4
Ozayiniwa wa Yinsa ti Sheethwani
1 Yinsa aarutiye omuttho Yorotaani ari wa wiitaala Rooho Ttakatthiifu, aalokoziwe ti Rooho Ttakatthiifu ethiito mpakha makuluttu.
2 Nttumpho khuzayiniwa ti Sheethwani siikhu arupayiini. Siikhu zaya epile khaari oja etthu, nawiisha khunkhola jala.
3 Sheethwani khumuuza yoori: “Nkhama o mwaana wa Nnyizinku orume liwe nttho lithatuwe liiye phaawu.”
4 Ila Yinsa khunjipu araka: “Yaatikhiwa nkithaapu yoori: ‘Khahiyo phaawu paasi enimwinkhaaye ohaayi pinaatamu’.”
5 Sheethwani khunweza vatulu, nasaapiru khunnoza ofwalume wooshi w'oolumwenku.
6 Khumuuza yoori: “Kintta owinkha ofwalume na siifwa z'oolumwenku opu wooshi, mwaasa yoori zooshi kenkhiwa miiyo, na miiyo kinimwinkha otule kinintakhelaaye.
7 Amana okikokhorela miiyo na khukaaputu, zooshi zintta wiiya zaawo.”
8 Yinsa khunjipu yoori: “Nttakhuzi la Nnyizinku lalupa yoori: ‘Omwaaputu Mbwanaawo Nnyizinku na onrumeyele othuuto paasi.’ ”
9 Aphano Sheethwani khunlawana Yeruzaleemu khunweza vatulu woolepavo wa Nyuupa ya Nnyizinku khumuuza yoori: “Nkhama o mwaana wa Nnyizinku ojeeselele vathi aphale,
10 maana yaatikhiwa nkithaapu yoori:
‘Ye ontta oruma malayikha awe awiinanele.
11 Atthaapo antta wuukholelela na makhono aya
yoori ohikwakwanttuwe valiwe.’ ”
12 Yinsa khunjipu yoori: “Nttakhuzi la Nnyizinku lalupa yoori: ‘Ohimweeze Mbwana Nnyizinku awo.’ ”
13 Sheethwani nawiisha onzayini wooshi, khumwaattuwa khusala awejela wakathi wonkhweyela.
Yinsa onaaza khaazi yawe nti wa Kalileya
14 Aphano Yinsa khurutela Kalileya, owahi wa Rooho Ttakatthiifu ori vamote na-ye. Hapari zaari olupaaye monkoni wa ye khumwazeyela miti zooshi za nkerekhere.
15 Aari osomisa mmanyupa woosifwiwamo Nnyizinku, atthu ooshi khusala anttottopela.
16 Khulawa mpakha sitati ya Nazareeti ohali aleliweewo. Siikhu ya saapatu khweetta nnyupa woosifwiwamo Nnyizinku nkhama etthiipo aazowereliyeezo. Khulankha yoori asome.
17 Khwinkhiwa kithaapu ya napiyu Ezaaya. Khufunula khusala athola khusikana vahali yaatikhiweevo yoori:
18 “Rooho ya Mbwana
eri vamote na-miyo,
akithawaza yoori kiwaatafusirele
hapari zooshapweya asikhini
na olaleya otaphuliwa wa anamahuzunikha,
owoonisa apale oohooni,
owaavumulisa apale oohukhumwiwa,
19 na olaleya yoori wafiya
mwaakha wa rehema ya Mbwana.”
20 Yinsa khufinikha kithaapu etile khumwinkha karumeya wa nnyupa woosifwiwamo Nnyizinku, Ye khwiikhala. Atthu ooshi apale aariimo khusala amweekesa.
21 Ye khuwooza yoori: “Leelo zarettikhana epile zaatikhiweeyo, etthiipi mwinttaaye wiisharu osiila.”
22 Atthu ooshi khusala anttottopela, na khwiiya ootikinisiwa mwaasa wa mattakhuzi a rehema aari olankhaaye nkhanyo mwawe, khusala oozelana yoori: “Khahi mwaana wa Yuusufu otu?”
23 Yinsa khuwooza yoori: “Khweele khweele mweeyo mwinlawa mwakuuze kittaphi mmote enraaye toono: ‘Tothoro ojivonise omweenyewe! Orette mmuti mwawo mphu minjuza nisiiliyeeyo epile orettiyeezo Kafwaranawu.’ ”
24 Khulupa theenya yoori: “Wookhweele kiniwuuzani yoori khaavo napiyu mmote ankhupaliwaaye mmuti mwawe.
25 Na weekhwele wakathi wa napiyu Aliyaasi, Ezirayeele aariwo aakha oofweliwa pi amanna zaya wakathi yaafukiweevo pinku nyaakha mittatthu na nyeezi sitha, yaapuwiye jala miti zooshi.
26 Ila Nnyizinku khuhinrumi Aliyaasi Ezirayeele, okhule aari wiikhalaawo apale aya, khunruma Sarefathi tuniya ya Sitooni aariiwo muukha mmote woofweliwa ti mannawe.
27 Siikhu za napiyu Elizeewu, Ezirayeele aariwo anamakuttula a waatta, khuhiivo hatha mmote aavonisiweeyo ila Naamani wa nti wa Siiriya ti ye aavonisiweeyo otthwe.”
28 Atthu ooshi aari nnyupa woosifwiwamo Nnyizinku, n'oosiila mattakhuzi apale aari olupaaye Yinsa yo khwiiphiiriwa.
29 Khwiikariwamo nsitati mphule khulawaniwa vamwaako yaajekiweevo sitati yaya etile, yoori ansukhumele vathi.
30 Ila Yinsa khuvira vakatthi vaya khusala alawa.
Yinsa onimwiikara sheethwani
31 Paata ya toole Yinsa khwiishukhela sitati ya Kafwaranawu, nti wa Kalileya, khusala awaanozela siikhu ya saapatu.
32 Yo aari ooshankisiwa na onozela wawe, mwaasa yoori nttakhuzi lawe laarina ofwalume.
33 Nnyupa woosifwiwamo Nnyizinku aarimo ntthu mmote aariina sheethwani. Aphano sheethwani khunyakula na kuvu zawe zooshi araka:
34 “Eeee! Onnitakhela-ni weeyo Yinsa wa Nazareeti? Wateela onankameza? Miiyo kinuujuwa weeyo yoori o Ttakatthiifu wa Nnyizinku!”
35 Yinsa ansukisiye sheethwani araka: “Nyamala, mwaattuwe ntthu oto!” Attaaphale sheethwani khunkwisela vathi ntthu otule atthu eettaka omoona, khuhinvulalisi khumwaattuwa.
36 Atthu ooshi aari ooshankisiwa, khusala oozana atthaaporu: “Nttakhuzi-ni ntthi? Khwa ofwalume na owahi wawe otu onruma masheethwani khusaruwa!”
37 Aphano siifwa ya Yinsa yaamwazeyeliye miti zooshi za nkerekhere.
Yinsa ona owahi vatulu wa masheethwani na marati
38 Yinsa khusaruwamo nnyupa woosifwiwamo Nnyizinku khweetta owawe Simawu. Nkhwewe Simawu aari nlwele hooma, yo khunvekelaza Yinsa yoori anvonise.
39 Ye khwiinama khwiikara hooma etile khunlikha, nasaapiru nunu otule khulankha khusala awaarumeyela.
40 Njuwa litupweelaka atthu ooshi apale aariina marati khusala atiiseliwa Yinsa, Ye n'oowaattheela makhono n'oowaavonisa.
41 Theenya aarivo atthu a waatta aari owaasaruwaaye masheethwani anyakulaka araka: “Weeyo o mwaana wa Nnyizinku!” Yinsa khusala amaruwa alikhisaka masheethwani apale ottakhula, maana yo aari ojuwa yoori ye ti Al-Masiihu.
Yinsa onlaleya hapari zooshapweya
42 N'oocha Yinsa khulankha khusala alawa mmakuluttu. Atthu a waatta khusala amweekesa, n'onsikana khuhisala atakha onlikha olawa.
43 Ye khuwooza yoori: “Enhithajiya theenya miiyo olawa sitati kiina olaleya hapari zoofwalume wa Nnyizinku, kaperekheliwa etthiipo.”
44 Ye aari otafusiri mmanyupa woosifwiwamo Nnyizinku a Yudeya.