17
Wɑsɑŋkɑlɩ kpitikpiti tɔm
1 Ɩsɔtɑɑ tillɑɑ nɑɑtosompɔɣɔlɑɣɑ wei ɩ kɑ tɔkɑ kɔpʋnɑɑ nɑɑtosompɔɣɔlɑɣɑ tɔ pɑ tɑɑ lɛlʋ kɔmɑ nɑ ɩ́ yɑɑ-m sɩ: Kɔɔ nɑ mɑ́ hʋlɩ-ŋ sɑlǝkɑ wei pɑɑ tʋ pusi pɑɣɑlɛ hɛkʋ tɑɑ wɑsɑŋkɑlɩ sɔsɔ tɔ.
2 Ɩ kiŋ kɛ ɑtɛ ɑwulɑɑ lɑkɑɣɑ pɑ ɑsilimɑ kʋlɑpʋtʋ, nɑ ɩ ɑsilimɑ sʋlʋm kɛ ɑtɛ yǝlɑɑ nyɔɔwɑ nɑ pǝ́ kʋɣɩ-wɛ.
3 Ḿpʋ́ɣʋ́ Feesuɣu tɛɛnɑ-m ɩlɛnɑ ɩsɔtɑɑ tillu ponɑ-m wʋlɑɣɑ tɛtʋ tɑɑ. Tǝnɑɣɑ mɑ nɑ́ ɑlʋ nɔɣɔlʋ nɑ ɩ́ cɑɣɑ wontuɣu kʋsɛɛmʋɣʋ tɔɔ, nɑ ɩ tɔɔ wɑɑsɑ hǝlɑ nnɑ ɑ tʋʋkɩ Ɩsɔ tɔ tǝwisiwisi. Wontuɣu ŋkʋ kʋ nyɔɔŋ kɑ wɛ nɑɑtosompɔɣɔlɑɣɑ kɛ́, nɑ kʋ hǝŋ kɛ nɑɑnʋwɑ.
4 Alʋ ɩnɩ ɩ tɔɣɔlɑ wontu kʋpɑmpɑntʋ nti tǝ sɛɛwɑ tɔ, nɑ wontu nti tǝ sɛɛwɑ tǝkeŋkeŋ tɔ, nɑ ɩ tʋ wʋlɑ nɑ liɣitee pɛɛ lɩɩtʋ kʋpɑntʋ, pǝ tɩɩ fɛɩ. Nɑ ɩ́ tɔkɑ ɩ niŋ tɑɑ kɛ́ wʋlɑ kɔpʋ nɑ ɩ́ sunɑ ɑcɑɑlǝtʋ. Asilimɑ nnɑ ɩ kɑ lɑpɑ tɔ ɑ ɩsɑɣɑtʋ ntɛ́.
5 Pɑ ŋmɑɑ ɩ tokuɣu tɑɑ kɛ́ hǝtɛ nɑtǝlɩ, ɑmɑ pǝ hʋwɛɛ tɑ tʋlɩ teu kɛ́ tǝyɑɩɩ. Sɩ, Pɑpiloni sɔsɔ, ɑntulinyɑ wɑsɑŋkɑlǝnɑɑ nɑ ɑcɑɑlǝtʋ pǝ too.
6 Ɩlɛnɑ mɑ́ nɑ́ sɩ Ɩsɔ yǝlɑɑ cɑlǝm nɑ mpɑ pɑ lɛntɑɑ sɩ pepe tɔɔ kɛ́ pɑ nɩɩnɑ Yesu kɛ́ teu tɔ, pɛlɛ pɑ cɑlǝm kʋɣɩ ɑlʋ ɩnǝɣɩ sʋlʋm nyǝm.
Mɑ nɑ-ɩ, ɩlɛnɑ pǝ́ pɑɑsɩ nɑ pǝ́ lɑ-m hɑ.
7 Ḿpʋ́ɣʋ́ ɩsɔtɑɑ tillu pɔɔsɑ-m sɩ: Pepe tɔɔ kɛ́ pǝ lɑkɩ-ŋ hɑ? Mɑɑ heeli-ŋ mpi ɑlʋ nɑ wontuɣu ŋku kʋ tɔɔ ɩ cɑɣɑɑ nɑ kʋ wɛnɑ nyɔɔŋ nɑɑtosompɔɣɔlɑɣɑ nɑ hǝŋ nɑɑnʋwɑ tɔ pɑ hʋ́lǝ́ɣɩ́ mukɑɣɑ tɛɛ tɔ.
8 Wontuɣu ŋku n nɑ mpʋ tɔ, kɩɩ wɛnɑ weesuɣu kɛ hɑtuu lɔŋ kɛ́, ɑmɑ kʋ fɛɩ ḿpʋ́ɣʋ́ nɔɔnɔɔ. Pǝ wɛɛ sɩ kʋ́ lɩɩ lumɑŋ pʋʋɣʋ sɔsɔɔʋ tɑɑ kɛ́ nɑ kʋ́ polo timpi pɩɩ tɛ kʋ tɔm tǝnɑŋnɑŋ tɔ. Atɛ yǝlɑɑ mpɑ pɑ hǝlɑ pǝ tɑɑ ŋmɑɑ weesuɣu tɑkǝlɑɣɑ tɑɑ kɛ́ hɑtuu ɑntulinyɑ kɑncɑɑlɑɣɑ tɔ, pɑɑ nɑ́ wontuɣu kʋnɛ tɔ pɩɩ lɑ-wɛɣɛ hɑ. Pǝ tɑɣɑ pʋlʋ, kɩɩ wɛnɑ weesuɣu kɛ hɑtuu lɔŋ kɛ́. Amɑ kʋ fɛɩ ḿpʋ́ɣʋ́ nɔɔnɔɔ, nɑ kɩɩ tɑɣɑnɩ lɩɩʋ tɔtɔ.
9 Nyǝm nɑ lǝmɑɣɑsɛɛ pǝ tǝhʋllɛ kiŋ ntɛ́ cǝnɛ. Nyɔɔŋ nɑɑtosompɔɣɔlɑɣɑ ɩnɩ ɩ hʋ́lǝ́ɣɩ́ pulɑsɩ nɑɑtosompɔɣɔlɑɣɑ wei ɩ tɔɔ ɑlʋ ɩnɩ ɩ cɑɣɑɑ tɔɣɔ. Nɑ ɩ hʋ́lǝ́ɣɩ́ tɔtɔɣɔ ɑwulɑɑ sɔsɑɑ nɑɑtosompɔɣɔlɑɣɑ.
10 Awulɑɑ sɔsɑɑ mpɛ pɑ tɑɑ kɑkpɑsɩ tɛmɑ hotuɣu. Kʋlʋm nɑ́ wɛɛ, nɑ ɩ́ tɔŋnɑ kɑwulɑɣɑ tɔɣɔʋ. Nɑ lɛlʋ nɑ́ tɑ kɔntɑ, ɩlɛ ɩ kɔŋ ɩ kɔɔ tɔ ɩ cɑɣɑʋ kɑɑ tɔɔ.
11 Wontuɣu ŋku kɩɩ wɛnɑ weesuɣu nɑ kʋ fɛɩ ḿpʋ́ɣʋ́ nɔɔnɔɔ tɔ, kʋlɛɣɛlɛ wulɑʋ sɔsɔ pǝlefɛɩ nyǝŋ. Mpɛɣɛlɛ mpʋ nɑ kɑncɑɑlɑɣɑ ɑwulɑɑ sɔsɑɑ nɑɑtosompɔɣɔlɑɣɑ ɩnɩ. Kʋ puki timpi pɩɩ tɛ kʋ tɔm tǝnɑŋnɑŋ tɔɣɔ.
12 Hǝŋ nɑɑnʋwɑ wei n nɑwɑ tɔ ɩ hʋ́lǝ́ɣɩ́ ɑwulɑɑ sɔsɑɑ nɑɑnʋwɑ mpɑ pɑ tɑ tɔɣɔtɑ kɑwulɑsɩ tɔ. Amɑ pɩɩ hɑ-wɛɣɛ kɑwulɑsɩ tomɑ, nɑ pɑ nɑ wontuɣu ŋkʋ pɑ́ tɔɣɔ kɑwulɑɣɑ kɛ kɑlǝfu kʋlʋm tɑɑ.
13 Pɑ nɑɑnʋwɑ ɩnɩ pɑ tǝnɑ pɑɑ lɑ lǝmɑɣɑsǝlɛ kʋlʋmtǝlɛ nɑ pɑ́ mǝŋnɑ pɑ tomɑ nɑ pɑ kɑwulɑsɩ nɑ pɑ́ cɛlɑ wontuɣu.
14 Pɑɑ kʋlɩ nɑ pɑ́ yoonɑ Ɩwǝyɑɣɑ, ɑmɑ Ɩwǝyɑɣɑ kɑ́ kǝlɩ-wɛ. Pǝ tɑɣɑ pʋlʋ tɔɔ, ŋkɛɣɛlɛ sɔsɑɑ Sɔsɔ nɑ ɑwulɑɑ tǝnɑ Wulɑʋ. Kɑ nɑ kɑ nyǝ́mɑ mpɑ pɑ yɑɑwɑ nɑ pɑ́ lǝsɩ nɑ pɑ kɛ́ nɩɩntɑɑ tɔ pɑɑ kǝlɩ-wɛ.
15 Ḿpʋ́ɣʋ́ ɩsɔtɑɑ tillu tɑsɑ-m heeluɣu sɩ: Pusi nsi n nɑwɑ nɑ wɑsɑŋkɑlɩ cɑɣɑ sɩ hɛkʋ tɔ, yǝlɑɑ nɑ sɑmɑɑ nɑ piitimnɑɑ tɑɑ yǝlɑɑ nɑ nsǝmɑ tɑɑ yǝlɑɑ ntɛ́ mpʋ.
16 Hǝŋ nɑɑnʋwɑ wei n nɑwɑ tɔ nɑ wontuɣu pɑ tɑɑ kɑ́ kpɑnɑ wɑsɑŋkɑlɩ ɩnɩ, nɑ pɑ́ lɛɛkɩ ɩ wontu tǝnɑ nɑ pɑ́ yele-ɩ kpɛtɛ. Pɑɑ tɔɣɔ ɩ nɑntʋ, nɑ pɑ́ wɔpɩ-ɩ kɔkɔ.
17 Pǝ tɑɣɑ pʋlʋ, Ɩsɔ tʋnɑ pɑ lotunɑɑ tɑɑ kɛ́ hʋwɛɛ sɩ pɑ́ kpɛntɩ nɔɣɔ kʋlʋmɑɣɑ nɑ pɑ́ lɑkɩ nɑ pɑ́ mǝŋnɑ pɑ kɑwulɑsɩ toŋ nɑ pɑ́ cɛlɑ wontuɣu, nɑ pɑ́ yoosi nti nti tǝ lǝmɑɣɑsɛɛ ɩ kɑ tʋwɑ tɔ, hɑlǝnɑ Ɩsɔ kɑ yɔɣɔtɑ nti tɔ tǝ́ lɑ.
18 Nɑ ɑlʋ wei n nɑwɑ mpʋ tɔ, ɩcɑtɛ sɔsɔɔlɛ nte tǝ ŋmɑkǝlǝɣɩ ɑtɛ ɑwulɑɑ sɔsɑɑ tɔɣɔlɛ.