9
1 Ḿpʋ́ɣʋ́ ɩsɔtɑɑ tillu kɑkpɑsɩ nyǝŋ hʋlɑ ɩ ɑkɑntǝlɛ, ɩlɛnɑ mɑ́ nɑ́ ɩsɔtʋlʋŋɑ nɑkǝlɩ nɑ kɑ́ kpɛsǝnɑ ɩsɔtɑɑ nɑ kɑ́ hoti ɑtɛ. Tǝnɑɣɑ pɑ cɛlɑ-kɛɣɛ lumɑŋ pʋ́ʋ́ɣʋ́ sɔsɔɔʋ sɑɑfʋ.
2 Ɩsɔtʋlʋŋɑ tʋlɑ pʋ́ʋ́ɣʋ́ ŋkʋ ɩlɛnɑ nyɔɔsɩ ɩsɩɩ kɔkɔ sɔsɔɣɑ nyɔɔsɩ sʋʋ lɩɩʋ. Ḿpʋ́ɣʋ́ nyɔɔsɩ nsɩ sɩ́ kʋlɑɑ ɩlɛnɑ sɩ kʋ́ ilim nɑ sɩ́ tǝkɩ heelim.
3 Tǝnɑɣɑ kʋtoloŋ lɩɩnɑ nyɔɔsɩ nsɩ sɩ tɑɑ nɑ kʋ yɑ tɛtʋ tɔɔ, nɑ pǝ́ tʋ-kʋɣʋ pǝcɛkɑ sɔtʋ.
4 Nɑ pǝ kpɑɑlɑ-kʋ sɩ kʋ́ tɑɑ lɑ kɑwɑlɑɣɑ kɛ nyɩɩtʋ nɑ tɩɩŋ nɑ kʋnyɔnyɔm tǝnɑ. Amɑ yǝlɑɑ mpɑ pɑ tokuŋ tɑɑ fɛɩ Ɩsɔ kʋyʋsʋm tɔ pɑ tike.
5 Pǝ tɑ hɑ kʋtoloŋ kɛ mpɑɑʋ sɩ kʋ́ kʋ-wɛ. Amɑ sɩ nɑɑsʋɣʋ tike kɛ kʋ́ nɑɑsɩ-wɛɣɛ ɩsɔtʋnɑɑ kɑkpɑsɩ. Kʋ nyɑsʋɣʋ wʋsɑsɩ wɛ teitei kɛ́ ɩsɩɩ pǝcɛkɑ.
6 Yǝlɑɑ kɑ pɛɛkɩ sǝm kɛ ɩsɔtʋnɑɑ kɑkpɑsɩ ɩnɩ ɩ tɑɑ sɩ sɑnɑ sǝm. Amɑ sǝm kɑ́ polo pooluŋ.
7 Kʋtoloŋ ŋkʋ kʋ nǝɣǝsǝnɑ kɛ́ ɩsɩɩ pɑ kpɛɛlʋɣʋʋ kpɑɣɑnǝŋ sɩ ɩ́ tɛɛ yoou tɔɣɔ. Kʋ nyɔɔŋ tɔɔ kɑ wɛ kɛ́ ɩsɩɩ wʋlɑ nteniŋ kɛ kʋ temɑ, nɑ kʋ ɩsɛntɑɑ nǝɣǝsǝnɑ ɩsɩɩ yǝlɑɑ ɩsɛntɑɑ.
8 Kʋ nyɔɔsɩ tɑɣɑlɑɑ kɛ́ ɩsɩɩ ɑlɑɑ nyɔɔsɩ, nɑ kʋ kelɑ wɛ kɛ ɩsɩɩ tɔɣɔlɑɣɑ kelɑ.
9 Kʋ lɑŋɑ tɔɔ cɑɣɑ kɛ́ ɩsɩɩ nyǝɣǝtʋ toko kɛ kʋ suuwɑ. Kʋ kʋlʋɣʋʋ nɑ kʋ keŋ mɑkɩ tɔ, ye n nɩɩwɑ n tɔŋ kɛ́ sɩ kpɑɣɑnǝŋ hɔŋʋɣʋ kɛɛkɛnɑɑ pɑɣɑlɛ nɑ ɩ́ lɑkɩ kpetele kpetele sɩ ɩ́ puki yoou tɔ.
10 Kʋ susi nɑ nyǝmɑ́ kɛ́ ɩsɩɩ pǝcɛsɩ, nɑ kʋ susi nsǝɣɩ kʋ pǝsǝɣǝnɑ nɑ kʋ́ lɑ yǝlɑɑ kɛ ɩsɑɣɑtʋ kɛ ɩsɔtʋnɑɑ kɑkpɑsɩ.
11 Lumɑŋ pʋ́ʋ́ɣʋ́ sɔsɔɔʋ tɑɑ ɩsɔtɑɑ tillu ntɛ́ kʋ wulɑʋ sɔsɔ. Hepǝlɑ nyǝ́mɑ nɑ́ yɑɑ-ɩ sɩ Apɑtɔŋ, nɑ Kǝlɛɛkɩ nyǝ́mɑ sɩ Apoliyɔŋ, nɑ pǝ kʋtoluɣu ntɛ́ sɩ wɑkǝllʋ.
12 Kɑncɑɑlɑɣɑ wɑhɑlɑ tɛɛnɑ ntɛ́, pǝ kɑɑsɑ wɑhɑlɑnɑɑ nɑɑlɛ wɛɛ pɑ kɔŋ.
13 Ḿpʋ́ɣʋ́ ɩsɔtɑɑ tillu nɑɑtoso nyǝŋ hʋlɑ ɩ ɑkɑntǝlɛ. Tǝnɑɣɑ mɑ nɩɩ pǝ yɔɣɔtɑ kɔtɑɣɑ tǝlɑtɛ nte pɑ lɑpǝnɑ wʋlɑ nɑ tǝ́ wɛ Ɩsɔ ɩsɛntɑɑ tɔ tǝ ŋkuluŋɑ tɑɑ hǝŋ liɣiti kiŋ.
14 Ɩsɔtɑɑ tillu nɑɑtoso nyǝŋ wei ɩ tɔkɑ ɑkɑntǝlɛ tɔɣɔ pǝ heelɑɑ sɩ ɩ́ hɛtɩ ɩsɔtɑɑ tillɑɑ liɣiti wei pɑ tʋ ɑlukpɑlɑ kɛ pɔɣɔ sɔsɑɣɑ Ɩfǝlɑtɩ nɔɣɔ tɔ.
15 Tǝnɑɣɑ pɑ hɛtɑ ɩsɔtɑɑ tillɑɑ liɣiti ɩnɩ. Pɑɑ tɛmɑ-wɛɣɛ tɑɣɑnʋɣʋ kɛ́ nɑ pɑ́ cɑɣɑɑ sɩ ye pǝ tɑlɑ pǝnɑɣɑ nɑ ɩsɔtʋ nɑ kʋyɑkʋ nɑ wɑɑtʋ ɩnɛɣɛ teitei ɩlɛ pɑ kʋ yǝlɑɑ tintikɑ tooso tɑɑ tintiɣile kʋlʋmtǝlɛ.
16 Nɑ pɑ heelɑ-m yoolɑɑ mpɑ pɑ cɑɣɑ kpɑɣɑnǝŋ tɔ pɑ nyʋɣʋ. Pɑɑ wɛ iyisi iyɑɣɑ (1000) kɛ tɔm ŋmʋnʋɣʋ (200) kɛ.
17 Pǝ lɑpɑ-m mpʋ ɩsɩɩ toosee tɑkɑ, nɑ mɑ́ nɑ́ kpɑɣɑnǝŋ nɑ ɩ tɔɔ cɑɣɑlɑɑ nɑ pɑ́ wɛ ɩsǝnɑ mpi tɔɣɔlɔ, pɑɑ suu nyǝɣǝtʋ tokonɑɑ kɛ́ nɑ pɑ́ sɛɛwɑ ɩsɩɩ kɔkɔ, nɑ pɑ́ wɛ pooku ɩsɩɩ liɣitee pǝlɛ nɑ pɑ́ wɛ kɑsɑsɑŋɑ ɩsɩɩ ɑsimti wɛʋ tɔ. Kpɑɣɑnǝŋ nyɔɔŋ kɑ wɛɛ kɛ́ ɩsɩɩ tɔɣɔlɑsɩ nyɔɔŋ, nɑ kɔkɔ nɑ nyɔɔsɩ nɑ ɑsimti pǝ lɩɩkɑɣɑnɑ ɩ nɔɔsɩ.
18 Ḿpʋ́ɣʋ́ ɩsɑɣɑtʋ sɔsɔɔntʋ tooso ɩnɛ, kɔkɔ nɑ nyɔɔsɩ nɑ ɑsimti mpi pǝ lɩɩkɑɣɑnɑ kpɑɣɑnǝŋ nɔɔsɩ tɔ, pǝ kʋ yǝlɑɑ tintikɑ tooso tɑɑ tintiɣile kʋlʋmtǝlɛ.
19 Pǝ tɑɣɑ pʋlʋ tɔɔ, kpɑɣɑnǝŋ nɔɔsɩ tɑɑ nɑ ɩ susi tɑɑ kɛ́ ɩ ɑpɑlʋtʋ kɑ wɛɛ. Ɩ susi nǝɣǝsǝnɑ tʋmɑɑ kɛ́. Sɩ wɛnɑ nyɔɔŋ nɑ nyɔɔŋ ɩnǝɣɩ sɩ lɑkǝnɑ yǝlɑɑ kɛ ɩsɑɣɑtʋ.
20 Pɑɑ nɑ mpʋ, yǝlɑɑ mpɑ pǝ kɑɑsɑɑ tɔ, pɑ tǝnɑ mpɑ wɑhɑlɑnɑɑ sɔsɑɑ pɑnɛ pɑ tɑ kʋ tɔ, pɑ tɑ yele pɑ mɑɣɑmɑɣɑ pɑ niŋ kʋlupumnɑɑ. Pɑ tɑ yele ɑlɔɣɑɑ nɑ tɩɩŋ wei pɑ lupǝnɑ wʋlɑ nɑ nyǝɣǝlʋɣʋ kʋhʋlʋmʋɣʋ nɑ nyǝɣǝlʋɣʋ kʋsɛɛmʋɣʋ nɑ pɛɛ tɔɔ nɑ tɩɩŋ kilɑ kɛ lɑɑʋ. Pǝyele pǝ tǝnɑɣɑ mpʋ pɩɩ nɑɑ, pɩɩ nɩɩkɩ, pɩɩ tɔŋ.
21 Nɑ yǝlɑɑ mpɑ pǝ yelɑ mpʋ tɔ pɑ tɑ yele pɑ nyǝŋ ɩnɩ se ɩsɩɩ, yʋlʋkʋlɛ nɑ topotopo tǝmɑ nɑ ɑsilimɑ nɑ pɑ ŋmɩɩlǝm.