3
Ovonosiwa wa Ntthu Woorakala
1 Siikhu moote Pheeturu na Yaahaya eetta owelela nnyupa woosifwiwamo Nnyizinku wakathi woolompa wakathi mittatthu wa makaaripi.
2 Aarettiye athuuliwe ntthu aavokoliweeyo ari woorakala eettaniwaka vanlako wa nyuupa yoosifwiwamo Nnyizinku, onittheliwaaye Nlako Wooshapweya, yoori asala awaavekela zimoola atthu apale aari oviramo.
3 Amooniyeevo Pheeturu na Yaahaya aviraka nnyupa mphule, khusala awaavekela zimola.
4 Pheeturu na Yaahaya khusala amweekesa saana khulupa yoori; “Oneekese fweeyo!”
5 Mwinyi otule khusala aweekesa woophalevo awejelaka opwekherele etthu ya wenkhiwa pi yo.
6 Pheeturu khulupa yoori: “Akina feeta na tahapu, etthu kiriina ethiito kintta owinkha. Khwa nzina la Yinsa Al-Masiihu Nnazareeti, ettetta!”
7 Khunkhalela nkhono-nlume awe khusala anshashulela yoori alankhe, nasaapiru moolu na khoza zawe khwiiya za wookowa.
8 Mwinyi otule khwiirukha khweemela khwaaza weettetta. Khuvira nnyupa woosifwiwamo Nnyizinku vamote na Pheeturu na Yaahaya, eettataka na wiirukha ansifwaraka Nnyizinku.
9 Wakathi atthu ooshi amooniyeevo eettaka weettetta na ansifwaka Nnyizinku,
10 khunjuwa yoori mwinyi othuutule aari okitirakaaye wiikhala vaNlako Wooshapweya wa nyuupa yoosifwiwamo Nnyizinku khusala alola zimola. Ooshi aya khwiiya ootikinisiwa na oshanka channu wa vitthu zanrettikaneliyeeyo.
Otafusiri wa Pheeturu Nnyupa wa Nnyizinku
11 Wakathi mwinyi otule aavoniseweeyo ti Pheeturu na Yaahaya aari owaaperekhaavo. Atthu ooshi khwiiya ootikinisiwa, khusala atthirela attaaphale aarivo Pheeturu na Yaahaya, puuro yaari wiithiwaaye nlako wa Seleyimaana.
12 Ooniyeevo vitthu epile, Pheeturu khuwaaza yoori: “Meezirayeele mwaasa aya niini mwisutisiwaka pi vitthu epo? Mwaasa aya niini mweeyo mwineekesaka fweeyo nkhama etthu emweettettisiyeeyo mwinyi otu owahi wetthu ama tthakaraka yetthu?
13 Nnyizinku wa Eburahiima wa Esiyaakha na wa Yaakhumpa, Nnyizinku wa mamarehemu etthu ansifu karumeya awe Yinsa, othuutule mweeyo mwaawenkhiyeeyo atthu yoori amuule na khunkatthala vamote na Ponsiyu Pilatu, ye afilakeleliye onfukula.
14 Mweeyo mwankhana vamwantiiwa Nttakatthiifu wa shariya, khuveka yoori afukuliwe namahusuti.
15 Mweeyo khumuula mwennyewe ohaayi, ila Nnyizinku khunsisimula muufwa na fweeyo namashahiti wa vitthu zaya epo.
16 Mwaasa wa waamini nzina la Yinsa, nzina nttiittho lanvonisa mwinyi otu mwinimaanaaye na mwininjuwaaye. Amini entaaye khwa nzina la Yinsa yamwinkha ekumi y'eekhweele, nkhama etthiipo mwinoonaaye mooshi.
17 Aphano attwizaku, miiyo kajuwa yoori mwaarettiye mwihijuwaka ata na anamalokozela enu.
18 Ti nanna yaya Nnyizinku eettettisiyeezo etile aalupiyeeyo awoozaka yoori Al-Masiihu awe aari oteela ohoowa.
19 P'aapho mwithapwiye mwirutele wa Nnyizinku yoori twampi zenu ziiye zooswammihiwa.
20 Neekeselaka wakathi woovumula ontaaye wa Mbwana na Al-Masiihu aperekhiweeyo tokhiya asulani aniitthiwaaye Yinsa.
21 T'iito Yinsa ona ya wiiya pinkuuni mpakha ofiya wakathi Nnyizinku anttelaaye arutisa vitthu zooshi etthiipile Nnyizinku aari olupaazo waaza raku vakatthi wa manapiyu.
22 Munsa khulupa yoori: ‘Mbwana Nnyizinku onlawa anlanse vakatthi wa attwiize napiyu mmote nkhama miiyo; mwinsiileze zooshi anttelaaye owuuzani.
23 Otule ahininsiilezaaye napiyu aya ota antta olaziwavo vakatthi wa atthu awe.’
24 W'ookhweele manapiyu ooshi, waaza Samuweele na apale akinoko aya, alaleya vitthu zinrettikanaazo siikhu epi.
25 Mweeyo mwaanamarithi wa manapiyu na olapha Nnyizinku alaphaniyeeyo mamarehemu aya, ye aamuuziye Eburahiima yoori: ‘Mwaasa wa peewu yawo atthu ooshi a voolumwenku anttela wiiya aaparikhiyiwa.
26 Nnyizinku nansisimula karumeya awe, amperekha omwanzo eene vakatthi venu mweeyo yoori ooparikhiyeni na oolikisakani zootakhala epile mwaari orettaazo wakhula ntthu.”