6
Sɑkɑlɩ toosee tɑkɑ pəlefɛɩ nyənɑ
1 Ḿpʋɣʋ pə lɑpɑ-m ɩsɩɩ toosee tɑkɑ, ɩlɛnɑ mɑ́ nɑ́ yoou kɛɛkɛnɑɑ liɣiti. Nɑ pɑ́ lɩɩkənɑ nyəɣəlʋɣʋ kʋsɛɛmʋɣʋ pɔ́ɔ́ŋ nɑɑlɛ hɛkʋ tɑɑ.
2 Kpɑɣɑnəŋ kʋsɛɛməŋ hɔŋnɑ kɑncɑɑlɑɣɑ kɛɛkɛ. Kpɑɣɑnəŋ kʋkpɛɛtəŋ kɛ kɛɛkɛ nɑɑlɛ nyəŋ.
3 Kpɑɣɑnʋhʋlʋmɑsɩ kɛ kɛɛkɛ tooso nyəŋ. Ɩlɛnɑ kpɑɣɑnəŋ wei ɩ wɛnɑ cʋntʋ tʋlʋŋɑsɩ tɔɣɔ kɛɛkɛ liɣiti nyəŋ. Kpɑɣɑnəŋ ɩnɩ ɩ tənɑ ɩ kɑ wɛnɑ toŋ kɛ́.
4 Ḿpʋɣʋ mɑ pɔɔsɑ ɩsɔtɑɑ tillu wei ɩ yɔɣɔtənɑ-m tɔ sɩ: Kpɑɣɑnəŋ nɑ ɩ kɛɛkɛnɑɑ mpɛ pɑ kʋtoluɣu suwe?
5 Ɩlɛnɑ pɛlɛ pɑ́ cɔ-m sɩ: Tɛtʋ tənɑ tʋ Tɑcɑɑ kiŋ kɛ feesiŋ liɣiti ɩnɩ ɩ lɩɩnɑɑ. Ɩlɛnɑ ɩ́ puki ɑntulinyɑ hɔɣɔləŋ tənɑ tɑɑ.
6 Ḿpʋɣʋ kpɑɣɑnʋkpɛɛtəŋ kɛɛkɛ nɑ́ məŋnɑ ilim ntɔɣɔŋ tɔɔ, kɛ́ Pɑpiloni tɛtʋ tɑɑ. Ɩlɛnɑ kpɑɣɑnʋhʋlʋmɑsɩ nɑ́ɑ́ məŋnɑ ilim tətʋlɛ tɔɔ. Nɑ cʋntʋ tʋlʋŋɑsɩ nyəŋ kɛ ilim mpətəŋ tɔɔ.
7 Ḿpʋɣʋ cʋntʋ tʋlʋŋɑsɩ nyəŋ ɩnɩ ɩ sələmɑɑ sɩ ɩ kɑ́ cɔɔ tɛtʋ. Ɩlɛnɑ Tɑcɑɑ sɩ pɑ́ cɔɔ-tɩ.
8 Ḿpʋɣʋ Tɑcɑɑ yɑɑ-m nɑ ɩ́ heeli-m sɩ: Kpɑɣɑnəŋ wei ɩ polɑ Pɑpiloni tɛtʋ tɑɑ tɔ. Ɩnɩ ɩ kɑ́ yelinɑ nɑ mɑ Feesuɣu tii hɔɣɔlʋɣʋ ŋkʋ kʋ tɑɑ.
Yesuwɑ kɑwulɑɣɑ tɔɣɔʋ
9 Ḿpʋɣʋ Tɑcɑɑ heelɑ-m sɩ:
10 Mʋ kʋcɔɔʋ kɛ mpɑ Pɑpiloni nyə́mɑ kuuwɑ tɔ pɑ kiŋ. Mpɛɣɛlɛ Hɛlətɑyi, nɑ Topiyɑ, nɑ Yetɑyɑ. Polo sɑŋɑ mɑɣɑmɑɣɑ kɛ Sefɑniyɑ pəyɑlʋ Yosiyɑ təyɑɣɑ tɑɑ. Tənɑɣɑ yəlɑɑ mpɛ pɑ wɛɛ.
11 Cɑɑ wʋlɑ nɑ liɣitee nyəɣətʋ. Ɩlɛnɑ ń lu ntenuɣu ŋku n kɑ́ te Yosɑtɑkɩ pəyɑlʋ kɔtʋlʋ sɔsɔ Yesuwɑ nyʋɣʋ tɔ.
12 Heeli-ɩ sɩ, Pə tənɑ pə tʋ Tɑcɑɑ yɔɣɔtɑɑ sɩ:
Yʋlʋ nɔɣɔlʋ wɛ cənɛ nɑ pɑ́ yɑɑ-ɩ sɩ Hoole.
Ɩ kɑ́ lɩɩ ɩ tɛtʋ tɑɑ.
Ɩnɩ ɩ kɑ́ ŋmɑnɑ Ɩsɔ təsɛɛlɛ.
13 Ɩnɩ ɩ kɑ́ tɑɣɑnənɑ-tɛɣɛ ŋmɑʋ.
Ɩ kɑ́ wɛɛnɑ kɑwulɑɣɑ kʋyʋsʋm,
ɩ kɑ́ cɑɣɑ kɑ kumte tɔɔ nɑ ɩ́ tɔɣɔ-kɛ.
Kɔtʋlʋ kɑ́ wɛɛ ɩ kɔŋkɔŋ tɑɑ,
nɑ pɑ́ nɩɩkənɑ təmɑɣɑ teu.
14 Ntenuɣu kɑ́ cɑɣɑ Ɩsɔ təsɛɛlɛ tɑɑ. Pɩɩ tɔɔsəɣɩ-wɛɣɛ Hɛlətɑyi, nɑ Topiyɑ, nɑ Yetɑyɑ, nɑ Sefɑniyɑ pəyɑlʋ pɑ kʋpɑntʋ tɔɔ.
15 Yəlɑɑ kɑ́ lɩɩnɑ pooluŋ nɑ pɑ́ kɔɔ nɑ pɑ́ sənɑ Ɩsɔ təsɛɛlɛ ŋmɑʋ. Ɩlɛ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m mə kiŋ.
Ye ɩ́ nɩɩkənɑ mə Ɩsɔ Tɑcɑɑ kɛ teu pɩɩ lɑ mpʋ.