8
Egbanngalung ji nfenfe
1 A wo li ejum ji wahnge e kpo bꞌbung. Nyehnen elkohn nlimanjom no e kpi no, ye ji jehk go ejang eboblum bi eti etul ji Esowo bi nnen a nnen go ejahbetul Esowo.
2 Á kpꞌloko go edi ji sahb bꞌbar, ji li go etingitingi ebkpatahk Esowo ana ntubesi abalimajom, ebkpatahk bio bi Jehova si antahng, bi ki li nne si no.
3 Nlimajom awohng awohng bo yehk-e na re á jo ko ayare song ka Esowo, fere jo lim ajom. Owo fvfo nlimanjom ewahre bahke tob bel ejum ji á bahk-e kake.
4 Li re á li go njini, kehn á jolem jolo nlimanjom ejolojolo, eji abalimajom li na, ba kpꞌkoko ayare song ka Esowo ana atahm bungu no.
5 Ebkpatahk bi bo kpꞌlimi eltum li ana ntugare, fere li go elfoongo ni ebkpatahk bi li go ejahbetul Esowo. Ngare nyi Moses yahke si ebkpatahk bio, owo Esowo kehm-e tubu elle re, “Kunu ekpu, eji a lꞌlohko lim ejum ajehng ajehng jang jang ana n tib-a no go ewong.”
6 Anv, Kraist ebbel eltum njom alimi ni ga nob. Fvfo, egbanngalung ji ye li nkonambum, ji ji ga nob, tibre egbanngalung jia kun go enyam bi Esowo nyame no, bi ga nob.
7 Li re ngbokambang egbanngalung jolo go nseenga nseenge, kehn Esowo jolem kpe seb re á kpe lim etoono jehko.
8 Tibre Jehova nyehne re, ane ebe limm go nseenge, owo wahnge á kehm bungu re,
“Afung kpꞌbake nya m bahke tuungu lim egbanngalung ji nfenfe a abone Israel,
a etꞌtohngo ji Juda.
9 Nehm jol ana egbanngalung ji n limi a babnde ebo efung bio bi n jabbe bo go ebo,
yehke bo go ndi nyi Ijib. Eji bo tene egbanngalung ji n limi a bo, owo wahnge n ki kpe jo kpur bo. Alum nyaa Jehova wo bungu.”
10 Jehova kehm kpe bung re,
“Egbanngalung ji a, ji m bahke limi a abone Israel afung nyao lꞌsehng. M bahke kake atahm enyame go bo a ntir atahng, fere nyon go bo a ntim. M bahke jolo Esowo ebo, bo bahke jolo ane ebame.
11 Nnene limm, no bahke jo tib nne ebjing ewe,
fere jo tong mmonannyehn re, ‘Kahn Jehova!’ Tibre bo ane kpee bahk-m kahne, bomo abonse tete ba rehng ajꞌjok ane.
12 Tibre bo bahk-m fili ndon tib go bo a nsoodo.
N nehm kpe tiki buumu abiafem ebo.”
13 Eji Esowo jo bung bade egbanngalung ji nfenfe, eblohng re, yebrod ngbokambang egbanngalung bum ana nkꞌkulu ejum. Ejum ji ma kehme elkulu, ngare nyi ma gohro kul, bahke gulu eltane.