Enga Nutesamene Baipolo APOSELE 9

Jisasame Solonya mona kapilyakamaiyamo doko

(Ap 22:6-16; 26:12-18)

1-2 Dokopa** Kamongo lao masoo miniamino endakali dupa Solome pyao kumasotona lao tomba nao katea-pyaa. Dopa petala baame pitisa mupa doko kateamo dokonya pupala baa lamaiyoo, “Embame Jutamanya limbingi taono Damasakosa kalyamino dupame kandena pepa mende pyao dii,” lea-pyaa. Dopa leamopa pepa pyao maiyamo dokonya dapa latae katea-pyaa: Jisasanya pii manapi dupa watao payatami enda tamopi akali tamopi mende Solome kutao kandatamo kandao doko, baame anjoo soo Jetusaleme epena lao pyatae katea-pyaa.

3 Baa pao Damasakosa tengesa joo pyakameamopa kaitinya tii pipae mendeme yapa ipao baa-kisa tii piyoko lea-pyaa. 4 Dopa piamopa baa lombapae sia-pyaa. Soo pituu siamopa pii mende leamo dokome, “Solo, Solo, embame aipuma namba watao pilipi?” lea-pyaa. 5-6 Dopa* leamopa Solome, “Kamongo, emba apipi?” lao pisia-pyaa. Dokopa baame lao pituu, “Namba Jisasa embame watao pyao kalyeno dokona, emba sakatatala yuu taono dokonya puu. Dokonya patenopa akali mendeme embame kalai pipenge doko langitana,” Jisasame dopa lea-pyaa. 7 Awapa* peamino akali dupa mee katapala pii mende naleami-pyaa. Dupame pii leamo doko siaminoaka doko, angi doko nakandeami-pyaa. 8 Solo lombapae siamo doko sakatatala lenge tao mende kandapenge nanjiamosa dokaitame baa kii minao Damasakosa peami-pyaa. 9 Baa kote tepo lenge iminjetae kateamopa neepi endakipi mende nanea-pyaa.

10 Jisasa* masoo miningi akali Ananayasa lenge mende Damasakosa yuu dokonya katea-pyaa. Akali dokome lee manimanimi joo siamopa Kamongome, “Ananayasa,” lea-pyaa. Ananayasame, “Kamongo, namba kalyona kanda,” lea-pyaa. 11 Kamongo* dokome baa dee lamaiyoo, “Emba sakatatala kaitini kenge Tolatae lenge dokonya pupala pituu Jutasanya andaka kolandatala taono Tasasa tange akali Solo lenge doko baa loma soo pilyamona kutao kandape. 12 Dee* baame lee manimanimi kandapumopa baanya lenge dolapo auu pina lao akali Ananayasa lenge mendeme pupala kingi setapyana,” Kamongo dokome dopa lea-pyaa. 13 Ananayasame* pii doko yanu pyao, “Kamongo, akali dokome embanya endakali Jetusaleme katenge dupa-kisa mana koo longo miniana lao endakali longome leamino nambame sio. 14 Indupa akali dokome pitisa mupa dupa-kisa pepa nyepala emba lao loma singi endakali dupa pitaka anjalanya epelyamona,” lea-pyaa. 15-16 Kamongo* dokome baa lamaiyoo, “Akali doko nambanya yapao nyepae nambanya kalai pyakata. Baame endakali tata waka dupanyapi, kiŋi dupanyapi, Isataele tata dupanyapi nambanya kenge doko soo pakata. Baame nambanya kenge doko panasalanya tanda andake nyetamo dupa nambame baa laitaka pituna, embame lamaiya puu,” Kamongo dokome dopa lea-pyaa. 17 Dopa* leamopa Ananayasa baa pao anda dokonya kolandatala baanya kingi Solo-kisa setea-pyaa. Setapala lao pituu, “Kaimia Solo, emba kaita epeeno ongonya Kamongo Jisasa emba-kisa epeamo kandeeno dokome embanya lenge dee auu pisetakala Oli Sipitisa doko tumbasakalanya namba angenya ipu lalamona,” lea-pyaa. 18 Dopa leamopa baanya lenge dolaponya kanopato kombangele mendapua siamo dupa lee mendai taka lala peamopa baa dee lenge tea-pyaa. Lenge tapala sakatao katapeamopa baanya kaimbu pyakamaiya-pyaa. 19 Baa nee nao pupu latala Damasakosa yuu dokonya masoo miningi endakali dupa-pipa awapa kote mendatupa kateami-pyaa.

Solome Damasakosa dokonya Jisasanya lao pii lamaiyamo doko

20 Dokopa* baame Jutamanya losuu anda dupanya yapa pupala Jisasa baa Gote Ikiningi doko lamona lao pii lamaiya-pyaa. 21 Endakali* pitakame pii lamaiyamo dupa soo mona andapala lao pituu, “Wamba Jetusaleme katao Jisasa lao loma singi endakali dupa minao koyasiamo akali doko doko taa aipape? Indupa endakali dupa anjetala pitisa mupa dupa-kisa laminao patona lao lao angenya epeamo akali dokoaka taa aipape?” leami-pyaa. 22 Solome* pupu lapae tumbi lao nyepala Jisasa baa Kataisa dokona lao lamaiyokondape piamo dokome Juta endakali Damasakosa kateamino dupanya pii doko angi nanjia-pyaa.

Solo Paka Peamo doko

23 Kote** longo pateamopa Juta dupame baa pyao kumasemana lao pii wasiami-pyaa. 24 Pii wasiamino doko Solome sia-pyaa. Dokaitame baa pyamana lao yuu taono dokonya lome kambu dupanya mendenya epelyape lao kuka kotakapi isoo kateami-pyaa. 25 Isoo* kateaminoaka doko, kuka mendenya Solonya pii singi endakali dupame tatali mandi mendenya baa mandipala mandyuu kana kame dokonya kamalyatena pyandemi-pyaa.

Solo Jetusaleme kateamo doko

26 Solo* baa Jetusaleme dokonya pupala, masoo miningi endakali dupa-pipa awapa katamana lao masiamopa dokaita pitakame baame masoo minala naengena lao masetala paka kayami-pyaa. 27 Dokopa* Banapasame Solo lanyepala laminao aposele dupa kateamino dokonya pea-pyaa. Pupala Solome Kamongo doko kaitinisa kandeamo dokopi, Kamongome baa pii lamaiyamo dokopi, Damasakosa katao Solome Jisasanya kenge doko lao pii pupu lao leamo dokopi dutupa baame dokaita lamaiya-pyaa. 28 Lamaitiamopa* aposele dupa-pipa Solo awapa Jetusaleme yuu dokonya pata ipata pyoo kateami-pyaa. Kamongonya kenge doko lao baame paka nakayao pii panao lamaiyoo katea-pyaa. 29 Baame Juta endakali Gitiki pii lenge dupa pii lamaiyoo dupa-pipa pii yanda pyoloo pyoo kateamopa dupame baa pyamana lao makande pyoo kateami-pyaa. 30 Pyalanya* piamino doko kandatala masoo miningi kaiminingi dupame baa Sisatia yuu taono dokonya laminao lanatala Tasasa yuu taono ongonya pena leami-pyaa.

31 Dokopa* sosa Jutiapi, Galiliapi, Samatiapi yuu dupanya kenda pipaepi mende naipao epe yuu yongea-pyaa. Ongopa sosanya endakali dupame pupu lapae epe nyoo katao Kamongo lao paka kayao payami-pyaa. Oli Sipitisa dokome endakali mendapua nisetala sosa dokonya nyoo konda peta peta pia-pyaa.

Ainiasa auu pisiamo doko

32 Pita baame Jutamanya yuu doko pitakanya kandama-kandama pao Lita yuu taono dokonya pyakanatala Gotenya endakali kateamino dupa kandea-pyaa. 33 Yuu dokonya baame akali Ainiasa lenge mende kandea-pyaa. Akali doko papa tambotae ee kana tukulapo tokonyaka paliuu singi-pyaa. 34 Pitame baa lamaiyoo, “Ainiasa, emba Jisasa Kataisame auu pisilyamo. Emba sakatatala embanya palenge toko doko lakao yaki pii,” lea-pyaa. Dopa lalu piamopa baa sakatea-pyaa. 35 Lita* tangepi Setone tangepi dupa pitakame akali doko kandeami-pyaa. Kandatala Kamongo lao mona kapilyetala masoo miniami-pyaa.

Pitame enda Tapita sakatasiamo doko

36 Jopa* yuu taono dokonya masoo miningi enda Tapita lenge mende petea-pyaa. Gitiki pii lengeli pyoo baa kenge Dokasa lengema-pyaa. Baa-kisa mana epeme tumbilyamopa baame endakali daa jingi dupa oapi maiyoo petenge-pyaa. 37 Yuu* mende baa yaina nyepala kumia-pyaa. Endakali dupame baa wasawasa pyapala anda namba pyoo petae palo kisa mendenya seteami-pyaa. 38 Jopa yuu doko Lita yuu dokonya tengesale joo siamosa masoo miningi endakali dupame Pita baa Lita yuu dokonya kalyamo lapae sepala akali lapomame Pita pii kyoto joo lamaiya pena lao lao pituu, “ ‘Embame malisala nayao naimanya yuu dakenya yapa ipupi,’ lena,” leami-pyaa. 39 Pita sakatatala dolapo-pipa awapa peami-pyaa. Pao yuu dokonya pyakaneaminopa dupame baa nyakamanya anda namba pyoo petae palo kisa dokonya laminao kolandeami-pyaa. Dokopa enda walyakae pitakame ee lao pituu lapalapapi kolosapi dupa enda Dokasa lenge dokome nyakama-pipa pituu wasakamaiyamo dupa Pita kandena lao minao malandao kakopeami-pyaa. 40 Kakopeaminopa* Pitame dupa pitaka kamaka pena latala lumame pitipala loma sia-pyaa. Loma setala kapilyetala enda kumapae siamo doko lamaiyoo, “Tapita, emba sakata,” lea-pyaa. Dopa leamopa enda doko lenge tea-pyaa. Baame Pita kandatala sakatao petea-pyaa. 41 Pitame* kinginya minao toya katasetala Gotenya endakali dupapi enda walyakae dupapi dupa epena latala enda sakateamo doko dupame kandena lao laitaka pia-pyaa. 42 Pitame* piamo doko Jopa tange endakali pitakame sepala dupanya longo dupame Kamongo lao masoo miniami-pyaa. 43 Pita* Jopa yuu dokonya gii longo katao mena tata dupanya yanonge tapalyepae wasingi akali Saimone lenge doko-pipa awapa kateambi-pyaa.

* 9:1-2 Ap 8:3; Ga 1:13 * 9:1-2 Ap 9:21; 18:25; 19:9,23; 22:4; 24:14,22; 2 Pi 2:2 * 9:5-6 Mt 25:40; Ap 5:39; 1 Ko 8:12; 15:8 * 9:7 Dan 10:7 * 9:10 Jen 22:1; Ap 10:3 * 9:11 Ap 21:39 * 9:12 Ap 9:17; 28:8; 1 Ti 4:14 * 9:13 Ap 8:3; 9:41-42; 26:10; Lo 1:7; 12:13; 1 Ko 1:2; 6:2; 2 Ko 1:1 * 9:15-16 Mt 10:22; Ap 15:26; 21:13; 22:21; 25:13; 27:24; Lo 1:5; 1 Ko 4:9-13; 9:16-17; 2 Ko 11:23-28 * 9:17 Ap 22:14; 26:16; 1 Ko 9:1; 15:8 * 9:20 Ap 13:33; Ga 1:16-17 * 9:21 Ap 8:3 * 9:22 Ap 2:36; 9:2; 18:5,28 * 9:23 Ap 23:12 * 9:23 2 Ko 11:32-33 * 9:25 Jas 2:15 * 9:26 Ap 22:17; Ga 1:17-19 * 9:27 Ap 4:36-37; 9:4,20; 1 Ko 9:1; 15:8 * 9:28 Ap 13:46 * 9:30 Ap 11:25; Ga 1:21 * 9:31 Ap 2:47; 20:32; 1 Ko 8:1 * 9:35 Ap 19:17 * 9:36 Lu 12:33 * 9:37 1 Kiŋ 17:19 * 9:40 Mk 5:40-41; Lu 7:15 * 9:41 Ap 3:7; 20:10 * 9:42 Ap 19:17 * 9:43 Lu 9:4; Ap 10:6