11
Dolö äudäea ado säla ulufai
1 Amalahilä, afädëa nelebo dofe melëlo i gili gadoi afädë nema ïahalea sähalea, Di nowela Godeïe mosöge, odala ïlo aulige, dofe nealahilä, udia dolöea mosöa ami Godeïe ëi gauia adalo nefolalebe amolile näbage nidela nimalo.
2 Be, mosö amoïe yala baagido gedosia segeamadida, dofe nimabio. Mida, sege amoda, udia dolö fii odoagali ï dialea. Amoli maalahilä, gaamu Godea hïle nafolai dibe amo aube nabülasi biyidiaïe odoai äudägi emesala nolealesa namolömelë.
3 Amaha neëgi, na nïe säla ulufalo dolö äudä amolema gelolasiseda, elea bobasëi fagulo salugalahilä bea säha nea, segeyo dausini afädëïe hädali äudäïe nabülasi gafeiagi, bea säha namolömelëla säsio.
4 Dolö äudä amole gadoida, i olibe äudä amolege, elamu i äudä amolege, sege föi dibe amoïe Dafidilo Geloi neebe amoïe odagia nowela aligilo nea.
5 Amase, afädëa ele neala nafademolö helësëse amoda, elele nafiadila nulo söa doadigila maasebe amea, elebalä ado nease amoda, naha maademolömelë. Ele neala nafademolö helësëse amolida, amo gadola wäla baagomäia nufulö dialea.
6 Elea bea säla säha neëgi, sege made digamäia, mu gala digilo geloi gaula nea. Amase, ödä sulubadela heale uula besela galamäia geloige, nagadaia udia dolö nefolalebe amolima neala nafadelasilo geloi elö elöla besela galamäia geloige, elea gaula nea. Elea amala hamomolö helësëse amo gadola hamomolöïe, geloi gaula nea.
7 Elea, hä, Godeïe ado säla ulufaha maadeseda, sugua ilaba sege uli nafade mia made dibea amila doadigila fedase amea, elebalä nudula salolela baagila moholömelë.
8 Amala hamoseda, elele domalo amoda, gaamu ilibia edefade amoïe aulo idiafa negesimolömelë. Gaamu amoïe ëi oodo bealada, Sodomo Isibila sämolöi dialea, elele Dafidilo Geloi i fügäigi baala negeia amimelë.
9 Segeyo ohodoa nelolahilä, biyidugi nofela, udia dolö gädili elögi elögilaeage, fii elögi elögilaeage, ado sälo elögi elögilaeage, gafodo elö elöiage, elele domalo memelelahilä, made baumäiala säla dofogamolömelë.
10 Nagadaia udia dolöea ele baagoi amogi obeägïla, gosahalea molö nadigi, ilile damelëgali galu ïadigisa namolömelë. Mida, bea sälo äudä amolea nagadaia udia dolö amoli së ïaha nelo amogi.
11 Gaso, segeyo ohodoa nelolahilä, biyidugi nofela, Godea namolö hame amo elele isogi bu negela obëgësebegi, ele nowela neebeo. Udia dolöea ele beahalea, edefademalä bedäsio.
12 Amala hamosebegi, bea sälo äudä amolema selesaia mosöala ado gelola säia idogosalea, Ali yawe fedamola säse nabi. Amala säse amo gaalu, ado nii nefolalo amolia ele siila beaha nebegimu, ele mu baidili gegoala Hebeni fedasio.
13 Amala fedai amole, fogoli edefademalä maahalea, gaamu amogi mosö sëgëlasida amilahilä, nabü amo mugulula digaha maadesalea, udia dolö dausini gifalädalïa nufudaha maadesio. Udia dolö odoa nefolalo amolia edefademalä bedäla, Gode Hebeni neebe amoïe ëi gauia adasio.
14 Yöi edefade agedu amoda, hä, wagai. Gaso, nabuö! Yöi edefade osoda moholö amoda, hä, ga made gabumelë.
Selesaia fii gifalädalü amea melo biguli amo fuusio
15 Selesaia fii gifalädalü amea melo biguli amo fuusebegi, selesaia mosöa odoaea ado gelola sähalea,
Sege föi sulubadelaïe beaha aligilo gini namolö geloi amoda, walio nilïle Dafidilo Geloile, ïe Afädë Memelei amolele geloi besela galai nea.
Hä, ea beaha aligilo gini namolöi namolömelëla
säsio.
16 Amala säse amo gaalu, dolö asigi gäwi dafidilo nabülasi äudäïe odoai biyidia amolile sigi aligilo filodaia Godeïe odagido filo amolia gumusula dia didigafulahilä, Godeïe ëi gauia adogola
17 sähalea,
Dafidilo Geloi Gode, Sulubadelaïe Geloifalï Geloi nebego,
walio nebegoge, siiba nelo amoge,
dia dïe geloi edefade amo neala gaulahilä, beaha namolö mi gäwisebegogi, nilïa dima nesegesa.
18 Udia dolö di helësëlo made nefolalebe amolia mihaläi nelo gaso, dïe mihaläloda, misi dialea.
Baagoi amoli mogemolö segeyo amoge, misi dialea.
Dïe hamoi hamolasilo bea sälo amolimage,
dïe udia dolö amolimage,
ëi sälo dibalä bedälo amolimage,
ëi sälo made, dibalä bedälo amolimage,
bidi ïmolö segeyo amoge, misi dialea.
Amase, sege föi nafadelo amoli nafademolö segeyo amoge misi dialeamelëla
säha dibeo.
19 Amala säsebegi, Hebeni gadogo Godeïe mosö doga negelahilä, ïe asialo made ado säi bogosigi sali dibe amoda, mosö isogi ulufai dibeo. Amase, sege yabagelelage, goba hïdo elöige, hahalä edefade dagabolage, fogoli afädëge maala, sege gägä yafiege digalala, amoli sulubadela hamosa aligisio.