4
Yesuea ado besula, molö gägä fëfëila säi
1 Yesuea Galili oeabo agesua nea udia dolöma ado mala bu säla olelesa nelo. Udia dolö yafie gegedoi amea negegisebegi, du ödä daia dilo, amodaia Yesu e fila fedai. Udia dolö yafie gedoi amolida agesua nefolalo.
2 Yesuea ado besu yafie ilima olelesalea säi amoda gowe.
3 Nabuö! Dolö afädëa gägä sagaido sadia gogola aligi asi.
4 Sadia gogola aligi awäha nebegi, gägä odoa idiafa daala negei amo haea maala, neala naha maadei.
5 Gägä odoa igi naga abelëidaia daala negelahilä, gägä amea naga abelëi amodaia fodolofalï bäui.
6 Bäui gaso, eso neea hëgïsalea difi moholö asusugala ödölola bausoi.
7 Amase, gägä odoa äyo gägäi neebea ami digai. Amoda äyo gägäi amobalä gegedola bäui amea widi gägä amo yau hahalea gägä made negei.
8 Gägä odoa naga hedabi dibea ami daala negei ameada, hedabola bäulahilä gägä negeimelë. Odoaeada gägä nabülasi ohodoa negei. Odoaeada nabülasi gafeia negei. Odoaeada nabülasi emu nabülasi negeimelëla säi.
9 Amala sälahilä Yesuea säla wagala sähalea, Dili gëhea galea galëda nabuöla säi.
Ado besula sämolö mi dibegi säi
(Madiu 13.10-17, Ulugu 8.9-10)
10 Udia dolö yafie afiaha maadeibua e bëgëla aulo giwilasi amola udia dolö odoa Yesubalä nefolalo amola ilia ea ado besula säi amoïe ema mi nabi.
11 Amala nabasebegi, Yesuea ilima säla obëgësalea, Godea Beaha Maadela Sigi Neebe amo helësëmolö amoda dafidi ulufadigila made musügä negei dilo amo dilia helësëmäia säla ï amomelë. Be udia dolö segea nefolalebe amolimada ado besulamu säla ïaha neebeweïe
12 Mida.
Ilia siia beahamu nea gaso, dofä gowe gabula made beagolemolömelë. Ilia gëhea nabahamu nea gaso, asigia mi gowe gabula made helësëmolömelë. Ilia beagolela helësësa galebeda, ili asigi besusa maadesegi ilia nafade hamoi amo Godea hësa maadelabiola
säla ï. Aisaea 6.9,10
Ado besula säi amoïe bu awala säi
(Madiu 13.18-23, Ulugu 8.11-15)
13 Yesuea ïe bëgëla aulo amolima sähalea, Ado besula säi amoïe mi fädäla made helësëi neale. Made helësëi nea galëda, ado odoa besula säse amo sulubadela abilia helësëmolö gabu.
14 Dolö amea hawa fëfëi amo gadolada ado mala fëfëlo dolö e nea.
15 Ado mala idiafa digai amo gadoida, udia dolö odoaea ado mala nabasebegi, Godea ilile isogi ado mala sagasi amo, mugabe Saidani maala fodolofalï neala gaula aulo nea.
16 Amase, udia dolö odoa widi gägä igi naga abelëidaia digai amo gadoi neebe amoliada, ado mala obeägïla nabalahilä fodolofalï neala gaulo.
17 Amai gaso, ili difi moholö ulïsalea sedade made aligilo. Amalahilä ilia ado mala neala gaui amoïe yöi beasege, odoaea ili neala sëlasisege, ilia fodolofalï dïgïla aulomelë.
18 Udia dolö odoa giisi äyo gägäi damui fedaha dibea daala negei amo gadoi neebe amoliada ado mala nabalahilä gaso,
19 ilia nagadaia galu difolalebe amoligi säosäola helësëlahilä, muni edefade negemolöila, nelebo elö elöla gesami awäla helësëse amea, ado mala nabi amo yau hahalea gägä negelo made nea.
20 Gaso, udia dolö odoa naga hedabia molö gägä daala negei amo gadoi neebe amoliada, ado mala nabala asigi afädë negela neala gaulahilä, ilia gägä nabülasi ohodoa negela digi, nabülasi gafeia negela digi, nabülasi emu nabülasi negela digilo neamelëla säi.
Gamaliïe ado säi
(Ulugu 8.16-18)
21 Amala sälahilä Yesuea ïe bëgëla aulo amolima sähalea, Afädëa gamali yola sagaseda faloea dabelole ma, imidi hawa negelole. Ai amala made hamolo, aulidaia negelomelë.
22 Nelebo musügä negei dibe amoda hobeala ulufadigisa maadela, udia dolöea nelebo dabela negei difolalebe amolida hobeala yo digai dibea ami ulufadigisa maademolömelë.
23 Afädëa di gëhe galea galëda, nabualola säi.
24 Ea aso ilima sähamu neamu sähalea, Ado dilia nabi amoda hedabola helësëmalo. Dilia odoagali mogela ïaseda, Godeage amo gadola wäla diligali mogela ïahalea odoage baala ïmolömelë.
25 Afädëa nelebo afädë gaula neebe amomada Godea odoa baala ïmolömelë. Afädëa nelebo afädë gaula made neebe amoda, ea holöfalï gaula nea dofe gaula neala neebe amolida, Gode hï fedela nimolömelëla säi.
Molö sagai bäulo amoïe ado säi
26 Yesuea ado aso sähamu nea sähalea, Godea Beaha Maadela Sigi Neebe amoda gowe gadoi dialea. Dolö afädëa sagaido hawa fëfëla aligi awäha nelolahilä,
27 gasi sulubadelagi dolö amo daiala, yose nowela afu mafusa neë gaalu, hawa fëfëi amo duulu besela galala bäuse amoda gomalä bäusebela dolö amo hïda dawa made aligilo.
28 Nagaea bäulasila gägä negelomelë. Dafidida bäudale bobagila, hobeala mumusu negelomelë. Hobeafalï hodo hï e gägä negelomelë.
29 Molö amo nimolö galëda, dolö amo hï damulo. Mida, molö mumului nimolö segeyo besela galai amea.
Ado besula masada gägäïe säi
(Madiu 13.31-32,34, Ulugu 13.18-19)
30 Yesuea aso sähamu nea sähalea, Godea Beaha Maadela Sigi Neebe amo, nilïa abodo gadoila sämolödu. Ado besula nilïa abodo gadoima oodo beala sämolödu.
31 Amoda masada gägä gadoi. Gägä odoa gadoi made. Gägä amoda holöfalïfalï. Ilia amo sagaia sagalomelë.
32 Ilia sagai amo fedala edefadela aligiseda dägöala sagai odoa amo baagila awäla bäulomelë. Ïe adomo edefade bafui amogida haea mafula bäu augi hawa ami mosö olelomelëla säi.
33 Udia dolö amolile asigia helësëseda helësëmäia Yesuea ado mala säla ïahaleada, ado besulamu yafie säla ïaha nelo.
34 Ea udia dolöma ado mala säla ïahaleada, ulufala made säla ïala, ado besulamu säla ïaha nelo. Ïe bëgëla aulolali hilidomu neada, ea ado besula säla ïlo amoïe mi sulubadela ilima säla ïaha maadei.
Yesuea fo ödälebalä adoi
(Madiu 8.23-27, Ulugu 8.22-25)
35 Segeyo amo gala deadi eso digase gaalu, Yesuea ïe bëgëla aulo amolima sähalea, Oeabo edefade goïe agesu alogodigogi afiadila säi.
36 Amala sälahilä udia dolö yafie nefolalo amoli amilahilä, ili Yesu sulo du amodaia fila fedalahilä, eege hiligila fila afiai. Du odoage ili awäse amo gadola hobeala bëgëla afiai.
37 Afiaha dibegi, fo edefade gelola guula maalahilä oeabo bubolela aidagula dudaia häila digala, du nobamolö hamose melï.
38 Amala hamose amo gaalu, Yesu eda du bidigi busa fugulo negela adi dilo. Amala adi dibegi ilia e didiigisalea sähalea, Säla Olelelo-o, di nowemo. Nilï baagodelä hamosebe gowegi di holöfalï fudugila made dialealela säi.
39 Amala säsebegi, Yesu e nowelahilä foma nemolahilä ödäma sähalea, Aeala aumamo. Fologomabula säi. Amala säi amole fo gelola misi amo boogelela ödä aidagula fedai amoge aumalasi.
40 Ea ïe bëgëla aulo ilima nabahalea, Edogi bedäha dialea. Dili Godema asigi afädë negei made nealela nabi.
41 Amala usila aumase amo beala, ili edefademalä bedälahilä hilidomu sähalea, Fo elea ödä eleada ïe ado nabelo gabu. Dolö weda nowëdula säha difolalo.