10
Udia nii fisimabiola säi
(Madiu 19.1-12, Ulugu 16.18)
Yesuea amala säha nelolahilä, sege amo dïgïla awäla Yudia segea besela galala ödä Yodona dëgëla alömodi asi. Udia dolö yafie e neebea ami mafula bu gegedosebegi, hï hamolo amo gadola ilima ado mala säla olelesa nelo. Amala olelesa nebegi, Felesi dolö odoa e neebea ami maalahilä, Yesuma fedogola nabahalea. Mala säla negei dibe ameada dolö afädëa udia nii fisimolöi galeala säla negeida dialealela nabi. Amala nabasebegi, ea ilima säla obëgësalea, Moseseada dilima edo hamomalola säla negei dialeala nabi. Ilia säla obëgësalea, Mosesea säla negesaleada, Dolöea udia fisisaleada, beba dëdëla ïalahilä, fisimolöi galeala säla negei dialeala säla obëgëi. Yesuea ilima säla obëgësalea, Moseseada dilile iso asigi geloi dibe amo bealahilä dilima amala säla dëdëla negeimelë. Godea siiba nelebo sulubadela mi gäwila hamosolo amo gala, udia dolöle hamoi. Amala hamoi ameada, dolöea ïe eedole emele dïgïla, ïe udiabalä gedola nea, eleda domalo afädëfalï namolömelë. Amo gadola ele äudä nelo amo fisila afädëfalï nea. Godea gedolasi amoda dolöea mogemabiola säi.
10 Hobeala ïe bëgëla aulolali mosöa obëgëla awäla sefolalea, ïe bëgëla aulo amolia ado säi amoïe ema mi fädäla nabi. 11 Amala nabasebegi, ea ilima säla obëgësalea, Dolö afädëa hïle udia fisila udia elö neaseda, ea udia amo fa susugu hamomolömelë. 12 Udia afädëa ïe dolö fisila dolö elöma fiseda, dolö amo ea fa susugu hamomolömelëla säi.
Yesuea malësäma obeägïsa nelo
(Madiu 19.13-15, Ulugu 18.15-17)
13 Udia dolö odoa nefolalo amolia, ilile malö Yesuïe naaboea diigimäia e neebea sigi maasebegi, ïe bëgëla aulo amolia ilima nemoi. 14 Amala hamosebe amo bealahilä Yesuea ilima habobalahilä sähalea, Malësä ne neebea maase goli misiäia, nemola dofogamabu. Godea Beaha Maadela Sigi Neebea amida malësä go gadoi nefolalebe amolile dialea. 15 Na dilima dofä gelola sähago. Godea Beaha Maadela Sigi Neebea ami malësä go ili gadoia moholöila helësëi neebe amo gadola, afädë ne moholöila made helësëi neebe amoda dofä made nogila digamolömelëla säi. 16 Amala sälahilä ea malësä amoli sogobala gaula nea naaboea diigisalea, Gode dia ugila negemalola säla fisiga idodogosa nelo.
Dolö nelegei yafie negelo afädëa Yesuma nabi
(Madiu 19.16-30, Ulugu 18.18-30)
17 Yesu e moholö awäha nebegi, dolö afädë baluluia maala, ïe emo mia gumusula dia idogolahilä sähalea, Säla Olelelo hedabi-e, ne namolöi namolö neala gaumolöïe abilia hamomolödula nabi. 18 Amala nabasebegi, Yesuea ema säla obëgësalea, Dia nema hedabila säi amoda edoïe. Afädë hedabi maademelë, Gode emu hedabi nea. 19 Ado säla negei dibe amolida dia dawadigi. Baagomäia nufuabio, udia fa nimabio, nelegei fa nimabio, wäfalï säsäla gudimabio, dahila neala elöïe nelegei dibe amo nimabio, dïe diado diemelele ado nabala hamomalola säla negei dialeala säla ï. 20 Amala säsebegi, ea Yesuma säla obëgësalea, Säla Olelelo-o, ado amolida ne malësägila hamosa maadeimelëla säi. 21 Amala säsebegi, Yesuea dolö amo boba hamolahilä, ema siila nea sähalea, Afädëmu dofea made nebego. Dïe nelegei dibe amo bidi neaha maademolö mosö. Amalahilä muni nease amoda nelegei made negelo busadäoi neebe amoligali ïmalo. Amala hamoseda, selesaia mosöa bidi edefade nimolömelë. Amalahilä ne bëgëla misialola säi. 22 Dolö amea ea säi amo nabala yöla ïe odagi augia idalahilä asi. Mida, ïe nelegei yafie dilo amogi.
23 Amasebegi Yesuea ïe bëgëla aulo nefolalebeadi sidawewela bealahilä sähalea, Udia dolö nelegei yafie negelo nefolalebe amolida Godea Beaha Maadela Sigi Neebea ami moholö häuai bimolömelëla säi. 24 Ea amala säsebegi ïe bëgëla aulo amolia fudugi. Yesuea ilima aso bu elö sähalea, Nïe malöla dili-e! Godea Beaha Maadela Sigi Neebea ami moholöda häuai galeamelë. 25 Sugua gameleda nusi galabagi nogila moholö ulï amo gadola, nelegei yafie negelo dafidilo dolö nefolalebe amolida, Godea Beaha Maadela Sigi Neebea ami moholö häuai bimolömelëla säla ï. 26 Amala säsebegi, ïe bëgëla aulo amolia edefademalä fudugilahilä hilidomu didiähalea, Namolöi namolö nowëa neala gaumolödula säi. 27 Amala säsebegi, Yesuea ilima siila nea sähalea, Udia dolöea hamomolöi made amoda. Godea hamomolöi madeda maade, ea sulubadela hamosa maademolöi neamelëla säi.
28 Amala säsebegi, Fidaea ema säla obëgësalea, Hä bimo. Nilïada nelebo sulubadela fisisa maadelahilä di bëgëla misimelëla säi. 29 Amala säsebegi Yesuea ilima sähalea, Na dilima dofä gelola sähago. Afädëa nemage, Ado Mala Hedabimage helësëlahilä, mosöge, edooge, elefige, emege, eedoge, malöge, segege, fisisa maadelahilä, 30 hädali afädë nimolömelë. Ili nagadaiawi nebegi Godea nelebo yafie dafidi ï amo baagila awäla ïmolömelë. Mosö yafiege, edoo yafiege, elefi yafiege, eme yafiege, sagai yafiege, segege, ilia yafie nimolömelë. Amase odoaeage e neala sëlasimolömelë. Hobeala segeyo afädë besela galasolo amo gala ea namolöi namolö gaula namolömelë. 31 Yafie dafidila nefolalebe amolida neala hobeahalea, hobeala nefolalebe amolida neala dafidimolömelëla säla ï.
Yesu e baagola nowemolömelëla bu osoda säi
(Madiu 20.17-19, Ulugu 18.31-34)
32 Yesula ïe bëgëla aulolali Yalusaleme aulo idigi awähalea, Yesu e, edale dafidi awäsebegi ïe bëgëla aulo amoli hobeala awähalea fudugila aligila aligi asi. Udia dolö odoa hobeafalï awäha nelo amoliage bedäla aligi asi. Yesuea ïe bëgëla aulo giwilasi amoli bu sigi aliga galahilä ema hobea hamomolö amoïe ado 33 säla ïahalea, Nabualo. Walio nilï Yalusaleme awähamelë. Dolöïe Malö amo gobela ïlo busa amolimage, ado säla negei dawadigi amolimage ilia e gaula ïmolömelë. Ilia ebalä gudila baagomäia nufulömelëla didiäla daialahilä, fii odoagali gaula ïmolömelë. 34 Dolö amolia ema gofedela galala digi, ëfë damuia nufudalahilä baagomäia nufulömelë. Amala hamoseda, segeyo osodagi hï nowela moholömelëla säla ï.
Yamese Yonelea dafidilo namolöïe hogoi
(Madiu 20.20-28)
35 Sebediïe malö Yamese Yonele Yesu neebea maalahilä elea ema sähalea, Säla Olelelo-o, alïa helësësewe gadoi dia alïma hamomäia hamesamelëla säla ï. 36 Amala säsebegi, ea elema säla obëgësalea, Na alima edo hamomäia helësësebela nabi. 37 Amala nabasebegi, elea ema säla obëgësalea, Dïe yo digalo hïdo elöibalä fisolo amo gala elöda dïe naabo dafädimadi, elöda dïe naabo fefeädimadi fimalola sämäia helësësamelëla säla ï. 38 Amala säsebegi, Yesuea elema sähalea, Ado säi amoda alia helësëla made nea säimelë. Na ödä iigi usi naha neebewegi alia molöi gabule. Ma, ne ödägi gesa neebewegi ali gemolöi gabulela nabi. 39 Amala nabasebegi, elea ema säla obëgësalea, Alïa amala hamomolöi neawela säi. Amala säsebegi, Yesuea elema sähalea, Na ödä iigi usi nasewe gadola aliage molömelë. Ne ödägi gesewe gadola alige gemolömelë. 40 Gaso, ali elö di nïe naabo dafädimadi, elö di nïe naabo fefeädimadila samiäia memelemolöda nïe mademelë. Godea fimäiala daiai amolilemelëla säla ï. 41 Bëgëla aulo nabülasi odoa amolia elea ado säi amo nabalahilä elema habobaha nelo. 42 Amasebegi, Yesuea ili mofiamolahilä ilima sähalea, Fii odoa beaha aligilo gadoi neebe amoliada, udia dolö gelola beaha aligilo nea, amase, ilile ëi sälo neebe amoliada udia dolö bobasëla made, ilia säse amo gadola hamomäia gelola sigi aligilo amoda dilia dawa. 43 Ilia amala hamolo amo gadola, dili nebegogi afädëa amala hamomolöi mademelë. Dili nebegogi afädëa ëi sälo namolöila helësëseda, odoa neebe amoligalimu hamoi hamolasilo namolöi dialea. 44 Afädëa e dafidilo namolöila helësëseda, ea udia dolö sulubadelaïe galabaia hamoi gadoi hamolasilo namolöi galea. 45 Mida, Udia dolöea Dolöïe Malö misi amo egali hamoi hamolasimäia made misi. Ea ilile hamoi hamolasimäiage, ïe namolö amo udia dolö yafiegali fisiga gala, ili sigi obëgëmolöge misimelëla säi.
Yesuea Badimasa si golai wahi
(Madiu 20.29-34, Ulugu 18.35-43)
46 Yesula ïe bëgëla aulolali afiala Yaligo gaamugi besela galai. Besela galala ïe bëgëla auloge udia dolö yafie odoage ebalä Yaligo baagila awäha dilo. Dolö si golai afädë idi agesua ami sulo. Eada muni ïmola ëdëgësa filo. Dolö amoda Dimasaïe malö Badimasa. 47 E amala salea Nasalese dolö Yesu maahala säi amo nabalahilä, ea uuala sähalea, Debidiïe malö Yesu-o, ne bobasëmola säi. 48 Amala säsebegi, udia dolö yafiea ema nemosalea, Dia adomabula säi gaso, ea bu gelola uuala nea sähalea, Debidiïe malö-o, ne bobasëmola sähamu nelo. 49 Ea Amala säsebegi, Yesu ea beaha nea sähalea, E misialamola säi. Amala säsebegi, ilia dolö si golai amoma sähalea, Ea di wesebego, asigia gelola nowemola säi. 50 Ea fagulo afädë salugala sulo amo gila sadia galahilä fodolofalï nowela Yesu neebea misi. 51 Maasebegi, Yesuea ema nabahalea, Na dima edo hamomäia helësësebela nabi. Amala nabasebegi, dolö si golai amea ema säla obëgësalea. Säla Olelelo-o, na bimolö helësësebela säi. 52 Amala säsebegi, Yesuea ema sähalea, Dihï asigi afädë negei amea dïe si wahigomelë. Hä mosalola säi. Amala säsebegi, dolö amo fodolofalï wahila siia fädäla bealahilä, Yesu bëgëla asi.