21
Ɩsɔtɔntʋɣʋ kʋfɑlʋɣʋ nɑ tɛtʋ kʋfɑtʋ
1 Ḿpʋ́ɣʋ́ mɑ nɑ́ ɩsɔtɔnʋɣʋ kʋfɑlʋɣʋ nɑ tɛtʋ kʋfɑtʋ. Ɩsɔtɔnʋɣʋ kʋpǝnʋɣʋ nɑ tɛtʋ kʋpǝntʋ kɑ mʋkɑ yem kɛ́, nɑ teŋku nɑ́ fɛɩ tɔtɔ.
2 Nɑ mɑ́ nɑ́ ɩcɑtɛ nɑŋŋ nyǝntɛ. Yosɑlɛm kʋfɑlʋ, nɑ tǝ lɩɩnɑ ɩsɔtɑɑ kɛ́ Ɩsɔ kiŋ nɑ tǝ́ tiiki. Tǝ tɑɣɑnɑ tǝ tǝɣɩ teu kɛ́ ɩsɩɩ pɛɛlɔ tɑɣɑnʋɣʋ ɩ tɩ nɑ ɩ́ puki ɩ pɑɑlʋ kiŋ tɔ.
3 Tǝnɑɣɑ mɑ nɩɩ pǝ yɔɣɔtǝnɑ kumte kiŋ nɑ nɔɣɔ sɔsɔɣɑ sɩ: Pǝnɛntɛ Ɩsɔ tǝcɑɣɑlɛ wɛ yǝlɑɑ hɛkʋ. Ɩ́ nɑ-wɛ pɑɑ cɑɣɑnɑ, nɑ pɑɑ lɑ ɩ yǝlɑɑ. Pɑ́ nɑ Ɩsɔ mɑɣɑmɑɣɑ pɑɑ cɑɣɑnɑ nɑ pɑ́ nyǝnǝɣɩ-ɩ pɑ Ɩsɔ.
4 Ɩ kɑ́ hɩɩsɩ pɑ ɩsǝlʋm tǝnɑ tǝpɑɩ. Sǝm kɑɑ tɑsɑ wɛɛʋ. Kʋpǝm mpɩ pǝ tǝnɑ pɩɩ mʋkɩ yem.
5 Ḿpʋ́ɣʋ́ wei ɩ cɑɣɑ kumte tɔɔ tɔ ɩ tɔmɑ sɩ: Pǝnɛntɑɑ mɑ pǝsǝɣɩ pǝ tǝnɑɣɑ kʋfɑm. Nɑ ɩ heelɑ-m sɩ: Nmɑɑ-tɩ. Mpi tɔ mɑ kʋyɔɣɔtʋtʋ kɛ tɑmpɑnɑ kɛ́, nɑ tǝ mʋnɑ pɑ́ tɛ-tɩ nɑ tɑɑ.
6 Nɑ ɩ́ tɑsɑ sɩ: Pǝ lɑpɑɣɑlɛ. Mɑɣɑlɛ Alǝfɑ nɑ Omɛkɑ, kɑncɑɑlɑɣɑ tʋ nɑ kɑntǝkɑɣɑ tʋ. Lʋkɔtʋ ɩ́ wɛnɑ wei, mɑɑ hɑ-ɩ weesuɣu lʋm sɛɛlʋ kɛ fɑɑlɑɑ nɑ ɩ́ nyɔɔ.
7 Ye wei ɩ́ lɑpɑ kǝllʋ mɑɑ lɑpɩ-ɩ kʋcɔɔʋ kʋnɛ, nɑ ɩ kɑ́ yɑɑ-m ɩ Ɩsɔ, nɑ mɑɑ yɑɑ-ɩ mɑ pǝyɑlʋ.
8 Amɑ pǝ yelɑ sɔɣɔntʋnɑɑ nɑ mɑ tɑ nyɩ ɩsɔnɑɑ nɑ ɑcɑɑlǝtʋ nyǝ́mɑ nɑ yʋlʋkʋlɑɑ nɑ ɑsilimɑ lɑtɑɑ nɑ mpɑ pɑ lɑkɩ topotopo tǝmɑ tɔ nɑ tɩɩŋ lɑɑlɑɑ nɑ pɔpɔtʋnɑɑ tǝnɑ pɑ tǝcɑɣɑlɛ ntɛ́ kɔkɔ nɑ ɑsimti pǝ teŋku wei ɩ mʋɣɩ kɔkɔ tɔ ɩ tɑɑ. Sǝm kʋlɛlǝm ntɛ́.
Yosɑlɛm kʋfɑlʋ
9 Ɩsɔtɑɑ tillɑɑ nɑɑtosompɔɣɔlɑɣɑ wei ɩ kɑ tɔkɑ kɔpʋnɑɑ nɑ pɑ́ sunɑ kʋnɑɑsǝnɑm kɑntǝkɑɣɑ nyǝm kɛ tɔm nɑɑtosompɔɣɔlɑɣɑ tɔ pɑ tɑɑ lɛlʋ kɔmɑ nɑ ɩ́ tɔ-m sɩ: Kɔɔ nɑ mɑ́ hʋlɩ-ŋ pɛɛlɔ wei pɑɑ kpɑ tɔ, Ɩwǝyɑɣɑ ɑlʋ ntɛ́.
10 Ḿpʋ́ɣʋ́ Feesuɣu tɛɛnɑ-m nɑ ɩsɔtɑɑ tillu kpɑɣɑ-m nɑ ɩ́ kpɑɑsɩ pʋɣʋ sɔsɔɔʋ nɑkʋlɩ kʋ comcom nɔɣɔ tɑɑ. Tǝnɑɣɑ ɩ hʋlɑ-m Yosɑlɛm, ɩcɑtɛ nɑŋŋ nyǝntɛ nte tǝ lɩɩnɑ Ɩsɔ kiŋ kɛ ɩsɔtɑɑ nɑ tǝ́ tiiki tɔ.
11 Nɑ tǝ́ nɑ Ɩsɔ teeli tǝnyǝnǝnyǝnɩ. Tǝ teekɑɣɑ kɔkɔ kɛ́ nɑ pǝ́ nǝɣǝsǝnɑ liɣitee pǝlɛ kʋcɔlɔcɔllɛ nte tǝ nɑɑ ɩsɩɩ tiŋ tɔ.
12 Koluŋɑ sɔsɔɔŋkɑ kʋkʋlɑɣɑ cɔɔnɑ-tɛ, nɑ tǝ wɛnɑ nɔnɔɔsɩ nɑɑnʋwɑ nɑ nɑɑlɛ, nɑ ɩsɔtɑɑ tillɑɑ nɑɑnʋwɑ nɑ nɑɑlɛ tɑŋɑ tǝ nɔnɔɔsɩ. Nɑ pɑ́ ŋmɑɑ nɔnɔɔsɩ nsɩ sɩ tɔɔ kɛ́ Ɩsɛɣɛlɩ nyǝ́mɑ kpekɑ nɑɑnʋwɑ nɑ nɑɑlɛ hǝlɑ.
13 Nɔnɔɔsɩ tooso kɑ wɛnnɑ pɑɑ hɔɣɔlʋɣʋ ŋku kʋ tɔɔ, ilim tǝlɩɩlɛ tɔɔ kɛ́ nɔnɔɔsɩ tooso, nɑ ilim ntɔɣɔŋ tɔɔ kɛ́ tooso, pǝ mpǝtǝŋ tɔɔ kɛ́ tooso, nɑ ilim tǝtʋlɛ tɔɔ kɛ́ tooso.
14 Pɩɩŋ nɑɑnʋwɑ nɑ nɑɑlɛ tɔɔ kɛ́ koluŋɑ nɑ ɩcɑtɛ pǝ sǝŋɑɑ. Nɑ pǝ́ ŋmɑɑwɑ pɩɩŋ ɩnɩ ɩ tɔɔ kɛ́ Ɩwǝyɑɣɑ tillɑɑ nɑɑnʋwɑ nɑ nɑɑlɛ hǝlɑ.
15 Ɩsɔtɑɑ tillu wei ɩ yɔɣɔtɑɣɑnɑ-m tɔ ɩ tɔkɑ cɑmlʋɣʋ kʋmɑɣɑsʋɣʋ kɛ ɩ niŋ tɑɑ. Cɑmlʋɣʋ ŋkʋ kʋ kɛ́ wʋlɑ kɛ́, sɩ ɩ mɑɣɑsǝɣǝnɑ ɩcɑtɛ nɑ tǝ nɔnɔɔsɩ nɑ tǝ koluŋɑ.
16 Kɔŋkɔmǝŋ liɣiti kɛ́ ɩcɑtɛ wɛnɑ, nɑ tǝ wɑŋ tɔɔ nɑ tǝ tɑɣɑlǝŋ tɔɔ wɛ teitei. Ḿpʋ́ɣʋ́ ɩsɔtɑɑ tillu mɑɣɑsɑ ɩcɑtɛ nɑ ɩ cɑmlʋɣʋ ŋkʋ, nɑ ɩcɑtɛ kɔŋkɔŋ tɑɣɑlǝŋ wɛ kilomɛɛtǝlǝnɑɑ iyisi nɑɑlɛ nɑ ŋmʋnʋɣʋ (2200), nɑ tǝ wɑŋ tɔɔ nɑ tǝ kʋŋkʋlʋmǝŋ tɔɔ tɔtɔɣɔ mpʋ.
17 Nɑ ɩsɔtɑɑ tillu mɑɣɑsɩ koluŋɑ tɔtɔ, nɑ kɛlɛ kɑ kʋŋkʋlʋmǝŋ mɑɣɑnɑ mɛɛtǝlǝnɑɑ nɩɩtoso nɑ kɑkpɑsɩ. Ɩsǝnɑ pɑ mɑɣɑsǝɣɩ tɔɣɔ ɩ mɑɣɑsɑɑ.
18 Liɣitee pɛɛ kʋcɔlɔcɔlɛɛ kɛ pɑ ŋmɑnɑ koluŋɑ. Pǝ yelɑ ɩcɑtɛ tɔ, wʋlɑ mɑɣɑmɑɣɑ kɛ pɑ ŋmɑnɑ tǝlɛ, nɑ wʋlɑ ɩnɩ ɩ wɛ tǝcɛɩcɛɩ kɛ́ ɩsɩɩ tiŋ.
19 Liɣitee pɛɛ kɛ pɑ lɑpǝnɑ kɑcɔkɑ kɛ ɩcɑtɛ koluŋɑ kite tɛɛ pɛɛ tɔɔ. Kɑncɑɑlɑɣɑ nyǝntɛ ntɛ́ liɣitee pǝlɛ nte tǝ sitɑ cʋntʋ nɑ pooku tɔ. Nɑɑlɛ nyǝntɛ ntɛ́ liɣitee pǝlɛ nte tǝ wɛ pooku tǝlɛ tɔ. Tooso nyǝntɛ ntɛ́ liɣitee pǝlɛ pooku nɑ ɑtɔntɔɔtɛ. Liɣiti nyǝntɛ ntɛ́ liɣitee pǝlɛ tiŋ ɑtɔntɔɔtɛ.
20 Kɑkpɑsɩ nyǝntɛ ntɛ́ liɣitee pǝlɛ kʋkpɛɛtǝlɛ. Nɑɑtoso nyǝntɛ ntɛ́ liɣitee pǝlɛ kʋsɛɛmlɛ cʋntʋ tɑkɑ. Nɑɑtosompɔɣɔlɑɣɑ nyǝntɛ ntɛ liɣitee pǝlɛ ɑtɔntɔɔtɛ nɑ pooku. Pǝlefɛɩ nyǝntɛ ntɛ́ liɣitee pǝlɛ ɑtɔntɔɔtɛ nɑ pooku nyǝntɛ. Pɔɣɔlɑɣɑfɛɩ nɑɑnʋwɑ nyǝntɛ ntɛ́ liɣitee pǝlɛ tiŋ kɑsɑsɑŋɑ nyǝntɛ. Nɑɑnʋwɑ nyǝntɛ ntɛ́ liɣitee pǝlɛ ɑtɔntɔɔtɛ kɑsɑsɑŋɑ nyǝntɛ. Nɑɑnʋwɑ nɑ kʋlʋm nyǝntɛ ntɛ́ liɣitee pǝlɛ pooku ɑtɔntɔɔtɛ nyǝntɛ. Nɑɑnʋwɑ nɑ nɑɑlɛ nyǝntɛ ntɛ́ ɑtɔntɔɔtɛ ɑkpɑɑyɑlɑ.
21 Nɔnɔɔsɩ nsɩ sɩ nɑɑnʋwɑ nɑ nɑɑlɛ sɩɩ kɛ́ kɑcɔkɑ wontu nɑɑnʋwɑ nɑ nɑɑlɛɣɛ, pɑɑ nɔnɔɣɔ ŋkɑ nɑ kɑ kɑcɔkɑ wontuɣu. Wʋlɑ mɑɣɑmɑɣɑ pɔnɑ ɩcɑtɛ ńtɛ́ tǝ hɑpǝlɛ tǝnɑ, nɑ wʋlɑ ɩnɩ ɩ wɛɛ kɛ́ ɩsɩɩ tiŋ wɛʋ tɔ.
22 Mɑ tɑ nɑ Ɩsɔ tǝsɛɛlɛ sɔsɔɔlɛ kɛ ɩcɑtɛ ńtɛ́ tǝ tɑɑ. Mpi tɔ, Tɑcɑɑ Ɩsɔ kɑwulɑɣɑ tʋ nɑ Ɩwǝyɑɣɑ pɑɑ kɛnɑ ɩcɑtɛ ńtɛ́ tǝ Ɩsɔ tǝsɛɛlɛ sɔsɔɔlɛ.
23 Ɩcɑtɛ ńtɛ́ tǝ tɑ tɑsɑ ilim yɑɑ ɩsɔtʋ pǝ tɔm kɛ lɑpʋ sɩ pǝ́ nɑɑkɩ tǝ tɑɑ. Mpi tɔ, Ɩsɔ teeli kɑ́ nɑɑnɑ tǝ tɑɑ ɩsɩɩ kɔkɔ, nɑ Ɩwǝyɑɣɑ kɛnɑ tǝ kɔkɔ.
24 Antulinyɑ tɑɑ yǝlɑɑ kɑ́ tɔŋnɑ tǝ kɔkɔsɩ, nɑ ɑtɛ ɑwulɑɑ sɔsɑɑ kɑ́ ponɑ tǝ tɑɑ kɛ́ pɑ ɑpititu.
25 Tǝ nɔnɔɔsɩ kɑ́ tʋ́lɩ́ ḿpʋ́ɣʋ́ ilim tɑɑ kɛ́, sɩ kɑɑ tǝkɩ. Pǝ tɑɣɑ pʋlʋ, ɑhoo fɛɩ tɔtɔ sɩ ɑ tɑsǝɣɩ yuɣu.
26 Pɑɑ ponɑ tǝ tɑɑ kɛ́ piitim tǝnɑ yǝlɑɑ ɑpititu nɑ pɑ sɔsɔɔntʋ.
27 Nɑ ɑsilimɑ nyǝm nɑpǝlɩ yɑɑ yǝlɑɑ mpɑ pɑ lɑkɩ ɑcɑɑlǝtʋ nɑ pɔpɔtʋ tɔ pɑ kɑɑ sʋʋ tǝ tɑɑ. Amɑ mpɑ pɑ hǝlɑ wɛ weesuɣu tɑkǝlɑɣɑ ŋkɑ kɑ kɛ́ Ɩwǝyɑɣɑ nyǝŋkɑ tɔ kɑ tɑɑ tɔ, mpɛ pɑɑ sʋʋnɑ ɩcɑtɛ ńtɛ́ tǝ tɑɑ.