14
Ayare nya Etingi Etohko
1 Jo noken, eji ń lꞌbel elkoro. Gbehden, eji ń lꞌtob bel ayare nyao nya Etingi Etohko, asehngesehnge ayare nya enyehnamahr ji Esowo.
2 Tibre nne no lꞌbung, eji á ma bel ayare nya elbungu go ejahbe jindiki, á kpehme bung a ane, á kpo bung a Esowo. Tibre nnene limm, no kpo wuk ana á kpꞌbungu, eji á kpo bung alum nya li mbehr mbehr, nya Etingi Etohko m-e ka.
3 Nne no lꞌnyehn amahr, á kpo bung tong ane, lim bo, bo gbal, kak bo ebo, fere kak bo eltim.
4 Nne no lꞌbung alum ejahbe jindiki, ye kpo kak elne ebo ntahngtahng. Nne no lꞌnyehn amahr, á kpo kak aneb ero kpee ebo.
5 Kp-m koro re wahn ane kpee, wahn bung go ajahbe nyandiki. Kp-m gaka kor re, wahn ane kpee, wahn jol abanyehnamahr Esowo. Nne no lꞌnyehn amahr, ye wo ga kak ebo sehnge nne no kpo bung go ajahbe nyandiki, sehngem re nne nondiki noa, no bahke ma tooro, eji lꞌkak aneb ero kpee ebo.
6 Abonanee, n lꞌba go egahne, fere jo ba bung go ajahbe nyandiki, nnoobo anyi m bahk-n kake? Sehngem re no, m ba, ba tiing-n etib bi Esowo ma lennge ka-m, fere ka-n elkahne, fere ba nyehn amahr tong-n, fere jo tib-n.
7 Jol nsol nyi ki kpi elkpin ana efiri abola ebuk, nne tohko ma kub, á lꞌjo gbehre na gbehre, nne bahke limi renan, kehm kahne ana á kpꞌkꞌkub?
8 Nne no kpi ntang wor, jo ku ane, á tohko ma wor, á lꞌwor aji aji, nnene limm, no bahke toobo ebjing bi á bahke tahme ebta.
9 Ano wo tob li ka-n. Ń lꞌbung go ajahbe nyandiki nya ane kil elwuku, bahke limi renan, nne kehm kahne ji ń kpꞌbungu? Tibre ń kpꞌbungu na kak go elfeb.
10 Ajoobo alum nyaa gbalee go ajahbe nya njini nyia a. Ejahbe ajehng ajehng limm, ji alum ebo ki lohng ejum.
11 Nne no lꞌlohng ejahbe jimongo lꞌkehme elbungu, n tohko ma wuk ejahbe jio, n nehm wuk ji nne ejahbe noo kpꞌbungu. Ye nehm wuk ji me n kpꞌbungu.
12 Ano wo tob li ka wahnfono antahng. Ana ń kpꞌnoko re wahn bel ayare nya Etingi Etohko, gbehden, eji ń lꞌbel ayare nyao nya kpo lim aneb ero gbal.
13 Nong, nne no kpꞌbungu go ejahbe jindiki jo kak ero, eji á lꞌbel ayare nyao nya á bahke ma tooro ana lohngo no.
14 N lꞌkehme ero kak go alum ejahbe jindiki, etohko ejame ji kpo kak ero, ntir enyame kpehme kak ebo abehng abehng.
15 Anv, jen ji m bahke limi? M bahke kake ero go egame etohko, fere kak ero go egama ntir. M bahke yimi ase go egame etohko, fere yim ase go egama ntir.
16 A lꞌkak Esowo saam go ega etohko, bahke limi renan, nne noka noka no tob li ona, kehm taame re, “Emen” go ero bi a kake no, eji á ki kahn ji a bungu no?
17 Eji a jo kak ero bi a jo kak Esowo saam, afi nobo na, nne noko, ebo we a kakem nkpel anyehng anyehng.
18 N kpꞌkake Esowo saam, tib eji me n kpo bung ajahbe nyandiki sehnge wahn ane kpee.
19 N lꞌjol go ellong aneb ero, n kpo ga tir re me m bung alum alon nya ane bahke ma wuk, eji n lꞌmal tib ane, sehnge re me m bung alum ejahbe jindiki atahltahl nkpel ebal atahl awubu.
20 Abonanee, kana jo rod elnahne bum ana abonse go egahna ntir atahng. Jolen abonbili go abiafem alimi. Go egahna ntir, jolen anebkul.
21 Bo nyono go nwer Esowo re,
“Jehova re,
M bahke koko ajahmjahm, go bo anyo wo,
m bahke bungu a ane ebame.
Jol bo m-e nehm wuungu atung.”
22 Owo e bahke kahne re, ayare nya elbungu go ejahbe jindiki limm ka aneb Esowo, li ka ane ba ki li aneb Esowo, eji lꞌkper bo tib Esowo. Enyehnamahr ji Esowo ji ji li ka aneb Esowo, limm ka ane ba ki li aneb Esowo.
23 Lꞌfere jol nyi aneb ero kpee bahke bake, ba kono edi ajehng, nne awohng awohng lꞌjo bung go alum ejahbe jindiki, ane ba ki li aneb Esowo, afi ajenne lꞌba yel egahne ellong, bo nehm tir re, wahn ebgbo esahla?
24 Ane kpee lꞌfere nyehn amahr nya Esowo, nne no ki li nne Esowo, afi njenne lꞌba yel, alum nya á wuku no bahk-e kehme ellame go ege atahng, á fere nyehn elne ana nne abiafem.
25 Ntir atahng nyi wob-e go ege eltim bahk-e lennge gbuul, á bahke gboko, kohk esamahr ebe go ndi, kak Esowo, fere jo bung re, “Esowo lohko li a nahne a, go etingitingi.”
Ana fuumu re ero jol
26 Anv, abonanee, jen ji fuumu re wahn lim? Ń lꞌba, ba kono edi ajehng, no nne bel ejum. Nne noko yehke ese, nne noko tib alum Esowo, noko tiingi etib bi Esowo ma lennge ka-e, noko bung go alum ejahbe jindiki, noko jo tooro ana lohngo no. Nong, ejum ajehng ajehng jol ekakebo ka aneb ero.
27 Elbungu nio go ajahbe nyandiki, nong, jol ane abal, ane ara, noko gbo mbang, noko toono, nne awohng jo tooro.
28 Nne awohng awohng tohko jol no bahke ma tooro, nong, nne awohng awohng belle, á kꞌkpe bung, á fere jo bung go ege eltim a Esowo.
29 Go amahr anyehne, nong, ane abal, ane ara jo bung, ane bako jo wuungu atung, joare alum nyao li nseenge.
30 Nne no jehk no, Esowo lꞌka-e alum re á lennge, nong, nne no yim no kpꞌbungu rahke.
31 Wahn ane kpee ń li ma tooro enyehnamahr ji Esowo esenngesennge, eji nne awohng awohng lꞌkpili, alum nyao fere kak-e eltim.
32 Etohko jio ji abanyehnamahr Esowo kpi no wob bo go elwo.
33 Esowo kpehme lim nsol enye jokko jokko jokko. Á li Esowo bio bi elkoono.
Go ekpꞌkpa ero ajehng ajehng ji aneb Esowo lꞌsong kono,
34 nobo re, anebkal jo belle. Fuumem re bo jo bung. Tibre anebkal sang kpo fili aneblum, ana ntahm nyi Moses bungu no.
35 Ejum ajehng ajehng ji bo lꞌseb re bo kahn, nong, bo jo bahb alum ebo go etahk. Tibre li ejum ndon sehng re, nnenkal jo bung go ekpꞌkpa ero.
36 Anv, wahn ba, alum Esowo lohng go egahna? Anv, wahn ba wahng ka alum Esowo ba noa?
37 Nne awohng awohng no lꞌtir re, ye nnyehnamahr Esowo wo, afi á tongo re, á kpi etohko ji Jehova, nong, á taame re, nsol nyi n kpꞌnyono a, atahm nya Jehova nya.
38 Nne awohng awohng no lꞌjol ntahnsi a nne, nong, á sa ano.
39 Abonanee, noken, wahn jo nyehn enyehnamahr ji Esowo. Kana sahde eyaame ji elbungu go alum ajahbe nyandiki.
40 Nong, ejum ajehng ajehng jol songo songo, fere nꞌnob.