2 Reye 24:8–25:12
24
Babiloniarãba Juda druad̶ebemarã poyaped̶ad̶a
8 Joaquiʌ̃ 18 poa b̶asid̶e Juda druad̶ebema boroda b̶esia. Jed̶eco ũbea Juda druad̶ebemarãra pe erob̶asia. Idjira Jerusaleʌ̃ne b̶abadjia. Idji papara Jerusaleʌ̃nebema Elnataʌ̃ cau Nehusta basía.
9 Joaquiʌ̃ba Ãcõrẽ quĩrãpita cadjiruada o b̶abadjia idji zeza b̶asiba o b̶ad̶a quĩrãca.
10 Maʌ̃ ewarid̶e Babilonianebema boro Nabucodonosó sordaorãda Jerusaleʌ̃nebemarã ume djõne wãnaped̶a purura aud̶u jũrã eropanesid̶aa.
11 Mãwã aud̶u jũrã eropanʌne Nabucodonosóra jũẽsia.
12 Maʌ̃ne Juda druad̶ebema boro Joaquiʌ̃ba, dji papaba, idjiare b̶eaba, idji sordao bororãba, dji dromarã bid̶a jarasid̶aa Nabucodonosó jʌwaed̶a panenida. Nabucodonosó ocho poa idji druad̶ebema boroda b̶ed̶acarea Juda druad̶ebema boro Joaquiʌ̃ra preso jidasia.
13 Maʌ̃be Ãcõrẽba jarad̶a quĩrãca Nabucodonosóba ne bia qued̶ea Ãcõrẽ de dromane b̶ead̶ada jũma pe edesia. Ne bia qued̶ea Juda druad̶ebema boro de dromane b̶ead̶a sid̶a jũma pe edesia. Idjab̶a Israeld̶ebema boro Salomoʌ̃ba Ãcõrẽ de dromane oro ocuad̶a sid̶a toapecuaped̶a pe edesia.
14 Maʌ̃ awara Nabucodonosóba Jerusaleʌ̃nebemarãda idji druad̶aa jida edesia: dji dromarãda, sordaorãda, ne o cawa b̶eada, jiorroba ne o cawa b̶ea sid̶a. Jũma ãbaa die mil jida edesia. Ab̶abe dji ne neẽ́ qued̶eadrʌ Juda druad̶e panesid̶aa.
15 Nabucodonosóba Juda druad̶ebema boro Joaquiʌ̃da, idji papada, idji quimarãda, idjiare b̶eada, dji dromarã sid̶a Babilonianaa jida edesia.
16 Sordaorãda siete mil, ne o cawa b̶eada idjab̶a jiorroba ne o cawa b̶eada mil jida edesia. Dji mẽsrã b̶eara Babilonianaa jũma jida edesia.
17 Maʌ̃be Nabucodonosóba Joaquiʌ̃ djabadrõã Mataníada Juda druad̶ebema boroda b̶ʌsia. Maʌ̃ Mataníara trʌ̃ b̶ʌsia Sedequía.
18 Sedequía 21 poa b̶asid̶e Juda druad̶ebema boroda b̶esia. Idjira Jerusaleʌ̃ne b̶abadjia. Once poa Judad̶ebemarãda pe erob̶asia. Idji papara Libna purud̶ebema Jeremia cau Hamutal basía.
19 Sedequíaba Ãcõrẽ quĩrãpita cadjiruada o b̶abadjia idji djaba Joaciʌ̃ba o b̶ad̶a quĩrãca.
20 Maʌ̃ carea Ãcõrẽra Jerusaleʌ̃nebemarã ume idjab̶a Juda druad̶ebemarã ume bio quĩrũsia. Maʌ̃ bẽrã ãdjirãra idji quĩrãpitabemada ãyã jʌretasia.
Nabucodonosóba Jerusaleʌ̃ babued̶a
Maʌ̃ ewarid̶e Sedequíaba Babilonia druad̶ebema borora igarasia.