4
Jisasapa Samaita tange enda dokopa
1 Gii dokopa Jisasame Jone ita minao endakali longo kaimbu pyakamaiyoo disaipele injisilyamo lapae doko akali Patasi dupame silyaminona lao Jisasame masia.
2 (Kini, Jisasa tangeme kaimbu pyakamaiya naya. Dopaka doko, baanya disaipele dupame kaimbu pyakamaiyami.)
3 Dopa lapae sepala baame Jutia yuu doko yakinatala Galili yuu dokonya pilyoo pea.
4 Baa kaitini Samatia-kaita pupenge jianya pea.
5 Pupala Samatia yuu dokonya yuu taono Saika lenge dokonya pao pyakamea. Yuu taono doko Jekopeme baanya ikiningi Josepe yuu maiyamo dosa tengesa singi.
6 Yuu dokonya Jekopenya endaki pete tombapae doko singi. Jisasa baa kaitini pao maka kayapala, kotaka andawai pungupungu jiamopa endaki pete tombapae dosa petea.
7-8 Jisasanya disaipele dupa nee sambala taononya pateaminopa Samatia enda mende endaki pete tombapae dokonya kamuala epea-pyaa. Epeamopa Jisasame enda doko lamaiyoo, “Endaki mendatupa natoo kamuoo dii,” lea-pyaa.
9 Dopa leamopa Samaita enda dokome yanu pyao, “Emba Juta dokome aipuma namba Samatia enda dake-kisa endaki tee leepe?” lea-pyaa. (Doko, Juta dupame Samatia dupa wandyuu katengema.)
10 Dopa leamopa Jisasame yanu pyao, “Goteme epe dingi doko masowapi dee endaki tee lelyamo akali doko dokome lelyamo lao masowapi pipili kandao doko, embame baa-kisa tee lapinopa baame emba lete katenge endaki doko dipyalina,” lea-pyaa.
11 Dopa leamopa enda dokome yanu pyao, “Akali Andake, embanya endaki penge nasilyamo. Dee endaki pete tombapae doko koko wakakana, embame endaki lete katenge doko anjatae nyetepe?
12 Naimanya yumbange Jekopeme endaki pete dake naimanya tombekea-pyaa. Baa tangepi baanya ikiningipi dee baanya mena sipisipi akipi dupa endaki dakenya neamiaka-pyaana, embame baa nyoo ana pyandao kalyepe?” lea-pyaa.
13 Dokopa Jisasame yanu pyao enda doko lamaiyoo, “Endaki dakenya natamo endakali doko pitaka dee endaki nanu kayatami.
14 Dopaka doko, endaki nambame maitopa natamo endakali doko tangapi dee nanu nakayata. Doko, nambame endaki maito endakali doko-kisa endaki doko lee kuoo ipao katao baa lete etete katasetana,” lea-pyaa.
15 Dopa leamopa enda dokome baa lamaiyoo, “Akali Andake, namba dee endaki nanu nakayao endaki dee kamuala naipao pitopa embame endaki doko namba dii,” lea-pyaa.
16 Dopa leamopa baame enda doko lamaiyoo, “Embame embanya akalingi doko epena latala ipale puu,” lea-pyaa.
17 Dokopa enda dokome Jisasa lamaiyoo, “Nambanya akali mende nakatengena,” lea-pyaa. Dopa leamopa Jisasame baa lamaiyoo, “ ‘Nambanya akali mende nakatengena,’ leeno doko kini auu pyoo leeno.
18 Wamba emba akali yuungi nyala peena, indupa akali pilyambino doko embanya akalingi daana, embame namba kiningi langilino,” lea-pyaa.
19 Dokopa enda dokome lao pituu, “Akali Andake, nambame emba potopesa mende lamo lao kandelyo.
20 Naima Samatia dupanya yumbange dupame yuu manda dakenya katao Gote lalyoo kateami-pyaa. Dopaka doko, nyakama Juta dupame Jetusaleme dokonya katao lalyepengena lengemana,” lea-pyaa.
21 Dopa leamopa Jisasame baa lamaiyoo, “Enda, embame nambanya pii lelyo dake kiningina masepe: yuu gii mende ipatamo dokopa yuu manda dakenyapi Jetusaleme dokonyapi dolaponya katao Takange Gote lalyala nayatami.
22 Nyakama Samatia dupame masala naelyamino doko lao lalyingima. Naima Juta dupame masilyamano doko lao lalyingi. Doko, pyoo nyingi doko naima Juta dupa-kisa epelyamo.
23 Dopaka doko, yuu gii ipatamo doko indupa epelyamona, kiningi lalyingi endakali dupame Takange lao moname angi lalyetami. Takangeme endakali dopale dupame baa lao lalyipimi laka lao masingi.
24 Gote baa Sipitisana, baa lao lalyetamino dupame moname angi lalyepengena,” lea-pyaa.
25 Dokopa enda dokome baa lamaiyoo, “Kataisa lengema Mesaya doko ipatana lao masilyo. Baa ipatamo dokopa baame dupa pitaka naima langitana,” lea-pyaa.
26 Jisasame enda doko lamaiyoo, “Doko nambana, namba dokopa embapa pii lelyambanona,” lea-pyaa.
27 Dopa lao peteambino dokopaka Jisasanya disaipele dupa ipu piami. Dopa petala baa enda dokopa pii lao pitalambini lamo lao longo pyoo masiami. Dopa lao masiaminoaka doko, dupanya mendaipi mendeme enda doko kandao, “Emba aki setao pitalepe?” lawapi Jisasa kandao, “Aipuma enda dokopa pii lao pitalambipi?” lawapi mende laa nayami.
28-29 Dokopa enda dokome endaki penge doko sina latala yuu taono dokonya pilyoo pupala endakali dokonya kateamino dupa lamaiyoo, “Akali mendeme wamba nambame pio dupa pitaka langyomona, Kataisa tamo nakandenya kanja ipupa,” lea-pyaa.
30 Dopa leamopa dupame yuu taono doko yakinatala Jisasa peteamo dokonya epeami.
31 Dokaita ipatala nayaminopa, disaipele dupame Jisasa lamaiyoo, “Mana Lenge Akali, nee napoko,” leami.
32 Dopa leaminoaka doko, baame dokaita lamaiyoo, “Nambanya nee napenge silyamo dupa nyakamame masala naelyaminona,” lea.
33 Dopa leamopa disaipele dupame nyakamalapo lao pituu, “Mendeme baanya nee manjakamaiyoo ipape?” leami.
34 Dokopa Jisasame dokaita lamaiyoo, “Nambanya nee doko namba puu leamo dokonya masingili pipengepa baanya kalai doko pyoo etasakamaipengepa dolapo.
35 “Nyakamame lao pituu, ‘Kana kitomende patatamo dokopa nee dupa wambu pitana,’ nalengemape? Dopa lengema doko nambame nyakama langilyona, nyakamame ee dupa wambu petelyamona kandayoko lao kanjepape.
36 Nee wambu petae mandyuu mau pingi akali dokome nee dupa tanga tangapi koyala nayatana lao mandyuu mau pyatala baa yole nyilyamo. Dopa petala nee mandyuu mau pingi akali dokopa wai pokenge akali dokopa lapota mona yaepelyambino.
37 Doko, ‘Mendeme nee wai pokenge doko mendeme mandengena,’ lapae singi pii doko kiningi.
38 Nambame nyakamame ee pokala nayamino dupanya nee manja pupa leo. Endakali waka dupame lekeleke tao pokeamino ee dupanya nyakamame pupala nee mandipelyaminona,” lea.
39 Enda dokome Samaita endakali yuu taono dokonya tange dupa lamaiyoo, “Nambame pio dupa pitaka baame langyomona,” leamo dokonya endakali longome Jisasa lao masoo miniami.
40 Dopa petala Samatia endakali dupame Jisasa kateasa ipupala baa nyakama-pipa awapa katamana lao tee leaminosa koto lapoma yuu dokonya katea.
41 Dokopa endakali longomeaka baanya pii doko sepala masoo miniami.
42 Dopa petala dupame enda doko lamaiyoo, “Wamba naimame embanya pii doko sepala baa lao masoo minapumanoaka doko, indupa naima tangeme baanya pii doko sepala kiningi baa yuunya endakali dupanya Pyoo Nyingi Akali doko lamo lao kandelyamanona,” leami.
Jisasame kapomanenya isingi akali mendenya ikiningi nisiamo doko
43 Jisasa koto lapoma yuu dokonya katapala, Galili yuu dokonya pea.
44 Jisasa baa tangeme lao pituu, “Potopesa mende baanya yuu tenge dokonya lalyala naengemana,” lea.
45 Baa pao Galili yuu dokonya pyakameamo dokopa Galili endakali dupame baa taeme ipame lamo lao lanyiami. Doko, Napinya Kayamo Gii epe dokonya dupa Jetusaleme peaminopa, baame kongali piamo dupa pitaka wamba kandeamino dokonya dopa piami.
46 Dopa piaminopa Jisasame Galili yuu dokonya endaki waene jina leamo yuu Kena dokonya dee pea. Yuu dokonya kapomanenya isingi akali mende kateamo dokonya ikiningi doko Kapaneame yuu dokonya yaina sia.
47 Akali dokome Jisasa Jutia yuu doko yakinatala Galili ipupya lapae sepala, baa kateasa ipupala baanya ikiningi kumalanya pyoo siamo doko mee injisakatale, Kapaneame lanamba lao tee lea.
48 Dopa leamopa Jisasame baa lamaiyoo, “Nyakamame kongalipi kalai paka pipaepi mende nakandelyamino kandao doko, masoo minala naengemana,” lea.
49 Dopa leamopa isingi akali dokome Jisasa kandao, “Akali Andake, nambanya wane doko kumatakatana yapa lanape,” lea.
50 Dokopa Jisasame baa lamaiyoo, “Embanya ikiningi doko saka pelyamona emba puu,” lea. Dopa leamopa akali dokome Jisasanya pii doko sepala, dopa pyumuna lao masetala pea.
51 Baa lanao kaitinisa ene peamopa baanya kendemane dupame baa kutao pao kandanyetala lamaiyoo, “Embanya wane doko saka pupyana,” leami-pyaa.
52 Dopa leaminopa baame dokaita pisoo, “Kiloko gii andukunya saka pupyape?” lea-pyaa. Dopa leamopa dokaitame, “Kuaka kotaka kiloko gii mendai dokonya itaita yatu lapyana,” leami-pyaa.
53 Takange dokome Jisasame wane doko saka pelyamona lao lamaiyamo gii doko masiamopa lamaiyamo kiloko gii etete dokonyaka jia-pyaa. Dokopa akali dokopi baanya palu dupa pitakapimi Jisasa lao masoo miniami-pyaa.
54 Jisasame Jutia yuu dokonya katao Galili pupala kongali dokome lapo pyoo pia.