2
Jisasame akali papa tambotae mende mee jina leamo doko
(Mt 9:1-8; Lu 5:17-26)
1 Gii mendatupa pateamopa maitakao Jisasame baa yuu taono Kapaneame dokonya dee pilyia-pyaa. Dokopa baa andaka kalyamo lapae doko siami-pyaa.
2 Sepala dokopa endakali longo ipao kapeaminosa panda nasia-pyaa. Anda kamapi dupanya apata panda nasiaka-pyaa. Dopa piamopa baame dokaita pii lamaiya-pyaa.
3 Baa kateamo dokonya akali papa tambotae mende akali kitomendeme soo epeami-pyaa.
4 Panda tumbiamosa dupame akali doko Jisasa kateamo dosa soo ipupenge nanjia-pyaa. Dopa pianya Jisasa kateamo dosa anda doko tungupala akali papa tambotae doko lapa tokonya paleta isa pyandeami-pyaa.
5 Dokopa Jisasame akali kitomende dokaitanya masoo miniamino doko kandatala, akali papa tambotae doko lamaiyoo, “Wane, embanya koo dupa kunanya nepekelyona,” lea-pyaa.
6-7 Dokonya mana setapae masingi akali mendapua peteamino dupame nyakamanya mona koko masoo pituu, “Baame aipuma dopa lelya kanjemape? Baame Gote kilya kandao lelyamo. Apimi kapa pao koo dupa kunao nepakamailyona latape? Goteme iki kapa pao koo dupa kunao nepakamailyona lapengena,” lao masiami-pyaa.
8 Dopa lao masiamino dokopaka masiamino doko Jisasa baanya moname masetala dokaita lamaiyoo, “Aipuma nyakamame nyakamanya moname dopa lao masilyamipi?
9 Akali papa tambotae dake kandao anduku laa nayapengepe? Akali dakenya koo dupa kunao nepakamailyona lapenge dokope, pande baa sakatatala baanya lapa toko doko nyoo soo kaita pena lapenge dokope?
10 Dopaka doko, Endakalinya Ikiningi dokome isa yuu dakenya katao endakali dupanya koo dupa kunanya nepenge pupu lapae doko baa-kisa singi lamo lao kanjepalena,” lea-pyaa. Dopa latala baame akali papa tambotae dapa lamaiya-pyaa.
11 “Emba sakata! Sakatatala embanya lapa toko doko nyoo soo andaka puu lelyona,” lea-pyaa.
12 Dopa leamo dokopa akali dokome pupae sakatatala endakali dupa pitakanya enomba dokonya baanya lapa toko doko nyoo soo kamanda pea-pyaa. Dopa piamosa endakali dupa pitakame doko kandao mona andapala Gote lao lalyoo, “Wamba naimame opale mende etete nakandeamana,” leami-pyaa.
Jisasame akali Lipai epena leamo doko
(Mt 9:9-13; Lu 5:27-32)
13 Jisasa baa endaki pete lemba dokonya deaka pea-pyaa. Dokopa endakali kambu doko pitaka baa kateamo dokonya epeaminopa baame dokaita mana lamaiya-pyaa.
14 Lamaitala baa kaita pao pituu Aopiasa ikiningi Lipai lenge doko takisa nyingi anda dokonya peteamo kandatala baa lamaiyoo, “Embame namba watao ipu,” lea-pyaa. Dokopa baa sakatatala Jisasa watao pea-pyaa.
15 Maitakao Jisasa baa Lipainya andaka nee nao peteamo dokonya takisa nyingi akalipi mana koo minao paenge longo mendapuame Jisasapi baanya disaipelepi dupa-pipa awapa nee nao peteami-pyaa. Doko, dokaita longome baa watao peami-pyaa.
16 Patasi dupanya mana setapae masingi akali dupame kandeaminopa mana koo minao paenge endakalipi takisa nyingi akalipi dupa-pipa baame nee nao peteanya baanya disaipele dupa pisoo, “Baame takisa nyingi akalipi mana koo minao paenge endakalipi dupa-pipa nee nao pituu kalyamo doko aipuma pilyape?” leami-pyaa.
17 Dopa leamino doko Jisasame sepala dokaita lamaiyoo, “Endakali yaina napingi dupa dokosaa katatasa pupenge nanjilyamo. Endakali yaina pyapae dupa pupenge jilyamo. Nambame endakali tolatae dupa epena laanya naepeo. Endakali mana koo minao paenge dupa epena laanya epeona,” lea-pyaa.
Nee nanenya kaenge dokonya Jisasa pisiamino doko
(Mt 9:14-17; Lu 5:33-39)
18 Jonenya disaipele dupapi akali Patasi dupapi dupame Gote lao masalanya nee nanenya kayapala mee kateami-pyaa. Dopa piaminopa endakali dupame ipao Jisasa pisoo, “Jonenya disaipele dupapi Patasi dupanya disaipele dupapi dupame nee nanenya kayapala mee kalyamino doko, aipuma embanya disaipele dupame nee nanenya kayala naelyamipi?” leami-pyaa.
19 Jisasame dokaita lamaiyoo, “Akali mendeme enda kelyapala watapae pyao baanya kaita miningi dupa-pipa awapa kalyamo gii dokopa baanya kaita miningi dupame nee dokonya nanenya kapa pao kaengemape? Daa, enda kelelyamo akali doko dupa-pipa kalyamo dokopa dupame nee nanenya kapa pao kayala naengema.
20 Dopaka doko, yuu gii mende ipatamo dokopa enda kelenge akali doko dupanya kainanya nyokonyetatamopa dupame nee nanao katatamina,” lea-pyaa.
21 “Endakali mendaipi mendeme lapalapa kangupae enenge mendeme yonge pee wambatae mendenya tii telya dokonya kii pimbala naenge. Endakali mendeme dopa pitamo kandao doko, enenge doko inungunyetala wambatae doko kangutamopa tii andake tata.
22 Dee endakali mendaipi mendeme waene enenge doko mena meme yanungimi penge wasepae wambatae dupanya kambuoo pisala naenge. Mendeme dopa pitamo kandao doko, waene dokome bolo lapala penge dupa polata. Dopa pitamopa waenepa pengepa lapota koyata. Dopaka doko, waene enenge doko penge enengenyaka pisepengena,” Jisasame lea-pyaa.
Sambasa giinya kalai pimape napimape lao pisiamino doko
(Mt 12:1-8; Lu 6:1-5)
23 Jisasa baa Sambasa gii mendenya wiisa ee kaina mendenya kaita peamopa, baanya disaipele dupame baa-pipa awapa pao pituu wiisa dii dupa kii lao nyepa nyepapyoo peami-pyaa.
24 Dopa piaminopa, Patasi dupame baa lamaiyoo, “Kanau! Sambasa gii dokonya daa latae singi mana doko aipuma akali dakaitame minilyamipi?” leami-pyaa.
25-26 Dokopa Jisasame dokaita lamaiyoo, “Dapitimi piamo doko nyakamame pepanya itaki napiamipi? Wamba akali Apayata doko pitisa mupa joo kateamo dokopa Dapitipi baa-pipa awapa kateamino akali dupapi nee daa jiamosa lopo kayapala Dapitimi Gotenya losuu anda dokonya kolandatala betesa Gotenya lao setapae pitisa dupame iki napenge dupa nyepala baa-pipa awapa kateamino dupa maiyoo nea-pyaana,” lea-pyaa.
27 Dopa latala baame dokaita dee lamaiyoo, “Goteme endakali lao masetala Sambasa gii doko setea-pyaa. Sambasa gii doko lao masetala endakali wapuala naya-pyaa.
28 Tenge dokonya, Endakalinya Ikiningi dokome Sambasa gii doko apata isoo kalyamoakana,” Jisasame lea-pyaa.