☰ 1 KOTINA 4
4
Kataisanya kalai pyakamaingi akalina leamo doko
1 Nyakamame* naima kandao Kataisanya kalai pyakamaingi akalipi dee Goteme yalo pyoo masoo kateamo dupa isakamaingi akalipina lao masalapape. 2 Isakamaingi akali dupanya kalai mupa doko, dupanya akali andake dokome latamoli pyoo pipenge. 3 Dopaka doko, nyakamame tamopi endakali kambu mendeme tamopi namba yapatamino kandao doko, nambame angi mende daana lao masilyo. Nambame namba tange yapala naenge. 4 Nambame* koo pio mende masala naelyo. Dopaka doko, masala naelyo dokome namba-kisa koo tenge mende nasilyamona lao laitaka napingi. Kamongo dokome namba yapenge. 5 Dopana,* pipenge gii doko ipatala nayatamopa wambao nyakamame endakali mende yapala naenya, Kamongo ipatamo gii doko malisalapape. Baame iminjetaenya yalo petae singi dupa tii pingi dokonya setata. Dee endakali dupame pitoo lao moname yalo pyoo masingi dupa panasetaka. Dokopa Goteme endakali dupa pitaka wakale wakale tama pipenge jetali pyoo tama pita.
6 Kaimia* paluma, nyakama nisalanya nambame pii lelyo dutupa Apolosa nalimba makande pyoo lelyo. Nambame dopa lelyo doko, nyakamanya mendaipi mendeme pii pepa pyapae silyamo dupa yalatala pao endakali mende tungi pyao mende kilya kandao napyanya mana nyalapale lao lelyo. 7 Doko,* nyakamame endakali waka dupa ita minao kalyaminona lao apimi masilyape? Nyakama-kisa silyamo dupa pitaka Goteme nandiape? Goteme dupa nyakama dia tamo kandao doko, aipuma baame nandiamopa nyakama tangeme nyiami joo nyakama tange lalyoo kalyamipi? 8 Indupa* nyakama yaka jetelyamona lao masilyamino. Nyakama etete kamongotelyamanona lao masilyamino. Nyakamame naima nyoo ana pyandatala kiŋi joo dupa pitaka isoo katapelyamanona lao masilyaminoaka. Kanau! Kini nyakama kiŋi joo katapimili kandao doko, naima apata nyakama-pipa kiŋi joo katamana lao auu kayapuli.
9 Goteme** naima aposele dupa etete maita-kaita katenge akali injisetae kalyamanona lao nambame masilyo. Doko, naima pyalanya moko nyepae joo katao yuu kaitipi pyoo enjelepi endakalipi dupame kandena lao laitaka petae joo kalyamano. 10 Kataisa* minao payapumanosa naima kyakao kalyaminona lelyaminoaka doko, nyakamame nyakama Kataisa-kisa katao mona paliuu kalyamanona lao masilyamino. Naima akali tambo lapaena lelyaminoaka doko, nyakamame nyakama akali pupu lapaena lao masilyamino. Naima kenge nasingina lelyaminoaka doko, nyakamame nyakama kenge singina lao masilyamino. 11 Wambapi* epapupi naima lopo kayao endaki nanu kayao yonge pee koo pyoo kateama doko mee kalyamano. Endakali dupame naima pilyamino. Naima anda yuupi mendenya katakinikini napyoo mendasa katao mendasaka paelyamano. 12 Naimame* nee akipi sambao nao katamana latala naima tangeme kalai lekeleke tao pyoo kalyamano. Endakali dupame naima kandao pii koo lapiminopa Goteme dupa auu pisina lao tee lelyamano. Dupame naima watao pyapiminopa pina lao kaelyamano. 13 Dupame* naima lao koyasipiminopa naimame dupa mona epe palena lao pii epe lamailyamano. Endakali dupa pitakame naima kandao koo aii pyapaena lao masingima. Dupame naima koo etetena lao masiami doko indupa apata dopaka lao masoo kalyamino.
14 Nambame nyakama elya pisoo pii dutupa pepa pyala naelyo. Daa, nyakama nambanya mona setenge wane wanakupi dupa mana langyoo pilyo. 15 Doko,* nyakamame Kataisa minao kalyepale lao akali taosene kingi ita mendeme nyakama setao katatamino kandawapi, nyakamanya takange longo daa. Nambame iki Wai Pii Epe dokome nyakama Kataisa Jisasanya endakali joo kalyepale lao mandeo. 16 Dopana,* nyakama nambame pingili pyoo pyoo kalyepape lao kyoto joo langilyo. 17 Tenge* mendai dokonyaka nambame akali Timoti baa nyakama kalyamino dokonya epena leo. Timoti baa Kamongopa pakatae katenge nambanya mona setenge wane tupi lapae mende. Nambame mana miningipi sosa yuu wakale wakale katenge dupa pitakanya Kataisa Jisasanya lao pii lamaingipi dupa nambame pingili pyoo baame nyakama langyuu nyakamanya masingi deaka sakatasakata.
18 Nambame nyakama kanja naipatena lao masetala nyakamanya yangi mendapuame luiyao kalyamino. 19 Dopa* pilyaminoaka doko, Kamongome ipupili lao masetamo kandao doko, yapa mende namba nyakama katatamisa ipato. Ipupala luiyao kalyamino endakali dupanya pii dupa sala naenya, dupa-kisa pupu lapae aipale singipi lao kandato. 20 Piimi* lenge doko Goteme isingi dokonya mende daa. Pupu lapae doko Goteme isingi dokonya mende. 21 Nyakamame* aipa pipili lao masilyamipi? Nambame kolyepepi mende minao nyakama kalyamino dokonya ipupi laka lao masilyamipi, pande auu kayao andiki pyoo ipupi laka lao masilyamipi?
* 4:1 Lu 12:42-44; Lo 11:25; 16:25; 1 Ko 9:17; Ta 1:7 * 4:4 Wee 143:2; 2 Ko 1:12; 5:10 * 4:5 Mt 7:1; Lu 12:2-3; Jo 5:44; Lo 2:16; 1 Ko 3:8,13; 2 Ko 10:18 * 4:6 Lo 12:3; 1 Ko 1:12,31; 3:4,19-20 * 4:7 Jo 3:27; Lo 12:6; Ga 6:3 * 4:8 Pa 3:17,21 * 4:9 Lo 8:36; 1 Ko 15:31; 2 Ti 3:10-11; Ip 10:33 * 4:9 2 Ko 4:8-12; 6:4-10; 11:23-27 * 4:10 1 Ko 1:18; 2:3; 3:18; 2 Ko 11:19; 13:9 * 4:11 Lo 8:35 * 4:12 Wee 109:28; Mt 5:44; Ap 18:3; 1 Ko 9:14-15; 2 Te 3:8; 1 Pi 3:9 * 4:13 Wee 116:10; J.Ee 3:45 * 4:15 1 Ko 1:30; Ga 4:19; Pm 1:10; 1 Pi 5:13 * 4:16 1 Ko 11:1; Pl 3:17; 1 Te 1:6; 2 Te 3:7 * 4:17 Ap 16:1; 19:22; 1 Ko 7:17; 16:10; Pl 3:19-21 * 4:19 Ap 18:21 * 4:20 1 Ko 2:4 * 4:21 1 Ko 1:23; 10:2
☰