7
Nɔhɔkʋtʋ kɛ Yosɑlɛm ncɑɑlɛ tɔɔ
1 Ḿpʋɣʋ Tɑcɑɑ heelɑ-m tɔm. Tɑliyusi kɑwulɑɣɑ pənɑɣɑ liɣiti nyəŋkɑ ɩsɔtʋ pɔɣɔlɑɣɑfɛɩ nyəŋ wei pɑ yɑɑ sɩ kisile tɔ ɩ kʋyɑkʋ liɣiti nyəŋkʋ wule kɛ ɩ heelɑ-m tɩ.
2 Petɛɛlɩ nyə́mɑ kɑ tilinɑ Sɑlesee nɑ Lekem-Mɛlɛkɩ sɩ pɑ́ kɔɔ Tɑcɑɑ wiinɑʋ kɛ ɩsɔ təsɛɛlɛ tɑɑ.
3 Ḿpʋɣʋ pɑ pɔɔsɑ kɔtəlɑɑ nɑ Ɩsɔ kʋyɔɣɔtʋtʋ tɛləsəlɑɑ sɩ: Pə́ wɛɛ sɩ, tə́ wiiki nɑ tə́ hɔkəɣɩ nɔɔsɩ, kɛ pɑɑ pənɑɣɑ ŋkɑ kɑ ɩsɔtʋ kɑkpɑsɩ nyəŋ, ɩsɩɩ too tə lɑkɑɣɑ pɩɩsɩ pɑɣɑlɛ tɑɑ tɔ?
4 Ḿpʋɣʋ Pə tənɑ pə tʋ Tɑcɑɑ tɔmɑ-m sɩ,
5 tɛləsɩ kɔtəlɑɑ nɑ tɛtʋ tɑɑ yəlɑɑ tənɑ tɔm sɩ:
Too pɩɩsɩ nɩɩtoso nɑ nɑɑnʋwɑ
kɔlɔ ɩ́ hɔkəɣɩ nɔɔsɩ,
nɑ ɩ́ wiiki pɑɑ ɩsɔtʋ kɑkpɑsɩ nyəŋ
nɑ ɩsɔtʋ nɑɑtosompɔɣɔlɑɣɑ nyəŋ wei.
Ɩlɛ pə tɑɣɑ mɑ lɑŋhʋlʋmlɛ kɛ ɩ́ cɑɑkɩ nɑ ɩ́ lɑkɩ mpʋ.
6 Hɑlɩ wɑɑtʋ wei ɩ́ tɔkɩ nɑ ɩ́ nyɔɔkɩ tɔ,
mə tɩ leleŋ kɛ ɩ́ pɛɛkəɣɩ.
7 Ɩsɔ kʋyɔɣɔtʋtʋ tɛləsəlɑɑ kɑ́ tɛmɑ Tɑcɑɑ kʋkpɑɑlətʋnɑɑ pɑnɛ pɑ nəɣəsəlɛ nɑʋ kɛ hɑtoo lɔŋtɑɑ. Wɑɑtʋ ɩnɩ ɩ tɑɑ Yosɑlɛm nɑ ɩ cɔlɔ ɑcɑlɛɛ wɛ hɛɛsʋɣʋ tɑɑ. Pəcɔ yəlɑɑ kɑ́ wɛ ilim ntɔɣɔŋ nɑ pə mpətəŋ tɛtʋ tɑɑ.
8-9 Ḿpʋɣʋ Pə tənɑ pə tʋ Tɑcɑɑ tɔɔsɑ-m nti ɩ kɑ yɔɣɔtʋɣʋ tɔ sɩ:
Ɩ́ təŋ tɑmpɑnɑ nɑ ɩ́ hʋʋkənɑ.
Ɩ́ lɑkɩ kʋpɑntʋ, ɩ́ hʋləɣɩ təmɑɣɑ suulu.
10 Ɩ́ tɑɑ muɣuli suluwɑɑ, yɑɑ leelɑɑ,
yɑɑ mʋʋlɑɑ, yɑɑ kʋnyɔntʋnɑɑ.
Ɩ́ tɑɑ mɑɣɑsɩ ɩsɑɣɑtʋ kɛ mə təmɑ tɔɔ.
11 Amɑ yəlɑɑ mɛ ɩ́ kisɑ-tɩ. Ɩ́ təkɑ mə ŋkpɑŋŋ sɩ ɩ́ tɑɑ nɩɩ.
12 Ɩ́ lɑpɑ mə nyɑmɑ kɛ kpɩɩsəŋ ɩsɩɩ pɛɛ. Ɩ́ kisɑ Pə tənɑ pə tʋ Tɑcɑɑ mɑ́ mɑ kʋsɛɣɛsətʋ. Ntəɣɩ mɑ Feesuɣu heelɑ Ɩsɔ kʋyɔɣɔtʋtʋ tɛləsəlɑɑ, nɑ pɑ́ tɛləsɩ-mɛɣɛ too lɔŋtɑɑ ɩlɛnɑ ɩ́ kisi nɩɩʋ. Ḿpʋɣʋ mɑ pɑ́ɑ́nɑ́ huunɑ-mɛ.
13 Ɩlɛnɑ mɑ tɔ sɩ:
Timpi mɑ yɑɑ-mɛ nɑ ɩ́ kisi tɔ.
Pə tɔɔ kɛ́ mə yɑɑ-m sɩ mɑ́ wɑɑsɩ-mɛ nɑ mɑɑ kisi cɔʋ.
14 Mɑɑ yɑsɩ-mɛɣɛ yəlɑɑ mpɑ ɩ́ tɑ nyɩ tɔ pɑ hɛkʋ.
Ɩ́ kɑ yele mə tɛtʋ kɛ kpɛtɛ.
Mə tɑɑ nɔɣɔlʋ ɩɩ puki,
pə́cɔ́ nɔɣɔlʋ ɩɩ kɔŋ.
Ɩ́ kʋ mə tɛtʋ nɑ mə niŋ nɑ tə́ pəsɩ tɛsəpɑɣɑ.