2
Eljini ni aneb ero
1 Wo Taitus, jo tib nsol nyi fuumu a eltibi ni nno!
2 Tong anebkul ba li aneblum re bo jo lim ejum ajehng ajehng biingi biingi, amahr ebo jo jol sange sange, bo fere jo bob elbo. Nong, bo bel ekakesehk ji nno, a elkoro ni nno, a elkpuumu ni nno.
3 Ano wo fvfo a bahke tob tong anebkal ba li anebkul re bo jo lim eljini ni ane ba li ebo ebo. Nong, bo kꞌjo jol ane ba kpo kiimi afahnge lake ane bako. Bo kꞌjo jol aju ka amahm gbalee. Nobo re bo jo tib ji kpꞌnobo,
4 fere jo ka agbahme elle re, alum ebo jo kor bo, a abon ebo fvfo,
5 fere jo tib bo, ana bo bahke jo bob elbo, fere jo jol saang, jo kuuru alaaga ebo, fere bel nnoobo eljini, fere jo woomo alum ebo go elwo, eji nne awohng awohng lꞌkꞌjo bung ebi bade alum Esowo.
6 Mbang nyꞌnehm nyi a bahke tob jo rehke ajangkun re bo jo bob elbo.
7 Wofono antahng jol ano ona go ejum ajehng ajehng, eji ane lꞌleeme nnoobo nyi a kpꞌlimi. A lꞌkehm tibi, ka jo be esamahr ane. Jo tib go mbang nyi ane bahke lohko kahn re, etib eba li etahntahn etib.
8 Jo bung alum nya nno, nya bo lꞌkꞌma jo faabe, eji lꞌriki nne no wob njahm nyehko ndon, á kꞌkpe ma bung ebꞌbi ajehng ajehng bada nahre.
9 Tong alokeltum re bo woomo babnde ebo go elwo, fere jo lim ejum ajehng ajehng ji bahke jo kor babnde ebo. Bo kꞌjo faange bo go nnyo,
10 bo kꞌjo v bo ejv. Ga nob re bo jo tib eljini ni ane ba li go etingitingi, ba kpo kuuru nsol nyi babnde ebo nob nob, eji eltibi ni Esowo ntꞌtahre ewahre lꞌbel nnooba mbing tib go ejum ajehng ajehng ji bo kpꞌlimi.
Ana nnoobo nyi Esowo ma lohng ba
11 Tibre nnoobo nyi Esowo eblohng ba re ba tahre ane kpee,
12 fere tib-r re, wahr yake eljini ni kil jo kor Esowo, a ekor nsol njini nyia, wahr fere jo jol amahr sange sange, fere jo bel etingitingi elkpin, tob jo lim nsol nyi kpo kor Esowo go njini nyia,
13 eji e kpꞌsiki efung bi Esowo ma fuulu, bi e kpꞌkunu ekpu, bi ellub ni egburu Esowo ebahre, a Jisos Kraist ntꞌtahre bahke lohngo ba,
14 ye ji yake elne ka tib go egahre esi, eji á lꞌfak-r yake go abꞌbi kpee, fere lim-r, e jol ane ba li saang ka-e, fere jo kak ekpuku go nnoobo alimi.
15 Jo tib nsol nyia, wo jo rehke ane, fere jo nyam bo go nsahm nyi n ka-a no. Nong, nne awohng awohng ki-a jo daange!