7
Yinsa ontta onjampo la heema
Paata ya vitthu epile, Yinsa khusala eettetta nti wa Kalileya, maana khaari otakha wiiya Yudeya, mwaasa wa mayaahuuti aari otakha omuula. Ila njampo la heema la mayaahuuti leetta waattamela. Yinsa khuuziwa ti attwiize yoori: “Weeyo ona yoolaamo mphu olawe Yudeya yoori anakhiyoni awo awahi woona khaazi onkholaaye. Maana khina aneekesaaye ojuwiwa pi atthu awaatta ankholaaye khaazi zawe sirini. Nkhama weeyo onretta vitthu epi, othoonyeze vamwanttiwa.” Maana hatha attwiize khaari onkhupali.
Yinsa khuwooza yoori: “Wakathi aka nalelo khunafiye, ila khwa mweeyo wakhula wakathi pi woolikana. Olumwenku khunwahi wiiphiiriwa ti mweeyo, ila oniiphiiriwa ti miiyo, maana miiyo kininkha oshaahiti wa yoori khaazi zaya pi zootakhala. Mwilawe onjampo, ila miiyo akinlawa maana khunafiye wakathi aka.” Paata ya olupa mattakhuzi apale khwiikhala Kalileya ottuukhule.
10 Aphano paata ya attwiize olawa onjampo, ye khaalawiye payana, ila sirini. 11 Vanjampo aphale mayaahuuti eetta onsaya na omuuzelela araka: “Mwinyi otule ori vayi?”
12 Vakatthi wa atthu apale waarivo waapa monkoni wa ye, akina aari olupa toono: “Mwinyi wooshapweya rooho.” Akina araka: “Wala, oniwaattettekha atthu.” 13 Ila khaavo aari ottakhulaaye payana mwaasa wa owoova mayaahuuti.
Yinsa oneetta onjampo
14 Wakathi lifiiyeevo vakatthi njampo ntthile, Yinsa khweetta Nnyupa Woosifwiwamo khwaaza osomisa. 15 Amayaahuuti khwiiya ooshanka na khuuzela yoori: “Mwinyi otu ajuwa toovi kano ahisomeeni?”
16 Yinsa khuwaajipu yoori: “Osomisa waka khahiyo waka, walankha wa otule akiperekhiyeeyo. 17 Amana ntthu ajilakelela oretta matakhelo a Nluku, ontta osophela nkhama osomisa waka onlankha wa Nluku ama kinjilupa ki mweenyewe. 18 Otule anjilupaaye mweenyewe oneekesa siifwa yawe, ila otule aneekesaaye siifwa ya otule amperekhiyeeyo, oto ti wa khweele; khayiivo hatha etthu yoovonyeya vakatthi vawe. 19 Munsa awinkhani kano! Ila khina mmote wa mweeyo anshututelaaye. Khi mwineekeselani okuula?”
20 Atthu apale khujipu yoori: “Weeyo ona sheethwani! Antakhaaye owuula ti paani?”
21 Aphano Yinsa khuri: “Keetta oretta minjuza, mooshi mweeyo khwiiya wooshanka. 22 Mwaasa wa yoori Munsa awenkha okhiriya (weetta ohiiyiru woolankha wa Munsa ila walankha wa amarehemu apapazetthu), mweeyo mwinkhiriyisana saapatu. 23 Moone, nkhama athuuliwa nlume khukhiriyisiwa saapatu, yoori kano za Munsa zimariseliwe, khi mwiniphireliwani ti miiyo mwaasa wa ovonisa mwiili wooshi wa ntthu otu saapatu? 24 Mwihiphukane mwaasa woona nanna ariizo ntthu aya, ila mwisala mwiphukana khwa shariya.”
Yinsa onsomisa vanjampo
25 Atthu akina a Yeruzaleemu khusala alupa yoori: “Khahiyo mwinyi othuutu mwaari omwekesaaye yoori mwimuule? 26 Mwimoone, ye onttakhula vamwanttiwa, ila khuhisala apuwa hatha ntthu wonkheeti! Talili afwalume anjuwa saaneene yoori otu ti Al-Masiihu? 27 Ila fweeyo ninjuwa ohali alankhiyeeyo. Amana Al-Masiihu ata, khina anttelaaye ojuwa ohali alankhiyeewo.”
28 Wakathi aari osomisaaye Nnyupa Woosifwiwamo, Yinsa khuttakhula woosileyavo araka: “Aaa, mweeyo mwakijuwa na mwinjuwa ohali kilankhiyeewo. Miiyo akiri apha khwa matakhelo aka, ila otule akiperekhiyeeyo ti eeyiye khweele. Otule mweeyo mwihininjuwaaye, 29 ila miiyo kininjuwa maana kata khwa ye na ti akiperekhiyeeyo.”
30 Aphano khusala atakha onkhola, ila khuhiivo mmote ansapiyeeyo maana wakathi waari ohinafiye. 31 Atthu enkeene aari aphale khumkhupali na khusala alupa yoori: “Amana Al-Masiihu ata, onteela oretta alama zootikinisa zayita epi arettiyeeyo mwinyi otu? Wala!”
Anamweekesela arumiweeyo yoori ankhole Yinsa
32 Mafwarizeewu noowasiila atthu aapaka monkoni wa Yinsa, aphano mahaakhimu a tiini na mafwarizeewu khuwaaruma anamweekesela a Nnyupa Yoosifwiwamo yoori ankhole. 33 Yinsa khuwooza yoori: “Kiri vamote na mweeyo wakathi vattitthiiru nawiisha kinlawa wa otule akiperekhiyeeyo. 34 Mweeyo mwinlawa mwakeekese, ila mwihikipatthe; maana mweeyo khamwinwahi ofiya okhu kinttelaaye wiiyawo.” 35 Mayaahuuti khusala oozelana atthaaporu yoori: “Ontta vayi mwinyi aya otu nihinttelaaye onsikana? Talili onttela wiikhala na mayaahuuti apale anikhalaaye malaponi, ama onttela owaasomisa akereeku? 36 Maana aya niini, a eto aalupiyeeyo yoori: ‘Mweeyo mwinlawa mwakeekese ila mwihikipatthe,’ maana ‘mweeyo khamwinwahi ofiya okhu kinttelaaye wiiyawo?”
Nlipu wa maati ohaayi
37 Siikhu ya mwiisho, siikhu khuulu ya njampo, Yinsa khulankha khweemela khukhuwelela araka: “Nkhama owaapho linkholiyeeyo nnyottha, akiteele miiyo anywe. 38 Maana otule anikikhupalaaye miiyo, nkhama enlupaazo zawaatikhiwa ttakatthiifu; ‘nkatthi mwawe zinttela wiittikhamu nyuuttho za maati ohaayi.” 39 Ye aari olupa monkoni wa Rooho Ttakatthiifu etile aari oteelaaye winkhiwa apale akhupaliyeeyo. Maana nalelo Yinsa aari ahinasifwiwe.
Waawanyeya wa atthu
40 Aphano noosiila atthu apale athukumaniyeeyo aphale khuri: “Otu ti Napiyu weekhweele!” 41 Akina khusala alupa yoori: “Ye ti Al-Masiihu!” Akina khusala oozelana yoori: “Al-Masiihu onttela olankha Kalileya? 42 Zawaatikhiwa ttakatthiifu zinlupa yoori Al-Masiihu onttela olankha khwa peewu ya Daawuuda nti wa Belemu, okhu aari wiikhalaawo Daawuuda.” 43 Mwaasa wa ye khupuwa waawanyeya khwa atthu apale. 44 Akina khusala atakha onkhola Yinsa, ila khuhiivo hatha ntthu ansapiyeeyo.
Anamalokozela amayaahuuti aninkatthala Yinsa
45 Anamweekesela khulawa wa mahaakhimu a tiini na mafwarizeewu, atthaapo oozeliyeeyo yoori: “Mwaasa aya niini mwihintisaka?” 46 Yo khujipu yoori: “Khina anattakhule nkhama mwinyi oto anttakhulaazo.” 47 Mafwarizeewu khuuzela yoori: “Niri talili na mweeyo mweetta ohatiwa? 48 Awaapho afwalume ama mafwarizeewu ankhupaliyeeyo? 49 Ila atthu apo ahinjuwaaye hatha etthu ya kano alaanikha.” 50 Mmote wa atthaapale aari wiitthiwaaye Nikoteemu, otule swaafu moote alawiyeeyo okutthanana Yinsa, khuuzela yoori: 51 “Kano zeetthu khazininhukhumu ntthu, ahaazeeni khapula osiiliwa khujuwiwa etthu arettiyeeyo, khahi etthiipo?” 52 Yo khujipu yoori: “Na weeyo wa Kalileya? Woone na ontta ojuwa yoori Kalileya khampuwawo hatha napiyu.” 53 Aphano wakhula mmote khulankha khusala alawa owawe.