3
Pɛɛlɔ toosiɣinɑ ɩfepu
(Pɛɛlɔ nyǝntʋ)
1 Ḿpʋ́ɣʋ́ mɑ toosɑ ɑhoo sɩ
mɑ kʋsɔɔlʋ ntɛ́ mɑ pɛɛkɑ kɑto tɔɔ.
Nɑ mɑ́ pɛɛkɩ, nɑ mɑ́ pɛɛkɩ, mɑ tɑ nɑ-ɩ.
2 Ɩlɛnɑ mɑ́ kʋlɩ nɑ mɑ́ cɔɔ ɩcɑtɛ.
Nɑ mɑ́ pɛɛkɩ-ɩ nɔnɔɔsɩ tɛɛ,
nɑ hɑpɛɛ tɔɔ, mɑ tɑ nɑ-ɩ.
3 Ɩlɛnɑ mɑ́ sulinɑ tɑŋlɑɑ mpɑ pɑ cɔɔkɩ ɩcɑtɛ tɔ
nɑ mɑ́ pɔɔsɩ-wɛ sɩ:
Ɩ́ nɑwɑ mɑ kʋsɔɔlʋ nɑ?
4 Mɑ polɑɑ sɩ mɑ tɛɛkɩ pɑ tɔɔ ɩlɛ,
mɑ nɑ́ mɑ kʋsɔɔlʋ ntɛ́.
Nɑ mɑ́ kpipi-ɩ nɑ mɑ́ tɔkɩ-ɩ teu nɑ mɑ́ ponɑ-ɩ mɑ too tɛ.
Nɑ mɑ́ sʋʋnɑ-ɩ wei ɩ lʋlɑ-m tɔ ɩ nɑŋ tɑɑ.
5 Hɑɩ, Yosɑlɛm pɛɛlɑɑ mɛ,
mɑ tuukinɑ nɑmǝŋ nɑ nɑsɛŋ.
Ɩ́ tɑɑ pɑɑtɩ tɑ́ sɔɔlʋɣʋ nɑ kʋ wɑɑtʋ tɑ tɑtɑ.
(Pɛɛlɔ nyǝntʋ)
6 Pepe lɩɩnɑ wʋlɑɣɑ tɛtʋ tɑɑ nɑ pǝ́ kɔŋ
ɩsɩɩ wontu pee tulɑɑlʋ nyɔɔsɩ?
7 Wulɑʋ Sɑlʋmɔŋ ɑmɑkɑ kɔŋnɑ.
Nɑ Ɩsɛɣɛlɩ yoolɑɑ tɑɑ yoolɑɑ nɩɩtoso kɛ ɩ wɑɑlɩ.
8 Pɑ tǝnɑ pɑ kpɛlǝmɑ yoou kɛ́.
Pɑ pɑɑ lɑɣɑlɛɛ kɛ pɑ kɔŋkɔmǝŋ tɑɑ.
Nɑ pɑ́ tɑŋɑ ɑsolɑ nnɑ ɑ kɔŋ ɑhoo tɔ.
9 Lipɑŋ tɑɑsɩ kʋpɑŋsɩ kɛ pɑ sɑɑkɑ
wulɑʋ Sɑlʋmɔŋ ɑmɑkɑ ɩnɩ.
10 Liɣitee nyǝɣǝtʋ kɛ pɑ lupɑ ɩ kpɑtǝŋ,
nɑ tǝteesile kɛ wʋlɑ.
Tǝcɑɣɑlɛ kɛ pʋʋɣʋ kʋsɛɛmʋɣʋ kʋpɑŋkʋ.
Ɩlɛnɑ Yosɑlɛm pɛɛlɑɑ nɑ́ɑ́ pɔ pǝ tɑɑ kɛ́
pɔɔŋ wei pɑ sɔpǝnɑ sɔɔlʋɣʋ tɔ.
11 Siyɔŋ pɛɛlɑɑ mɛ,
ɩ́ lɩɩ nɑ ɩ́ nɑ́ wulɑʋ Sɑlʋmɔŋ ntenuɣu
ŋku ɩ too temɑ-ɩ ɩ ɑkpɑɣɑlɛ wule tɔ.
Kʋ kɛ́ ɩ lɑŋhʋlʋmlɛ sɔsɔɔlɛ kʋyɑkʋ kɛ́.