3
Atubesi ero
(Tait 1:5-9)
1 Etingitingi elbungu ni a, ni li re, nne lꞌkor-e re, á bahke jolo ntubesi ero, lohngo re á kpꞌsebe eltum ni nno a nno.
2 Ntubesi ero bahke jolo nne no ki kpi egahme. Á bahke bele nkal awohng. Á bahke jolo nne no li soom, fere jol nne no bahke jo mal elne bob. Á bahke jo lim nnoobo eljini. Á bahke jolo nne no bahke jo vvrv ajenne, fere jol nne no bahke jo mal ane tib.
3 Á nehm jol nwokamahm, á nehm jol mbibeltim a nne, á nehm jo seb nfem, á nehm jo taange ntaange, á bahke jolo nne no akpohko lꞌki-e jo kor.
4 Á bahke jo fili nlaaga enye nob nob, fere lim, eji abon ebe lꞌjo kak-e, fere jo wuk-e go mbang anyehng anyehng.
5 Eji nne kil elma fili nlaaga enye, bahke limi renan, á kehm ma fili aneb Esowo?
6 Á nehm jol nne no kpꞌna jolo nne Esowo, eji á lꞌkꞌgeere, fere li ebi ana nnehm li no.
7 Á bahke bele elgahm ni nno goji ane baka baka ba ki li aneb ero, eji nne awohng awohng lꞌki-e sono, nnehm fere laang-e tub.
Alokeltum ero
(Elt 6:1-7)
8 Alokeltum ero bahke tob jol anoobo eljini ane. Bo nehm jol aneb nliki ebal ebal. Bo nehm jol awokamahm, fere jol ane ba nsol nyi bo kpi no kil jo gbal bo.
9 Nong, etingitingi ji bo ma lennge ka bo, jol go bo a ntim, ntir atahng ebo jol saang.
10 Nong, bo tohko gbo mbang wuungu bo. Bo lꞌbel elgahm ni nno, bo kehm limi eltum nio.
11 Anebkal fvfo bahke jo tob bel eljini ni nno. Bo nehm jol ane ba kpo kiimi afahnge lake ane. Bo bahke jolo soom, fere jo lim ejum ajehng ajehng go etingitingi.
12 Alokeltum ero bahke jolo ane ba kpi nkal awohng awohng. Bo bahke jo mal fili abon ebo, a alaaga ebo.
13 Ane bao ba kpꞌmale elloko nob nob, bo bahke bele nwahrewahre edi nji, fere bel esahb ji bo bahke yiimi go mbang nyi Kraist Jisos.
Egburu nkpokosi ejum nyi e kpꞌtaame tv
14 N kpꞌbumu re, m bahke gulu elbake go ega. N kpꞌnyono nwer nyia tv-a,
15 eji afi n laange na elbake, a lꞌkahn eljini ni a bahke jo lim go ellong aneb ero ba li ero bi Esowo bi li go elkpin. Ero bio li nnahb ekahme, a ago nya etingitingi.
16 Nnene limm, no bahke ma faabe egburu nkpokosi ejum nyi e kpꞌtaame tv, nyi li re,
Esowo ba go elfoongo ni nne.
Etingi Etohko ji jo yiimi ntianse ka-e re á li eno.
Babenjel nyehn-e nyehn.
Ane ebe kpꞌbungu alum enye go ellong ane baka baka.
Ane ba ma taame tv-e baa, go njini nyia.
Nsahm Esowo rod-e tahm a ne go ejahbetul Esowo.