8
Ye mɑ nɑ-ŋ tɩɩ kɑɑwɑ too kʋlʋm,
mɑɑ wɑɣɑlɑɣɑ-ŋ ɑwɑlɩ kɛlɛ timpi timpi mɑ suliɣi-ŋ tɔ.
Ɩlɛ nɔɣɔlʋ tɑɑ yɩ-m.
Mɑɑ ponɑ-ŋ nɑ mɑ́ sʋsɩ-ŋ mɑ too tɛ́ nɑ ń sɛɣɛsɩ-m.
Nɑ mɑ́ yele nɑ ń nyɔɔ mɑ sʋlʋm sɔɔsʋŋ nyǝm.
Mpi pǝ kɛ́ mɑ tʋɣʋ pile nyǝm tɔ.
Te mɑ nyʋɣʋ nɑ nyɑ́ niŋ mpǝtǝŋ,
Kpɛkǝnɑ-m nɑ nyɑ́ ntɔɣɔŋ.
Hɑɩ, Yosɑlɛm pɛɛlɑɑ mɛ, mɑ tuukinɑ-mɛ.
Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.
(Pɛɛlɑɑ nyǝntʋ)
Pɛɛlɔ wei ɩ kɔŋnɑ ntɛ́ nɑ wʋlɑɣɑ tɛtʋ tɔɔ,
nɑ ɩ́ nyǝkɑ ɩ kʋsɔɔlʋ tɔɔ?
Sɔɔlʋɣʋ toŋ
(Pɛɛlɔ nyǝntʋ)
Tʋɣʋ tɛɛ kɛ́ mɑ feesɑ-ŋ.
Tǝnɑɣɑ nyɑ́ too wei ɩ lʋlɑ-ŋ tɔ ɩ kpɑɣɑ nyɑ́ hɔɣɔ.
Sɩɩ-m nyɑ́ lɑŋlɛ nɑ nyɑ́ ŋkpɑlǝŋɑ tɔɔ ɩsɩɩ kʋyʋsʋɣʋ.
Mpi tɔ, Sɔɔlʋɣʋ wɛ toŋ kɛ́ ɩsɩɩ sǝm.
Nɑ ɩsǝsɛɛmlɛ nɑ́ɑ́ wɛ tomɑ ɩsɩɩ ɑtɛtǝlɛ.
Sɔɔlʋɣʋ nyǝmɑ́ kɛ kɔkɔ nyǝnɑ kɛ́.
Kʋ kɛ́ Tɑcɑɑ kɔkɔ kɛ́.
Lʋm sɔsɔɔm ɩɩ pǝsǝɣɩ nɑ pǝ́ teesi kʋ kɔkɔ.
Pǝyele pusi sɔsɔɔnsɩ kɑɑ li-kʋ.
Ye yʋlʋ cɛlɑ ɩ tǝyɑɣɑ wɛnɑʋ tǝnɑ
sɩ ɩ lɑɣɑsǝɣǝnɑ sɔɔlʋɣʋ, ɩsɩɩ pɑ tʋʋ-ɩ.
(Pɛɛlɔ tɑɑlʋnɑɑ)
Tǝ wɛnɑ newɑɣɑ ɑlʋnyǝŋkɑ ŋkɑ kɑ tɑ lɩɩtɑ hǝlɑ tɔ.
Ɩsǝnɑɣɑ tɩɩ lɑ kʋyɑkʋ ŋku
pɑɑ yɔɣɔtɩ kɑ́ ɑsɑsɑɑlɛ tɔm tɔ?
Ye kɑ tɔkɑ kɑ tɩ nɑ kɑ́ kisi yɛlɛyɛlɛ,
tɩɩ yɔɔlǝnɑ-kɛ nɑ kɑcɔkɑ wontu.
Amɑ ye kɑ pǝsɑ ɩsɩɩ yǝlɑɑ tǝnɑ nɔnɔɣɔ,
tɩɩ tǝkɩ-kɛ nɑ kpeŋkpelɑsɩ toŋ nyǝnsɩ.
(Pɛɛlɔ nyǝntʋ)
10 Mɑ tɔkɑ mɑ tǝɣɩ, mɑ fɛɩ yɛlɛyɛlɛ tɑɑ.
Mɑ hǝlɑ sǝŋɑɑ kɛ́ ɩsɩɩ ɑkelenɑɑ.
Mpʋ tɔ, mɑ kʋsɔɔlʋ nyǝnǝɣɩ-m wei ɩ kɔŋnɑ hɛɛsʋɣʋ tɔɣɔ.
(Ɩfepu nyǝntʋ)
11 Ḿpʋ́ɣʋ́ Sɑlʋmɔŋ tɔmɑ sɩ:
Mɑ wɛnɑ tɩɩŋ wei pɑ yɑɑ sɩ lɛsɛŋ tɔ ɩ tɑɑlɛ
kɛ timpi pɑ yɑɑ sɩ Pɑɑlɩ-Hɑmɔŋ tɔɣɔ.
Mɑ yelinɑ-tɛɣɛ tɑŋlɑɑ,
pɑɑ wei ɩ kɔŋnɑ-m tǝ kʋlʋlʋm kɛ liɣitee nyǝɣǝtʋ iyɑɣɑ (1000).
12 Mɑ tɩɩŋ tɑɑlɛ wɛ mɑ kiŋ kɛ́.
Sɑlʋmɔŋ nyɑɑ kpɑɣɑ liɣitee nyǝɣǝtʋ iyɑɣɑ (1000).
Lǝsɩ tǝ tɑɑ kɛ́ nyǝɣǝtʋ ŋmʋnʋɣʋ (200) nɑ ń cɛlɑ tɑŋlɑɑ.
13 Nyɑ́ wei n wɛ hɑlǝm tɑɑ tɔ,
nyɑ́ tɑɑpɑlɑɑ kemɑ ŋkpɑŋŋ sɩ pɑ nɩɩkɩ nyɑ́ nɔɣɔ.
Ɩlɛ yele nɑ mɑ́ nɩɩ-kɛ.
14 Mɑ kʋsɔɔlʋ nyɑ́ kpɑɣɑ ɑsewɑ ɩsɩɩ nɑsɛm yɑɑ
kɑpǝlǝŋɑ kɛ tulɑɑlʋnɑɑ pʋɣʋ tɑɑ nɑ ń kɔɔ.