2
Tɔm nti pɑ heelɑ Ɩfeesu Yesu sɛɛlɑɑ kpekǝle tɔ
1 Nmɑɑ tɑkǝlɑɣɑ nɑ ń heeli Ɩfeesu Yesu sɛɛlɑɑ kpekǝle ɩsɔtɑɑ tillu sɩ: Mɑ́ wei mɑ tɔkɑ ɩsɔtʋlʋŋɑsɩ nɑɑtosompɔɣɔlɑɣɑ kɛ mɑ niŋ ntɔɣɔŋ tɑɑ, nɑ mɑ tɔŋ wʋlɑ kpɑtǝŋ nɑɑtosompɔɣɔlɑɣɑ wei ɩ tɔɔ pɑ mʋsɑ kɔkɔsɩ tɔ ɩ hɛkʋ tɑɑ tɔ mɑ yɔɣɔtɑɑ sɩ:
2 Mɑ nyǝmɑ́ pǝ tǝnɑ mpi n lɑpɑ tɔ. Nɑ mɑ nɑwɑ ɩsǝnɑ n wɩɩwɑ tɔ, nɑ suulu wei n tɔkɑɑ tɔ. Mɑ nyǝmɑ́ sɩ nn cɑɑ ɑsɑɣɑɑ tɔm. N mɑɣɑsɑ mpɑ pɑ yɑɑ pɑ tǝɣɩ tillɑɑ, pǝyele kpɑɩtǝko pɑ tɑ kɛ pʋlʋ tɔ, sɩ n nɑɑ pɑ wɑɑlɩ. N nɑwɑ sɩ pɑ kɛ́ pɔpɔtʋnɑɑ kɛ́.
3 N tɔɣɑ suulu nɑ ń tɔɣɔ mɑ kʋnyɔŋ, nɑ pɑɑ nɑ mpʋ tɔ n tɑ lɔ tɔɔŋ.
4 Amɑ kʋlʋmtʋ nti mɑ lɑŋlɛ tɑ hɛɛnɑ-ŋ tɔɣɔlɛ sɩ, nn tɑsǝɣɩ-m sɔɔlʋɣʋ ɩsɩɩ hɑtuu kɑncɑɑlɑɣɑ n kɑ sɔɔlʋɣʋ-m tɔ.
5 Tɔʋ, timpi ɩnɩ n cɔlǝsɑ mpʋ tɔ tɔɔsɩ pǝ tɔɔ nɑ ń hɑ nyɑ́ ɩsɑɣɑtʋ kɛ siɣile, nɑ ń lɑ́ ɩsɩɩ n lɑkɑɣɑ tuu kɑncɑɑlɑɣɑ tɔ. Ye n tɑ hɑ nyɑ́ ɩsɑɣɑtʋ kɛ siɣile mɑɑ kɔɔ nyɑ́ kiŋ nɑ mɑ́ kpɛsɩ nyɑ́ kɔkɔ kpɑ́tʋ́ɣʋ́ kɛ kʋ lonte tɑɑ.
6 Pɑɑ nɑ mpʋ kʋlʋmtʋ nti mɑ lɑŋlɛ hɛɛnɑ-ŋ tɔɣɔlɛ sɩ, nyɑ́ kpiisɑ ŋkpɑŋʋɣʋ tɔtɔɣɔ Nikolɑɩ nyǝ́mɑ kʋlɑpʋtʋ nti mɑ kpiisɑ ŋkpɑŋʋɣʋ tɔ.
7 Ye wei ɩ wɛnɑ ŋkpɑŋŋ pʋntʋ ɩ́ tʋ-ɩ teu, nɑ ɩ́ nɩɩ nti Feesuɣu heeliɣi Yesu sɛɛlɑɑ kpekɑ tɔ ɩlɛ.
Ye mpɑ pɑ lɑpɑ kǝllɑɑ mɑɑ hɑ-wɛɣɛ nɔɣɔ nɑ pɑ́ tɔɣɔ Ɩsɔ tɩɩŋ tɑɑlɛ tɑɑ weesuɣu tʋɣʋ pǝle.
Tɔm nti pɑ heelɑ Simiinɩ Yesu sɛɛlɑɑ kpekǝle tɔ
8 Nmɑɑ tɑkǝlɑɣɑ nɑ ń heeli Simiinɩ Yesu sɛɛlɑɑ kpekǝle ɩsɔtɑɑ tillu sɩ: Mɑ́ wei mɑ kɛ́ kɑncɑɑlɑɣɑ tʋ nɑ kɑntǝkɑɣɑ tʋ nɑ mɑ sǝpɑ nɑ mɑ́ fe tɔ, mɑ yɔɣɔtɑɑ sɩ:
9 Mɑ nyǝmɑ́ kʋnyɔmǝŋ wei n tɔɣɑɑ tɔ. Mɑ nyǝmɑ́ nyɑ́ hʋlʋmǝŋ tɔɔ. Pɑɑ nɑ mpʋ tɑmpɑnɑ tɔɔ ɩsǝntɔ n pilɑɑ kɛ́. Mɑ nyǝmɑ́ ɩsɑɣɑtʋ nti mpɑ pɑ yɑɑ pɑ tǝɣɩ Yutɑ nyǝ́mɑ pǝyele pɑ tɑ kɛ Yutɑ nyǝ́mɑ tɔ pɑ yɔɣɔtǝɣɩ nyɑ́ tɔɔ tɔ. Pɑ kɛ́ Sɑtɑnɩ nyǝ́mɑ kɛ́.
10 Tɑɑ nyɑnɑ kʋnyɔŋ ŋku n kɑ́ kɔɔ nɑ ń tɔɣɔ tɔ. Nyǝnɩ, Ɩlɔɣɔʋ kɑ́ tʋ mǝ tɑɑ pɑɣɑlɛ kɛ sɑlǝkɑ tɑɑ sɩ ɩ mɑɣɑsǝɣɩ-mɛ nɑ ɩ́ nɑ́ mǝ wɑɑlɩ. Nɑ kʋyɛɛŋ nɑɑnʋwɑ tɑɑ kɛ́ ɩ́ kɑ́ tɔɣɔ kʋnyɔŋ. Lɑ yʋlʋpɑŋ hɑlǝnɑ nyɑ́ sǝm wule, mɑɑ tɛ nɑ mɑ́ hɑ-ŋ weesuɣu teeli ntenuɣu.
11 Ye wei ɩ wɛnɑ ŋkpɑŋŋ pʋntʋ ɩ́ tʋ-ɩ teu, nɑ ɩ́ nɩɩ nti Feesuɣu heeliɣi Yesu sɛɛlɑɑ kpekɑ tɔ ɩlɛ.
Ye mpɑ pɑ lɑpɑ kǝllɑɑ pɑ kɑɑ nɑ sǝm kʋlɛlǝm.
Tɔm nti pɑ heelɑ Pɛɛkɑm Yesu sɛɛlɑɑ kpekǝle tɔ
12 Nmɑɑ tɑkǝlɑɣɑ nɑ ń heeli Pɛɛkɑm Yesu sɛɛlɑɑ kpekǝle ɩsɔtɑɑ tillu sɩ: Mɑ́ wei mɑ wɛnɑ lɑɣɑtɛ nte tǝ wɛ lɔŋ kɛ tɑ́ɑ́ nɑ wɑɑlɩ tɔ mɑ yɔɣɔtɑɑ sɩ:
13 Mɑ nyǝmɑ́ timpi n wɛɛ tɔ, Sɑtɑnɩ kɑwulɑɣɑ tǝtɔɣɔlɛ ntɛ́ tǝnɑ. N nyɔɔnɑ-m teu tǝkpɑm, hɑlǝnɑ wɑɑtʋ wei pɑ kʋ mɑ ɑseetɑ tʋ kʋpɑŋ Antipɑsɩ kɛ mǝ tɛ timpi Sɑtɑnɩ nɑ́ lɑpɑ ɩ tɛ tɔtɔ tɔ, n tɛmɑ-m nɑ nyɑ́ tɑɑ kɛ́ ḿpʋ́ɣʋ́, n tɑ yele.
14 Amɑ kʋlʋmtʋ nti mɑ lɑŋlɛ tɑ hɛɛnɑ-ŋ tɔɣɔlɛ sɩ, mpɑ pɑ tɔkɑ Pɑlɑɑm sɛɣɛsʋɣʋ tɔ pɑ wɛ nyɑ́ tɛ tǝnɑ. Pɑlɑɑm kɑ sɛɣɛsǝnɑ Pɑlɑkɩ sɩ ɩ́ tusi Ɩsɛɣɛlɩ nyǝ́mɑ sɩ pɑ́ tɔɣɔ tɩɩŋ kʋlɑlɑɑm, nɑ pɑ́ lɑ ɑsilimɑ nɑ pɑ́ pǝsɩ ɑsɑɣɑɑ.
15 Nɑ mpɑ pɑ tɔkɑ Nikolɑɩ nyǝ́mɑ sɛɣɛsǝŋ tɔ pɑ wɛ nyɑ́ tɛ tɔtɔ.
16 Yele nyɑ́ ɩsɑɣɑtʋ ntɩ, ye pǝ tɑɣɑ mpʋ mɑɑ kɔɔ nɔɔnɔɔ kɛ́ nyɑ́ kiŋ nɑ mɑ́ yoonɑ yǝlɑɑ mpɛ nɑ mɑ nɔɣɔ tɑɑ lɑɣɑtɛ.
17 Ye wei ɩ wɛnɑ ŋkpɑŋŋ pʋntʋ ɩ tʋ-ɩ teu, nɑ ɩ́ nɩɩ nti Feesuɣu heeliɣi Yesu sɛɛlɑɑ kpekɑ tɔ ɩlɛ.
Ye mpɑ pɑ lɑpɑ kǝllɑɑ mɑɑ hɑ-wɛɣɛ mɑnnɑ kʋŋmɛsʋ. Nɑ mɑɑ hɑ pɑɑ pɑ tɑɑ wei tɔtɔɣɔ pǝlɛ kʋhʋlʋmǝlɛ nte tǝ tɔɔ pɑ ŋmɑɑ hǝtɛ kʋfɑtɛ nte nɔɣɔlʋ tɑ nyɩ tɔ ye pǝ tɑɣɑ pʋntʋ wei pɑɑ cɛlɛ-tɛ tɔ ɩ pɑɑsi.
Tɔm nti pɑ heelɑ Tiyɑtii Yesu sɛɛlɑɑ kpekǝle tɔ
18 Nmɑɑ tɑkǝlɑɣɑ nɑ ń heeli Tiyɑtii Yesu sɛɛlɑɑ kpekǝle ɩsɔtɑɑ tillu sɩ: Mɑ́ wei mɑ kɛ́ Ɩsɔ Pǝyɑlʋ, nɑ mɑ ɩsɛ mʋɣɩ kɔkɔ, nɑ mɑ nɔntɑɑlǝŋ tee kɔkɔ kɛ nyǝnǝnyǝnɩ ɩsɩɩ nyǝɣǝlʋɣʋ kʋsɛɛmʋɣʋ ŋku pɑ sotitɑɑ tɔ, mɑ yɔɣɔtɑɑ sɩ:
19 Mɑ nyǝmɑ́ pǝ tǝnɑ mpi n lɑpɑ tɔ, mɑ nyǝmɑ́ nyɑ́ sɔɔlʋɣʋ tɔm nɑ nyɑ́ Ɩsɔ tɔɔ yuŋ tisuɣu tɔm, nɑ ɩsǝnɑ n pɑɑsɑɑ nɑ ń kʋɣɩ nyɑ́ tǝɣɩ tǝmlɛ lɑpʋ tɔɔ, nɑ ɩsǝnɑ n tɔkɑ suulu tɔ. Mɑ nyǝmɑ́ sɩ nyɑ́ kʋlɑpǝlɛ nɔɔnɔɔ nyǝntɛ kǝlɑ tuu kɑncɑɑlɑɣɑ nyǝntɛ.
20 Amɑ kʋlʋmtʋ nti mɑ lɑŋlɛ tɑ hɛɛnɑ-ŋ tɔɣɔlɛ sɩ n yelɑ ɑlʋ Cɛsɑpɛlɩ nɑ ɩ́ yɔɣɔtǝɣɩ sɩ Ɩsɔ tilinɑ ɩnɩ sɩ ɩ́ yɔɣɔtǝɣɩ, pǝyele kpɑɩtǝko. Ɩ sɛɣɛsǝɣɩ mɑ pǝyɑlɑɑ sɩ pɑ́ lɑ ɑsilimɑ nɑ pɑ́ tɔɣɔ tɩɩŋ kʋlɑlɑɑm tɔ, ɩ pilisiɣi-wɛɣɛ.
21 Mɑ hɑ-ɩ wɑɑtʋ sɩ ɩ yele ɩ ɩsɑɣɑtʋ ntɩ, ɑmɑ ɩɩ cɑɑ ɩ ɑsilimɑ yeluɣu.
22 Pǝ tɔɔ tɔ mɑɑ kpɑɣɑ-ɩ nɑ mɑ́ hɩɩsɩ kʋnyɔntɔɣɔlɛ kɑto tɔɔ, nɑ mɑɑ lɑ nɑ mpɑ pɑ lɑkǝnɑ-ɩ wɑsɑŋkɑlǝtʋ tɔ pɛlɛ pɑ́ nɑ kʋnyɔŋ kɛ sɔsɔm tɔtɔ. Amɑ ye pɑ yelɑ ɑsilimɑ kʋlɑpʋtʋ nti pɑ́ nɑ-ɩ pɑ lɑkɩ tɔ pǝ pɑɑsi.
23 Nɑ kʋkǝlǝtʋ ntɛ́ sɩ mɑɑ kʋ ɩ piyɑ nɑ pǝ́cɔ́ Yesu sɛɛlɑɑ tǝnɑ nyɩ sɩ mɑɣɑlɛ wei ɩ nyǝmɑ́ yʋlʋ lotu tɑɑ hʋwɛɛ nɑ ɩ kʋnyɩɩlǝm tɔ. Mɑɑ tɛ nɑ mɑ́ fɛlɩ pɑɑ wei kɛ́ ɩsɩɩ ɩ lɑpɑ tɔ.
24 Pǝ kɑɑsɑ mpɑ mɛ mǝ wɛ Tiyɑtii Yesu sɛɛlɑɑ kpekǝle tɑɑ tǝnɑ nɑ ɩ́ tɑ́ tǝŋ sɛɣɛsʋɣʋ ɩsɑɣɑʋ kʋnɛ tɔ, mǝ tɑ́ nyǝnɑ mpi yǝlɑɑ pɑnɛ pɑ yɑɑ sɩ Sɑtɑnɩ mukɑɣɑ tɛɛ mukɑɣɑ nyǝm tɔ, mɑ heeliɣi-mɛ sɩ mɑ kɑɑ tɑsɑ-mɛɣɛ sǝɣǝlɑ nɑɑlǝɣɩ sʋkʋɣʋ.
25 Amɑ ɩ́ tɔkɩ mpi ɩ́ wɛnɑ tɔɣɔ teu tǝkem nɑ hɑlǝnɑ mɑ́ kɔɔ.
26-28 Mpɑ pɑɑ lɑ kǝllɑɑ nɑ pʋntʋnɑɑ lɑkɩ mpi mɑ cɑɑkɩ hɑlǝnɑ tǝnɑɣɑ tɔ, mɑɑ cɛlɑ pʋntʋnɑɑ kɛ pǝsʋɣʋ ŋku mɑ Cɑɑ nɑ́ cɛlɑ mɑ́ tɔ. Mɑɑ hɑ-wɛɣɛ pǝsʋɣʋ nɑ pɑ́ ŋmɑkǝlǝɣɩ piitimnɑɑ. Nɑ pɑɑ tiiki-wɛ nɑ nyǝɣǝlʋɣʋ kpɑ́tʋ́ɣʋ́, nɑ pʋntʋnɑɑ kɑ́ nɑŋ piitimnɑɑ ɩsɩɩ pɑ yɔkʋɣʋʋ cʋɣʋ nyǝm tɔ. Nɑ mɑɑ hɑ-wɛɣɛ tʋlʋmɑlʋɣʋ tɔtɔ.
29 Ye wei ɩ wɛnɑ ŋkpɑŋŋ pʋntʋ ɩ́ tʋ-ɩ teu, nɑ ɩ́ nɩɩ nti Feesuɣu heeliɣi Yesu sɛɛlɑɑ kpekɑ tɔ ɩlɛ.