɑ pɑ nɔɔsɩ nɑ pɔpɔtiyɑ, pɑ fɛɩnɑ tɑɑlɩ nɔɣɔlʋ.
Ɩsɔtɑɑ tillɑɑ tooso tɔm
6 Ḿpʋ́ɣʋ́ mɑ nɑ ɩsɔtɑɑ tillu lɛlʋ nɑ ɩ́ kʋlǝɣɩ hʋntʋ kɛ hɑtuu ɩsɔtɑɑ. Ɩ wɛnɑ Lɑɑpɑɑlɩ Kʋpɑŋ tɑm tɔɔ nyǝŋ nɔɣɔlʋ sɩ ɩ kɑɑsǝɣɩ ɑtɛ yǝlɑɑ nɑ piitimnɑɑ tǝnɑ tɑɑ yǝlɑɑ nɑ kpekɑ tǝnɑ nɑ nsǝmɑ tǝnɑ nɑ yǝlɑɑ tǝnɑ.
7 Ɩ yɔɣɔtɑɣɑnɑ nɔɣɔ sɔsɔɣɑ sɩ: Ɩ́ nyɑnɑ Ɩsɔ nɑ ɩ́ tʋ-ɩ teeli. Pǝ tɑɣɑ pʋlʋ tɔɔ, pǝnɛntɛ pǝ tɑlɑɑ kɛ́ sɩ ɩ́ hʋʋnɑ yǝlɑɑ kɛ tɔm. Wei ɩ lɑpɑ ɩsɔtɔnʋɣʋ nɑ tɛtʋ nɑ teŋku nɑ hilɑ tɔ ɩ́ sɛɛ ɩnɩ.
8 Tǝnɑɣɑ ɩsɔtɑɑ tillu nɑɑlɛ nyǝŋ nɑ́ lɩɩwɑ kɑncɑɑlɑɣɑ nyǝŋ wɑɑlɩ nɑ ɩ́ tɔŋ sɩ: Ɩ tɩɩ hotɑɑ, Pɑpiloni sɔsɔ tɩɩ hotɑɑ. Ɩnɩ ɩ nyɔɔsǝnɑ piitim tǝnɑ yǝlɑɑ kɛ ɩ sʋlʋm, ɩ ɑsilimɑ sɔsɔɔnɑ ɑnɩ ɑ sʋlʋm.
9 Ɩsɔtɑɑ tillɑɑ nɑɑlɛ ɩnɩ ɩ wɑɑlɩ kɛ́ tooso nyǝŋ lɩɩwɑ nɑ ɩ́ yɔɣɔtǝɣǝnɑ nɔɣɔ sɔsɔɣɑ sɩ: Ye wei ɩ́ sɛɛ wontuɣu ŋkʋ nɑ kʋ lɛɛsʋɣʋ nɑ ɩ́ tʋ́ kʋ kʋyʋsʋm kɛ ɩ tokuɣu tɑɑ yɑɑ ɩ niŋ tɑɑ tɔ,
10 pʋntʋ mɑɣɑmɑɣɑ kɑ́ tɛ nɑ ɩ́ nyɔɔ Ɩsɔ sʋlʋm, ɩ pɑ́ɑ́nɑ́ sɔsɔɔnɑ nyǝm mpi ɩ pǝlɑ ɩ pɑ́ɑ́nɑ́ kɔpʋ tɑɑ nɑ pɑ́ tɑ́ pɑlɑ pǝ tɑɑ kɛ́ pʋlʋ tɔ. Ɩ kɑ́ nɑ́ kɑŋkɑŋsi kɛ kɔkɔ nɑ ɑsimti pǝ tɑɑ kɛ́ ɩsɔtɑɑ tillɑɑ nɑŋŋ nyǝ́mɑ nɑ Ɩwǝyɑɣɑ pɑ ɩsɛntɑɑ.
11 Nɑ kɔkɔ ŋkɑ kɑ tɑɑ pɑ nɑɑ ḿpʋ́ɣʋ́ kɑŋkɑŋsi tɔ tɑm tɔɔ kɛ́ kɑ nyɔɔsɩ kʋlǝɣǝnɑ ɩsɔ. Mpɑ pɑ sɛɛ wontuɣu ŋkʋ nɑ kʋ lɛɛsʋɣʋ nɑ pɑ yʋsɑ-wɛ nɑ kʋ hǝtɛ kʋyʋsʋm tɔ, ḿpʋ́ɣʋ́ pɩɩ wɛɛ tɑm tɔɔ, hɛɛsʋɣʋ fɛɩ.
12 Pǝ tɔɔ kɛ́ Ɩsɔ yǝlɑɑ mpɑ pɑ tǝŋǝɣɩ ɩ kʋheelitu nɑ pɑ́ nɩɩkǝnɑ Yesu kɛ teu tɔ pǝ wɛɛ sɩ pɑ́ tɔkɩ suulu.
13 Ḿpʋ́ɣʋ́ mɑ nɩɩwɑ pǝ tɔmɑ-m nɑ ɩsɔtɑɑ sɩ: Nmɑɑ tɑkǝlɑɣɑ tɑɑ sɩ pǝ kpɑɣɑʋ pǝnɛntɑɑ tɔ mpɑ pɑ sǝkɩ Tɑcɑɑ tǝmlɛ tɑɑ tɔɣɔlɛ leleŋ nɩɩlɑɑ. Ɩlɛnɑ Feesuɣu tɔ sɩ: Nn, tɑmpɑnɑ kɛ́, pɑ tǝmɑ toŋ nyǝnɑ wenɑ pɑ lɑpɑ tɔ, pǝ tɑlɑ pɑ hɛɛsɩ. Pǝ tɑɣɑ pʋlʋ, kʋpɑntʋ nti pɑ lɑkɑɣɑ tɔ ntɩ tǝ tǝŋǝɣǝnɑ-wɛ.
Kʋmtʋ tɑtɛ
14 Mɑ nyǝnɑɑ tɔtɔ ɩlɛ mɑ nɑ́ ɩsɔŋmʋntʋɣʋ kʋhʋlʋmʋɣʋ ntɛ́, nɑ nɔɣɔlʋ cɑɣɑ kʋ tɔɔ, nɑ pʋntʋ nǝɣǝsǝnɑ yʋlʋ, nɑ wʋlɑ ntenuɣu temɑ ɩ nyʋɣʋ, nɑ ɩ niŋ tɑɑ kɛ́ lemse lɔŋ nyǝŋ.
15 Ḿpʋ́ɣʋ́ ɩsɔtɑɑ tillu lɛlʋ lɩɩnɑ Ɩsɔ tǝsɛɛlɛ sɔsɔɔlɛ tɑɑ nɑ ɩ́ yɔɣɔtǝnɑ wei ɩ cɑɣɑ ɩsɔŋmʋntʋɣʋ tɔɔ tɔ nɑ nɔɣɔ sɔsɔɣɑ sɩ: Kpɑɣɑ nyɑ́ lemse nɑ ń kʋ́, kʋmtʋ tɑlɑɑ kɛ́. Tɛtʋ pɩɩwɑ tɔ, kʋmtʋ tɑlɑɑ kɛ́.
16 Tǝnɑɣɑ wei ɩ cɑɣɑ ɩsɔŋmʋntʋɣʋ tɔɔ tɔ ɩ tʋ ɩ lemse kɛ́ tɛtʋ tɔɔ, ɩlɛnɑ pǝ́ kʋ́ tɛtʋ tɔɔ.
17 Nɑ ɩsɔtɑɑ tillu lɛlʋ nɑ́ɑ́ lɩɩnɑ ɩsɔtɔnʋɣʋ tɑɑ Ɩsɔ tǝsɛɛlɛ sɔsɔɔlɛ tɑɑ nɑ ɩ́lɛ́ ɩ tɔkɑ lemse lɔŋ nyǝŋ tɔtɔ.
18 Ḿpʋ́ɣʋ́ ɩsɔtɑɑ tillu lɛlʋ wei ɩ́lɛ́ ɩ wɛnɑ pǝsʋɣʋ kɛ kɔkɔ tɔɔ tɔ ɩ lɩɩnɑ kɔtɑɣɑ tǝlɑtɛ nɑ ɩ́ kɔɔ. Ɩlɛnɑ ɩ́ yɔɣɔtǝnɑ ɩsɔtɑɑ tillu wei ɩ tɔkɑ lemse lɔŋ nyǝŋ tɔ nɑ nɔɣɔ sɔsɔɣɑ sɩ: Kpɑɣɑ nyɑ́ lemse nɑ ń kóólí tɛtʋ tɔɔ lɛsɛŋ tukuŋ, ɩ pɩɩwɑɣɑ.
19 Tǝnɑɣɑ ɩsɔtɑɑ tillu tʋ ɩ lemse nɑ ɩ́ kóólí tɛtʋ tɔɔ lɛsɛŋ tukuŋ, nɑ ɩ́ pɛtɩ-ɩ Ɩsɔ pɑ́ɑ́nɑ́ sɔsɔɔnɑ lɛsɛŋ tǝnyɑɑsǝlɛ tɑɑ.
20 Ɩlɛnɑ pɑ́ nyɑɑsɩ lɛsɛŋ kɛ ɩcɑtɛ wɑɑlɩ kɛ́ tǝnyɑɑsǝlɛ tɑɑ, nɑ cɑlǝmʋɣʋ lɩɩnɑ tǝnyɑɑsǝlɛ tǝnɑ nɑ kʋ kpe kpokpokpo nɑ pǝ́ polo ɩsɩɩ kilomɛɛtǝlǝnɑɑ ŋmʋnʋɣʋ nɑ nɩɩwʋwɑ (300), nɑ pǝ lumɑ ɩsɩɩ mɛɛtǝlɩ kʋlʋm nɑ hɔɣɔlʋɣʋ.